1. Сиз нәјә ҝөрә сәбирли инсанлара дәјәр верирсиниз?

 СӘБИРЛИ инсаны ким севмәз? Нәјисә ҝөзләјәркән өзүндән чыхмајан инсанлары ҝөрәндә онлара һөрмәтимиз јараныр. Сәһвимизә бахмајараг бизимлә сәбирлә давранан инсанлара дәјәр веририк. Бизә Мүгәддәс Китабы өјрәдән мүәллимләримизә дә миннәтдарыг. Онларын сәбрини аз сынамамышыг. Биз Мүгәддәс Китабдакы һәгигәтләри өјрәнәнә, гәбул едәнә вә тәтбиг едәнә кими онлар нә гәдәр ҝөзләмәли олублар. Ән әсасы исә бизимлә сәбирлә давранан Јеһова Аллаһа миннәтдарыг! (Ром. 2:4).

2. Һансы вәзијјәтләрдә сәбирли олмаг чәтин ола биләр?

² Инсанларда сәбир хүсусијјәтини дәјәрләндирсәк дә, бәзән өзүмүз сәбирли ола билмирик. Мәсәлән, тыхаҹда илишиб галанда сакитлији горумаг чәтин олур. Өзү дә ки, һараса ҝеҹикириксә, сәбримиз лап тарыма чәкилир. Јахуд да кимсә бизи гыҹыгландыранда һөвсәләдән чыхырыг. Бәзән исә Јеһованын вәд етдији јени дүнјаны ҝөзләмәјә сәбримиз чатмыр. Истәјәрдиниз, даһа сәбирли оласыныз? Бу мәгаләдә ҝөрәҹәјик ки, сәбирли олмаг нә демәкдир вә нәјә ҝөрә бу ваҹиб хүсусијјәтдир. Һәмчинин даһа сәбирли олмағын јолларыны өјрәнәҹәјик.

3. Сәбирли инсаны кимсә әсәбиләшдирәндә о неҹә давраныр?

³ Ҝәлин сәбир ҝөстәрмәјин дөрд јолундан данышаг. Биринҹиси, сәбирли инсан тез өзүндән чыхмыр. Стрес алтында  оланда вә ја кимсә ону әсәбиләшдирәндә о, сакитлијини горујур вә әвәз чыхмыр. Мүгәддәс Китабда «сәбир» ифадәсинә илк дәфә Јеһованы тәсвир едән ајәдә раст ҝәлинир. Орада дејилир ки, «Јеһова, рәһмли вә мәрһәмәтли, сәбирли, мәһәббәти бол, һәгигәти әнҝин олан» Аллаһдыр (Чых. 34:6).

4. Сәбирли инсан ҝөзләмәли оланда неҹә давраныр?

⁴ Икинҹиси, сәбирли инсан сакитҹә ҝөзләмәји баҹарыр. Әҝәр нәсә ҝөзләдијиндән узун чәкирсә, о, тәлаш кечирмир, һөвсәләдән чыхмыр (Мәт. 18:26, 27). Сакитҹә ҝөзләмәјин ваҹиб олдуғу чох вәзијјәтләр вар. Мәсәлән, кимсә данышанда сөзүнү кәсмәдән сәбирлә динләмәји баҹармалыјыг (Әјј. 36:2). Һәмчинин шаҝирдимизә һансыса тәлими изаһ едәндә, јахуд пис вәрдишиндән јаха гуртармаға көмәк едәндә сәбирли олмаг лазым ҝәлә биләр.

5. Сәбир ҝөстәрмәјин диҝәр јолу һансыдыр?

⁵ Үчүнҹүсү, сәбирли инсан тәләскән дејил. Дүздүр, бәзи вәзијјәтләрдә ҹәлд һәрәкәт етмәк лазымдыр. Амма сәбирли инсана һансыса ваҹиб иш тапшырыланда о, тәләм-тәләсик бу ишә башлајыб тез ону башындан етмәјә чалышмыр. Әксинә, лазымынҹа вахт ајырыб едәҹәји иши планлашдырыр. Ишә башлајанда исә ону кејфијјәтли ҝөрмәк үчүн нә гәдәр лазымдырса, о гәдәр вахт ајырыр.

6. Сәбирли инсан чәтинликләрә неҹә јанашыр?

⁶ Дөрдүнҹүсү, сәбирли инсан шикајәт етмәдән чәтинликләрә дөзүр. Буну нәзәрә алараг демәк олар ки, сәбир хүсусијјәти дөзүмлә бағлыдыр. Әлбәттә ки, јахын достумуза үрәјимизи ачыб дәрдимизи данышмагда пис бир шеј јохдур. Бунунла белә, сәбирли инсан чалышаҹаг ки, чәтинлијә дөзсүн вә бу заман мүсбәт шејләри ҝөрмәји баҹарсын (Кол. 1:11). Бир мәсиһи кими биз бүтүн бу саһәләрдә сәбир ҝөстәрмәлијик. Нәјә ҝөрә? Ҝәлин бунун бир нечә сәбәбини арашдыраг.

7. Јагуб 5:7, 8 ајәләринә әсасән нәјә ҝөрә сәбир ваҹибдир? (Һәмчинин шәклә бахын.)

⁷ Хилас олмағымыз үчүн сәбирли олмаг мүтләгдир. Јеһованын кечмишдәки садиг хидмәтчиләри кими биз дә Онун вәдләрини ҝерчәкләшдирәҹәји вахты сәбирлә ҝөзләмәлијик (Ибр. 6:11, 12). Мүгәддәс Китабда бизим вәзијјәтимиз әкинчинин вәзијјәтинә бәнзәдилир. (Јагуб 5:7, 8 ајәләрини охујун.) Әкинчи мәһсулу әкмәк вә суламаг үчүн чох әзијјәт чәкир, амма чох шеј ҝүнәшдән вә јағышдан асылы олдуғу үчүн онун дәгиг нә вахт јетишәҹәјини билмир. Буна ҝөрә дә о, сәбирлә ҝөзләјир вә әминдир ки, бир ҝүн әкдијини бичәҹәк. Ејнилә биз дә Ағанын «һансы ҝүн ҝәләҹәјини» билмәсәк дә, ибадәтимизлә бағлы ишләрлә мәшғул олуруг (Мәт. 24:42). Биз сәбирлә ҝөзләјирик, әминик ки, вахты чатанда Јеһова бүтүн вәдләрини јеринә јетирәҹәк. Әҝәр сәбирсиз олсаг, ҝөзләмәкдән јоруларыг вә јаваш-јаваш һәгигәтдән узаглашарыг. Һәмчинин сәбирсиз давраныб бизә инди һәзз верәҹәк шејләрин далынҹа ҝедәрик. Лакин сәбирли олсаг, ахыра кими дөзүб хилас олаҹағыг (Мик. 7:7; Мәт. 24:13).

8. Сәбир башгалары илә јахшы мүнасибәти горумаға неҹә көмәк едир? (Колослулара 3:12, 13).

⁸ Сәбир башгалары илә јахшы мүнасибәти горумаға көмәк едир. Бу хүсусијјәтин сајәсиндә кимсә данышанда биз диггәтлә гулаг асырыг (Јаг. 1:19). Инсанларла арамызда меһрибан мүнасибәт олур. Сәбир көмәк едир ки, ҝәрҝин вәзијјәт јарананда тез реаксија вермәјәк вә хошаҝәлмәз ифадәләр ишләтмәјәк. Һәмчинин сәбирли олсаг, башгасы хәтримизә дәјәндә гәзәбләнмәјәҹәјик. Ондан әвәз чыхмајаҹағыг, әксинә, бир-биримизә гаршы һәмишә сәбирли олуб бир-биримизи үрәкдән бағышлајаҹағыг. (Колослулара 3:12, 13 ајәләрини охујун.)

9. Гәрар верәркән сәбир хүсусијјәти бизә неҹә көмәк едир? (Мәсәлләр 21:5).

⁹ Сәбир хүсусијјәти даһа јахшы гәрарлар вермәјә дә көмәк едир. Бунун сајәсиндә тез-тәләсик, һиссләрә гапылыб гәрар вермәјәҹәјик. Әксинә, мүхтәлиф вариантлары ҝөтүр-гој едәҹәјик вә онларын ичиндән ән јахшысыны сечәҹәјик. (Мәсәлләр 21:5 ајәсини охујун.) Мәсәлән, әҝәр иш ахтарырыгса, ола билсин, гаршымыза чыхан илк иши гәбул етмәк истәјәк вә онун ибадәтимизә мане олаҹағына мәһәл гојмајаг. Амма сәбирлијиксә, биз вахт ајырыб мүәјјән амилләри өлчүб-бичәҹәјик. Мәсәлән, јола нә гәдәр вахтымыз ҝедәҹәк? Нечә саат ишләмәли олаҹағыг? Бу иш аиләмизә вә Јеһова илә мүнасибәтимизә неҹә тәсир едәҹәк? Сәбирли олсаг, јанлыш гәрар вермәјәҹәјик.

10. Мәсиһијә сәбир хүсусијјәтини јетишдирмәјә вә ону итирмәмәјә нә көмәк едә биләр?

¹⁰ Дуада Јеһовадан сәбир истәјин. Сәбир руһун бәһрәсинин бир һиссәсидир (Гал. 5:22, 23). Буна ҝөрә дә ону јетишдирмәк үчүн Јеһовадан мүгәддәс руһ истәмәлијик. Әҝәр һансыса вәзијјәтдә сәбир касамызын долдуғуну һисс едириксә, Јеһовадан мүгәддәс руһу «дурмадан» диләмәлијик (Лука 11:9, 13). Һәмчинин хаһиш едә биләрик ки, вәзијјәтә Онун кими баха биләк. Дуадан сонра исә һәр ҝүн вар ҝүҹүмүзлә чалышмалыјыг ки, сәбир ҝөстәрәк. Сәбирли олмаг үчүн дуа етдикҹә вә сәбирли олмаға чалышдыгҹа бу хүсусијјәт үрәјимиздә ҝетдикҹә даһа дәрин көк салаҹаг вә бизим хасијјәтимизә чевриләҹәк.

11, 12. Јеһованын сәбри нәдән ҝөрүнүр?

¹¹ Мүгәддәс Китабдакы нүмунәләр барәдә  дәриндән дүшүнүн. Орада сәбирлә давранан чох инсан һагда јазылыб. Онларын нүмунәси барәдә дүшүнмәклә сәбирли олмағын јолларыны өјрәнә биләрик. Мәгаләдә бу нүмунәләрдән бәзиләрини арашдыраҹағыг. Амма әввәлҹә ҝәлин ән бөјүк сәбир нүмунәси олан Јеһовадан данышаг.

¹² Шејтан Әдән бағында Јеһованын адына гара јахды. О, Һәвваны Јеһованын әдаләтли вә мәһәббәтли Һөкмдар олмадығына инандырмаға чалышырды. Амма Јеһова бөһтанчыны дәрһал мәһв етмәди. Сәбирли вә тәмкинли давранды. Билирди ки, ән јахшы Һөкмдар олдуғунун сүбут олунмасы үчүн вахт лазымдыр. Буну ҝөзләдији мүддәтдә О, адына атылан бөһтанлара дөзүр. Үстәлик, Јеһова сәбирлә ҝөзләјир ки, даһа чох инсанын әбәди һәјаты алмаг имканы олсун (2 Бут. 3:9, 15). Бунун нәтиҹәсиндә милјонларла инсан Ону таныјыб. Әҝәр Јеһованын сәбринин хејри барәдә дүшүнсәк, сонун ҝәлишини ҝөзләмәк бизә даһа асан олаҹаг.

13. Иса Мәсиһ Атасынын сәбир хүсусијјәтини мүкәммәл шәкилдә неҹә әкс етдирмишди? (Һәмчинин шәклә бахын.)

¹³ Јеһованын сәбир хүсусијјәтини ән мүкәммәл шәкилдә әкс етдирән Иса Мәсиһдир. О, јер үзүндә оларкән бөјүк сәбир ҝөстәрмишди. Јәгин, она сәбирли давранмаг һәмишә асан олмурду. Әсас да икиүзлү мирзәләрә вә фәрисиләрә гаршы (Јәһ. 8:25—27). Амма о да Атасы кими гәзәбләнмәјә тәләсмирди. Исаны тәһгир етсәләр дә, өзүндән чыхартмаға чалышсалар да, о, һеч вахт әвәз чыхмырды (1 Бут. 2:23). О, бүтүн чәтинликләрә ҝилејләнмәдән таб ҝәтирирди. Елә буна ҝөрә дә Мүгәддәс Китабда дејилир ки, «ҝүнаһлыларын о ҹүр әдавәтли сөзләринә дөзән Иса һаггында ҹидди  дүшүнүн» (Ибр. 12:2, 3). Јеһованын көмәји илә биз дә гаршымыза чыхан истәнилән сынаға сәбирлә дөзә биләрик.

14. Ибраһим пејғәмбәрин сәбриндән нә өјрәнирик? (Ибраниләрә 6:15). (Һәмчинин шәклә бахын.)

¹⁴ Ола билсин, сонла бағлы ҝөзләдикләримиз һәлә јеринә јетмәјиб. Бәлкә дә, биз бу дүнјанын сонунун чохдан ҝәләҹәјинә үмид едирдик вә инди нараһатыг ки, бирдән о ҝүнү ҝөрмәјә өмрүмүз јетмәз. Бәс бундан сонра да сәбирлә ҝөзләмәјә бизә нә көмәк едә биләр? Ҝәлин Ибраһим пејғәмбәрин нүмунәсинә бахаг. Ибраһим 75 јашында оланда онун һәлә өвлады јох иди. Һәмин вахт Јеһова она белә бир вәд вермишди: «Сәндән бөјүк бир халг төрәјәҹәк. Буну Мән едәҹәјәм» (Јар. 12:1—4). Ибраһим бу вәдин јеринә јетдијини ҝөрдү? Там јох. Фәрат чајыны кечдикдән вә 25 ил ҝөзләдикдән сонра мөҹүзәви шәкилдә оғлу Исһаг дүнјаја ҝәлди. Бундан 60 ил сонра исә нәвәләри Ејслә Јагуб анадан олду. (Ибраниләрә 6:15 ајәсини охујун.) Амма нәслинин бөјүк халга чеврилдијини вә онларын Вәд едилмиш дијары мирас алдығыны ҝөрмәк Ибраһим пејғәмбәрә нәсиб олмады. Бунунла белә, бу мөмин инсанын Јараданла мөһкәм достлуғу вар иди (Јаг. 2:23). Ибраһим дириләндә биләҹәк ки, онун иманы вә сәбри сајәсиндә јер үзүндәки бүтүн халглар мүбарәк гылыныб (Јар. 22:18). Сөзсүз, о чох севинәҹәк. Бурадан нә өјрәнирик? Биз Јеһованын бүтүн вәдләринин елә индиҹә јеринә јетдијини ҝөрмәсәк дә, әмин ола биләрик ки, Ибраһим пејғәмбәр кими сәбирли олсаг, Јеһова бизә һәм инди мүкафат верәҹәк, һәм дә вәд етдији јени  дүнјада даһа чох немәтләр бәхш едәҹәк (Марк 10:29, 30).

15. Фәрди мүталиә заманы нәји арашдырмаг олар?

¹⁵ Мүгәддәс Китабда сәбир ҝөстәрмиш һәлә чох адамын нүмунәси вар (Јаг. 5:10). Бәлкә, фәрди мүталиәниз заманы онлар барәдә арашдырма апарасыныз? b Мәсәлән, Давуд Исраилин ҝәләҹәк падшаһы олмаг үчүн мәсһ едиләндә ҝәнҹ јашларында иди. Амма бу падшаһлығы алмаг үчүн о, узун илләр ҝөзләмәли олду. Јахуд ҝөтүрәк Шәмуну вә Һәннәни. Онлар Јеһоваја сәдагәтлә гуллуг едәрәк вәд олунмуш Мәсиһин ҝәлишини ҝөзләјирди (Лука 2:25, 36—38). Бу кими нүмунәләри арашдыраркән нөвбәти суаллар үзәриндә дүшүнүн: «Бу инсана сәбир ҝөстәрмәјә нә көмәк едиб? Бунун она һансы хејри олуб? Мән она неҹә бәнзәјә биләрәм?» Һәмчинин сәбирсизлик едән инсанлар барәдә дә мүталиә едә биләрсиниз (1 Ишм. 13:8—14). Нөвбәти суаллара ҹаваб тапмаға чалышын: «Бу инсанын сәбирсизлик етмәсинә нә сәбәб олду? Бу нә илә нәтиҹәләнди?»

16. Сәбирли олмағын һансы хејри вар?

¹⁶ Сәбирли олмағын хејри барәдә дүшүнүн. Сәбирли оланда даһа хошбәхт, даһа сакит олуруг. Буна ҝөрә дә сәбир бизим физики вә емосионал сағламлығымызы јахшылашдырыр. Һәмчинин инсанлара сәбир ҝөстәрәндә онларла арамыздакы мүнасибәт даһа јахшы олур. Јығынҹагда бирлик јараныр. Бизи тәбдән чыхармаға чалышан инсана ујмајыб сакитлијимизи горујанда ҝәрҝинлијин бөјүмәсинин гаршысыны алырыг (Зәб. 37:8, һашијә; Мәс. 14:29). Ән әсасы исә сәбирли оланда сәмави Атамыза бәнзәјирик вә Она даһа да јахын олуруг.

17. Даима нәјә чалышмалыјыг?

¹⁷ Доғрудан да, сәбир чох ҝөзәл хүсусијјәтдир. Ону јетишдирмәјә дәјәр! Дүздүр, сәбирли олмаг бәзән чәтин олур. Амма Јеһованын көмәји илә өзүмүздә бу хүсусијјәти инкишаф етдирә биләрик. Јени дүнјанын ҝәлишини сәбирлә ҝөзләдијимиз мүддәтдә исә әмин ола биләрик ки, «Јеһованын ҝөзү Ондан горханларын, Ондан мәһәббәт уманларын үзәриндәдир» (Зәб. 33:18). Ҝәлин сәбри ҝејинмәк әзмимизи һеч вахт итирмәјәк!