1. ¿Kunatsa pacienciani jaqenakampïñajj gustistu?

 TAQENIRUW pacienciani jaqenakamp parlañajj gustistu. Jan colerasis pacienciamp suytʼapki ukanakarojj respettanwa. Pantjasktan ukhajj pacienciamp uñjapkistu ukanakarojj wal yuspärtanjja. Bibliat yatichkistäna uka jilatarus jan ukajj uka kullakarus wal yuspärtanjja, jupanakajj jan entiendiñ puedkayätan, Biblian yatichäwinakap jan creykayätan, ukarjam sarnaqañas jiwasatak chʼamäkäna ukhajja, pacienciampiw uñjapjjestäna. ¡Jukʼampis Jehová Diosaruw jiwasar pacienciamp uñjatapat wal yuspärtanjja! (Rom. 2:4).

2. ¿Kuna horasanakas paciencianïñajj chʼamakïspa?

² Mayninakan paciencianïpjjatap wali valoranitwa uñjtanjja. Ukampis paciencianïñajj waktʼjjestu ukhajja, paciencianïñajj janiw faciläjjaspati. Trancaderajj wal utjki ukhajj paciencianïñajj chʼamakïspawa, yamas qheptʼatäjjtan ukhaw paciencianïñajj jukʼamp chʼamäjjaspa. Mayninakajj colerayapkistu ukhajj inas jukʼamp colerasjjsna. Inas awisanakajj Jehová Diosajj arsuwayki uka machaq mundojj janirakis jankʼak purinkitejjä sasin amuyjjaraksna. ¿Taqenejjay paciencia chuymanïñ muntanjja? Aka yatichäwinjja, paciencia chuyman jaqejj kunjamasa, kunatsa paciencianïñajj wali importante ukanakwa yatjjataskañäni. Jukʼamp paciencianïñatakejj kunanakas yanaptʼistaspa uka toqetwa mä qhawqha ewjjtʼanak uñjaskarakiñäni.

3. ¿Mayninakajj colerayapki ukhajj kunsa pacienciani jaqejj luri?

³ Pacienciani jaqejj kunjamasa uk pusi toqet uñjañäni. Maya, janiw ratuk coleraskiti. Estresatäki ukhajj tranquilokïñatakiw chʼamachasi, mayninakajj colerayapki ukhas janiw ukhamat  ukham kuttʼaykiti. “Jan ratuk colerasiri” siski ukajja, Jehová Diosat parlañatakiw nayrïr kut Biblian aytasi, ukan akham siwa: “Jupajj khuyaptʼayasiri, sinttʼasiri, jan ratuk colerasiri, wali munasiri ukhamarak jan jaytjasiri, arupar phoqeri [Diosawa]” sasa (Éx. 34:6, nota).

4. ¿Suytʼañapäki ukhajj kunsa pacienciani jaqejj luri?

⁴ Paya, pacienciampiw suytʼi. Mä kunas jan jankʼak lurasjje ukhajja, tranquilokïskiwa, janiw jankʼak coleraskiti (Mat. 18:26, 27). Walja horasanakanwa pacienciampi suytʼañajj wakisispa. Maynejj parlkistu ukhajj tukuyañapkamaw pacienciamp istʼañasa (Job 36:2). Mä yateqerisar Biblian mä yatichäwipat amuytʼayañatakisa jan ukajj mä jan wali luräwi apanukjjañapatak yanaptʼañatakis paciencianïñasarakiwa.

5. ¿Kunjamatsa paciencianïtas uñachtʼayaraksna?

⁵ Kimsa, janiw jan amuytʼasisajj jankʼak kuns lurkiti. Yaqhep horasanakanjja jankʼakiw kun lurañas wakisi. Ukampis wali importante mä luräwi lurañapäki ukhajja, pacienciani jaqejj janiw jan amuytʼasisajj ratuk qalltkiti, janirakiw ratuk tukuyañatakejj apur apur lurkiti. Jan ukasti kunsa lurani uk amuykiptʼañatakejj tiempo apstʼasi, ukatsti sum lurañatakejj qhawqha tiempos wakisi ukarjamaw luri.

6. ¿Kunsa pacienciani jaqejj yantʼanakan uñjaskasasa jan waltʼäwinakan uñjaskasas luri?

⁶ Pusi, yantʼanak aguantañatakiw chʼamachasi. Uka toqet parlkasinjja, paciencianïñajj aguantañatakiw yanaptʼistu. Confiyktan uka amigosar llakinakas awistʼasiñasa, jan waltʼäwinakan uñjasisajj kunjamas chuymasan jikjjatastan ukanak awistʼasiñas walikïskiwa, janiw jan walïkiti. Ukampis pacienciani mä jaqejja, kuna sumanakatï jakäwipan utjki ukanakat piensañatakiw chʼamachasi, Jehová Diosarus kusisitaw serviskakini (Col. 1:11). Yatjjataniwayktan uka pusi toqenakanwa cristianonakajj paciencianïtas uñachtʼayañasa. ¿Kunatsa? Uka toqet mä qhawqhanak uñjañäni.

7. Santiago 5:7, 8 textorjamajj ¿kunatsa paciencianïñajj wali wakiskiri? (Dibujonak uñjjattʼarakïta).

⁷ Salvasiñasatakejj paciencianïñasawa. Diosat jan jitheqtiri nayra servirinakjamarakiw Diosajj arsutanakap phoqañap pacienciampi suytʼañasa (Heb. 6:11, 12). Bibliarjamajja, yapuchirïksnas ukhamätanwa (Santiago 5:7, 8 liytʼäta). Yapuchirejja, yapuchasasa umamp qarpjjatasas wal trabaji, ukampis kunapachas yapojj jiltani uk janiw yatkiti. Ukatwa pacienciampi suytʼi, achunak apthapiñat janiw payachaskarakiti. Cristianonakampejj ukhamarakiwa, ‘kunürus Tatitojj jutani uk janis yatipkchejja’ Jehová Diosatakejj wal trabajipjje (Mat. 24:42). Cheqas jiwasajj pacienciampiw suytʼtanjja, Jehová Diosan taqpach promesanakapajj tiempoparuw phoqasini sasaw taqe chuym suytʼtanjja. Jiwasatï jan paciencianïksna ukhajja, janiw suytʼjjsnati, Jehová Diosats jukʼat jukʼatwa jitheqtaraksna. Mä rat kusistʼaykistu ukanakar chuym uchañwa qalltjjaraksna. Ukampis paciencianïñäni ukhajja, tukuykamaw aguantañäni, salvatarakïñäniwa (Miq. 7:7; Mat. 24:13).

8. ¿Kunjamsa paciencianïñajj mayninakamp sum apasiñatak yanaptʼistu? (Colosenses 3:12, 13).

⁸ Paciencianïñajj mayninakamp sum apasiñatakiw yanaptʼistu. Jiwasatï paciencianïñäni ukhajja, mayninakajj parlapkistu ukhajj sumwa istʼañäni (Sant. 1:19). Paciencianïtasat mayninakampis sumankarakiñäniwa. Estresatäktan ukhajja, janiw jan amuytʼasisajj jankʼak kuns lurkañäniti, janirakiw mayninakar chuym ustʼayir arunaks arskañäniti. Maynejj chuym ustʼayistani ukhasa, janiw jankʼakejj coleraskañäniti, ni ukhamat ukhamsa kuttʼaykañäniti. Antisas maynit maynikamaw aguantasiñäni, taqe chuymaw perdonasirakiñäni (Colosenses 3:12, 13 liytʼäta).

9. ¿Kunjamsa paciencianïñajj suma amtanakar puriñatak yanaptʼistu? (Proverbios 21:5).

⁹ Paciencianïñajj suma amtanakar puriñatakiw yanaptʼarakistu. Jankʼaki jan amuytʼasis kun lurañat sipansa, kun lurañas wakisispa uk amuytʼañatakejj tiempo apstʼasiñasawa (Proverbios 21:5 liytʼäta). Jiwasatï mä trabajo thaqaskstan ukhajja, inas nayraqat uñstkistu uka trabajo katoqasiñ munsna, uka trabajo katoqasisajj inas yaqhep tantachäwinakar jan sarjjsnati jan ukajj jukʼak predikjjsna. Ukampis paciencianïñäni ukhajja, trabajosajj kawkinkisa, qhawqha horas trabajiñäni, kunjamsa familiasarusa Jehová Diosamp sum apasitasarus jan waltʼayani ukwa amuytʼañasa. Paciencianïñajj jan wali amtanakar jan puriñatakiw yanaptʼistani.

10. ¿Kunsa jukʼamp paciencianïñatakejj lursna?

¹⁰ Jukʼamp paciencianïñatakejj Jehová Diosaruw yanaptʼap mayisiñasa. Paciencianïñajj espíritu santon achup taypinkiwa (Gál. 5:22, 23). Ukhamajj Jehová Diosaruw espíritu santop mayisiñasa, espíritu santon achuparjam sarnaqañatak yanaptʼita sasaw mayisiñasaraki. Mä jan walin uñjasktan ukhatï paciencianïñajj jiwasatak chʼamächi ukhajja, espíritu santo ‘mayiskakiñasawa’ (Luc. 11:9, 13). Kunjamtï Jehová Diosajj taqe kuns uñjki ukham uñjañatakiw orasiraksna. Orasjjasajja sapüru paciencianïñatakiw chʼamachasiñasaraki. Jiwasatï Jehová Diosar paciencianïñatak yanaptʼa mayiskakiñäni, paciencianïñatak chʼamachasiskakiñäni ukhajja, jukʼat jukʼat jukʼamp paciencianëjjañäniwa.

11, 12. ¿Kunjamsa Jehová Diosajj paciencianïtap uñachtʼayi?

¹¹ Biblian sarnaqäwinakapat lupʼipjjañäni. Biblianjja, pacienciani walja chacha warminakatwa  parli, jupanakat lupʼiñäni ukhajj paciencianïñwa yateqsna. Uka sarnaqäwinakat mä qhawqha yatjjatañäni. Ukampis nayraqatjja, taqet sipans wali pacienciani Jehová Diosat yatjjatapjjañäni.

¹² Edén jardinanjja, Supayajj Jehová Diosan sutipwa qʼañuchäna, Jehová Diosajj janis cheqapar apnaqerïkaspa, janis munasirïkaspa ukhamwa Eva warmirojj payachasiyäna. Ukampis Jehová Diosajj ukspach uka kʼari Supayar tukjañat sipansa, paciencianïtapa, munañapamp jan apnaqayasirïtapwa uñachtʼayäna, kuna laykutejj wali suma apnaqerïtap uñachtʼayañatakejj tiempo munasitap yatïnwa. Ukañkamajja, sutip qʼañuchasipkakitap aguantaskakiwa. Ukhamarus Jehová Diosan paciencianïtap laykojja, millón millón jaqenakaw jupar uñtʼawayapjje, wiñay jakañwa katoqapjjarakispa (2 Ped. 3:9, 15). Taqe kunanakatï Jehová Diosan paciencianïtap laykojj jikjjatasiwayki ukanakat amuytʼañäni ukhajja, akapachar tukjañ amtki uka tiempon puriniñap suytʼañajj janiw chʼamäkaniti.

13. ¿Kunjamsa Jesusajj aka oraqenkasajj Jehová Dios Awkipjam paciencianïtap uñachtʼayäna? (Foto uñjjattʼarakïta).

¹³ Jesusajj awkipjam paciencianirakiwa, aka oraqenkasaw paciencianïtap uñachtʼayäna. Ukampis jupatakejj janiw paciencianïñajj facilapunïkänti, yamas kʼari chuyman escribanakaru fariseonakar pacienciamp uñjañajj wali chʼamäpachänwa (Juan 8:25-27). Ukampis Jesusajj Awkipjamarakïnwa, janiw jankʼak coleraskänti. Enemigonakapamp insultatasa toqetas janiw jan wali arunakamp jayskänti (1 Ped. 2:23). Antisas jan walinak pacienciampiw aguantäna. Ukatwa Bibliajj akham sasin ewjjtʼistu: “Jucharar jaqenakajj jan walinak jupa contra [parlapkäna], ukanaksa jupajj aguantänwa. Jumanakajj ukanakat wali amuyump  lupʼipjjam” sasa (Heb. 12:2, 3). Kuna jan walinsay jutïrin uñjaschiñänejja, Jehová Diosan yanaptʼapampejj pacienciampiw uk aguantañäni.

14. ¿Kunsa Abrahanan paciencianïtapat yateqsna? (Hebreos 6:15; fotompi dibujompi uñjjattʼarakïta).

¹⁴ ¿Kunas akapachan tukusiñap pacienciamp suytʼaskakiñatak yanaptʼistani? Inas jiwasajj niyaw purinjjañapäna sasin amuystan, janjamakiw akapachan tukusiñap uñjkañäniti sasin amuyarakstan. Abrahán chachat amuytʼañäni. Kunapachatï Jehová Diosajj “mä jachʼa markaruw jumar tukuyäma” sasin siskäna ukhajja, Abrahanajj 75 maranïnwa, janiw ni mä wawapas utjkänti (Gén. 12:1-4). ¿Abrahanajj uka promesa phoqasir uñjänti? Uka promesan mä partepakwa phoqasir uñjäna. Éufrates jawira paskatasajj 25 maranak qhepatwa uka promesa phoqasir uñjäna. Jan suykäna ukhaw Isaac wawapajj nasïna. 60 maranak qhepatjja, Esaú ukat Jacob allchhinakapaw nasirakïna (Hebreos 6:15 liytʼäta). Ukampis Abrahanajj jupat jutir wawanakarojj janiw mä jachʼa markar tukursa suma oraqe herenciat katoqersa uñjkänti. Ukampis Diosat jan jitheqtir Abrahán chachajja, Lurir Awkipampejj wali sum apasïna (Sant. 2:23). Abrahanajj jaktanjjani ukhajj ¿kunja kusisitänisa uk amuyasmati? Kunjamsa Diosar confiyatapatsa paciencianïtapatsa taqe markanakajj bendisitäpjjäna uks yatirakiniwa (Gén. 22:18). ¿Kunsa Abrahanat yateqsna? Inas jichhürunakan Jehová Diosan taqe promesanakap jan phoqasir uñjkchiñäniti. Ukampis Abrahanjam paciencianïñäni ukhajja, Jehová Diosajj jichhürun bendisistaniwa, machaq mundon jukʼampiw bendisistani, janiw ukat payachasktanti (Mar. 10:29, 30).

15. ¿Bibliat sapak yatjjatkasajj kuna toqenakatsa yatjjataraksna?

¹⁵ Biblianjja, pacienciani yaqha chacha warminakatwa parlaraki (Sant. 5:10). ¿Janit jupanakan  sarnaqäwinakapat yatjjatkasma? b David reyit amuytʼañäni, wali waynitüskäna ukhaw Israel markan reyipäñapatakejj ajllitäna, ukampis tronon qontʼasiñapatakejj walja maranakaw suyañapäna. Simeonampi Anampejja, jutañapäkäna uka Mesiasan puriniñapkamajj jan jitheqtasaw Jehová Diosar servipjjäna (Luc. 2:25, 36-38). Uka sarnaqäwinakat yatjjatkasajj akham sasin jisktʼasim: “¿Kunas jupanakarojj paciencianïñatak yanaptʼäna? ¿Paciencianïpjjatapat kunanaksa jikjjatapjjäna? ¿Kunjamatsa jupanakat yateqasirista?” sasa. Jan paciencianïpkäna ukanakat waljanakwa yateqaraksna (1 Sam. 13:8-14). Akhamwa jisktʼasisma: “¿Kunatsa jupanakajj jan paciencianïpkäna? ¿Jan paciencianïpjjatapat kuna jan walinakansa uñjasipjjäna?” sasa.

16. Paciencianïsajj kunanaksa jikjjattan uk mä qhawqhanak qhanañchtʼam.

¹⁶ Paciencianïsajj kunanaksa jikjjatañäni uk amuytʼañasawa. Paciencianïñajj jukʼamp kusisitäñataki, jukʼamp tranquilokïñatakiw yanaptʼistu. Ukhamajj paciencianïñajj cuerposana amuyusan kʼumaräñatakiw yanaptʼistu. Mayninakamp jukʼamp sum apasiñatakis yanaptʼarakistuwa, congregacionan jukʼamp mayachtʼatäpjjañapatakis yanaptʼarakiwa. Maynitejj jiwasar colerayirjam kuns lurani ukat jiwasajj jan jankʼak coleraskañäni ukhajja, mä problemajj janiw jukʼamp jachʼaptkaniti (Sal. 37:8, nota; Prov. 14:29). Taqe kunat sipansa paciencianïsajj alajjpachankir Awkisatwa yateqastanjja, juparus jukʼampiw jakʼachasiraktanjja.

17. ¿Kun lurañsa amtañasa?

¹⁷ Paciencia chuymanïñajj wali sumawa, taqeniruw yanaptʼarakistu. Paciencianïñajj janis faciläkchejja, Jehová Diosajj paciencianïñatakejj yanaptʼistaniwa. Machaq mundon puriniñap pacienciampi suykasajja, aka arunakar confiyañasawa: “Jehová Diosan nayranakapajj khitinakatï jupar ajjsarapki ukanakaruw uñchʼukiski, khitinakatï jupan munasiñapsa jan jaytjasirïtapsa suytʼasipki ukanakaruw uñchʼukiski” (Sal. 33:18). Ukhamajj taqeniw paciencia chuymampi isthapisiskakiñatak amtañasa.