ICIPANDE CA KUSAMBILILAMO 35
Twalilileni Ukuba Abatekanya
“E ico, tekanyeni.”—YAKO. 5:7.
ULWIMBO 114 ‘Mube Abatekanya’
IFYO TWALASAMBILILA a
1. Mulandu nshi mwatemenwa abantu abatekanya?
BONSE tulatemwa ukuba na bantu abatekanya. Mulandu nshi? Pantu tulatemwa ukuba na bashifulwa bwangu nga ca kuti ifyo balelolela taficitike. Tulatasha sana abantu nga baletutekanishisha ilyo twalufyanya. Kabili tulatasha sana abaletusambilisha Baibo ifi batutekanishishe ilyo baletusambilisha. Ne cacilapo ukucindama, tulatasha sana ifi Yehova atutekanishisha.—Rom. 2:4.
2. Finshi ifingacitika ifingalenga catukosela ukuba abatekanya?
2 Nangu ca kuti twalitemwa abantu abatekanya, limo ifwe bene kuti catukosela ukuba abatekanya. Ku ca kumwenako, kuti twafilwa ukuba abatekanya nga ca kuti tuli mu mulongo ku cipatala e lyo natucelwa tulefwaya ukuya kumo. Kuti twafulwa bamo nga batukalifya. Kabili inshita shimo kuti catukosela ukulolela icalo cipya ico Yehova atulaya. Bushe kuti mwatemwa ukutwalilila ukuba abatekanya? Muli cino cipande, twalasambilila ifyo cipilibula ukutekanya, e lyo no mulandu ukutekanya kwacindamina. Twalasambilila na pa cingatwafwa ukutwalilila ukuba abatekanya.
BUSHE UMUNTU UWATEKANYA ABA SHANI
3. Bushe umuntu uwatekanya acita shani nga bamukalifya?
3 Natulandeko pa nshila 4 umo twingalanga ukuti twalitekanya. Ica kubalilapo, umuntu uwatekanya tafulwa bwangu. Abantu nga bacita ifya kumukalifya, alatekanya kabili tabwesesha ububi pa bubi. Kabili nangu nanaka takalifya abantu. Umuku wa kubalilapo amashiwi ya kuti “uukokola ukukalipa” yaba mu Baibo, ni lintu Yehova aleilondolola ukuti “Lesa wa luse kabili uwa mutembo, uukokola ukukalipa kabili uwafulisha icikuuku ne cine.”—Ukufu. 34:6.
4. Bushe umuntu uwatekanya acita shani nga alelolela fimo?
4 Icalenga bubili, umuntu uwatekanya alalolela. Nga ca kuti ifyo alelolela fyakokola ukucitika, tomfwa ububi nelyo ukukalipa. (Mat. 18:26, 27) Kwaliba ifintu ifingi ifyo tulingile ukutekanya ilyo tulefilolela. Ku ca kumwenako, tulingile ukutekanya ilyo tulekutika umuntu nga alelanda pa kuti twimucilima. (Yobo 36:2) Na kabili tulingile ukutekanishisha uo tulesambilisha Baibo pa kuti omfwikishe ifyo alesambilila, e lyo no kuleka imibele imo iyabipa.
5. Ni nshila nshi imbi iyo twingalangilamo ukuti twalitekanya?
5 Icalenga butatu, umuntu uwatekanya tangufyanya ukucita fimo ukwabula ukutontonkanyapo. Ca cine ukuti inshita shimo cilawama ukwangufyanya ukucita fimo. Na lyo line, umuntu uwatekanya nga alebombela pa fintu fimo ifyacindama, tangufyanya ukuficita nelyo ukufipwisha. Lelo alashininkisha ukuti nakwata inshita iikalamba pa kuti atantike ifyo akabomba. Lyena alabomba uyo mulimo ukulingana ne nshita ingapooswapo pa ku-ubomba.
6. Bushe umuntu uwatekanya acita shani nga aleshipikisha amafya?
6 Icalenga 4, umuntu uwatekanya alashipikisha amafya ukwabula ukuilishanya. Kanshi kuti twatila ukutekanya kwalipalana sana no kushishimisha. Kwena tacabipa ukweba cibusa wesu ifyo tuleumfwa pa bwafya tukwete. Na lyo line, umuntu uwatekanya, alatwalilila ukushipikisha amafya kabili alenekela ukuti ifintu fikawama. (Kol. 1:11) Abantu ba kwa Yehova balingile ukulanga ukuti balitekanya muli ifi fyonse twalandapo. Mulandu nshi balingile ukulangila ukuti balitekanya? Natulandeko pa milandu imo.
UMULANDU UKUTEKANYA KWACINDAMINA
Nga filya fine shibulimi alolela no kucetekela ukuti ali no kusombola ifilimwa fyakwe, na ifwe tulatekanya ilyo tulelolela Yehova ukuti akafikilishe fyonse ifyo atulaya pa nshita yakwe iyalinga (Moneni paragrafu 7)
7. Ukulingana na mashiwi yaba pali Yakobo 5:7, 8, mulandu nshi ukutekanya kwacindamina? (Moneni ne cikope.)
7 Tufwile ukuba abatekanya pa kuti tukapusuke. Nga filya ababomfi ba cishinka aba kwa Lesa bali abatekanya, na ifwe tufwile ukuba abatekanya ilyo tulelolela ifyo Lesa atulaya ukuti fikafikilishiwe. (Heb. 6:11, 12) Baibo ilalinganya ifyo tulingile ukuba abatekanya kuli shibulimi. (Belengeni Yakobo 5:7, 8.) Shibulimi alabombesha ukulima ifilimwa no kufitapilisha, lelo teshiba ilyo fikamena. E ico ilyo shibulimi alebomba, alatekanya kabili alacetekela no kuti ifilimwa fyakwe fikamena. Na ifwe tulabombesha ukuba abasambi ba kwa Yesu nangu ca kuti ‘tatwaishiba ubushiku ubo Shikulwifwe akesamo.’ (Mat. 24:42) Tulaba abatekanya ilyo tulelolela ukuti Yehova akafikilishe fyonse ifyo atulaya pa nshita yalinga. Nga ca kuti tatutekenye, kuti twanaka kabili kuti twaleka ukuba ifibusa fya kwa Yehova. Kabili kuti twalabika na mano ku kucita ifintu ifyo tulemona kwati kuti fyalenga twaba ne nsansa pali ino nshita. Nomba nga natutekanya, kuti twashipikisha kabili kuti twaisapusuka.—Mika 7:7; Mat. 24:13.
8. Bushe ukuba abatekanya kukatwafwa shani ukulaumfwana na bantu? (Abena Kolose 3:12, 13)
8 Tulingile ukuba abatekanya pa kuti tube ifibusa na bantu. Ukutekanya kulalenga tulekutikisha ilyo bambi balelanda. (Yako. 1:19) Na kabili ukutekanya kulalenga twaba aba mutende na bantu. Nga tuli abatekanya tatwakula-angufyanya ukucita ifintu fimo nelyo ukulanda amashiwi ayabipa nga natusakamikwa. Kabili nga tuli abatekanya, tatwakulafulwa bwangu abantu nga batukalifya. Mu nshita ya kulabwesesha ububi pa bubi, tukatwalilila ‘ukulashipikishanya no kubelelana uluse.’—Belengeni Abena Kolose 3:12, 13.
9. Bushe ukutekanya kutwafwa shani ukusalapo bwino ifya kucita? (Amapinda 21:5)
9 Ukuba abatekanya kuti kwatwafwa ukusalapo bwino ifya kucita. Mu nshita ya kula-angufyanya ukusalapo ifya kucita, tukalateka umutima no kufwailapo ifyebo. Lyena pa numa tukalasalapo bwino ifya kucita. (Belengeni Amapinda 21:5.) Ku ca kumwenako, nga tulefwaya incito nalimo kuti twasumina fye ukubomba incito iili yonse nangu ca kuti iyo ncito tayakaletushilako inshita ya kupepa Yehova. Nomba nga natutekanya, tukatontonkanya pa fintu pamo nga, icifulo uko incito imonekele, inshita tukalapoosa ukubomba, e lyo ne fyo ikakuma ulupwa lwesu na bucibusa twakwata na Yehova. Nga tuli abatekanya, tukalasala bwino ifya kucita.
IFYO MWINGACITA PA KUTI MUBE SANA ABATEKANYA
10. Bushe Umwina Kristu kuti aba shani uwatekanya, kabili kuti atwalilila shani ukuba uwatekanya?
10 Mulepepa ukuti muleba abatekanya sana. Ukutekanya kwaba pa fisabo fya mupashi. (Gal. 5:22, 23) Kanshi kuti twapepela umupashi wa mushilo no kulomba Yehova ukuti aletwafwa ukuba ne ci cisabo ca mupashi. Nga kwacitika fimo ifyalenga ca-afya ukuba abatekanya, ‘tulelomba’ Yehova ukuti aletupeela umupashi wa mushilo uwingatwafwa ukuba abatekanya. (Luka 11:9, 13) Na kabili kuti twalomba Yehova ukuti aletwafwa ukumona ifintu nge fyo afimona. Lyena nga twapepa, tufwile ukubombesha pa kuti tuleba abatekanya cila bushiku. Nga tulepepa ukuti tuleba abatekanya kabili tule-esha na po twingapesha ukutekanya, Yehova akalenga tukabe abatekanya nangu ca kuti tatwatekanya.
11-12. Finshi Yehova acita ifilanga ukuti alitekanya?
11 Muletontonkanya pa bantu balembwa mu Baibo abo twingapashanya. Mu Baibo mwaba abantu abali abatekanya abo twingapashanya. Nga tuletontonkanya pa malyashi yaba mu Baibo, kuti twasambilila ifya kuba abatekanya. Ilyo tatulalanda pali ifi ifya kumwenako, intanshi lekeni tusambilile pa fyo Yehova aba uwatekanya.
12 Mwi bala lya Edeni, Satana aliponteele ishina lya kwa Yehova, kabili alengele Efa ukulatwishika nga ca kuti Yehova ni Kateka umusuma. Mu nshita ya kuti lilya line onaule Satana uwaponteele ishina lyakwe, Yehova alitekenye kabili aliilamine pantu alishibe ukuti pali no kupita inshita pa kuti bonse beshibe ukuti e kateka musuma. Ilyo inshita iyi tailafika, Yehova alitwalilila ukushipikisha ilyo abantu bapontela ishina lyakwe. Na kabili Yehova alitwalilila ukuba uwatekanya pa kuti abantu abengi bakakwate umweo wa muyayaya. (2 Pet. 3:9, 15) Ne ci calilenga abantu abengi ukumwishiba bwino. Nga twabika sana amano ku fyo Yehova aba uwatekanya, tukalalolela mpaka ilyo akonaula cino calo cabipa.
Ukutekanya kukalenga twilafulwa bwangu nga batukalifya (Moneni paragrafu 13)
13. Bushe Yesu apashanya shani ifyo Wishi aba uwatekanya? (Moneni ne cikope.)
13 Yesu alepashanya ifyo Wishi aba uwatekanya, kabili alilangile ukuti ali uwatekanya ilyo ali pano isonde. Te lyonse caleanguka kuli Yesu ukuba uwatekanya, maka maka ukutekanishisha bakalemba ba bumbimunda e lyo na baFarise. (Yoh. 8:25-27) Nomba nga filya fine Wishi aba, Yesu alekokola ukukalipa. Talebwesesha ububi pa bubi ilyo balemutuka nelyo ukumukalifya. (1 Pet. 2:23) Yesu ali uwatekanya ilyo aleshipikisha amafya ukwabula ukuilishanya. E mulandu wine Baibo itwebela ukuti, “tontonkanyeni pa washipikishe amashiwi ayabipa aya babembu.” (Heb. 12:2, 3) Na ifwe Yehova nga atwafwa, kuti twaba abatekanya ilyo tuleshipikisha amafya.
Nga tulepashanya ifyo Abrahamu ali uwatekanya, tukacetekela ukuti Yehova akatulambula pali ino nshita e lyo na mu calo cipya ico atulaya (Moneni paragrafu 14)
14. Finshi tulesambililako kuli filya Abrahamu ali uwatekanya? (AbaHebere 6:15) (Moneni ne cikope.)
14 Bamo twale-enekela ukuti impela yali no kwisa bwangu. Nomba kuti twatendeka ukusakamana ukuti tatwakabeko ilyo impela ikesa. Cinshi cingatwafwa ukuba abatekanya ilyo tulelolela impela? Natulandeko pali Abrahamu. Ilyo Abrahamu ali ne myaka 75 ninshi takwatapo umwana, Yehova amulaile ukuti: “Nkakulenga ukuba uluko ulukalamba.” (Ukute. 12:1-4) Abrahamu alifwile ilyo fimo ifyo bamulaile tafilafikilishiwa. Ilyo Abrahamu ayabwike Umumana wa Yufrate kabili alolela ne myaka 25, alimwene uko umwana wakwe Isaki afyelwe. Na kabili alilolelele imyaka 60 pa kuti amone uko abeshikulu bakwe babili, Esau na Yakobo bafyelwe. (Belengeni AbaHebere 6:15.) Lelo Abrahamu tamweneko uko abana bakwe baishileba uluko ulukalamba kabili bapyana ne Calo ca Bulayo. Na lyo line, uyu mwaume wa cishinka ali ni cibusa sana na Kabumba wakwe. (Yako. 2:23) Kabili ilyo Abrahamu akabuuka, akatemwa sana ukwishiba ukuti filya ali ne citetekelo kabili uwatekanya, fyalilengele inko ishingi ukupaalwa. (Ukute. 22:18) Finshi tulesambililako? Nalimo te kuti tumoneko fyonse ifyo Yehova atulaya fyafikilishiwa. Na lyo line, nga tuli abatekanya nga filya Abrahamu ali, kuti twacetekela ukuti Yehova akatulambula pali ino nshita e lyo na mu calo cipya.—Marko 10:29, 30.
15. Malyashi nshi twingabelenga ilyo tuleisambilisha Baibo?
15 Mu Baibo mwalilembwa abantu na bambi abali abatekanya. (Yako. 5:10) Kuti cawama ukusambilila pali abo bantu. b Ku ca kumwenako, nangu ca kuti Davidi balimusubile ukuba imfumu ninshi ali umwaice sana, palipitile imyaka iingi pa kuti abe imfumu. Simeone na Ana, balepepa Yehova ne cishinka ilyo balelolela ukumona Mesia. (Luka 2:25, 36-38) Ilyo mulebelenga pali aya malyashi, mulesanga amasuko kuli ifi fipusho: Cinshi calengele uyu muntu ndebelengapo ukuba uwatekanya? Bushe anonkelemo shani ifi ali uwatekanya? Kuti namupashanya shani? Na kabili kuti mwasambilila ifingi nga mulebelenga pa bantu abashali abatekanya. (1 Sam. 13:8-14) Ilyo mulebelenga pali aba bantu kuti mwatontonkanya pali ifi fipusho: ‘Cinshi calengele aba bantu ukukanatekanya? Finshi fyabacitikile pa mulandu wa kuti tabali abatekanya?’
16. Busuma nshi bwaba mu kuba abatekanya?
16 Muletontonkanya pa busuma bwaba mu kutekanya. Nga natutekanya, tulaba ne nsansa kabili tatusakamikwa. Ukutekanya kuti kwalenga ubumi bwesu ukuwaminako. Nga tuletekanishisha abantu, tulaba sana ifibusa kabili tulekatana sana na ba bwananyina mu cilonganino. Kabili umo nga atukalifya tatufulwa bwangu ne ci cilenga ubwafya ukukanakulilako. (Amalu. 37:8; Amapi. 14:29) Ne cacilapo ukucindama ca kuti nga tuli abatekanya, tukalapashanya Shifwe wa ku muulu kabili tukapalama sana kuli ena.
17. Cinshi tufwile ukulafwaisha ukucita?
17 Ukutekanya mibele iisuma sana iyo bonse tunonkelamo nga twaikwata. Nangu ca kuti limo cilafya ukutekanya, Yehova nga atwafwa, kuti twatwalilila ukuba ne yi mibele. Kabili ilyo tulelolela icalo cipya, kuti twacetekela ukuti “amenso ya kwa Yehova [yaba] pa bantu abamutiina, pa balolela icikuuku cakwe.” (Amalu. 33:18) Kanshi lekeni bonse tutwalilile ukuba abatekanya.
ULWIMBO 41 Umfweni Ipepo Lyandi
a Muno nshiku abantu abengi tabatekanya. Na lyo line, Baibo itweba ukuba abatekanya. Muli cino cipande twalasambilila ico ukubela abatekanya kwacindamina, e lyo ne fyo twingacita pa kuti tube abatekanya.
b Nga mulefwaya ukubelenga amalyashi ya mu Baibo pa bantu abali abatekanya, kuti mwayabelenga pa mutwe utila “Ukutekanya” mu Icitabo ca Kwafwa Inte sha kwa Yehova Ukusanga Ifyebo.
