1. Pirang’o imaru dhanu ma nyutho cirocir?

 WAN ceke wamaru dhanu ma ginyutho cirocir. Anyong’a negowa i kum ju ma kuro lembe moko m’umbe nikier. Watie ku foyofoc nia jumange gicirowa kinde ma watimo kosa moko. Watie bende kud anyong’a nia ng’atu m’utelo wi ponji nwa mi Biblia ucirowa kinde m’ebino iwa tek ninyang’ i ponji moko mi Biblia, niyiyogi man nitiyo kugi. M’usagu zoo, watie ku foyofoc lee ni Yehova Mungu pilembe ecirowa!​—Rum. 2:4.

2. Eromo bedo iwa tek ninyutho cirocir i saa ma kani?

² Kadok nwang’u wamaru cirocir ma jumange ginyutho de, re copere nia ebedo iwa yot ungo saa ceke ninyutho cirocir. Ku lapor, eromo bedo iwa tek nikwiyo kumwa ka wabekuro lembe moko kpe, asagane ka saa umayuwa. Ng’eicwiny romo makuwa lee kinde ma jumange gitimo lembe m’ukierowa. Saa mange lundo waromo nwang’u nia etie iwa tek nikuro ng’om ma nyen ma Yehova ung’olo pire. Nyo imaru nia ibed won cirocir ma lee? I thiwiwec maeni, wabineno ayi ma wacopo nyutho ko cirocir man pirang’o pi kite maeno utie tek lee. Bende, wabidwogo kendo iwi gin ma romo konyowa nicego cirocir lee.

3. Won cirocir timo ang’o kinde ma junyayu ng’eicwiny i iye?

³ Wakewec iwi yo ang’wen ma waromo nyutho ko cirocir. Mi kwong’o, won cirocir bedo yoo ni ng’eicwiny. Eii nikwiyo kume man ecerere nidwoko wang’ lembe kinde ma junyayu ng’eicwiny i iye. Wec ma nia ‘ebedo yoo ni ng’eicwiny,’  nwang’ere wang’ ma kwong’a i Biblia kaka ma Yehova uyero i iye nia etie “Mungu ma won kisa ku bero, ng’atu ma bedo yo ni ng’ecwiny, man dit ku mer mi bero ku lemandha.”​—Ai 34:6.

4. Won cirocir timo ang’o kinde m’ebekuro lembe moko?

⁴ Mir ario, won cirocir kuro lembe ma nwang’u kume poto. Tek lembe moko ubecamu saa nisagu m’egeno, ng’atu ma ciro lembe maku ngo lembe heu heu. (Mat. 18:26, 27) Lembe tie dupa dit m’ukwayu watim ma nwang’u kumwa upoto. Ku lapor, kinde ma ng’atu moko ubeweco i bang’wa, mito wawinje ku cirocir, m’umbe nikathe. (Yob 36:2) Waromo bedo bende ku yeny mi nyutho cirocir kinde ma wabekonyo japonj Biblia unyang’ i ponji moko mi Biblia kunoke ewek timo moko ma rac.

5. Junyutho cirocir i ayi mange ma kani?

⁵ Mir adek, won cirocir timo ngo lembe nyamalu malu. I andha re, saa moko kwayu jutim lembe pio pio. Ento tek won cirocir utie ku lembe moko ma pire tek m’ukwayu etim, ecake ngo vur vur man erewe ngo arewa. Kakare nitimo kumeno, ekoyo saa m’ukwayere pi nitimo lembene. E i ng’eye, emiyere pi nitime cuu.

6. Won cirocir timo ang’o kinde m’ebenwang’ere ku peko?

⁶ Mir ang’wen, won cirocir ii ninyego ku peko m’umbe nimoye. Pi thelembe maeno re ma cirocir utie kite ma ceng’ini ku mwonyolembe hai. Etie rac ungo niyabu adundewa pi nikoro kite ma wawinjara ko ni jarimbwa moko ma ceng’ini. Re won cirocir timo ceke m’ecopo kara emedere nitwiyo cwinye man nibedo ku nen ma ber kinde m’ebeciro peko. (Kol. 1:11) Calu ma watie Jukristu, watie ku yeny mi nyutho cirocir i ayi maeno ceke. Pirang’o? Wakenenu thelembene moko.

7. Nimakere ku Yakobo 5:7, 8, pirang’o cirocir pire tie teki? (Nen bende cal.)

⁷ Kara wabin wabothi, watie ku yeny mi cirocir. Calu jutic pa Yehova ma weg bedopwe mi rundi ma con, ukwayu wakur ku cirocir nitundo ma Mungu bipong’o lembang’ola pare. (Ebr. 6:11, 12) Biblia uporowa ku jarafur. (Som Yakobo 5:7, 8.) Jarafur timo tic ma tek pi nipidho kodhi pare man nikwoyo pii i wiye, re eng’eyo ngo nindo ma tap m’ebidongo i iye. Pieno ekuro ku cirocir, m’etie ku genogen nia ebikayu cam moko kokoro. Kumeno bende, waketho wiwa zoo i kum lembe mi tipo, kadok nwang’u ‘wang’eyo ngo nindo ma Rwoth mwa bibino i iye’ de. (Mat. 24:42) Wakuro ku cirocir, ma cwinywa tek nia i saa ma tap, Yehova bipong’o lembang’ola pare ceke. Tek wabayu cirocir mwa, waromo nwang’u nia nikuro ubeolowa, e nok nok waweko Yehova. Bende, wacopo caku sayu piny ma miyo iwa anyong’a ndhundhu. Re tek watie weg cirocir, wabiciro nitundo i ajiki, e wabiboth.​—Mik. 7:7; Mat. 24:13.

8. Cirocir konyowa nenedi i bedo mwa ku jumange? (Jukolosai 3:12, 13)

⁸ Cirocir konyowa i bedo mwa ku jumange. Ekonyowa niwinjo jumange kilili mandha kinde ma gibeweco. (Yak. 1:19) Ekonyowa bende nibedo ku kwiyocwiny kugi. Ecerowa nitimo lembe vur vur kunoke niyero wec m’umaku piny ungo kinde ma wabewinjara ngo cuu. Man ka watie weg cirocir, wabiweko ngo ng’eicwiny umakwa pio pio saa ma ng’atu moko utimowa rac. Kakare niculo wang’ racu, ‘wabimedara nicirara i kindwa ng’atuman biciro wadi man biciro wadi, man wabiweko lembe m’i kindwa yot yot.’​—Som Jukolosai 3:12, 13.

9. Cirocir konyowa nenedi saa m’ukwayu wamak yubi? (Lembrieko 21:5)

⁹ Cirocir copo konyowa bende nimaku yub ma beco. Kakare niyiyo lembe ceke ngbaku kunoke m’umbe ninyamu iye, wabikoyo saa pi nitimo sayusac man ning’iyo i lembe cuu. (Som Lembrieko 21:5.) Ku lapor, tek wabesayu tic, waromo paru nia wayii tic m’ular unwang’ere, kadok nwang’u tije biketho wabikoso coko kunoke tic mi lembanyong’a saa moko de. Re tek watie weg cirocir, wabiting’o saa pi ning’iyo i lembe ma calu ve kaka ma wabitimo iye tije, saa m’ebicamu man adwogi m’eromo bedo ko iwi juruot mwa man iwi winjiri mwa ku Yehova. Ka watie weg cirocir, wacopo uro nimaku yub ma rac.

10. Jakristu copo cego man edoko won cirocir nenedi?

¹⁰ Bed irwo kara cirocir peri umedere. Cirocir utie acel m’i kind nying tipo. (Gal. 5:22, 23) Pieno wacopo rwo pi ninwang’u tipo ma leng’ man wakwayu Yehova ukonywa waceg nying tipone. Tek wabenwang’ara i wang’ lembe m’ubeketho cirocir mwa i amulaic, wamedara “nikwayu” Yehova umii iwa tipo ma leng’ ukonywa wabed weg cirocir. (Luka 11:9, 13) Wacopo kwaye bende ekonywa nineno lembe calu en. E i ng’ey ma warwo, ukwayu kubang’ ceng’ waii nibedo weg cirocir. Ka wabemedara nirwo man wabetimo kero ninyutho cirocir, kite maeno biguro ulage i adundewa man wabidoko weg cirocir.

11-12. Yehova unyutho cirocir nenedi?

 ¹¹ Bed inyam i lembe iwi lapor mi Biblia. I Biblia junwang’u lapor mi dhanu dupa ma ginyutho cirocir. Ka wabenyamu i lembe iwi lapor migi, waponjo ayi mi nyutho cirocir. I wang’ niweco iwi laporne moko, wakenenu lapor pa won cirocir m’usagu zoo, niwacu Yehova.

¹² I podho mir Eden, Sitani ucido nying’ Yehova man eketho Eva upar nia Yehova utie ngo Ubimo m’uromo man ma jamer. Kakare ninyotho jayernying’ maeno ndhundhu, Yehova unyutho cirocir man kweriri gijo, m’eng’eyo ko nia bikwayu saa ma lee ukeukadhi kara jung’ey nia Bimobim pare re m’uloyo zoo. Kinde m’ebekurone, eciro bende acidi dupa ma jukelo iwi nyinge. M’umedo maeno, Yehova ubemedere nikuro ku cirocir kara dhanu dupa unwang’ kaka mi kwo rondo ku rondo. (2 Pet. 3:9, 15) Eno uketho milioni dupa mi dhanu ubeng’eye. Tek waketho wiwa i kum bero ma cirocir pa Yehova ubemiyo, ebibedo iwa yot nikuro saa m’ebikelo iye ajiki.

13. Yesu ulubo lapor mi cirocir pa Won tap tap nenedi? (Nen bende cal.)

¹³ Yesu ulubo lapor mi cirocir pa Won tap tap, man enyutho kite maeno kinde m’ebino iwi ng’om. Ebino ire lembe ma yot ungo ninyutho cirocir saa ceke, asagane ni jugor cik man Jufarisayo ma weg umbili. (Yoh. 8:25-27) Re tap calu Won, Yesu ubed ubedo yoo ni ng’eicwiny. Ebed eculo ngo wang’ lembe kinde ma jubeyanye man jubesaye. (1 Pet. 2:23) Eciro bende peko m’umbe niwagere. Pi thelembe maeno re ma Biblia ukwayuwa nia waketh paru mwa zoo “i bang’ ng’atu maeno m’uciro wec ma reco dupa mi  judubo”! (Ebr. 12:2, 3) Ku kony pa Yehova, wan bende wacopo ciro peko moko ci ma wabenwang’ara ko.

14. Lapor mi cirocir p’Abraham ubemiyo iwa ponji ma kani? (Juebrania 6:15) (Nen bende cal.)

¹⁴ Dong’ ka wabekuro kpe lembe ma bitimere i ajiki ke? Saa moko nyo nindo ma wageno nia ajiki bitundo i iye udaru kadhu. Kunoke nyo wabeparu nia ebinwang’u dong’ watho. Ang’o ma copo konyowa kara wamedara nikuro ku cirociri? Wakewec iwi lapor p’Abraham. Kinde m’Abraham ubino ku oro 75, ebino mbe ku nyathin. Re Yehova ung’olo ire kumae: “Abiketho ibedo thek ma dit.” (Tha. 12:1-4) Nyo Abraham uneno pong’o mi lembang’ola maeno? Enene zoo ngo. I ng’ey m’Abraham ukadhu kulo Efrath, ekuro pi oro 25 ka wode ma Isak unyolere i ayi mir udu. I ng’ey oro 60 mange, ka nyikwaye ma Esau giku Yakobo ginyoliri. (Som Juebrania 6:15.) Re Abraham uneno ngo nyanok de nia nyikwaye udoko thek ma dit man ulagu Ng’om mi lembang’ola. Ento won bedopwe maeno ubino ku winjiri ma ceng’ini ku Jacwic pare. (Yak. 2:23) Kinde m’Abraham bicer, ebibedo kud anyong’a ma yerere ngo niwinjo nia yiyoyic man cirocir pare re m’uketho thek ceke unwang’u mugisa! (Tha. 22:18) Eno ubemiyo iwa ponji ma kani? Waromo neno ngo ku wang’wa kite ma lembang’ola pa Yehova ceke ubepong’o ko. Re ka watie weg cirocir calu Abraham, cwinywa copo bedo tek nia Yehova bimiyo iwa sukulia kawoni man kadok i ng’om ma nyen m’eng’olo pire.​—Mark. 10:29, 30.

15. Wacopo ng’iyo i lembe ma kani i saa mi ponji mwa ma segi?

¹⁵ I Biblia, junwang’u lapor mange dupa  mi dhanu ma gi weg yiyoyic. (Yak. 5:10) Nyo icopo ponjo ngo lembe i wigi? b Ku lapor, kadok nwang’u juwiro Daudi saa m’ebino nyanok pi nidoko ubimo mir Israel de, re ugam ukwayu ekur pi oro ma dupa i wang’ niidho iwi ker. Simeon giku Hana de gitimo ni Yehova ku bedopwe kinde ma gibekuro Masiya ma jular jung’olo pire. (Luka 2:25, 36-38) Kinde m’ibeponjo kpawa ma kumeno, say dwokowang’ penji m’ulubo e: Ang’o m’ukonyo ng’atu maeni ninyutho cirocir? Nibedo won cirocir uketho enwang’u bero ma kani? Acopo lubo lapor pare ke nenedi? Iromo nwang’u bende ponji kud i lapor mi dhanu m’unyutho ngo cirocir. (1 Sam. 13:8-14) Iromo kepenjiri kumae: ‘Ang’o m’uketho ekoso cirocir? Eno umiyo ire matoke ma kani?’

16. Wanwang’u bero moko ma kani tek watie weg cirocir?

¹⁶ Bed ipar pi bero ma cirocir kelo. Tek watie weg cirocir, wabedo jumutoro man ma kumwa kwiyo. Pieno, cirocir ketho wawinjara ma ber man wabedo ku yotkum ma cuu. Tek waciro jumange, wabedo ku winjiri ma ber kugi. Cokiri mwa de bedo i acel. Ka ng’atu moko usayuwa, waweko ngo ng’eicwiny umakwa yot yot man wating’o ngo lak lembe. (Zab. 37:8; Rie. 14:29) Ento m’usagu zoo, ka watie weg cirocir, walubo lapor pa Wegwa m’i polo man kindwa doko ceng’ini kude nisagu.

17. Ukwayu wabed ku lembakeca mi timo ang’o?

¹⁷ Cirocir tie kite ma ber ma diko kindwa ku jumange man ma miyo iwa bero! Kadok nwang’u eromo bedo iwa yot ungo saa ceke nibedo weg cirocir de, re ku kony pa Yehova wacopo medara nicego kite maeno. Man kinde ma ‘wabekuro’ ng’om ma nyen m’ubebino ku cirocir, cwinywa romo bedo tek nia Yehova bikonyowa man bigwokowa. (Mik. 7:7) Dong’ wan ceke wabed ku lembakeca ma wamedara ko nironyara ku cirocir.