1. Pouki nou ka apwésyé moun ki ni pasyans?

 NOU tout ka apwésyé moun ki ni pasyans. Mé pouki? Èben, sa sé paski nou ka kontan lè nou wè moun ka èspéwé pou an bagay san yo vini faché. Osi lè nou fè lèwè, nou ka apwésyé moun ki ni pasyans épi nou. Èk kon nou té ka goumen pou apwann, aksèpté, èben apliké on pwensip ki an Bib-la, nou té byen kontan moun-lan ki té ka étidyé épi nou-an té ni pasyans épi nou. An plis di sa, pa dé kontan nou kontan Jéhova ni pasyans épi nou!​—Ronm 2:4.

2. Adan ki diféwan sitiwasyon nou pé twouvé’y difisil pou ni pasyans?

² Magwé nou ka apwésyé’y lè moun ni pasyans, i pé wèd pou nou menm ni pasyans. Pou ègzanp, lè nou anwita, i pé difisil pou wèsté kam lè nou anmitan twafik ki bandé. Osi, nou pé santi kontwayé lè moun fè nou faché. Èk délè nou pé twouvé’y wèd pou èspéwé latè nèf-la. Alò an atik sala, nou kay konsidiwé kisa i vlé di pou ni pasyans, èk wézon-an kawaktè sala si tèlman enpòtan. Osi, nou kay konsidiwé kisa ki kay édé nou dévlopé pli pasyans.

3. Kisa on moun ki ni pasyans ka fè lè moun kontwayé’y?

³ Annou konsidiwé kat (4) mannyè nou sa moutwé nou ni pasyans. Pwèmyéman, an moun ki ni pasyans pa ka faché vit. Wi, lè on moun kontwayé’y, i ka wèsté kam èk i pa ka twété moun-lan menm mannyè-a moun-lan té twété’y. Anfen pwèmyé fwa-a èspwèsyon-an ‘pa ka faché vit’ pawèt an Bib-la, sé an Ègzodòs 34:6. La i di nou Jéhova sé ‘an Dyé ki plen mizéwikòd èk konpasyon. I pa ka faché vit èk i plen lanmityé fidèl èk lavéwité.’​—Ègz. 34:6.

4. Ki mannyè an moun ki ni pasyans kay konpòté kò’y paditan i ka èspéwé?

⁴ Dézyenmman, on moun ki ni pasyans ka wèsté kam paditan i ka èspéwé. Moun sala pa kay vini faché ében kontwayé si on bagay i ka èspéwé ka pwan pli tan pasé i té sipozé pwan. (Maf. 18:26, 27) Anfen, nou ni pou wèsté kam an plizyè diféwan sitiwasyon. Pou ègzanp, nou ni pou kouté èvèk pasyans lè on moun ka palé ban nou san nou koupé pawòl li. (Jòb 36:2) Osi nou bizwen pasyans lè nou ka édé yon étidyan Bib pou konpwann yon enstwiksyon ki an Bib-la, ében pou ganyen a bout yon mové labitid. 

5. An ki lòt mannyè nou sa moutwé pasyans?

⁵ Twazyenmman, an moun ki ni pasyans pa ka twò pwésé pou fè bagay san i katjilé. I vwé, la ni sèten sitiwasyon nou kay ni pou fè bagay vitman. Kanmenm, lè an moun ki ni pasyans ni bagay enpòtan pou fè, i pa kay fè’y pwésé, ni i pa kay fè’y vitman pou fini. Pito i fè sa, i ka pwan tan pou byen katjilé asou sa i vlé fè-a, èk apwé, i ka fè asé tan pou fè sa i vlé fè-a byen.

6. Kisa an moun ki ni pasyans kay fè lè i ka èspéyansé difikilté?

⁶ Katyenmman, an moun ki ni pasyans kay kontiné pou andiwé anba difikilté san i bougonnen. Konsa nou bizwen ni pasyans ni ladiway lè nou ka èspéyansé difikilté. Kanmenm, i ka toujou bon pou di an fwè nou pwé épi konsèné an pwòblenm nou ni. Mé an moun ki ni pasyans kay kontiné fè kon’y pé pou andiwé épi an atitid ki pòzitif. Sa vlé di, i kay toujou chonjé sé bon bagay-la ki ka fèt an lavi’y, èk i kay fè tout sa i pé pou kontiné sèvi Jéhova épi lajwa. (Kòl. 1:11) Alò, kon pèp Jéhova, nou ni pou moutwé pasyans an tout sé diféwan mannyè sala. Mé poutji sa enpòtan? Annou konsidiwé déotwa wézon.

7. Silon Jémz 5:7, 8, pouki i si tèlman enpòtan pou nou ni pasyans? (Gadé pòtwé-a osi.)

⁷ Pasyans sé an kawaktè ki byen enpòtan. Anfen, si nou pa ni pasyans nou pa kay twapé lavi étonnèl. Alò, menm kon sèvant fidèl Jéhova té moutwé pasyans an tan pasé, nou ni pou moutwé pasyans kon nou ka èspéyé asou Jéhova pou akonpli sé pwonmèt li-a. (Hib. 6:11, 12) Bib-la ka konpawé sitiwasyon nou épi an fama. (Li Jémz 5:7, 8.) Wi, an fama ka twavay wèd pou planté èk wouzé jaden’y, mé i pa konnèt ègzaktiman ki lè jaden-an kay pwodwi manjé. Alò, fama-a ka moutwé pasyans, èk i ni konfyans-lan ki jaden-an kay pwodwi manjé. Menm kon fama-a ka kontiné twavay wèd magwé i pa sav ki jou jaden-an kay pwodwi manjé, nou osi ka kontiné twavay wèd kon disip Jézi menm si nou “pa sav ki jou mèt [nou] kay vini”. (Maf. 24:42) Èk padan nou ka èspéyé épi pasyans, nou ni konfyans-lan ki, tout pwonmèt Jéhova kay fèt vwé a lè-a i vlé. Èk i bon pou nou tjenn atitid pòzitif sala paski si nou pèd pasyans, nou pé koumansé fiksé asou bagay ki pa enpòtan pou ban nou lakontantman. Anfen, nou pé jis santi nou pa sa èspéyé ankò, èk apwé an lè nou pé jis kité Jéhova. Mé si nou ni pasyans, nou kay tjenbé fò pou jis an bout-la, èk nou kay twapé lavi étonnèl.—Mayk. 7:7; Maf. 24:13.

8. Ki mannyè pasyans ka édé nou pou aji byen épi lézòt moun? (Kòlòsé 3:12, 13)

⁸ Lè nou ni pasyans i kay pli ézé pou nou aji byen épi lézòt moun. Pou ègzanp, lè nou ni pasyans, nou kay kouté moun lè yo ka palé. (Jémz 1:19) Osi, pasyans kay édé nou viv an lapé épi yonn a lòt. Poutji nou sa di sa? Èben sa sé paski lè nou ni tèt cho, pasyans kay anpéché nou di ében fè bagay ki pa janti. Èk si nou ni pasyans, nou pa kay faché vit lè an moun ofwansé nou. Pito sa, nou kay “sipòté yonn a lòt” èk ‘pawdonnen yonn a lòt lè nou ni anyen kont yonn a lòt.’—Li Kòlòsé 3:12, 13.

9. Lè nou ni pasyans, ki mannyè sa kay édé nou pou fè bon disizyon? (Pwovèb 21:5)

⁹ Lè nou ni pasyans, sa kay édé nou pou fè bon disizyon. Poutji nou di sa? Ében sa sé paski, lè nou ni pasyans, pito nou fè bagay vitman san katjilé, nou kay fè tan pou apwann tout sa nou pé konsèné sé diféwan chwa-a nou ni, èk nou kay désidé kilès ki pli mèyè. (Li Pwovèb 21:5.) Pou ègzanp, si nou ka gadé pou twavay èk nou pa ni pasyans, nou pé aksèpté pwèmyé twavay-la nou jwenn, menm si twavay-la annékòz nou pou mantjé mitin nou ében pou fè mwens an minis-la. Mé si nou ni pasyans, nou kay katjilé asou ki mizi tan i kay pwan nou pou alé twavay, ki mizi nèditan nou kay ni pou twavay pou, èk ki mannyè twavay sala kay afèkté wilasyon nou épi fanmi nou èk Jéhova. Wi, lè nou ni pasyans sa kay édé nou pou fè bon disizyon.

10. Ki mannyè on Kwityen sa dévlopé pli pasyans èk kontiné moutwé pasyans?

¹⁰ Mandé Jéhova pou pli pasyans. Pasyans sé on pa an lisentèspwi Bondyé. (Gal. 5:22, 23) Alò nou vlé mandé Jéhova pou lisentèspwi’y èk osi pou édé nou dévlopé kawaktè di lisentèspwi’y. Konsa, si nou adan on sitiwasyon ki ka mété pasyans nou anba tès, nou vlé ‘kontiné mandé’ Jéhova pou lisentèspwi’y ki kay édé nou pou ni pasyans. (Louk 11:9, 13) Osi nou sa mandé Jéhova pou édé nou wè bagay mannyè-a i ka wè’y. Épi apwé nou pwédyé, nou vlé fè tout sa nou pé pou moutwé pasyans touléjou. Wi, si nou kontiné pou mandé Jéhova pou pasyans èk si nou kontiné fè éfò-a pou moutwé pasyans, sé pli nou kay dévlopé pasyans.

11-12. An ki sitiwasyon Jéhova ja moutwé pasyans?

¹¹ Katjilé asou sé ègzanp-lan ki an Bib-la. Bib-la ni ègzanp an pil moun ki té ni pasyans. Alò, lè nou mèdité asou sé ègzanp sala, nou sa apwann diféwan mannyè nou sa moutwé pasyans. Mé avan nou konsidiwé détwa an sé ègzanp sala, annou konsidiwé ègzanp Jéhova. Moun-lan ki ni pli pasyans pasé tout lòt moun.

¹² An jaden Édenn, Satan sali non Jéhova lè’y té éséyé pou fè Èv ni dout ki, Jéhova sé pa on Dyé ki jis èk ki ni lanmityé. Mé lè sa fèt Jéhova pa détwi Satan la menm, pito sa, Jéhova moutwé an chay pasyans èk i kontwolé kò’y. Pouki? Ében sa sé paski, i té sav tan té ni pou pasé pou moutwé i sé pli mèyè Kondwitè-a. Èk paditan Jéhova ka èspéwé, i ka tjenbé fò magwé Satan ka simen tout kalité mansonj kont li. An plis di sa, Jéhova vlé pli moun twapé lavi étonnèl, konsa i ka èspéwé épi pasyans. (2 Pita 3:9, 15) Èk paski Jéhova ka moutwé pasyans, milyon di moun ja vini konnèt li. Alò, si nou fiksé asou sé bennéfis-la nou sa twapé paski Jéhova ni pasyans, sa kay fè’y pli ézé pou nou èspéwé asou tan Jéhova pou détwi vyé sistèm sala.

13. An ki mannyè Jézi ja moutwé i ni pasyans menm kon Papa’y? (Gadé pòtwé-a osi.)

¹³ Jézi ka moutwé i ni pasyans menm kon Papa’y, èk i té moutwé sa lè’y té asou latè-a. I pa té toujou ézé pou’y moutwé pasyans, sitou épi sé titja lwa-a épi sé Fawizyen-an. (Jan 8:25-27) Mé kanmenm, Jézi moutwé i pa ka vini faché vit menm kon Papa’y. Konsa, lè moun té ensiltéʼy ében pwovoké’y i wèsté kam. (1 Pita 2:23) Wi, Jézi tjenbé fò anba difikilté épi pasyans, èk i pa janmen bougonnen. Alò sé pou wézon sala lévanjil-la di nou pou “katjilé [asou] tout sé bagay-la i soufè-a. Mové moun té hayiʼy an pil, mé i aksèpté sa.” (Hib. 12:2, 3) Wi épi èd Jéhova, nou sa moutwé pasyans menm kon Jézi èk nou sa osi tjenbé fò anba népòt difikilté nou ka èspéyansé.

14. Kisa nou sa apwann an mannyè-a Abrahanm té moutwé pasyans? (Hibrou 6:15) (Gadé pòtwé-a osi.)

¹⁴ Pou adan di nou, sé pa jòdi nou ka èspéwé pou bout sistèm sala wivé. Kanmenm, kon tan ka pasé pitèt nou ka katjilé si nou kay wè bout-la avan nou mò. Mé kisa ki kay édé nou pou kontiné èspéyé épi pasyans? Èben nou kay jwenn an chay ankouwajman si nou konsidiwé ègzanp Abrahanm. Lè Abrahanm té swasant kenz (75) lanné i pa té ni pyès ich. Kanmenm Jéhova pwonmèt Abrahanm ‘mwen kay fè’w vini yon gwo nasyon’. (Jen. 12:1-4) Ès Abrahanm té wè pwonmèt sala fèt vwé? Wi, mé pa tout pwonmèt-la. Pou ègzanp, apwé Abrahanm janbé Lawivyè Youfrétis-la, i èspéyé pou vennsenk (25) lanné avan gason’y Ayzak té fèt. A lè sala Abrahanm té yon san (100) lanné di laj. Èk i té ni pou èspéyé on lòt swasant (60) lanné pou’y wè sé ti ich li-a, Isò èk Jakòb. (Li Hibrou 6:15.) Mé Abrahanm pa té viv pou wè lè désandan’y té vini an gwan nasyon èben lè yo té éwityé Tè Pwonmèt-la. Kanmenm, Abrahanm té ni an bon wilasyon épi Kwéyatè’y. (Jémz 2:23) Èk lè Bondyé wésisité Abrahanm, pa dé kontan i kay kontan pou apwann mannyè tout nasyon té twapé bennéfis hòd pasyans li! (Jen. 22:18) Alò, ki lison nou sa apwann an ègzanp Abrahanm? Ében pitèt nou pé mò avan nou wè tout pwonmèt Jéhova fèt. Kanmenm, menm kon Abrahanm, si nou ni pasyans, nou sa ni konfyans-lan ki, Jéhova kay benni nou apwézan èk an latè nèf-la nou kay enjwi pli bennéfis.—Mak 10:29, 30.

15. Lè nou ka fè létid pèwsonnèl nou, kisa nou sa étidyé?

¹⁵ Bib-la ni plizyè ègzanp lòt moun ki té ni pasyans. (Jémz 5:10) Alò lè nou ka fè létid pèwsonnèl nou, i kay bon pou étidyé konsèné sé ègzanp sala. b Pou ègzanp Jéhova té annonté David pou vini wa lè’y té on jenn nonm, mé i té ni pou èspéwé an chay lanné avan i vini wa. Èk Siméyon èk Anna, yo té adowé Jéhova pou plizyè lanné padan yo té ka èspéwé pou Mèsaya-a. (Louk 2:25, 36-38) Konsa, kon’w ka étidyé sé wakont sala, i kay bon pou mandé kò’w kwèsyon tèl kon: ‘Kisa ki édé moun sala pou moutwé pasyans? Ki bennéfis moun sala té twapé paski i té ni pasyans? Ki mannyè mwen sa swiv ègzanp li?’ Osi, i kay bon pou nou étidyé konsèné moun ki pa té ni pasyans. (1 Sm 13:8-14) Èk ou pé mandé kò’w kwèsyon tèl kon: ‘Poutji sé moun sala pa té ni pasyans? Ki mové bagay ki té wivé yo paski yo pa té ni pasyans?’

16. Lè nou ni pasyans, ki bennéfis nou kay èspéyansé?

¹⁶ Katjilé asou sé bennéfis-la nou kay èspéyansé lè nou ni pasyans. Lè nou ni pasyans nou ka vini pli kam èk nou ka èspéyansé pli lakontantman. Alò, pasyans sa vwéman édé nou ni bon santé. Osi lè nou ni pasyans épi lézòt, sa kay édé nou pou ni on pli mèyè wilasyon épi yo, èk kongwigasyon nou kay ni pli lilyon. An plis di, si on moun pwovoké nou, nou pa kay vini faché vit paski nou sav sa kay fè sitiwasyon-an pli mové. (Sam 37:8; Pwov. 14:29) Mé bagay-la ki pli enpòtan sé sa, nou ka imité Jéhova Papa nou ki an syèl, èk nou kay vansé pli pwé’y.

17. Kisa nou détèminé pou fè?

¹⁷ Pasyans sé on bèl kawaktè èk lè nou dévlopé’y nou sa twapé an chay bennéfis hòd li. Kanmenm i pa toujou ézé pou ni pasyans, mé chonjé épi èd Jéhova nou sa dévlopé bèl kawaktè sala. Èk kon nou ka èspéyé épi pasyans pou latè nèf-la, nou sa ni konfyans-lan ki, “zyé Bondyé Senyè-a asou sé moun-an ki . . . ka èspéyé èk tout konfyans yo”. (Sam 33:18) Konsa annou fè’y détèminasyon nou pou dévlopé pasyans.