1. Engkai maka meriah kapndu ras kalak si sabar?

 KERINA kita meriah siakap ras kalak si sabar. Engkai? Perban siergai kalak si nggit nimai, tapi la jungut-jungut. Siergai kel kalak si sabar man banta sanga siban kesalahen. Ngata bujur kita perban kalak si ngajari kita Pustaka sabar nampati kita guna mpelajari, ngaloken, ntah pe ndalanken piga-piga ajaren Pustaka. Si pentingna, ngata bujur kel kita perban sabar Dibata Jahwe man banta.​—Rom. 2:4.

2. Situasi kai saja si banci erban mesera siakap tetap sabar?

² Amin pe meriah siakap ngidah kalak si sabar, mon-mon mesera siakap tetap sabar. Contohna, banci saja merawa teta sanga kena macet, apai ka adi enggo terlambat kita. Banci ka merawa teta sanga lit kalak si la bagi ukurta, janah mon-mon mesera siakap sabar nimai doni si mbaru si ijanjiken Jahwe. Merhat nge kam jadi kalak si reh sabarna? Bas artikel enda, sibahas kari uga kin kalak si sabar e, engkai maka sipat sabar seh kel pentingna, janah uga carana gelah banci kita reh sabarna.

3. Uga nge tanggapen kalak si sabar sanga lit si erban ia merawa?

³ Perdiateken empat cara si ncidahken uga kin situhuna kalak si sabar e. Si pertama, kalak si sabar la nukah merawa. Usahakenna tetap tenang janah la balasna adi lit kalak si erban ia merawa. Labo ka kasar perbahanenna  man kalak amin pe sangana ia stres. Istilah “la nukah merawa” tangtangna ikataken bas Pustaka guna nggambarken Jahwe. Ia ikataken “Dibata si perkuah, si mehuli, la nukah merawa, janah dem alu kekelengen si setia ras kebenaren.”​—Kel. 34:6.

4. Uga tanggapen kalak si sabar sanga arus ia nimai?

⁴ Si peduaken, kalak si sabar banci nimai alu tenang. Adi arus ia nimai dekahen asangken si arapkenna, usahakenna tetap tenang janah la merawa. (Mat. 18:26, 27) Bas situasi kai saja kita perlu nimai alu sabar? Banci saja perlu sibegiken kalak alu tutus janah la sipotong rananna. (Jop 36:2) Banci saja perlu kita sabar sanga nampati si erlajar Pustaka guna ngangkai piga-piga ajaren Pustaka ntah pe mpengadi kebiasan si la mehuli.

5. Kai deba nari si mbuktiken maka sekalak jelma sabar?

⁵ Si peteluken, kalak si sabar la merudu-rudu. Bas situasi tertentu, memang perlu kita meter ertindak. Tapi sanga ndatken tugas si penting, kalak si sabar la merudu-rudu mbenakenca. Ibanna waktu guna ngerencanaken kai si arus ilakokenna. La ka ia merudu-rudu guna ndungisa. Tapi, pastikenna tugas e ilakoken alu mehuli.

6. Uga nge tanggapen kalak si sabar sanga ngadapi masalah?

⁶ Si peempatken, kalak si sabar usahakenna la jungut-jungut sanga ngadapi masalah. Sipat sabar mbelin kel hubungenna ras sipat megenggeng. Memang, sanga ngadapi masalah, labo salah adi situriken perasanta alu terus terang man temanta. Tapi, kalak si sabar usahakenna asa ngasupna gelah terus  megenggeng ras positip perukurenna. (Kol. 1:11) Selaku kalak Kristen arus siinget si empat ndai guna jadi kalak si sabar. Tapi, engkai maka penting kel sipat sabar e? Mari sibahas piga-piga alasenna.

7. Menurut Jakup 5:7, 8, engkai maka penting kel sipat sabar? (Nen ka gambar.)

⁷ Sipat sabar seh kel pentingna guna keselamatenta. Bali bagi umat Jahwe si setia bas jaman si mbarenda, perlu kita sabar nimai seh ngasa itepati Dibata kerina janjiNa. (Heb. 6:11, 12) Bas Pustaka, kita ipeseri ras sekalak perjuma-juma. (Baca Jakup 5:7, 8.) Perjuma-juma kerja keras ia nuan ras niram, tapi labo tehna ndigan tepatna turah sinuan-sinuanna e. Amin pe bage, sabar ia nimai janah tek ia datna nge pagi hasilna. Bage ka pe, tetaplah kita sibuk ngelakoken kegiaten rohani amin pe ‘la siteh ndigan Tuanta reh.’ (Mat. 24:42) Sitimai alu sabar janah tek kita bas waktuna pagi itepati Jahwe kerina janjiNa. Adi la kita sabar, banci latih siakap nimai janah mulai me sitadingken kebenaren. Banci ka mulai siayaki kai si gundari siakap banci erban meriah ukurta. Tapi, adi tetap kita sabar, banci kita megenggeng seh ku kedungenna janah iselamatken.​—Mi. 7:7; Mat. 24:13.

8. Engkai maka sipat sabar banci erban mehuli hubungenta ras kalak si deban? (Kolose 3:12, 13)

⁸ Sipat sabar banci erban mehuli hubungenta ras kalak si deban. Sipat e banci nampati kita gelah tutus ateta megiken sanga kalak ngerana. (Jak. 1:19) Sipat sabar pe penting kel guna njaga perdamen. Sanga siadapi tentangen, sipat sabar banci nampati kita la metersa ertindak janah ngataken kai si erban ceda ukur kalak. Sanga lit si erban kita sakit hati, la kita mis merawa ntah pe sibalas. Tapi, ‘tetap kita sabar janah alu bulat ukur siampunilah sada ras si debanna.’​—Baca Kolose 3:12, 13.

9. Engkai maka sipat sabar banci nampati kita erban keputusen si mehuli? (Kuan-kuanen 21:5)

⁹ Sipat sabar pe banci nampati kita erban keputusen si mehuli. Adi sabar kita, la kita merudu-rudu erban keputusen, tapi siban waktuta guna riset janah ngukuri piga-piga pilihen si lit. (Baca Kuan-kuanen 21:5.) Contohna, sanga ndarami pendahin. Banci saja mis ateta sialoken pendahin si tangtangna itawarken man banta amin pe pendahin e banci ngganggu ibadahta man Jahwe. Tapi adi sabar kita, siukuri lebe i ja inganna, jam erdahinna, ras pengaruhna man keluargata, bage pe hubungenta ras Jahwe. Payo, sipat sabar banci nampati kita gelah la siban keputusen si la mehuli.

10. Uga carana gelah kita banci jadi kalak si sabar?

¹⁰ Ertotolah gelah banci jadi kalak si reh sabarna. Sipat sabar eme sipat si ihasilken kesah si badia. (Gal. 5:22, 23) Emaka, banci kita ertoto gelah bereken Jahwe kita kesah si badiaNa guna nampati kita ncidahken sipat si sabar. Perlu ‘terus sipindo’ kesah si badiaNa terlebih sanga lit situasi si nguji kesabarenta. (Luk. 11:9, 13) Perlu ka kita ertoto gelah banci sampati Jahwe kita ngenen sada situasi bagi caraNa ngenenca. Kenca ertoto,  perlu siusahaken gelah banci sabar tiap wari. Adi terus kita ertoto janah siusahaken jadi kalak si sabar, reh dekahna sipat e banci rurat bas pusuhta janah jadi bagin arah dirita.

11-12. Uga Jahwe ncidahken sipat sabar?

¹¹ Ukurilah usihen si lit bas Pustaka. Bas Pustaka melala contoh kerna kalak si sabar. Adi siukuri kerna si e, banci kita erlajar uga carana jadi kalak si sabar. Tapi sope sibahas usihen kalak e, mari sinen uga Jahwe jadi usihen si mehulina bas ncidahken sipat sabar.

¹² Bas Taman Eden, ipitnah Setan Jahwe janah ceda banna gelar Jahwe. Ituduhna maka Jahwe labo Penguasa si adil ras perkeleng. Tapi labo mis ikernepken Jahwe tukang pitnah e. Ikendaliken Jahwe diriNa janah tetap Ia sabar perban tehNa perlu waktu guna mbuktiken maka pemerentahenNa me si mehulina. JanahNa nimai, megenggeng Jahwe ngadapi kerina pitnah si ibelasken Setan. Jahwe pe sabar perban bereNa ateNa kesempaten gelah reh teremna kalak ndatken kegeluhen si rasa lalap. (2 Pet. 3:9, 15) Hasilna, jutan kalak banci nandai Ia. Payo, melala manpaatna perban Jahwe sabar. Adi siukuri kerna si e, banci reh nukahna siakap nimai alu sabar seh ngasa ikernepken Jahwe doni si jahat enda.

13. Kai si ncidahken maka iusih Jesus sipat Bapakna si sabar alu sempurna? (Nen ka gambar.)

¹³ Iusih Jesus sipat Bapakna si sabar alu sempurna janah si e teridah sanga ia nggeluh denga i doni. Pasti labo lalap menukah akap Jesus guna sabar,  terlebih ka sanga arus adapina kalak Parisi ras ahli Undang-Undang Musa si munapik. (Joh. 8:25-27) Tapi bali bagi Bapakna, Jesus la nukah merawa. La ibalasna sanga lit kalak si nokoh-nokohi ia ntah pe si sengaja erban ia merawa. (1 Pet. 2:23) Sabar Jesus ngadapi erbage-bage ujin janah la ia jungut-jungut. E me sebapna inasehati Pustaka kita guna tuhu-tuhu ngukuri usihen Jesus si ‘sabar ngadapi kalak erdosa si ngelawan ia alu ranan’! (Heb. 12:2, 3) Alu penampat Jahwe, kita pe banci sabar ngadapi ujin kai pe.

14. Kai si banci sipelajari arah sipat Abraham si sabar? (Heber 6:15) (Nen ka gambar.)

¹⁴ Uga adi kedungen doni enda la meter reh bagi si enggo siarapken? Banci saja enggo ndekah sitimai janah kuatir kita lanai kari sempat siidah. Kai si banci nampati kita terus nimai alu sabar? Cuba perdiateken usihen arah Abraham. Sanga umurna 75 tahun janah lenga lit anakna, erjanji Jahwe man bana, nina, “Kuban pagi kam jadi bangsa si mbelin.” (Kej. 12:1-4) Idah Abraham nge janji e terjadi? Idahna, tapi deba ngenca. Memang, kenca sebrangina Lau Eprat janah nimai 25 tahun, idahna lahir anakna Isak. Nce, 60 tahun kenca si e lahir kempuna Esau ras Jakup. (Baca Heber 6:15.) Tapi, labo idah Abraham keturunenna jadi bangsa si mbelin janah ngiani Negri Perjanjin. Amin pe bage, tetap ia setia janah jadi teman Jahwe, Penciptana. (Jak. 2:23) Kenca ipekeke pagi Abraham pasti meriah kapna sanga itehna maka kinitekenna ras sipatna si  sabar mere pasu-pasu man kerina bangsa. (Kej. 22:18) Kai pelajarenna? Banci saja la sempat siidah kerina janji Jahwe terjadi. Tapi adi tetap kita sabar bagi Abraham, tek kita pasti pasu-pasu Jahwe kita gundari, terlebih pagi bas doni si mbaru.​—Mrk. 10:29, 30.

15. Kai saja si banci siriset sanga pelajaren pribadi?

¹⁵ Bas Pustaka, melala usihen kerna kalak si sabar. (Jak. 5:10) Risetlah kerna kalak e sanga kam pelajaren pribadi. b Contohna, Daud ilantik jadi raja Israel sanga ia nguda denga, tapi arus ia nimai ertahun-tahun dekahna seh ngasa ia jadi raja. Lit ka usihen si deban eme Simeon ras Hanna si ngelayani Jahwe alu setia janah nimai kerehen Mesias si ijanjiken. (Luk. 2:25, 36-38) Sanga pelajarindu cerita kerna kalak e, cuba ukuri penungkunen-penungkunen enda: ‘Banci saja kai nge si erban ia tetap sabar? Kai gunana perban ia sabar? Uga caraku ngusih ia?’ Banci ka kam erlajar arah cerita kerna kalak si la sabar. (1 Sam. 13:8-14) Cuba ukuri penungkunen enda: ‘Banci saja kai nge si erban kalak e la sabar? Kai nge akibatna?’

16. Kai saja manpaatna adi kita sabar?

¹⁶ Ukurilah manpaatna adi sabar. Adi sabar kita, reh tenangna kita ras reh riahna ukurta. Sipat sabar banci nampati kita njaga kesehaten dagingta ras mentalta. Adi sabar kita man kalak si deban, hubungenta pe reh ulina ras kalak e. Runggunta pe banci reh kompakna. Sanga lit si erban kita merawa, sipat sabar banci nampati kita gelah la nukah merawa, alu bage masalahna la reh belinna. (Ms. 37:8, cataten i teruh; Kua. 14:29) Si pentingna, adi sabar kita, siusih Bapakta si i surga janah reh rembakna kita ras Ia.

17. Kai arusna tekadta?

¹⁷ Jelas me, sipat sabar seh kel ulina ras erguna. Memang labo lalap nukah jadi kalak si sabar, tapi alu penampat Jahwe banci terus sipebelin sipat e. Janahta nimai doni si mbaru alu sabar, banci kita tek maka “mata Jahwe terus mperdiateken kalak si mbiar man baNa, si ngarapken kekelengenNa si setia.” (Ms. 33:18) Mbera-mbera kita kerina terus ertekad guna ncidahken sipat sabar.