1. ?From wanem yu glad long ol man we oli gat longfala tingting?

 YUMI evriwan i laekem ol man we oli gat longfala tingting. Yumi respektem olgeta we oli save wet wetem longfala tingting mo oli no kam kros. Mo taem yumi mekem mastik, yumi glad sipos narafala i gat longfala tingting. Yumi glad we tija blong yumi i gat longfala tingting taem yumi stap traehad blong lanem ol tijing blong Baebol, akseptem olgeta, mo folem long laef blong yumi. !Antap moa, yumi glad tumas taem Jehova God i gat longfala tingting long yumi!—Rom 2:4.

2. ?Wetaem i had blong gat longfala tingting?

² Nating se yumi glad taem narafala i gat longfala tingting, be plante taem i no isi blong yumi gat longfala tingting long narafala. Eksampol, maet i had blong yu wet long laen taem yu stap long stoa, speseli sipos yu stap hariap blong go samples. Maet i had blong stap kwaet taem narafala i mekem yumi kros, mo samtaem i had blong wet long niufala wol blong i kamtru. ?Olsem wanem? ?Yu yu wantem kamgud moa blong gat longfala tingting? Long stadi ya, bambae yumi tokbaot olsem wanem yumi save gat fasin ya mo from wanem i impoten. Mo tu, bambae yumi tokbaot samting we i save givhan long yumi blong kamgud moa long fasin ya.

3. ?Man we i gat longfala tingting i mekem wanem taem narafala i mekem hem i harem nogud?

³ Hemia fo rod blong soemaot longfala tingting. Faswan, man we i gat longfala tingting i no kros kwik. Taem narafala i mekem hem i harem nogud o i stres, hem i stap kwaet mo i no givimbak nogud fasin long narafala. Faswan taem we Baebol i talem tok ya, “no save kros kwik,” hemia taem i tokbaot Jehova  se hem i “wan God we i gat sore mo i kaen, i no save kros kwik, mo fasin blong hem blong lavem man oltaem i bigwan tumas, mo hem i tok tru.”—Eks. 34:6.

4. ?Man we i gat longfala tingting hem i mekem wanem taem hem i mas wet?

⁴ Seken rod, man we i gat longfala tingting i stap kwaet mo wet. Man olsem i no save kam kros, taem hem i mas wet longtaem moa i bitim wanem we hem i ekspektem. (Mat. 18:26, 27) Plante taem long laef blong yumi, yumi mas stap kwaet mo wet. Eksampol, taem narafala i stap toktok, yumi lesin wetem longfala tingting mo yumi no katem toktok blong hem. (Job 36:2) Mo tu, yumi nidim longfala tingting taem yumi stap givhan long wan Baebol stadi blong i kasem save long wan tijing o i winim wan nogud fasin.

5. ?Wanem wan narafala rod blong soemaot longfala tingting?

⁵ Namba tri rod, man we i gat longfala tingting i no hariap, be i tingting gud fastaem. I tru, samtaem yumi mas tekem aksen kwiktaem. Nating se i olsem, man we i gat longfala tingting bambae i no hariap blong mekem wan impoten wok, be i tingting gud fastaem. Mo bambae hem i meksua se hem i gat wan plan blong folem, mo i gat inaf taem we hem i nidim blong finisim wok ya.

6. ?Man we i gat longfala tingting i mekem wanem taem hem i kasem trabol?

⁶ Namba fo rod, man we i gat longfala tingting i no komplen taem hem i kasem trabol. Longfala tingting i joen wetem fasin blong stanap strong. I tru, i no rong blong tokbaot trabol blong yumi long wan gudfala fren. Be man we i gat longfala tingting bambae i tingbaot ol gudfala samting long laef blong hem, mo i traehad blong mekem wok blong Jehova wetem glad. (Kol. 1:11) Ol man blong Jehova oli mas soemaot longfala tingting long ol fofala rod ya. ?From wanem? Bambae yumi tokbaot sam risen.

7. Folem Jemes 5:7, 8, ?from wanem i impoten blong gat longfala tingting? (Mo tu, yu luk pija.)

⁷ Blong kasem laef we i no save finis, yumi mas gat longfala tingting. Olsem ol gudfala man blong God bifo, yumi mas wet wetem longfala tingting blong God i mekem ol promes blong hem oli kamtru. (Hib. 6:11, 12) Baebol i talem se yumi olsem wan man blong wokem garen. (Ridim Jemes 5:7, 8.) Man blong wokem garen i wok had blong planem ol sid mo wotarem, be hem i no save stret wetaem ol sid ya bambae oli gru. Taswe, hem i wet wetem longfala tingting mo i bilif se bambae hem i kasem ol frut blong ol hadwok blong hem. Long sem fasin, yumi stap bisi long wok we Jisas i givim long yumi, nating se yumi ‘no save wanem dei we Masta blong yumi, bambae i kam.’ (Mat. 24:42) Yumi wet wetem longfala tingting, from yumi bilif se long stret taem Jehova bambae i mekem ol promes blong hem oli kamtru. Sipos yumi no moa gat longfala tingting, yumi save kam taed blong wet mo sloslo yumi stat blong lego Jehova. Mo tu, maet yumi stat blong ronem ol samting we i save mekem yumi glad naoia nomo. Be sipos yumi gat longfala tingting, bambae yumi naf blong stanap strong mo kasem laef.—Maeka 7:7; Mat. 24:13.

8. ?Olsem wanem longfala tingting i givhan long yumi blong frengud wetem ol narafala? (Kolosi 3:12, 13)

⁸ Yumi nidim longfala tingting blong yumi save frengud wetem ol narafala. Fasin ya bambae i givhan long yumi blong lesingud taem narafala i toktok. (Jem. 1:19) Mo tu, i givhan long yumi blong gat pis wetem ol narafala. Taem yumi stres, longfala tingting i mekem se yumi no ansa kwik tumas mo talem samting we i no kaen. Sipos yumi gat longfala tingting, bambae yumi no kros kwik, mo givimbak taem narafala i spolem yumi. Be bambae yumi ‘glad blong fofogivim yumi nating sipos wan long yumi i gat risen blong komplen agens long narawan.’—Ridim Kolosi 3:12, 13.

9. ?Olsem wanem longfala tingting i save givhan long yumi taem yumi mas mekem wan desisen? (Ol Proveb 21:5)

⁹ Longfala tingting i save givhan long yumi tu blong mekem ol gudfala desisen. Bambae yumi no hariap tumas, be yumi tekem taem blong mekem risej, tingting gud, mo jusum rod we i beswan. (Ridim Ol Proveb 21:5.) Tingbaot sipos yu stap lukaot wan wok, maet yu kwik blong akseptem faswan wok we yu faenem, nating se wok ya i mekem se yu mestem sam miting o wok blong prij. Be sipos yumi gat longfala tingting, bambae yumi tingbaot ol samting olsem, ples we wok i stap long hem, hamas aoa yumi mas wok, mo olsem wanem wok ya i save afektem famle mo wosip blong yumi. Longfala tingting bambae i givhan long yumi blong no mekem wan nogud desisen.

10. ?Olsem wanem wan Kristin i save gat longfala tingting oltaem?

¹⁰ Prea blong gat longfala tingting. Longfala tingting i wan haf blong frut blong tabu spirit. (Gal. 5:22, 23) Taswe, yumi save prea long Jehova blong i givim tabu spirit mo halpem yumi blong wokem ol frut blong tabu spirit. Sipos yumi fesem wan situesen we i mekem se yumi no moa gat longfala tingting, i gud yumi “gohed blong askem” Jehova blong i givim tabu spirit, blong i givhan long yumi blong gat fasin ya. (Luk 11:9, 13) Mo tu, yumi save askem Hem blong i halpem yumi blong gat sem tingting olsem hem long situesen we yumi fesem. Afta we yumi prea, yumi  mas mekem bes blong yumi blong gat longfala tingting evri dei. Sipos yumi gohed blong prea mo gat longfala tingting, Jehova bambae i givhan long yumi blong gat fasin ya, nating se bifo yumi no wan man olsem.

11-12. ?Olsem wanem Jehova i soem se i gat longfala tingting?

¹¹ Tingting dip long ol eksampol long Baebol. Long Baebol i gat plante eksampol blong ol man we oli gat longfala tingting. Taem yumi tingting dip long olgeta, yumi save lanem tu olsem wanem blong soemaot fasin ya. Bifo we yumi luk ol eksampol ya, bambae yumi tokbaot beswan eksampol we yumi save folem, hemia blong Jehova.

¹² Long garen blong Iden, Setan i giaman blong spolem nem blong Jehova taem hem i talem se rul blong Jehova i no stret mo Hem i no lavem ol man. Jehova i no kilim Setan stret long taem ya, be hem i gat longfala tingting mo i bos long tingting blong hem, from hem i save se bambae i tekem taem blong pruvum se rul blong hem i beswan. Taem hem i stap wet, ol enemi oli gohed blong sakem doti long nem blong hem, be hem i gat longfala tingting. From we Jehova i gat longfala tingting, hemia i givim janis long plante moa man blong oli kasem laef we i no save finis. (2 Pita 3:9, 15) From samting ya, plante milian man oli save hem. Sipos yumi tingbaot ol blesing we yumi kasem from longfala tingting blong Jehova, bambae i moa isi blong wet kasem taem we Hem i mekem en i kam.

13. ?Olsem wanem Jisas i folemgud fasin blong Papa blong hem blong gat longfala tingting? (Mo tu, yu luk pija.)

¹³ Jisas i folemgud fasin blong Papa blong hem blong gat longfala tingting, mo hem i soemaot fasin ya taem hem i stap long wol. I no isi oltaem long hem blong soem longfala  tingting, speseli taem ol skraeb mo ol Farisi oli gat tu fes. (Jon 8:25-27) Be olsem Papa blong hem, Jisas i no stap kros kwik mo givimbak taem ol man oli tok nogud long hem. (1 Pita 2:23) Taem Jisas i fesem ol traem, hem i no komplen be hem i stanap strong wetem longfala tingting. Taswe Baebol i talem se: “[Yumi] i mas tingting gud long man ya we i stanap strong taem ol man blong mekem sin oli tok nogud long hem.” (Hib. 12:2, 3) Wetem help blong Jehova, yumi tu yumi save gat longfala tingting mo stanap strong long ol traem we yumi fesem.

14. ?Fasin blong Ebraham blong gat longfala tingting i tijim yumi long wanem? (Hibru 6:15) (Mo tu, yu luk pija.)

¹⁴ Samfala oli gat tingting ya se en i sud kam longtaem finis mo naoia oli stap wari se maet bambae oli no laef kasem we en i kam. ?Wanem i save givhan long yumi blong wet wetem longfala tingting? Traem tingbaot eksampol blong Ebraham. Taem hem i gat 75 yia mo hem i nogat pikinini, Jehova i promes long hem se: “Bambae mi mekem wan bigfala nesen i kamaot biaen long yu.” (Jen. 12:1-4) ?Olsem wanem? ?Ebraham i luk we promes ya i kamtru? Nogat. Afta we oli gokros long Yufretes Reva, hem i mas wet 25 yia bifo we hem i luk merikel we Jehova i mekem, hemia se boe blong hem Aesak i bon. Mo biaen, hem i wet 60 yia bakegen bifo we tufala bubu blong hem Esao mo Jekob i bon. (Ridim Hibru 6:15.) Be Ebraham i neva luk we ol bubu blong hem oli kam wan bigfala nesen mo oli go insaed long promes lan. Nating se i olsem, gudfala man ya i glad tumas from we hem i frengud wetem Krieta blong hem. (Jem. 2:23) Taem Ebraham i laef bakegen, bambae hem i glad tumas blong save se from bilif mo longfala  tingting blong hem, Jehova i blesem olgeta nesen. (Jen. 22:18) ?Yumi lanem wanem? Maet bambae yumi no save luk olgeta promes blong Jehova oli kamtru naoia. Nating se i olsem, sipos yumi gat longfala tingting olsem Ebraham, i sua se Jehova bambae i blesem yumi naoia mo bambae i blesem yumi moa long niufala wol we hem i promes blong givim.—Mak 10:29, 30.

15. ?Wanem sam samting we yumi save stadi long hem long prapa stadi blong yumi?

¹⁵ Baebol i tokbaot plante eksampol blong ol man we oli gat longfala tingting. (Jem. 5:10) I gud yu stadi mo mekem risej long olgeta. b Traem tingbaot Deved, nating se oli makemaot hem blong i kam king taem hem i yangfala nomo, be hem i mas wet plante yia bifo we hem i kam king. Simeon mo Ana i gohed blong wosipim Jehova, taem tufala i stap wet blong luk Mesaea we God i promes blong sanem. (Luk 2:25, 36-38) Taem yu stap stadi long ol eksampol ya, i gud yu traem faenem ansa blong ol kwestin ya: ?Wanem i givhan long man ya blong gat longfala tingting? ?Hem i kasem wanem blesing? ?Olsem wanem mi save folem fasin blong hem? Yu save lanem samting tu long eksampol blong olgeta we oli nogat longfala tingting. (1 Saml. 13:8-14) Maet yu save askem se: ‘?Wanem i mekem se oli nogat longfala tingting? ?Wanem nogud samting i kamaot taem oli nogat longfala tingting?’

16. ?Wanem ol blesing we yumi save kasem taem yumi gat longfala tingting?

¹⁶ Tingbaot blesing we i kamaot taem yu gat longfala tingting. Taem yumi gat longfala tingting bambae yumi no wari tumas, be yumi glad mo tingting blong yumi i kwaet. Taswe longfala tingting i save givhan long tingting blong yumi mo helt blong yumi. Mo i save mekem tu se yumi frengud wetem ol narafala, mo i mekem evriwan long kongregesen oli joengud. Sipos wan man i mekem yumi harem nogud mo yumi no kwik blong kam kros, hemia bambae i mekem se problem i no kam bigwan moa. (Sam 37:8, fut.; Prov. 14:29) Be samting we i impoten moa, hemia se yumi stap folem fasin blong Papa blong yumi long heven mo yumi kam klosap moa long hem.

17. ?Yumi mas gat strong tingting blong mekem wanem?

¹⁷ !Longfala tingting i wan gudfala fasin we i save givhan long yumi evriwan! I no isi oltaem blong gat longfala tingting, be wetem help blong Jehova yumi naf blong wokem fasin ya. Taem yumi stap wet blong niufala wol i kam, yumi save gat strong tingting se “ae blong Jehova i wajem olgeta we oli fraet long hem, hemia olgeta we oli stap wet long fasin blong hem blong lavem man oltaem.” (Sam 33:18) I gud yumi gat strong tingting blong gohed blong werem longfala tingting olsem klos blong yumi.