1. Uḍighi ika kụ yira rosereghiạn ghan bọ we dị roḍeenhaan ghan okparạm?

 YIRA rosereghiạn ghan ni we dị roḍeenhaan ghan okparạm. Ii, yira rolọgh ghan ni eegu we dị kotue okori esi eedoọny amem dị olhoghi u/kạgh. Yira rosereghiạn ghan ni bulọ ruḍeenhaan ghan iyira okparạm mem dị yira opiomạn. Kụ yira oḅilhẹ kẹn ni rosereghiạn ghan buphẹ utughemhị bọ iyira Baibul phọ loor okparạm mọ bidị uḍeenhaan ghan bọ iyira iduọn yira rokparaghạ bọ otuughạ r’osighẹ oḍighinhom ipẹ yira rotuughạ bọ. Idị epelhom oomo phọ iphẹn phọ, yira okạr kụ rosẹph aZihova Enhaạn phọ ayira ruḍeenhaan ghan bọ iyira okparạm!—Rom. 2:4.

2. Ighẹn asidọl kụ ketue edẹgh epogh okparạm mọ ayira?

² Ghalhamọ r’iduọn yira rosereghiạn ghan bọ ni we dị roḍeenhaan ghan okparạm, rikparanhaạn ghan ni iyira r’aloor okparạm. Esi omaạm, rikparanhaạn ghan ni iyira okori abunhọn mem dị yira roogborion oghị esi. Yira otue ni okaghạm olhoghi we dị oḍighi iyaạr dị repin esi ayira. Kụ eeni amem kẹn, reḍighi ghan ni ipaanhaạn oghị aghisigh okori omhoom aḅirinhi phọ aZihova aguanhaan bọ. Keḅeraạn ni nyinhạ obughẹ okparạm mọ anạ ḍughụm? Siẹn emhuoghaạph phọ ephẹn phọ, yira kooḅeghiọn idị yira kotue oḍeenhaan okparạm ḅilhẹ r’iyaạr phọ emhạn bọ maạr oḍighi iduọn phọ. Yira koḅilhẹ kẹn ni omiịn raraạr dị ketue ilhoghonhaạn iyira ḍighaạgh obughẹ okparạm mọ ayira.

3. Oye okparạm ramegheron ghan ika mem dị oḍighi nyodị iyaạr oghạgh olhoghi?

³ Ooḅeghiọn inya areten dị yira kotue oḍeenhaan okparạm. Eḅẹl phọ, oye okparạm ra/nuụn ghan kaghạgh olhoghi. Odị rapoomhị ghan ni loor ḅilhẹ ra/ḍighi ghan kaḅulhemian mem dị oye aḍighi nyodị iyaạr oghạgh olhoghi. Ikpo onhụ phọ “ra/nuụn ghan kaghạgh olhoghi” iphụr emite siphẹ aBaibul phọ mem mọ rokaạph bọ ilọ aZihova mọ odị aḍighi “Enhaạn onmạ ighirigiir r’aghusạn, dị ra/nuụn ghan kaghạgh olhoghi, ḅilhẹ amoọgh ephomhoghiạn oḅạr dị ephughạn r’igey.”—Ex. 34:6.

4. Oye okparạm ramegheron ghan ika mem dị ewạ mọ odị akori iyaạr?

 ⁴ Omhunhenhiom iyạl, oye okparạm mọ rapoomhị ghan loor kakori. Oye okparạm mọ rapoomhị ghan ni loor kakori ghalhamọ r’amem dị iyaạr phọ odị rakori bọ reebinya kepelhom ipẹ ogbiighi bọ. (Mat. 18:26, 27) Ibadị asidọl remite ghan ni dị kemoghi mọ okparạm kụ okori. Esi omaạm, ewạ ni dị yira koler rurụ ongọ oye dị rakaạph iyaạr, dị yira ko/soph onhụ oye phọ. (Job 36:2) Yira omoghi kẹn ni okparạm mem dị yira rologhonhaạn ḍighaạgh nyopọ yira rotughemhị bọ onhaghanhạn itughemhị aBaibul phọ obobọ okpạr opu ekarạph eegharạ.

5. Eghẹn kụ enhọn eten dị yira kotue oḍeenhaan okparạm?

⁵ Omhunhenhiom iraạr, oye okparạm ra/ḍighi ghan iyaạr dị u/pụr ugbiighi. Ii okạr oghaạph, eeni amem rewạ ghan ni oogborion oḍighi iyaạr omiteom. Kuolọ, mem dị oye okparạm mọ amhoọgh ephigh iyaạr oḍighi, odị raa/gborion ghan kozuoghom iyaạr phọ. Kparipẹ ghụn, odị ramiteom ghan mem kagbiighi kụ agbi oḍighi. Kụ odị angọ amem mọ ewạ bọ oḍighi iyaạr phọ.

6. Oye okparạm ramegheron ghan ika mem lọ asoman odẹgh ophogh obobọ ḍikparamhinheẹn?

⁶ Omhunhenhiom inya, oye okparạm ra/nụn ghan mem lọ asoman imhinhimhiịn. Kuolọ, i/beeph oghaạph iiḅaghamhị oye phọ ḅilhẹ r’idị oye phọ alhoghoma oḅenhị ogbogh oyaghirị oye phọ. Toroboiperolbọ, oye okparạm mọ kakiọm ni ghisigh aatughiạn ghan ilọ imạ araraạr phọ aZihova maḍighinhaan bọ nyodị kụ aḍighi oomo ipẹ odị katue bọ oghị aghisigh okumu aZihova r’ibo. (Kọl. 1:11) Idiphọ aKristẹn, ewạ ni dị yira koḍeenhaan ghan okparạm esi oomo areten phọ iphẹn phọ. Eeghe kụ iḍighi? Ooḅeghiọn iniin ariphigh.

7. Odaphạn Jems 5:7, 8, eeghe kụ iḍighi bọ iyaạr phọ okparạm amhạn bọ maạr? (Miịn kẹn afoto phọ.)

⁷ Orue omhoọgh apelieẹny, yira omoghi okparạm. Idiphọ arebenhẹ aZihova iḍiodi phọ,  ewạ dị yira kokparạm okori Enhaạn omhunhenhi aruguanhaan phọ odị. (Hib. 6:11, 12) ABaibul phọ atomaạm dọl phọ ayira oḅephom ozo. (Bạl Jems 5:7, 8.) Oḅephom ozo ralọgh ghan ni inyaạm oḅeph r’ooḍuom amuụm iizuphạ phọ odị, kuolọ ra/legheri ghan mem mọ kepoph bọ. Esi iduọn phọ, oḅephom ozo phọ rakparạm ghan ni kakori, r’oḍuom olhoghi m’onọ kabugha ni iḅeph phọ onọ. Eniin phọ eten phọ kẹn, yira roḍighi ghan ni ipẹ yira kotue bọ odạph aZizọs, ghalhamọ r’iduọn yira u/legheri bọ “odọ phọ aḍio phọ Omoọgh-we phọ [ayira]” ratu bọ. (Mat. 24:42) Yira rokori ni r’okparạm, loor esi dị yira okuphom ni owol mọ amem mọ eteẹny aZihova kaḍighi ni ipẹ odị aguanhaan bọ. Yira u/kparạm, pọ yira koḅonyonhu ni ozuan bịn enụm enụm omeel oḍuạ siẹn igey phọ. Bịn eeni yira omiigh ophorogh araraạr dị yira ootughiạn mọ kingọ iyira oḅaạl-olhoghi nyiidiphọ. Kuolọ yira okparạm ni osi epẹ eekunha phọ, yira komoọgh ni pelieẹny.—Mic. 7:7; Mat. 24:13.

8. Ika kụ edị okparạm rulhoghonhaạn ghan iyira ḍighaạgh omhoọgh igey asiya r’abunhọn? (Kolosị 3:12, 13)

⁸ Yira omoghi ni okparạm orue omhoọgh igey asiya r’abunhọn. Okparạm raḍighi ghan idị yira Koler rurụ ongọ bunhọn. (Jems. 1:19) Okparạm ralọgh ghan kẹn kaphophe eephọ. Yira omhoọgh okparạm, pọ yira ko/meera mọ iiḅaghamhị dị yira osoman eḍighi idị yira koogboronhom oḍighi obobọ oḅạ ikpo onhụ dị ke/lọgh bunhọn epophe. Yira oḍighi kẹn we okparạm, yira koo/gboronhom ghan okạgh olhoghi mem dị abunhọn oghaạph obobọ oḍighi iyaạr oghạgh olhoghi oru esi ayira. Kparipẹ r’oḍighi oḅulhemian, odaphạn ghụn oroma aBaibul phọ aḅẹm bọ mọ, “iminoghọm ghan esạr ghan ewilenaạn ikarạph Iọ awe iḍighi inyina.”—Bạl Kolosị 3:12, 13.

9. Ika kụ edị okparạm rulhoghonhaạn ghan iyira ḍighaạgh mem dị yira rowạ osopha osopha? (Proverbs 21:5)

⁹ Okparạm katue kẹn ni ulhoghonhaạn iyira ḍighaạgh osopha ogey osopha. Kparipẹ r’oogboronhom ghan bịn osopha osopha, yira kosighẹ ghụn mem owaaghị raraạr, ogbiighi okị ogbiighi oḅula kụ ogbi loor olhegheri ilọ osopha. (Bạl Proverbs 21:5.) Esi omaạm, eḍighi iyaạr dị yira rowạ oḍighi, keḍighi ni odẹgh ophogh oogboronhom osighẹ oḍighi dị ungọ iyira, ghalhamọ oḍighi phọ kaḍighi ni iyaạr dị yira kobilhẹ yogh ituughạ obobọ kusophoghom ghan iyira omite epẹ erugh phọ. Toroboiperolbọ, yira omhoọgh okparạm, yira komiigha ni loor ooḅeghiọn inhọn araraạr idiphọ ekpisi phọ oḍighi phọ odi bọ, onhụ amem mọ yira kolọgh ghan bọ, ḅilhẹ r’idị oḍighi phọ katir buọ eghunotu phọ ayira r’aZihova. Okparạm kuphẹl iyira asighẹ esi osopha ghan okarạph osopha.

10. Ika kụ edị onyọ aKristẹn katue amoọgh aḅilhẹ apamanhạm okparạm mọ odị?

¹⁰ Ḅeeḅereghị alhọm okparạm dị abụgh. Okparạm aḍighi pakirị eemhumha uwaloor iigbia phọ. (Gal. 5:22, 23) Esi iduọn phọ, yira kotue ni olọm aZihova esi iiḅereghị ongọ ayira uwaloor iigbia phọ ḅilhẹ r’olhoghonhaạn ayira ḍighaạgh omhoọgh eemhumha uwaloor iigbia phọ. Kụ eḍighi maạr dị yira osoman dọl dị edẹgh ephogh okparạm mọ ayira, pọ oghị ghisigh olhọm ghan uwaloor iigbia phọ obọ yira orue okparạm. (Luk 11:9, 13) Yira kotue ni olọm aZihova olhoghonhaạn aḍighaạgh omhiịn araraạr eten phọ epẹ odị. Kụ mem dị yira rooḅereghị, oghị ni ghisigh oḍighi ghan ipẹ yira kotue bọ torobọ aḍio okparạm. Yira orue ni oghị ghisigh olhọm ghan kụ oḅilhẹ oḍighi ipẹ yira kotue bọ obughẹ okparạm mọ ayira, pọ eegharạ phọ ephẹn phọ kekị ni ghisigh esi sinhị siphẹ ekpom mọ ayira bịn eḍighi eniin eegharạ dị yira momhoọgh.

11-12. Ika kụ edị aZihova maḍeenhaan okparạm?

¹¹ Gbirima reḍeenhaan aBaibul phọ. Ibadị areḍeenhaan awe okparạm edi ni siphẹ aBaibul  phọ. Lọ yira ogbirima ghan reḍeenhaan phọ iphẹn phọ, pọ yira kotue ni omiịn reten orue oḍeenhaan aani okparạm. Kụ yira ogbi ooḅeghiọn areḍeenhaan phọ iphẹn phọ, ophụr ooḅeghiọn eḍeenhaan okparạm dị epelheghiom—eḍeenhaan phọ aZihova.

¹² Siphẹ oghoony phọ Iden, aSetan agbaaghiọm ni aphuẹ ḍien phọ aZihova, oḍighi idị Iv kaakia ephomhoghiạn phọ r’elhiom itooghị phọ aZihova. Kparipẹ r’oogborion ophiemhi ogbaạm okpẹ phọ, aZihova aghị ni ghisigh aḍeenhaan okparạm r’ophamhaghạn aloor, loor esi dị odị alegheri ni mọ kesighẹ ni mem kụ egbi oganhanha mọ eten itooghị phọ odị kụ inhighẹ epelheghiom. Kụ loor okori phọ ophọn phọ, odị makparạm ni ibadị aroofolha dị mokpolhom ḍien phọ odị. Kụ oḅarạm isiẹn, okparạm mọ aZihova mamiteom eepoogh angọ ibadị omhoọgh aghuḍum k’agee-pọ. (2 Pit. 3:9, 15) Kụ iphẹn phọ meḍighi idị irubal awe moru olhegheri nyodị. Yira ogbon suọ phọ okparạm mọ aZihova mungọ bọ iyira, pọ kidughanhaan ni iyira oghị aghisigh okori amem mọ odị kasiemhi bọ eekunha okarạph aḅirinhi phọ ophọn phọ.

13. Ika kụ edị aZizọs ratuughaạny bọ okparạm Odẹ phọ odị eten dị emhunhughan? (Miịn kẹn afoto phọ.)

¹³ AZizọs akạr kụ aaghironhaan eten dị emhunhughan okparạm Odẹ phọ odị. Odị aghị ni ghisigh aḍeenhaan ghan eegharạ phọ ephẹn phọ mem mọ odị arọl bọ siẹn ade phọ. Okạr oghaạph, i/dughanhaan ghan nyodị oomo amem oḍeenhaan okparạm, ekạr ekpaariọm esi abutughemhiạ iilhogh phọ r’aFarisi phọ oḍighi bọ we iyạI asinem. (Jọn 8:25-27) Kuolọ, idiphọ Odẹ phọ odị, aZizọs oo/gboronhom ghan oghạgh olhoghi. Odị o/ḍighi ghan oḅulhemhian mem dị ootuuny nyodị obobọ oḍighi iyaạr dị kekạgh olhoghi odị. (1 Pit. 2:23) AZizọs o/nhụn ghan mem dị odị rakparạm imhinhimhiịn kirokirọ. Epẹ kụ iyaạr phọ  aBaibul phọ uḅenhị bọ iyira mọ: “Iitughiạn odọ amulọgh-ḍien phọ odị akparạm bọ ḍighaạgh abuḍighinom ikarạph phọ”! (Hib. 12:2, 3) R’olhoghonhaạn aḍighaạgh aZihova, yira kotue kẹn ni okparạm torobọ iiḅaghamhị dị yira osoman.

14. Okparạm mọ Ebraham itughemhị iyira eeghe? (Hibru 6:15) (Miịn kẹn afoto phọ.)

¹⁴ Kokaạph ika eḍighi maạr dị ipẹ yira ogbiighi bọ ilọ eekunha phọ ke/mhunhughan? Eeni yira ugbi ghan mọ eekunha phọ ketu k’amem dị mebia epẹ omhạn. Kụ nyiidiphọ eeni yira rokiilhaan mọ yira ko/tọl omiịn aani eekunha phọ. Eeghe kụ kilhoghonhaạn iyira ḍighaạgh oghị aghisigh okparạm okori ghan? Ooḅeghiọn eḍeenhaan phọ Ebraham. AZihova aguanhaan Ebraham mọ “mị kaḍighi nyinhạ egbogh eelhe” mem dị odị mamhạn 75 asiạ kụ moọny ko/mhoọgh. (Gen. 12:1-4) Ebraham amhiịn ni mem mọ oguanhaan phọ opọ phọ amhunhughan bọ ḍughụm? Odị o/mhiịn oomo ph’idị. Odị r’oḅeẹny bọ ophiịny Euphrates phọ, odị akori ni esi 25 asiạ, kụ ogbi bọ omhạr oọny phọ odị Aizịk, kụ inhọn 60 asiạ reten, kụ ogbi omhạr Isọ r’aJekọb. (Bạl Hibru 6:15.) Kuolọ Ebraham o/mhiịn eemharạ eemharạ phọ odị dị oḍighi egbogh eelhe oḅilhẹ olhe erua Ade Oguanhaan phọ. Toroboiperolbọ, oye omheeraam mọ ophọn phọ aghị ni ghisigh aghelhọm siya dị ekpạr r’Olemiạ phọ odị. (Jems. 2:23) Kụ mem mọ koḅeton bọ Ebraham, olhoghi odị kaḅaạl li olhegheri mọ omheeraam mọ ḅilhẹ r’okparạm mọ odị akọm ni ḍisẹph kirokirọ angọ oomo areelhe aḅirinhi phọ! (Gen. 22:18) Yira otuughạ eeghe? Eeni yira r’aloor ko/tue omiịn dị oomo aruguanhaan phọ aZihova kemunughan. Kuolọ, eḍighi maạr dị yira omhoọgh okparạm idiphọ Ebraham, yira kotue ni okuphom owol mọ aZihova kusẹph ni iyira nyiidiphọ ḅilhẹ r’epẹ omhoom aḅirinhi phọ.—Mạk 10:29, 30.

15. Mem dị nạ aphạm ituughạ ogina anạ eeghe kụ edị ewạ mọ ḅeeḅeghiọn siphẹ ituughạ phọ anạ?

 ¹⁵ ABaibul phọ akaạph ni ilọ inhọn areḍeenhaan awe okparạm. (Jems. 5:10) Kenighẹ ni otuughạ ilọ areḍeenhaan phọ iphẹn phọ. b Esi omaạm, ghalhamọ r’iduọn omạ bọ ni Devid k’eghoroghọr oḍighi odaạm eelhe phọ Izrạl, odị akori ni esi ibadị asiạ kụ ogbi bọ oḅọgh itooghị phọ ongọ odị. ASimiọn r’Anạ ughị ni ghisigh okumu aZihova kụ okoriom ghan aMesaya phọ. (Luk 2:25, 36-38) Mem dị nạ atuughạ ilọ areḍeenhaan phọ iphẹn phọ, puruan loor mọ: Eeghe kụ ilhoghonhaạn bọ ḍighaạgh oye phọ ophọn phọ oḍeenhaan okparạm? Eeghe asuọ kụ edị odị amhoọgh esi oḍeenhaan okparạm? Ika kụ edị mị katue atuughaạny nyodị? Nạ katue ni kẹn amooghọm suọ esi otuughạ ilọ abuphẹ okparạm u/moọgh bọ. (1 Sam. 13:8-14) Nạ atue ni apuru mọ: ‘Eeghẹ kụ iḍighi bọ iyaạr phọ bidị okparạm u/moọgh bọ? Eeghe ikarạph araraạr kụ imitenhaan bidị loor e/moọgh okparạm mọ abidị?’

16. Eeghe asuọ kụ odi esi okparạm?

¹⁶ Ḅeeḅeghiọn suọ phọ okparạm rangọ ghan bọ. Okparạm, rangọ ghan eephọ r’oḅaạl olhoghi. Okparạm katue ni anighemhị eten iitughiạn phọ ḅilhẹ r’omhoon aloor phọ ayira. Okparạm rulhoghonhaạn ghan iyira ḍighaạgh omhoọgh igey asiya r’abunhọn. Rasighẹ ghan muḅọph karu siphẹ ookpomhoghan phọ. Eḍighi iyaạr dị oye uḍighi iyira iyaạr dị eghạgh olhoghi ayira, kụ yira uu/gborion ukạgh olhoghi, pọ yira kotue ni opamaghạn iiḅaghamhị phọ. (Ps. 37:8, igẹ dị edi ude; Prov. 14:29) Kuolọ idị emhạn maạr epu iphẹn phọ, pọ mem dị yira oḍeenhaan okparạm, yira rotuughaạny ghan Odẹ k’akẹ phọ ayira kụ oḅilhẹ oḍuraan otuman nyodị.

17. Eeghe kụ edị yira kosopha oḍighi?

¹⁷ Dị iikia i/lo, okparạm akạr kụ aḍighi emạ eegharạ dị rengọ ghan oomo phọ ayira suọ! Re/dugh ghan oḍeenhaan okparạm oomo phọ amem mọ, kuolọ r’olhoghonhaạn aḍighaạgh aZihova, yira kotue ni okiọm ghisigh ooneghị ghan eegharạ phọ ephẹn phọ. Ḅilhẹ iduọn yira oghị bọ ghisigh rokori omhoom aḅirinhi phọ, yira kotue ni okuphom owol mọ “aZihova agbi riḍien odị esi oomo abuphẹ rokuenhi ghan bọ nyodị, r’abuphẹ rokoriom ghan bọ ephomhoghiạn phọ odị re/munheen ghan bọ.” (Ps. 33:18) Eḍighi ni idị oomo phọ ayira kosopha oghị aghisigh oḍighi ghan ipẹ yira kotue bọ omhoọgh ezọ okparạm.