1. Wai wi apreeshiayt wen peepl ga payshens?

 AALA wi laik peepl weh payshent. Wi rispek dehn wan weh ku wayt fi sohnting widowt di geh beks. Ahn wen wee mek wahn mistayk, wi apreeshiayt it wen ada peepl payshent wid wi. Aala wi tankful dat wi Baibl teecha mi payshent wid wi wen wi mi-di fain it haad fi aksep ahn laan fi liv akaadn tu wahn Baibl teechin. Bot eevn moa dan dat, wi hapi dat Jehoava payshent wid wi!—Roam. 2:4.

2. Eena weh kaina sichuwayshan wi wuda fain it haad fi ga payshens?

² Eevn doa wi laik it wen ada peepl ga payshens, wee wiself mait fain it haad fi bee payshent. Fi egzampl, ih noh mait bee eezi fi stay kaam wen wi di wayt eena wahn lang lain, espeshali if wi don di ron layt fi sohnting. Wi mait geh beks bad if adaz get pahn wi nervz. Ahn sohntaim ih ku bee haad fi wayt fi di nyoo werl weh Jehoava pramis wi. Yoo wuda waahn ga moa payshens? Eena dis aatikl, wi wahn taak bowt weh ih meenz fi bee payshent ahn wai dat soh impoatant. Den wi wahn diskos weh ku help wi fi ga moa payshens.

3. Weh wahn payshent persn du wen sohnbadi get pahn dehn nervz?

³ Mek wi luk pahn foa wayz how wi ku shoa payshens. Fers, wahn payshent persn noh eezi fi geh beks. Ih chrai stay kaam if sohnbadi du ahn sohnting bad. Ih noh chreet peepl di saym way dehn chreet ahn. Ahn wen ih schres owt, ih noh chreet adaz eena wahn bad way needa. Di fers taim di Baibl yooz di frayz “noh eezi fi geh beks” da wen Jehoava diskraib ihself az wahn Gaad weh shoa lata mersi, weh ga kompashan, weh noh eezi fi geh beks, weh shoa wahn lata lov, ahn weh aalwayz tel di chroot.—Eks. 34:6.

4. How wahn persn weh ga payshens ak wen ih haftu wayt?

 ⁴ Wahn persn weh payshent kaam wen ih di wayt. If sohnting di tek langa dan weh ih ekspek, ih chrai kip kaam ahn chrai noh geh foschraytid. (Mach. 18:26, 27) Dehn ga lata sichuwayshan wi need fi stay kaam eena. Fi egzampl, wen sohnbadi di taak, wi noh waahn intarop dehn. Insteda dat, wi waahn bee payshent ahn lisn tu dehn. (Job 36:2) Ahn wi need fi ga payshens wen wi di help wahn Baibl styoodent fi andastan wahn Baibl teechin er stap wahn bad habit.

5. Wat da wahn nada way how wi ku shoa dat wi payshent?

⁵ Terd, wahn persn weh payshent noh hori ak widowt tink. Af koars, sohntaim wi doo haftu ak faas. Bot wen wahn payshent persn ga sohnting impoatant fi du, ih noh chrai hori fi staat er finish weh ih haftu du. Insteda dat, ih mek shoar ih ga inof taim fi plan owt weh ih wahn du. Ahn wen ih tek taim fi du weh ih need fi du, ih du it gud.

6. How wahn payshent persn ak wen ih di goh chroo wahn chraiyal?

⁶ Foat, wahn payshent persn goh chroo haad taim widowt di komplayn. Af koars, ih noh rang fi taak tu wahn kloas fren ahn tel dehn weh wi di goh chroo. Bot wahn payshent persn wahn aalso tink bowt di gud tingz weh ih ga eena ih laif, an ih wahn chrai ih bes fi kantinyu serv Jehoava wid jai. (Kol. 1:11) Az Kristyanz, wi need fi shoa dat wi ga payshens eena evriting weh wi du. Mek wi si wai.

7. Akaadn tu Jaymz 5:7, 8, wai ih impoatant fi bee payshent? (Koment pahn di picha.)

⁷ If wi waahn geh evalastin laif wi need fi bee payshent. Jos laik Jehoava faytful servants eena di paas, wi need fi ga  payshens ahn wayt fi mek Gaad pramis dehn kohn chroo. (Heeb. 6:11, 12) Di Baibl seh dat wi deh eena di saym sichuwayshan laik wahn faama. (Reed Jaymz 5:7, 8.) Wahn faama werk haad fi tek kayr a ih plaants, bot hihn noh noa di egzak taim wen ih wahn groa. Soh di faama bayr payshens ahn chros dat ih wahn ku haavis weh ih plaant. Jos laik da faama, wi werk haad fi kapi Jeezas egzampl eevn doa wi “noh noa pahn wich day [wi] Laad wahn kom.” (Mach. 24:42) Wi wayt wid payshens ahn kanfidens fi di taim wen aala Jehoava pramis dehn wahn kohn chroo. If wi noh ga payshens, wi ku geh taiyad a wayt ahn lee bit bai lee bit wi ku staat lef Jehoava. Wi mait eevn staat goh afta tingz weh wahn onli mek wi hapi fi wahn lee wail. Bot if wi payshent, wi wahn bayr op til di en ahn wi wahn geh sayv.—Mic. 7:7; Mach. 24:13.

8. Wen wi ga payshens, how dat help fi ga wahn gud rilayshanship wid adaz? (Koloashanz 3:12, 13)

⁸ Wen wi ga payshens, dat help wi fi ga wahn gud rilayshanship wid adaz. Ih help wi fi reeli pay atenshan tu adaz wen dehn di taak tu wi. (Jay. 1:19) Payshens help wi fi kip pees wid adaz tu. Soh wi noh wahn hori fi seh sohnting weh wuda hert sombadi feelinz if wi feel schres owt. If wi ga payshens, wi noh wahn eezi fi geh beks wen adaz hert wi feelinz. Insteda insolt dehn bak, wi wahn “kantinyu fi put op wid wan anada ahn fergiv wan anada wid aala [wi] haat.”—Reed Koloashanz 3:12, 13.

9. Wen wi ga payshens, how dat help wi fi mek gud disizhanz? (Proverbs 21:5)

⁹ Payshens ku help wi fi mek beta disizhanz. Insteda bee haysti wen wi di chrai mek wahn disizhan, wi need fi tek di taim fi tink bowt wi opshanz ahn den si wich wan wuda werk owt bes fi wee. (Reed Proverbs 21:5.) b Fi egzampl, if wi di luk fi wahn jab, wi mait waahn tek di fers jab weh wi fain, eevn if dat meenz dat wi wahn mis som a wi meetin dehn er wi mait kyaahn goh pahn feel servis az moch az bifoa. Bot wen wi payshent, wi wahn tek di taim fi tink bowt how faar wi wahn haftu chravl fi get da werk, how moch owaz wi wuda need fi werk, ahn how dis jab wuda afek wi famili ahn wi rilayshanship wid Jehoava. Wen wi payshent, wi ku sayv wiself fahn mek bad disizhanz.

10. How wahn Kristyan ku laan fi bee moa payshent?

¹⁰ Kip aan di pray fi moa payshens. Payshens da wahn kwaliti weh kohn fahn di hoali spirit. (Gal. 5:22, 23) Soh wee ku pray fi moa hoali spirit an aks Jehoava fi help wi fi ga dehndeh kwalitiz. If wi deh eena wahn sichuwayshan weh tes wi payshens, wi ku “kip aan di aks” fi hoali spirit soh dat wi ku bee moa payshent. (Look 11:9, 13) Wi ku aks Jehoava fi help wi si tingz di way how hihn si tingz. Ahn den afta wi pray, wi need fi chrai wi bes fi bee moa payshent evri day. Di moa wi pray fi bee payshent ahn di moa wi chrai shoa it, di moa Jehoava wahn help wi eevn if wee da neva wahn payshent persn bifoa.

11-12. How Jehoava shoa payshens eena di paas?

¹¹ Meditayt pahn Baibl egzamplz. Di Baibl gat een lata egzampl a peepl weh  mi payshent. Wen wi tink bowt dehndeh Baibl egzampl, wi ku laan difrent wayz how fi shoa payshens. Bot bifoa wi taak bowt som a dehndeh egzampl, mek wi taak bowt Jehoava, hoo da di bes egzampl a payshens.

¹² Da di gyaadn eena Eedn, Saytan mi tel lai bowt Jehoava fi chrai giv ahn wahn bad naym. Ih mi chrai mek Eev dowt dat Jehoava da wahn lovin Roola. Bot Jehoava neva dischrai Saytan rait deh pahn di spat. Hihn mi shoa payshens ahn self-kanchroal wen Saytan mi taak bad bowt ahn. Jehoava mi noa dat ih mi wahn tek taim fi proov dat hihn da di bes Roola. Wail Jehoava di wayt fi tek akshan, eevn hihn haftu kip aan di bayr payshens bikaaz a aala di lai weh Saytan seh bowt ahn. Pahn tap a dat, Jehoava di shoa payshens ahn wayt soh dat moa peepl ku geh di chaans fi liv fareva. (2 Peet. 3:9, 15) Bikaaz a dat, milyanz a peepl di geh fi noa Jehoava. If wi foakos pahn how wi ku benifit fahn Jehoava payshens, den ih wahn bee eeziya fi mek wi wayt fi di taim wen hihn bring di en a dis sistem.

13. How Jeezas payshent jos laik ih Pa? (Koment pahn di picha.)

¹³ Jeezas payshent jos laik ih Pa. Hihn mi shoa dat wen hihn mi deh pahn ert. Ih mosi neva aalwayz eezi fi mek Jeezas shoa payshens, espeshali tuwaadz di skraib ahn Farisee dehn. (Jan 8:25-27) Bot stilyet, hihn mi kapi ih Pa egzampl. Ih neva hori fi geh beks ahn fait bak wen dehn mi insolt ahn er provoak ahn. (1 Peet. 2:23) Jeezas mi payshent an ih mi bayr op chroo dehndeh chraiyalz widowt komplayn. Dats wai di Baibl tel wi  mek wi “tink bowt di egzampl a di wan weh mi bayr op wen sinaz mi insolt ahn.” (Heeb. 12:2, 3) Noh mata weh chraiyalz kom op eena wi laif, Jehoava ku help wi bayr op ahn bee payshent.

14. Weh wi ku laan fahn di payshens weh Aybraham mi shoa? (Heebrooz 6:15) (Koment pahn di picha.)

¹⁴ Maybi som a wi mi tink dat di en mi wahn kohn fahn lang taim, ahn now wi mait wori dat wi noh wahn liv lang inof fi seeʼt. Weh ku help wi fi ga payshens ahn wayt pahn Jehoava taimin? Mek wi luk pahn Aybraham egzampl. Wen Aybraham mi 75 yaaz oal ahn neva ga no pikni, Jehoava mi tel ahn: “Ah wahn mek yu disendant dehn . . . bee wahn big nayshan.” (Jen. 12:1-4) Yu tink Aybraham mi geh fi si da pramis kohn chroo? Hihn mi onli geh fi si paat a da pramis kohn chroo. Afta 25 yaaz, wen Aybraham mi kraas di Yoofraytis Riva, hihn mi geh fi si ih son Aizak baan. Ahn 60 yaaz layta, hihn mi geh fi si ih granson Eesaa ahn Jaykob baan. (Reed Heebrooz 6:15.) Bot Aybraham neva geh fi si ih disendant dehn bee wahn big nayshan an inherit di Pramis Lan. Stilyet, hihn da-mi wahn faytful man weh mi ga wahn kloas frenship wid ih Kriyayta. (Jay. 2:23) Ahn wen Jehoava bring Aybraham bak tu laif, yoo ku imajin how hapi hihn wahn bee fi fain owt dat bikaaz hihn mi payshent ahn ga fayt eena Jehoava, aala di nayshan dehn mi geh bles? (Jen. 22:18) Weh wi ku laan fahn Aybraham egzampl? Wi mait noh geh fi si aala Jehoava pramis dehn kohn chroo rait now, bot if wi payshent  laik Aybraham wi ku bee shoar dat Jehoava wahn bles wi now an eena di fyoocha.—Maak 10:29, 30.

15. Weh wi ku kansida wen wi di du wi persnal stodi?

¹⁵ Eena di Baibl, wi ku fain wahn lata ada egzampl a peepl weh mi payshent. (Jay. 5:10) Ih wuda bee gud fi stodi bowt dehn. c Tink bowt Dayvid egzampl. Eevn doa hihn mi yong wen ih mi geh anointid fi bee king a Izrel, ih mi haftu wayt wahn lata yaaz bifoa ih akchwali staat rool. Simiyan an Ana mi stay faytful Jehoava wail dehn mi-di wayt fi si di pramis bowt di Mesaiya kohn chroo. (Look 2:25, 36-38) Wen unu di stodi dehnya Baibl egzampl, chrai luk fi di ansa tu dehnya kweschanz: Da weh mi help dis persn fi bee payshent? How dis persn mi benifit bikaaz ih mi payshent? Ahn how Ai ku fala fi dehn egzampl? Yu ku laan sohn lesn fahn dehn wan weh neva payshent tu. (1 Sam. 13:8-14) Yu ku aks yuself: ‘Wai dehn neva payshent? Ahn weh bad tingz mi hapm tu dehn bikaaz dehn neva payshent?ʼ

16. How wi benifit wen wi payshent?

¹⁶ Mek wi luk pahn difrent wayz how wi benifit wen wi payshent. Wi stay kaam ahn wi hapiya wen wi payshent. Ih help wi fi ga gud mental ahn fizikal helt. Wen wi payshent wid adaz, wi wahn injai wahn beta rilayshanship wi dehn. Wi kangrigayshan wahn bee moa yoonaitid tu. If wi payshent wi noh wahn eezi fi geh beks, eevn if sohnbadi du wi sohnting. Soh eevn if wahn prablem kom op, wi noh wahn mek it wers. (Ps. 37:8, ftn.; Prov. 14:29) Ahn moas impoatant, wi kapi Jehoava egzampl wen wi payshent ahn dis mek wi jraa kloasa tu hihn.

17. Weh wi haftu werk haad fi du?

¹⁷ Payshens da wahn byootiful kwaliti, an aala wi benifit wen wi shoa it. Ih noh eezi fi bee payshent, bot wid Jehoava help wi ku du it. Wail wi di bayr payshens ahn wayt fi di nyoo werl, wi ku bee shoar dat “Jehoava di wach oava dehn wan hoo fyaa hihn, dehn wan hoo wayt pahn fi hihn laayal lov.” (Ps. 33:18) Mek wi du evriting wi kud fi kantinyu shoa payshens!