1. Hano maolah kiso to iraay ko mihadidiay falocoˈ a tamdaw hani?

 MAOLAHAY kita to iraay ko mihadidiay falocoˈ a tamdaw. Tinakoen, roma tamdaw cowa pakayni i pitala macarirawen ko falocoˈ, masemeray kita cingranan. O roma tamdaw ano mararaw kita i, patalahkalay to mihadidiay falocoˈ, tada miakoˈiday kita cingranan. Miakoˈiday kita to pakingkiway a singsi mihadidi padama kitanan cipinang a micada ato misaka dademak to kimad no Fangcalay Cudad. Manaokaniw, sakakaay aakoˈiden ita ci Yihofa paihkalay to mihadidiay falocoˈ i kitanan.—Loma 2:4.

2. Itini maanan a pakayraan paihkal to mihadidiay falocoˈ cowa ko madoloay alatek?

² Soˈliˈlin maolahay kita paihkal ko tao to mihadidiay falocoˈ, kawra ano o kita ko mamihaen to demak i, latekay cowa ko madoloay. Tinakoen, ano masoot ko rakat no paliding i, pasangaran nanay kita rihaday ko falocoˈ, mangalefay ano matayoayto kita i, marawraway ko falocoˈ. Ano pakararaw ko tao kitanan i, madoloay a maketer kita alatek. Soˈliˈlin mikiˈokay ko Kawas papaira to faelohay hekal, kawra nolatekay pasangaray a mitatala kita. Ciharatengay kiso ira ko mihadidiay falocoˈ han? Onini lalakaw sasomowal o maanan ko tatodong no mihadidiay ko falocoˈ, ato misamaanay hano tada masakalimlaan konini capeling. Sasomowalho ko lalakaw, mamisamaan kita palahad to mihadidiay falocoˈ.

3. Ano mapakararaw no tao i, wa ira ko masamaanay a harateng no mihadidiay a tamdaw hani?

³ Haratengen hena ngaˈay kita i maanan a sepat pakayraan paihkal to mihadidiay falocoˈ. Saka cecay, ira ko mihadidiay falocoˈ a  tamdaw cowa ka ranikay mangolaw. Ano maroero anca mapakararaw no tao i, mihadidiay a tamdaw papadadotoc a rihaday ko falocoˈ, cowa ko mamiˈodis. Itini Fangcalay Cudad, ‘cowa ka ranikay mangolaw’ onini a sowal sakinacecay masadak i, ci Yihofa ko nisowalan. Sowal no sinael ci Yihofa ‘siniˈadaay, sidaˈitay to tamdaw a Kawas, cowa ka ranikay mangolaw, iraay ko madimadiay a olah, tada ngaˈayay tiˈeren.’—Kasadakan 34:6.

4. O mihadidiay a tamdaw aira ko masamaanay a waywayan itini pitalaan?

⁴ Saka tosa, o mihadidiay a tamdaw rihadayay ko falocoˈ a mitala. Ano halafinay a mitala i, iraay ko mihadidiay falocoˈ a tamdaw cowa ka carirawen anca maˈefangen. (Patnakay 7:8) Itini i adihayay pakayraan o mamihadidi kita mitala. Tinakoen, ano caciyaw ko tao i, hadidien ita mitengil, aka a miketon to sowal. (Yopu 36:2) Ano padama to sito cipinang to maanan a kimad no Fangcalay Cudad ato miremo to tatiihay nanaman i, papairaen ita ko mihadidiay falocoˈ.

5. Ngaˈayho kita itini maanan a pakayraan patalahkal to mihadidiay falocoˈ?

⁵ Saka tolo, o mihadidiay falocoˈ a tamdaw cowa ka caloh sa ko demak. Manaokaniw, o roma pakayraan, o kakalamkam kita a midemak. Kawra o mihadidiay a tamdaw itini pidemak to masakalimlaan a tayal i, cowa ko mamacaloh a misatapang, cowa ko mamikasimaan to demak. Aisalakat cingra milimasmas to toki, misongilaˈ a misahalaka, misaadihay to toki milahci to tayal.

6. Ano tahalifa to sapalifet anca pasangar i, mamisamaan ko pidemak no mihadidiay ko falocoˈ a tamdaw?

⁶ Saka sepat, iraay ko mihadidiay falocoˈ a tamdaw kakiemel a miemem, eca ka ngaliwngiw. Manaokaniw, ano tahasiˈayaw to sapalifet kita i, ngaˈayay mikilim to ngaˈayay widang mifowah to nafalocoˈan. Kawra mihadidiay ko falocoˈ a tamdaw mamiemem to sapalifet, misaˈicel a mitawmec to tawlikay falocoˈ. (Kolosay 1:11) O finawlan ni Yihofa itini sepat a pakayraan mamipaihkal to mihadidiay falocoˈ. Dotoc lengoen ita ko pina lalangian.

7. Mikitini Yakop 5:7, 8, o mihadidiay falocoˈ hano masakalimlaan aki? (Nengnengen ko coka.)

⁷ O mihadidiay falocoˈ o sakalidong a capeling. Malecad to nolitengan madimadiay sikawdan, mamihadidi kita mitala to pipalaˈosi ni Yihofa to sakiˈok Ningra. (Hipray 6:11, 12) Sapatinakoan no Fangcalay Cudad kita to maomahay tamdaw. (ˈOsien ko Yakop 5:7, 8.) O maomahay tamdaw misaˈicelay a paloma ato mipananom, soˈliˈlin cowa ka fanaˈ cingra to hahacowa a lomahad ko pinaloma, kawra mihadidiay cingra mitala, pakasoˈlin to aira ko papanayen. Malecadayto, soˈliˈlin kita cowa ka fanaˈ to ‘hahacowa romiˈad ira ko Tapang,’ kawra mamisaˈicel kita dademak to tayal no Krisciyang. (Matay 24:42) Ano mihadidiay kita mitala, papakasoˈlinen ci Yihofa aitini misaˈosian Ningra a toki palaˈosi to polong mikiˈokan Ningra. Ano maˈefangen kita, caayto ka sapitalaaw alatek, palidlid sato a miliyas to soˈlinay kimad. Alatek misatapangto kita micangacang to tangsolay palipahak kitanan a demak. Kawra ano patalahkal kita to mihadidiay a falocoˈ, wa miemem tahatolas, salikor malidongto kita.—Mika 7:7; Matay 24:13.

8. Ano ira ko mihadidiay falocoˈ hano ngangaˈay ko kalalaˈed ato tao? (Kolosay 3:12, 13)

⁸ O mihadidiay falocoˈ papadama kitanan ngaˈay ko kalalaˈed ato tao. Ira ko mihadidiay falocoˈ ita i, mamisongilaˈ mitengil to sowal no tao. (Yakop 1:19) Ira ko mihadidiay falocoˈ ita i, mamicowat to sakadipayal. Tinakoen, ano maroero kita i, cowa ko mamacaloh, somowal to midokaˈay to tao a sowal, ano makariˈang no tao i, cowa ko raranikay a mangolaw. Cowa ko mamiˈodis, ao ‘padadotoc masasihadidi, masasisodod.’—ˈOsien ko Kolosay 3:12, 13.

9. Ano hamamisaˈosi i, o mihadidiay falocoˈ iraay ko manan a sapadama kitanan hani? (Taneng 21:5)

⁹ Ira ko mihadidiay falocoˈ ita, mamataneng ko pisaˈosi. Cowa ko mamacaloh ko demak, ao mamipalak to toki a micekiw, halo mifolfol to cowa ka lecad a papiliˈen, iraay ko manan kangaˈayan iraay ko manan katatiihan. (ˈOsien ko Taneng 21:5.) Tinakoen, ano mikilimay to katayalan, alatek ira saho ko katayalan tangsol a micada kita, soˈlin o mamacara ko pidoko ci Yihofaan, alatek caayto ko sapitalaaw kita. Kawrira ira ko mihadidiay falocoˈ, o mamipalak to toki misinanot to masasiromaay a pakayraan, mahawpay icowaay kora katayalan? Hakowa ko mamapalak a toki itini i paliding anca i katayalan? Onini a katayalan samaanay mifiyor to paro no lomaˈ ato kalalaˈed ita ci Yihofaan? Ira ko mihadidiay falocoˈ ita, o mamatanengto ko pisaˈosi.

10. Sasamaan ko Krisciyang padadotoc palahad to mihadidiay falocoˈ hani?

¹⁰ Cangacangen ko Kawas padama kitanan palahad to mihadidiay. O cecay a capeling no fangcalay saocor ko mihadidiay. (Kalatiya 5:22, 23) Mansa, ngitangiten ci Yihofa pafeli kitanan to fangcalay saocor, padama kitanan palahad tonini capeling. Kita ano itiniay i maanan a pakayraan madoloay a maˈefangen i, ‘padadotocen mingitangit’ ci Yihofa pafeli to fangcalay saocor, padama kitanan paihkal to mihadidiay. (Luka 11:9, 13) Ngaˈayay ngitangiten ci Yihofa padama kitanan mikitini i pinengneng Ningra minengneng to demak. Ikor no pitolon i, mamisaˈicel kita to romiˈamiˈad paihkal to mihadidiay falocoˈ, papadadotoc kita mitolon halo misaˈicel patalahkal to mihadidiay, papadamaento ni Yihofa kita malo iraay ko mihadidiay falocoˈ a tamdaw, mihaen i, mamalo capelingto no mita ko mihadidiay.

11-12. Samaanay ci Yihofa patalahkal to mihadidiay falocoˈ?

¹¹ Minanam to ngaˈayay taˈarawan i Fangcalay Cudad. I Fangcalay Cudad adihayay ko patalahkalay to mihadidiay falocoˈ a ngaˈayay taˈarawan, ano dotimen ita konini a maˈoningay mamananamto  sasamaan patalahkal to mihadidiay falocoˈ. Salakat, nengnengen ita ko saˈakawangay taˈarawan ci Yihofa, samaanay Cingra patalahkal to mihadidiay capeling.

¹² Itini i Itin mipalakay ci Satan to ngangan ni Yihofa, mitongangan Cingranan caay ko masadafdafay awaay ko olah a Mikowanay. Cowa ka tangsol han ni Yihofa a palaˈafo konini mitowakangay, ao patalahkalay to mihadidiay ato miˈimeray, samanen mafanaˈay Cingra ira ko toki ngaˈ ngaˈayay a misawacay to o sangaˈayay ko pikowan Ningra. Itini tonini a pitalaan a tatokian, o fangcalay ngangan ni Yihofa padadotocay a mapakadit, ˈarawhan padadotocay Cingra mihadidi. Roma i, padadotocay mihadidi a mitala ci Yihofa, toha saka ˈalomanaw no tamdaw milayap to midaˈocay ˈorip. (2 Pitiro 3:9, 15) Tona iraay ko mihadidiay falocoˈ Ningra, o masaˈofaday a tamdamdaw ngaˈayayto a mafanaˈ to Kawas. Ano haratengen ita ko pihadidi ni Yihofa pairaay to maanan a sapalemed i, o mamadoloto kita mihadidi a mitala, tangasa i pipalaˈafoan ni Yihofa tonini tatiihay a hekal.

13. Itini pihadidi, samaanay ci Yis malefot ko pitodong to Wamaan hani? (Nengnengen ko coka.)

¹³ Itini pihadidi, malefotay ci Yis mitodong to Wamaan. Tayni ci Yis i fafekang no sera i, mihadidiay to tamdaw cingra, mangalef misiˈayaw to halisamangahay a mitatiliday ato Farisay a tamdaw, maedeng cowa ko madoloay. (Yohani 8:25-27) Kawrira, ci Yis matiyaay to Wama cowa ka ranikay a mangolaw. Ano samsamen no tao pakangolaw cingra i, cowa ka piˈodis. (1 Pitiro 2:23) Ano mapalifet padadotocay ci Yis mihadidi, cowa ka ngaliwngiw, ‘ano lokesen no ciraraway tamdaw i, mihadidiay cingra,’ mansa palimoˈotay ko Fangcalay Cudad kitanan ‘sinanoten miharateng ko taˈarawan ningra’ sanay. (Hipray 12:2, 3) Ira ko sapadama ni Yihofa, o ngangaˈay kita patalahkal to mihadidiay falocoˈ, miemem to masamaamaanay a sapalifet.

14. Patalahkalay to mihadidiay ci Apraham, mikitini taˈarawan ningra mamananam ita ko maanan? (Hipray 6:15) (Nengnengen ko coka.)

 ¹⁴ Alatek halafinayto kita mitala to sakahererekaw no hekal ni Satan, kawra nohatini calemcemay to tatahira ko ˈorip ita hokira. O maanan ko papadama kitanan padadotoc mihadidi a mitala hani? Nengnengen ko taˈarawan ni Apraham. Ci Apraham 75 ko mihecaan awaayho ko wawa, kawra mikiˈokan ni Yihofa cingra: ‘O papalemeden Ako misaˈaloman ko wawa ato teloc iso.’ (Satapangan 12:1-4) Maˈaraway ni Apraham ko nika laˈosi nonini sakiˈok han? Milakowit ci Apraham to Iufratis ˈAlo i, mitalaayho to 25 miheca, ngaˈ maˈaraway ko pidemak no Kawas to kafahkaˈan ciwawa ci Isakan. Ikor no 60 miheca i, o fofo ni Apraham ci Isau aci Yakop mihofocanto. (ˈOsien ko Hipray 6:15.) Nikawrira, itini hakelong no ˈorip ni Apraham cowaho ka maˈaraw ko fofofofo ningra malo taˈangayay kitakit, cowaho ka layap ningra ko mikiˈokan no Kawas to papafelien cingranan a sera. Soˈliˈlin hatira, madimadiay a Aprahaman iraay ko tangongolay a kalawidang aci Yihofaan. (Yakop 2:23) Ikor patikolto maˈorip ci Apraham i, o mamafanaˈ cingra pakayniay i pakasoˈlinay falocoˈ ato pihadidi ningra milayap ko kasakitakit to adihayay sapalemed, lalipahakto cingra itiya. (Satapangan 22:18) O maanan ko mananamay ita hani? Alatek cowa ko tatangsol a maˈaraw malaˈosi ko mikiˈokan ni Yihofa, kawra ano matira kita ci Aprahaman a mihadidi i, o papasoˈlinen ita ci Yihofa to cowa ko papalifon aca kitanan nohatini, ikor itini faelohay hekal papafeli Cingra to mikikakaay ko nika adihay a sapalemed.—Marko 10:29, 30.

15. Itini notekedan a picekiw i, ngaˈay kingkiwen ko maanan?

¹⁵ Ilalomaˈ no Fangcalay Cudad adihayay ko patalahkalay to mihadidiay a ngaˈayay taˈarawan.  (Yakop 5:10) Ngaˈayay kiso mitanam a misahalaka, misinanot a micekiw to pakayniay cangranan a maˈoningay. b Tinakoen, ci Tafiti kaemangho i, minilnilanto mamalo hongti no Israil, kawra halafinayho cingra a mitala ngaˈ mala hongtiay. Ci Simiyon aci Anna itini halafinay a pitala to kaira ni Misiya i, padadotocay a madimadi midoko ci Yihofaan. (Luka 2:25, 36-38) Micekiw kiso tonini a maˈoningay i, sinanoten a miharateng: “Onini a tamdaw hano patalahkal to mihadidiay falocoˈ hani? Malayapay ningra ko maanan epoc hani? Sasamaan kako a minanam cingranan hani?” Roma i, ngaˈayay mikitini i tatiihay a tinakoan minanam to sapasifanaˈ. (1 Samuil 13:8-14) Haratengen hena: “Onini a tamdaw hano awa ko mihadidiay falocoˈ hani? Pairaay to maanan a teloc hani?”

16. Ano ira ko mihadidiay falocoˈ i, pairaay to maanan a epoc hani?

¹⁶ Saharateratengen ko epoc no mihadidiay. Ano ira ko mihadidiay falocoˈ ita i, o lalipahak, rarihaday, mihaen i, ciepocay to sakatanoktok no tireng ato falocoˈ. Ano mihadidi kita to tao i, ngangaˈay ko kalalaˈed cangranan, o mamakedec ko polong a kasakopang a tamdaw. Ano mapakararaw no tao kita i, cowa ito ko raranikay a mangolaw, cowa ito ko mamangalef a tatiih ko demak. (ˈOlic 37:8 ato roma pihongyak; Taneng 14:29) Ora masakalimlaan i, ano ira ko mihadidiay falocoˈ ita, o mitodongay to Wama ci Yihofaan, mamatongal ko nika piingid Cingranan.

17. Mamisetek kita to falocoˈ samaan ko pidemak hani?

¹⁷ Mihadidiay falocoˈ onini a capeling misolotay to tamdaw, papaira to adihayay haepoc ita. Soˈliˈlin patalahkal to mihadidiay cowa ko madoloay nolatek, kawra tadiˈecen ko sapadama ni Yihofa, ngangaˈay kita padadotoc palahad tonini a capeling. Itini pihadidi a mitala to hakaira no faelohay hekal i, pakasoˈlinen ita ‘ci Yihofa minengnengay to mikangodoay Cingranan a tamdaw, midimokosay to mitalaay to madimadiay a olah Ningra a tamdaw.’ (ˈOlic 33:18) Nanay kita maemin misetek to falocoˈ, padadotoc micaˈedong to mihadidiay onini a makapahay capeling.