1. ¿Chumngelu am falintuquefiyiñ ñochi duamngechi che?

 COM iñchiñ ayüqueiñ taiñ trür müleal ñochi duamngechi che iñchiñ. Feitachi che illcufemquelaingün feimu respetafali. Ca falintufiyiñ taiñ nieleteu mu paciencia huelulcahun mu iñchiñ. Ca mañumtuquefiyiñ ti che taiñ enseñaeteu mu Biblia. Quiñeque mu cüdautuiñ chi taiñ inayal Biblia ñi feipin, huelu nieleiñmu ta paciencia taiñ enseñayaeteu. Doi mai mañumtuquefiyiñ ta Jehová taiñ nieleteu mu paciencia (Rom. 2:4).

2. ¿Chem dungu mu doi cüdautuafuiñ taiñ nieal paciencia?

² Iñchiñ falintuquefiyiñ ñochi duamngechi che, huelu cüdautuafuiñ taiñ femngechi chengeal. Por ejemplo, alüñma esperaliyiñ ti micro fei aporiaucüleliyiñ, cüdautuafuiñ taiñ nieal ta paciencia. Cafei quiñe che huesa pieliyiñmu, cüdautuafuiñ taiñ illcufemnoal. Ca femngechi cüdautuafuiñ taiñ ñochi duam mu esperayal ñi acual ti hue mapu. Com iñchiñ ayüqueiñ taiñ ñochi duamngeal, feimu tüfachi troquiñ mu peaiñ chumngechi pengelafuiñ taiñ ñochi duamngen ca chumngelu fente falin-ngei taiñ femal. Ca peaiñ chumngechi doi nieafuiñ ta paciencia.

3. ¿Chumquei quiñe che ñochi duamngelu huesa pingen mu?

³ ¿Chumqueingün ñochi duamngechi che? Peaiñ meli dungu. Hune, illcufemquelai. Chem pingefule rume tüngcülequei ca huiñolelquetulafi tañi huesa femeteu. Jehová ca illcufemquelai. Biblia feipi quisu mu: “Jehová, quiñe Ngünechen cutranduamyechequelu, cutranpiuqueyechequelu, ca lladcüfemquenolu, rume piuqueyechequelu ca rüfngelu” (Éx. 34:6).

4. Ñochi duamngechi che mülefule ñi üngümcüleal, ¿chumquei?

 ⁴ Epu, ñochi duamngechi che tüngcülen mu üngümcülequei. Alüñmale tañi üngümnieel, feitachi che lladcüyauquelai, tüngcülequei (Mat. 18:26, 27). Iñchiñ fentren dungu mu mülei taiñ üngümcüleal tüngcülen mu. Por ejemplo, quiñe che nütramcaeliyiñmu, mülei taiñ üngümcüleal ca taiñ cüme allcütuafiel, femngechi taiñ catrütunoafiel taiñ chem pieteu (Job 36:2). Cafei quiñe taiñ estudiante cüdautule tañi elcünual quiñe huesa huimtun ca ñi adümafiel ñi feipin Biblia, nielelafiyiñ paciencia.

5. ¿Ca chumquei ñochi duamngechi che?

⁵ Cüla, ñochi duamngechi che aporiauquechi femquelai. Quiñeque dungu mülei ñi matu femngeal. Huelu ti ñochi duamngechi che petu ñi femnoel quiñe falin dungu, aporiauquechi femlayai, huelu mai cüme raquiduamai chumngechi ñi femal.

6. ¿Chumquei ñochi duamngechi che rupan mu huesaque dungu mu?

⁶ Meli, ñochi duamngechi che rupale huesaque dungu mu fillpiyauquelai, doi mai eluuquei ñi cüme chaftuafiel. Huesaque dungu mu rupaliyiñ, nütramcayafuiñ quiñe cüme hueni taiñ chum duamcülen. Huelu ñochi duamngeliyiñ, ca raquiduamaiñ cümeque dungu taiñ rupamequen ca ayühunquechi serfiafiyiñ Jehová (Col. 1:11). Iñchiñ taiñ cristianongen, rume falin-ngei taiñ ñochi duamngeal. ¿Chumngelu feipiqueiñ? Peafiyiñ.

7. Ñi feipin Santiago 5:7, 8, ¿chumngelu fente falin-ngei taiñ ñochi duamngeal? (Ca inaduamnge ti adentun).

⁷ Taiñ afnoachi mongen taiñ nieal, mülei taiñ ñochi duamngeal. Nieliyiñ paciencia, cüme duam mu esperaleaiñ Chau Dios ñi femtripayal ñi feipicünuel chumngechi  ñi femquefel cuifiqueche (Heb. 6:11, 12). Biblia feipi taiñ üngümcüleal chumngechi ñi femquen quiñe che cüdauquelu mapu (papeltunge Santiago 5:7, 8). Ti cüdauquelu mapu nehuentu cüdauquei, sembraquei ca huitrucoquefi, huelu quimlai chumül ñi noyüal ti quetran. Feimu ñochi duam mu üngümcülequei, quimnielu am ñi huefpayal ti quetran. Iñchiñ ca femngechi quimlaiñ ‘chem antü ñi cüpayal taiñ Ñidol’, huelu nehuentu cüdauqueiñ Chau Jehová mu (Mat. 24:42). Quimnieiñ Jehová ñi femtripayal tañi feipicünuel, feimu ñochi duam mu esperaniefiyiñ. Huelu nienoliyiñ paciencia, ¿chem rupayafui? Cansayafuiñ taiñ esperayal ca ñochiquechi famtripayafuiñ Jehová mu. Cafei doyümafuiñ taiñ cüme rupaleal müten. Huelu ñochi duamngeliyiñ, nehuentuleaiñ puule ñi afal ti müleyechi dungu mapu meu, fei montuaiñ (Miq. 7:7; Mat. 24:13).

8. Ñochi duamngeliyiñ, ¿chumngechi quelluaiñmu taiñ cüme yeucüleal caquelu che iñchiñ? (Colosenses 3:12, 13).

⁸ Nieliyiñ paciencia, cüme yeucüleaiñ caquelu che iñchiñ. Ñochi duamngeliyiñ, cüme allcütuafiyiñ ñi feipin caquelu pu che (Sant. 1:19). Ca femngechi cümelcaucüleaiñ caquelu che iñchiñ. Cafei cüdaungechi dungu mu rupaliyiñ huelu ñochi duamngeliyiñ, chumlayaiñ rume ca chem pilayaiñ rume taiñ huesa duamelafiel caquelu pu che. Ca huesa duameleliyiñmu quiñeque che, illcufemlayaiñ. Taiñ huesa femeteu ca femngechi femlayafiyiñ, doi mai ‘illcutumequeulayaiñ ca hueluquentu perdonahuaiñ com piuque mu’ (papeltunge Colosenses 3:12, 13).

9. Ñochi duamngeliyiñ, ¿chumngechi quelluaiñmu taiñ cüme femal? (Proverbios 21:5).

⁹ Nieliyiñ paciencia, cüme raquiduamaiñ taiñ femal. Petu taiñ femnon quiñe dungu aporiaulayaiñ, huelu mai cüme raquiduamaiñ taiñ chumal (papeltunge Proverbios 21:5). Por ejemplo, nieliyiñ paciencia, cüme dulliaiñ chem cüdau taiñ llohual. Ofrecelngeliyiñ quiñe cüdau, lloufemlayafiyiñ. Hune raquiduamaiñ cheu mülei ti cüdau ca tunten hora taiñ cüdahual. Ca ramtuhuafuiñ: “¿Llouli tüfachi cüdau catrütupeafeneu mai tañi müleal tañi familia iñchiñ ca tañi hueniyeafiel Jehová?”. Huelu nienoliyiñ paciencia, lloufemafuiñ chem cüdau rume. Feimu faltayafuiñ trahun mu ca müte amuldunguhuelayafuiñ, müna huesa. Feimu taiñ cüme femal mülei taiñ ñochi duamngeal.

10. ¿Chumaiñ taiñ doi nieal paciencia?

¹⁰ Ngillatuaiñ taiñ doi nieal ta paciencia. Tati nielu Chau Dios ñi nehuen ñochi duamngequei (Gál. 5:22, 23). Feimu Jehová feipiafiyiñ taiñ eluaeteu ñi nehuen ca taiñ adnieaeteu. Feimu cüdautuliyiñ taiñ ñochi duamngeal, llellipunieafiyiñ Jehová taiñ eluaeteu ñi nehuen femngechi taiñ ñochi duamngeal (Luc. 11:9, 13). Ca llellipuafuiñ Jehová taiñ quelluaeteu cüme raquiduamal quisu reque. Huelu deu llellipuliyiñ, fill antü mülei taiñ cüdahual femngechi taiñ ñochi duamngeal. Iñchiñ llellipuliyiñ ca eluuliyiñ taiñ ñochi duamngeal, Jehová ta quelluaiñmu.

11, 12. Jehová, ¿chumngechi pengelquei ñi nien ta paciencia?

¹¹ Raquiduamaiñ Biblia mu tripachi che inayentufalngelu. Biblia nütramcai fentren che ñochi duamngequelu. Inaduamliyiñ ñi femün engün, quimürpuafuiñ  chumngechi taiñ ñochi duamngeal. Feula ngüneduamafiyiñ ñi femün quiñeque engün. Hunelu mu peaiñ Jehová chumngechi ñi pengelquen paciencia.

¹² Raquiduamaiñ tañi rupan jardin de Edén mu. Huecüfü coila dalluntucufi Jehová ñi üi ca feipifi Eva Chau Dios ñi cüme ngünenienofiel ca piuqueyechequelai pi. Huelu Jehová pürüm apümcalafi ta Huecüfü. Eluhui ñi nieal ta paciencia ca ngünehui, ¿chemu am? Huecüfü re coilacafui, feimu Jehová elcünufi tiempo ñi quimfalcünual Huecüfü ñi coilatumequen. Fantepu mu, Jehová petu aguantalei ñi huesa dunguyemequengen. ¿Ca chumngechi Jehová pengelquei tañi nien ta paciencia? Elufi ta tiempo tati pu che ñi quimaeteu, femngechi ñi nieal engün rumel mongen (2 Ped. 3:9, 15). Raquiduamliyiñ Jehová ñi nien mu ta paciencia, fei cüdautulayaiñ taiñ esperanieafiel Jehová ñi antü.

13. Mülepalu mapu mu, ¿chumngechi pengeli tañi nien ta paciencia Jesús? (Ca inaduamnge ti adentun).

¹³ Jesús ñochi duamngequei Jehová reque. Peafiyiñ ñi chumün mülepalu mapu mu. ¿Cüdautupelafui tañi nieal paciencia pu fariseo mu ca pu adümquefilu ti ley? (Juan 8:25-27). Huelu Jesús inayentuquefi ta Jehová, feimu lladcüfemquelafui. Quisu huesa pieteu mu tañi pu caiñe, huiñoldungulai huesaque pin mu (1 Ped. 2:23). Jesús cüme duam mu aguantai cüdaungechi dungu mu ñi rupan. Feimu Biblia feipieiñmu: “Cüme raquiduamafimün ta Jesús. Fei afeluulai pu culpafe ñi rume caiñetudungueteu” (Heb. 12:2, 3). Jehová tañi quellun mu chem dungu mu rume rupafuliyiñ, cüme duam mu aguantayafuiñ.

14. ¿Chem quimeltueiñmu ta Abrahán ñi nien mu ta paciencia? (Hebreos 6:15; ca inaduamnge ti adentun).

 ¹⁴ Quiñeque iñchiñ fütra cuifi mu esperamequefiyiñ ñi acual Jehová ñi antü, huelu petu aculai. Fei raquiduamafuiñ chi: “Lali hula, acuai Jehová ñi antü” piafuiñ. Fei, ¿chem quelluafeiñmu taiñ nieal ta paciencia ca taiñ cüme duam mu üngümcüleal? Peafiyiñ ñi rupan ta Abrahán. Jehová feipieyu: “Quiñe fütra troquiñche femcünuayu” pieyu. Huelu Abrahán deu füchafui, 75 tripantu niefui ca nielafui ta yall (Gén. 12:1-4). Fei Abrahán, ¿pepefi mai ñi feipicünueteu ta Jehová? Com pelafi, pefi quiñeque müten. Deu rumelu Éufrates leufü mu, Abrahán mülefui ñi esperayal 25 tripantu ñi choyüngeal tañi fotüm Isaac. Ca 60 tripantu ca rupafui tañi choyüngeal tañi epu nieto, Esaú ca Jacob (papeltunge Hebreos 6:15). Abrahán pelafi com tañi cüpanche quiñe fütra troquiñche reque ca pelafi chumngechi ñi conpun engün ti cüme mapu mu. Femfulu rume, Abrahán müna cüme hueniyequefui ta Jehová (Sant. 2:23). Raquiduamnge huiñomongetule ta Abrahán. Quimai quisu tañi feyentun mu ca ñi nien mu paciencia com pu che mapu mu cümelcangei (Gén. 22:18). ¿Chem quimiyiñ tüfa? Abrahán reque com pelayafiyiñ chi ñi femtriparpun com ñi feipicünuel ta Jehová. Huelu mülei taiñ nieal ta paciencia, fei maneluucüleaiñ Jehová taiñ cümelcayaeteu feula ca cüpalechi antü mu (Mar. 10:29, 30).

15. Papeltufiliyiñ Biblia, ¿chem inaduamafuiñ?

¹⁵ Biblia mu mülei fentren che ñochi duamngequefulu (Sant. 5:10). Iñchiñ doi  cüme inaduamafuiñ ñi femün engün. b Peafiyiñ ñi rupan quiñeque engün. David rume huechengelu müten feipingei tañi reyngeal, huelu esperafui fentren tripantu tañi reycünungeal. Ca femngechi Simeón ca Ana petu ñi esperaniefiel ñi cüpayal ti Mesías, ayühunquechi serfifingu Jehová (Luc. 2:25, 36-38). Papeltufiliyiñ ñi femün engün, ramtuhuaiñ: “¿Chem quellueyu feitachi pu che ñi ñochi duamngeal? ¿Chem cümeque dungu rupai tañi ñochi duamngen mu? ¿Chumngechi inayentuafuiñ?”. Ca inaduamafuiñ ñi femün pu ñochi duamngenochi pu che, fei entuafuiñ falinque quimeltun (1 Sam. 13:8-14). Ramtuhuafuiñ: “¿Chumngelu am nielaingün ta paciencia? ¿Chem huesaque dungu mu rupafuingün tañi nienon mu ta paciencia?”.

16. ¿Chem cümeque dungu rupayaiñ ñochi duamngeliyiñ?

¹⁶ Raquiduamaiñ cümeque dungu taiñ rupayal ñochi duamngeliyiñ. Femngechi chengeliyiñ, tüngcüleaiñ ca ayüucüleaiñ. Ca femngechi nieliyiñ paciencia, quelluaiñmu taiñ cümelcaleal taiñ raquiduam ca taiñ cülfüncüleal. Nielfiliyiñ ta paciencia caquelu che, doi cüme yeucüleaiñ ca taiñ trahunche doi quiñeucüleai. Quiñe che huesa pieliyiñmu, illcufemlayaiñ femngechi doyelcülerpulayai ti dungu (Sal. 37:8, nota; Prov. 14:29). Doi mai ñochi duamngeliyiñ, inayentuafiyiñ ta Jehová ca doi fülconcüleaiñ quisu mu.

17. ¿Chem eluhuaiñ taiñ femal?

¹⁷ Rume ayüfali taiñ ñochi duamngeal. Quiñeque mu cüdautuafuiñ taiñ nieal ta paciencia. Huelu Jehová ñi quellun mu femafuiñ llemai. Ñochi duam mu esperanieafiyiñ ñi acual ti hue mapu. Ca maneluucüleaiñ “Jehová ngüneduammequefi tañi pu yamnieteu, tati pu maneluuquelu tañi nor piuqueyeaeteu” (Sal. 33:18). Feimu caque quiñeque iñchiñ eluhuaiñ taiñ ñochi duamngeal.