▪ Rogo gu kekeapai re, ani awiriki gupai nga pai ho sa nga gu aboro dunduko agbiatiyo na ni nga: pa ziasi rimo Yekova. Singia aboro idi kuti ni watadu i aidanga kuti te, ga Yekova zogarago ngba kisusi mbiko si na ngbanya dagbaha na pa ziasi rimo ko. Wakina gure a, singia boro nye niruru ni fu Mbori watadu ni anyenga te, si na kina ngbanya a dagbaha na pa gu nyanyakipa pai nga ga ziasi rimo Yekova.

Tipagine ani anyakasa pa gu nyanyakipa pai ti ni du tipa rimo Yekova na pa ziasihe? Ani bingo andu apai biata.

Ni bambataha, Satana azubo rimo Yekova, ati Edene yo. Gu sanahe Satana asana Eva na ni aayugo gupai nga Yekova nga boro gamahe te na agu arugapai ko afuhe fu Adamu na Eva aarunga te. Sidu, Satana ape gupai nadu kia ti gu Yekova apehe, ko ape gupai nzunzu nga Mbori nga iraziree. Sidu, ko agumba kere ziree kuti rimo Yekova. Ko ada ni “Bakitingbanga,” du rogoyo nga “bape ziree.” (Yo. 8:44) Mbiko gupai nga Eva aima ida kuti ga Satana aziree, ri abasasangba Mbori na ki samungu kuti gako bakere pagbia. (Bam. P. 3:1-6) Satana nandu kindi kumbatayo kaa pe ziree tipa gu ngbatunga boro nga Yekova. Agu aboro naida kuti agu aziree re ima rengba ka basasangba Yekova. Sidu, fu ga Mbori aboro, gu kere ziree Satana apehe kuti ziazia rimo Yekova nga kere irairapai. Si du nga ndu gupai du arungo gbiati gbegberẽ mangaapai ti ni rogo zegino.

Uepai nga, tipa gupai nga aboro dunduko gbiati amaraika gbia undo, Yekova nika ziasi rimoko aziasi, ki girisihe ti gu gbegberẽ apai dunduko i napehe kutini. Gipai re na nyanyakipaha gbe fu Yekova. Si du nga ndu gupai ko aya ti ni we: “Mi ki kpara bakere rimore ni ziazia ha.” (Yeze. 36:23) Na Yesu aima yugo gupai ziazia si aida si du ni nyanyakipa pai rogo agu akparakpee yo nga ga ga Yekova ruru amoyambu dunduko ho ko aya ni we: “Ani írisi rimoro airisa” watadu ani ziasi rimoro aziasi. (Mt. 6:9) Baibiri na dogoda pa nyakapa taasa rimo Yekova. Ani bingo bete akpiapai: “Oni fú taarimo fu Yekova a wa rengbe he na rimoko.” (1 Peka 16:29; Tam. 96:8) “Oni bi bia taarimoko ku ari.” (Tam. 66:2) “Mi ataasa rimoro nye anye kindi.” (Tam. 86:12) Gu kura regbo sa dagba agu aregbo yo Yekova afura ngbangbaturũ yo ti ni adu yekaru yo Yerusarema yo, yo Yesu aya ni we: “Buba, mo táasi rimoro.” Na Yekova ki karagaha nga: “Mi taasi he, mi atáasa ha ataasa berewe a.”—Yo. 12:28. a

Biata pai nga, ga Yekova ringbisapai ti aregbo dunduko na ngbanya dagbaha na rimoko. Oni bingo wai pa nyakapa rimo Yekova nika du tifuo yangara asada ti digido ga Kristo Zogarago Tipa Agarã Kutu. Gini bipai amaraika dunduko gbiati aboro nika du na ni tipa rimo Yekova ti gu regbo re? Ti gu regbo re, si aidanga gupai berewe nga aboro yugo gayo padu ni ruruse te. I nika du ni rengberengbe yo na i nika asada yo rogo  apai yo dunduko. I nika gbia nyenye unga. Ya mo aboro nikaa sakapai kindi tipa ga Yekova bakere pagbia na si kini ye na kparakaro ku dagba aboro na amaraika? Ndupai adu nga ho tipa ka yugoho singia ga Yekova gene zogarago ngba kisusi te. Ti gu regbo re, amaraika ngbangbaturũ yo dunduko na aboro auru kpotosende nika du ni kodikodi yo na ki idi kuti ga Yekova zogarago. Ono ya mo rimo Yekova nika du kindi na nyanyakipaha kisusi ti gu regbo re fu gako aboro?

Ti gu regbo re, aboro dunduko nika ino gu rengo du tipa rimo Yekova na rimoko nika du ni ziasiziasi he ti ai ziree. Rimo Yekova nikaa ndu kumbatayo kindi kaa du ni nyanyakipa pai kisusi fu aboro dunduko. Tipagine? Mbiko i nika bi Yekova ko nindu kumbatayo kindi kaa manga weneapai. Oni bingo gipai re: Mbiko gupai nga Yesu nika fu pa zogarago dunduko fu Yekova, Mbori nika “du adu mbata yo fu ahe dunduko.” (1 Kor. 15:28) Tifuo gure, aboro auru kpotosende nika gbia ngbarago ti, “gu taarimo nga ga awiri Mbori.” (Rom. 8:21) Na fuo gure, Yekova nika digiso gako ringbisapai nga ga koda agu awiriko du ngbangbaturũ yo na aguyo nika du auru kpotosende i du ni aborokporo sa ni kodikodi yo.—Ef. 1:10.

Waigu agu apai re nika du na maapai kurii gu ga Yekova aborokporo du ngbangbaturũ yo na auru kpotosende? Ni rengo, ani nika du kindi na bakere nyemu ka taasa rimo Yekova. Ga Mbori toro adu kugii gu bake atambuahe nangia Davide ko ke gupai nga: “Yekova nga Mbori dú ni sambuasambua ko . . . I sambua rimoko du ni taasitaasi he nye anye kindi.” (Tam. 72:18, 19) Ani nikaa ndu kindi kumbatayo kaa bi vovo nduapai nga gu nika du ni pa ngbarago tipa kaa taasa rimoko nyeanye kindi.

Rimo Yekova narukuba agu apai dunduko du tipa ko. Ho ani aberãpa rimo Yekova ni, ani naberãpa gako nyemuse. (1 Yo. 4:8) Ani nikaa tingida gupai ti aregbo dunduko nga Yekova akusi rani mbiko nyemuse, ko afu motumo tumorii furani mbiko nyemuse, na ko nayugo padu gako gene zogarago nga si du ni ruruhe mbiko nyemuse. Ono ani nikaa ndu kindi kumbatayo kaa bi wai Yekova nikaa yugo nyemuse furani nyeanye kindi. Ani nikaa mbeda gbe na ko wa ngia ko Barani na kini bi bia taarimo tipa wene rimoko nyeanye kindi.—Tam. 73:28.