1. Inyuki u ngwés bôt ba gwé wongut?

 BÉSBOBASÔNA di ngwés bôt ba gwé wongut. Inyuki hala? Di nti i bôt ba nyi bem lipém. Di ngwés ki le bôt bape ba hônba bés ni wongut i ngéda di mboñ dihôha. Kinje maséé di bi nôgda i tehe le i mankéé a bé niiga bés Bibel a bi hôla bés ni wongut i nigil Bibel, i neebe i yom di bé nigil, ni i bii yo bibôñôl. Iloo ki hala, di nlôôha ti Yéhôva Nyambe mayéga inyu wongut a ñunda bés!​—Rôma 2:4.

2. Imbe ngéda i unda wongut i nlet ngandak?

² To hala kiki di ndiihe bôt ba gwé wongut, i tane bé bés jam li ntomb i unda i lem i. Kiki hihéga, i nla bane bés ndutu i bem i ngéda di nlama bem jôga, ki le di nsôk. I nla pam le di bep unup i ngéda bôt bape ba ñunbaha bés. Ngim mangéda di nla tehe ndutu i ke ni bisu i bem mbok yondo Yéhôva a bi bôn bés. Baa u gwé ngôñ i kônde sal i lem ini le wongut? Munu yigil ini, di ga tehe kii di nla boñ inyu bana wongut, inyuki i nlôôha ba nseñ? Di ga tehe ki kii i nla hôla bés i kônde hôlôs i lem i.

3. Kii i mut a gwé wongut a mboñ i ngéda ba nyumbla nye?

³ Di tehe manjel ma-na di nla gwélél inyu unda wongut. Pog, i mut a gwé wongut a mpala bé unup. A noode gwel  nyemede, a jok sañ le a saa bañ i ngéda ba nyumbla nye tole i ngeñ ba ntééñga nye. Bibuk bini le “a mpala bé unup,” bi bi gwéélana inyu ngélé bisu ikété Bibel inyu unda le Yéhôva, a yé “Nyambe nu konangoo ni nu ñem ngôô, nu a mpala bé unup, nu a ntéñbe ki i unda ngandak gwéha ni maliga.”​—Manyodi 34:6.

4. Kii i mut a gwé wongut a mboñ i ngéda a nlama bem?

⁴ Iba, i mut a gwé wongut a mbem ikété nwee nyensôna. To ibale jam li nom iloo kiki a hoñlak, mut a gwé wongut a ñunup bé. (Matéô 18:26, 27) Ngandak mam i niñ yés i mbat le di bem ikété nwee nyensôna. Kiki hihéga, i ngéda di nkwel ni mut, di nlama emble nye ibabé le di kit nye hop. (Hiôb 36:2) Di nlama ki unda wongut i ngéda di nhôla nnigil Bibel i nok biniigana ni i yémbél ngim lem ibe.

5. Sima njel ipe di nla gwélél inyu unda wongut.

⁵ Aa, i mut a gwé wongut a mpabla bé. Maliga ma yé le, ngim mam i mbat le di pala boñ. Ndi i ngéda i mut a gwé wongut a nsômbôl gwel ngim nson u mahee; a mpabla bé. Ndi a nyoñ ngéda i kôôba i mam momasôna ma ga hôla nye i tibil gwel nson wé. I mbus, a téé ngim ngéda inyu hiki man jam a ga boñ inyu yônôs nson u.

6. Kii i mut a gwé wongut a mboñ i ngéda a mboma mandutu?

⁶ Ina, i mut a gwé wongut a mboñ biliya i hônba mandutu ibabé i tjelel. Jon wongut i gwé maada ni hônba. Maliga ma yé le, béba i ta bé i añle liwanda joñ li ñem nyuu i yom u nôgda i ngéda u ntégbaha ngim ndutu. Ndi mut nu a gwé wongut, a mboñ kii yosôna a nla inyu ke ni bisu i hônba, a téédaga litehge lilam li mam. (Kôlôsé 1:11) Bés bikristen di  nlama unda wongut ikété manjel ma-na mana momasôna. Inyuki? Di wan le ndék manjom.

7. Inoñnaga ni Yakôbô 5:7, 8, inyuki wongut i nlôôha ba nseñ? (Béñge yak titii.)

⁷ Wongut i nlôôha ba nseñ inyu tohi yés. Kiki bôt ba hémle ba kôba, ni wongut, di mbem le mimbônga mi Nyambe mi yon. (Lôk Héber 6:11, 12) Bibel i nhégha bés ni nsalwom. (Añ Yakôbô 5:7, 8.) Nsalwom a mboñ biliya bi ngui i bel ni i kôp malép, ndi a nyi bé i ngéda i yom a nsal i ga nañ. Jon a mbem ni wongut, a ban-ga botñem le a ga bumbul matam. Nlélém ni bés, di pégi i gwel minson mi mbuu, tolakii di “nyi bé kel Nwet [wés] a nlo.” (Matéô 24:42) Di mbem ni wongut, di bak nkwoog nkaa le Yéhôva a ga yônôs i mam momasôna a mbôn bés. Ndi ibale di nimis wongut, d’a la ha bé bem, ndék ni ndék di ga ke haa ni maliga. Di nla yak bôdôl noñ mam ma nlona bés maséé inyu ndék ngéda. Ndi ki le, ibale di gwé wongut, di ga hônba letee ni lisuk, di kôhna ki tohi.​—Mika 7:7; Matéô 24:13.

8. Lelaa wongut i nhôla bés mu maada més ni bôt bape? (Kôlôsé 3:12, 13)

⁸ Wongut i nhôla bés mu maada més ni bôt bape. I nhôla bés i yoñ ngéda i emble bo i ngeñ ba mpot. (Yakôbô 1:19) Wongut i nhôñôs yak nsañ. I mboñ le di ngwel bésbomede i ngéda ba nyumbla bés, ni le di pot bañ bibuk di ga yiga tam. Ñ, ibale di gwé wongut, di ga pala bé unup i ngeñ mut a ñunbaha bés. Ha ngéda i, iloole di saa, d’a ‘ke ni bisu i hônbana bés ni bés, di nwéhlaga ki bés ni bés ni ñem wonsôna.’​—Añ Kôlôsé 3:12, 13.

9. Lelaa wongut i nhôla bés i yoñ makidik malam? (Bingéngén 21:5)

⁹ Wongut i nhôla yak bés i yoñ makidik malam. Iloole di ba bôs mut, di ga yoñ ngéda i boñ nyiña inyu pam i yi mambe makidik ma nlôôha malam. (Añ Bingéngén 21:5.) Kiki hihéga, i ngéda di nyéñ bôlô, i nla pam le di hoo neebe bôlô i bisu di nléba, to ibale i nkéñ bés i ke makoda ni likalô. Ndi ibale di gwé wongut, di ga yoñ ngéda i badba le: Baa i bôlô i y’a kena me haa ni likoda lôñni lihaa jem? Ngeñ yañen m’a tégbaha mu? Baa i bôlô ini y’a boñ le me nimis maada malam me gwé ni lihaa jem yak ni Yéhôva? I ngéda di gwé wongut, di ga yoñ bé makidik mabe.

10. Lelaa kristen i nla hôlôs wongut, i tééda ki i lem i?

¹⁰ Soohe inyu kônde bana wongut. Wongut i yé lem yada mu litam li mbuu. (Galatia 5:22, 23) Di nla soohe inyu bat Yéhôva le a ti bés mbuu mpubi, u u ga hôla bés i hôlôs litam li mbuu mpubi. Ibale di mboma mandutu ma ma mboñ le i ba bé bés jam li ntomb i unda wongut, di “bat ibabé waa” le mbuu mpubi u hôla bés i bana wongut. (Lukas 11:9, 13) Di nla ki bat Yéhôva le a hôla bés i tehe mam kiki nye. I mbus masoohe, di sal ni ngui inyu hôlôs wongut hiki kel. Kiki di ga ke ni bisu i soohe inyu bana wongut, di boñok biliya bi ngui, hala nyen ndék ni ndék i ga o minkañ miñem nwés, kayéle i lem i i kôndba i mut wés yondo.

11-12. Lelaa Yéhôva a bi unda wongut?

 ¹¹ Yoñ ngéda i ôt pék mu dihéga di Bibel. Bibel i yé nyonok ni bôt ba ba bééna wongut. Ibale di nyoñ ngéda i ôt pék mu, di ga léba ngandak manjel ma ma nhôla bés i unda wongut. Ilole di nwan ngim dihéga mu, di bôk ndugi di béñge ndémbél i mbôk ni nsôk i wongut, le Yéhôva.

¹² I wom Éden, Satan a bi ôbôs jôl li Yéhôva, a ôm nye nsohi le a mbep énél bôt ba binam ni le a ngwés bé bo. Iloole a hoo tjé Nsohop, ni wongut yosôna Yéhôva a bi unda hôtnyuu, a yik le hala a ga bat ngéda inyu kwés bôt nkaa le énél yé yon i nlôôha ba ilam. Mu kiki a bé bem, a bi hônba i tehe ba nhoo jôl jé mahindi. Jam lipe li yé le, wongut i Yéhôva i nti ngandak bôt pôla i bana niñ boga. (2 Pétrô 3:9, 15) Inyu hala nyen didun di bôt di mpam i yi nye i len ini. Ibale di mbok mis i bisai wongut i Yéhôva i nlona, hala a ga ba bés jam li ntomb i bem ngéda a ntéé inyu lisuk li nkoñ ’isi.

13. Lelaa Yésu a bi kôna wongut i Isañ i nya i yôni? (Béñge yak titii.)

¹³ Yésu a bi kôna wongut i Isañ i nya i yôni i ngéda a bé hana ’isi. I bé bé nye jam li ntomb i unda wongut hiki ngéda, téntén i bisu bi Farisai ni bayimbén ba ba bé bôt ba bihéñba. (Yôhanes 8:25-27) Ndi kiki Isañ, Yésu a bé pala bé unup. I ngéda ba bé sol nye, a bé timbhe bé sol inyu sol. (1 Pétrô 2:23) Ni wongut, Yésu a bi hônba mandutu ibabé i tjelel. Di nla nok inyuki Bibel i nkal le “tiblana yaga hoñol ndémbél i nu a bi hônba bipôdôl bi ngolba bi baboñbéba.”  (Lôk Héber 12:2, 3) Ni mahôla ma Yéhôva, yak bés di nla hônba mandutu momasôna di mboma ni wongut.

14. Kii ndémbél i Abraham i niiga bés? (Lôk Héber 6:15) (Béñge yak titii.)

¹⁴ Ndi kii di nla boñ ibale i nene bés wee lisuk li nkoñ ’isi li ntiñha lo? Bebek di bé hoñol le i nya ngéda ini, ki li ma tagbe behee. Di nla yak kon woñi le di tiga wo ilole li nlo. Kii i nla ni hôla bés i ke ni bisu i bem ni wongut? Di bigda ndémbél i Abraham. Yéhôva a ti nye mbônga unu i ngéda a bi bolna 75 nwii, nye ngi bana man: “Me ga yilha we litén likeñi.” (Bibôdle 12:1-4) Baa Abraham a bi tehe mbônga u u nyon? Ndék. I ngéda a bi yap lom Ufraté, a bem 25 nwii, ha nyen man wé Isak a bi gwéé i nya i hélha, i mbus a témb a bem 60 ma nwii inyu tehe balal bé ba ngwéé, Ésau bona Yakôb. (Añ Lôk Héber 6:15.) Ndi Abraham a bi tehe bé mbôda yé i nyila litén likeñi, to jôp i Hisi hi Likak. I mut hémle nunu, a bééna maada ma bas bas ni Nhek wé. (Yakôbô 2:23) Hégda le maséé Abraham a ga nok i bitugne, i ngéda a’ yi le hémle yé ni wongut yé bi mboñ le biloñ gwobisôna bi kôhna bisai! (Bibôdle 22:18) Biniigana: I nla pam le di tehe bé mimbônga nwominsôna mi Yéhôva mi nyon. Ndi ibale di bana wongut kiki Abraham, di nla ba nkwoog nkaa le Yéhôva a ga bom bés i len ini, a kônde ki kôp bés bisai i mbok yondo a mbôn bés.​—Markô 10:29, 30.

15. Kii di nla wan i ngéda di nigil?

¹⁵ Bibel i yé nyonok ni bôt bape ba ba  bi unda wongut. (Yakôbô 5:10) Inyuki u nla bé pohol i nigil dihéga di? b Kiki hihéga, tolakii ba bi hoo David nye mañge, le nyen a ga ba kiñe Israel, a bi bem ki ngandak nwii ilole a mbôdôl énél. Siméôn ni Ana ba bé ba tiñi ni Yéhôva, mu kiki ba bé bem Mésia. (Lukas 2:25, 36-38) Mu kiki u nigil miñañ mi, yéñ mandimbhe ma mambadga mana: Kii i bi hôla i mut nunu i unda wongut? Bimbe bisai a bi kôs? Lelaa me nla nigle nye? U nla yak ôt biniigana mu i jam li bi pémél i bet ba bi bana bé wongut. (1 Samuel 13:8-14) U nla badba le: ‘Kii i bi boñ le ba bana bañ wongut? Kii i bi pémél bo?’

16. Bimbe bisai di nkôs i bana wongut?

¹⁶ Di béñge bisai di nkôs i ngéda di gwé wongut. I ngéda di gwé i lem i, di yé maséé, di bak nwee. Wongut i nla hôla bés i kônde ba mbôô i pes minsôn ni i pes mahoñol. I ngéda di ñunda bôt wongut, hala a mboñ le di bana maada malam ni bo. Hala a nkônde hôñôs adna ikété likoda. Ibale mut a nyumbla bés, ndi di pala bé unup, hala a nla boñ le di keñgle mindañ. (Tjémbi 37:8, buk isi lipep; Bingéngén 14:29) Jam li nlôôha lilam li yé le, i ngeñ di gwé wongut, di nkôna Tata wés Nungingii, di nkônde kôôge bebee ni nye.

17. Mambe makidik di nlama yoñ?

¹⁷ Maliga, wongut i yé lem i i ñôt bôt ngandak, i yéne ki bés nseñ. To ibale i nla bane bés ndutu i unda i lem i ngim mangéda, ni mahôla ma Yéhôva, di nla ke ni bisu i hôlôs yo. Kiki di mbem mbok yondo ni wongut, di nla ba nkwoog nkaa le “Yéhôva a ntat ba ba nkon nye woñi, a tadak ba ba mbem loñge yé ñem.” (Tjémbi 33:18) Di boñ kii yosôna di nla inyu ke ni bisu i haba wongut.