1. Nganong ganahan kag mga tawong mapailobon?

 KITANG tanan ganahan ug mga tawong mapailobon. Ngano? Makadayeg ta niadtong kayang maghulat nga dili maglagot. Maapresyar nato dihang ang uban magpailob nato kon masipyat ta. Ug mapasalamaton ta nga ang nag-Bible study nato nagpailob dihang naglisod ta sa pagsabot, pagdawat, o pagpadapat sa gitudlo sa Bibliya. Labaw sa tanan, mapasalamaton kaayo ta nga si Jehova nga Diyos nagpailob nato!—Roma 2:4.

2. Unsang mga situwasyon nga malisdan tingali tang magpailob?

² Malipay ta dihang ang uban magpailob nato, pero usahay kita mismo malisdan sa pagpakitag pailob. Pananglitan, malisdan tingali ta nga magpabiling kalmado dihang ma-traffic ta, ilabina kon late na ta. O basin masuko ta pag-ayo kon naay gihimo ang uban nga makapalagot nato. Ug usahay, malisdan tingali ta nga padayong magpaabot sa gisaad ni Jehova nga bag-ong kalibotan. Gusto ba ka nga mahimong mas mapailobon? Niining artikuloha, atong konsiderahon kon sa unsang paagi ta makapakitag pailob ug kon nganong importante kaayo kini nga hiyas. Hisgotan pod nato kon unsay makatabang nato nga mahimong mas mapailobon.

3. Unsay reaksiyon sa mapailobong tawo kon naay makapalagot niya?

³ Konsideraha ang upat ka paagi nga makapakita tag pailob. Una, ang mapailobong tawo dili daling masuko. Maningkamot siya nga magpabiling kalmado ug dili mobalos dihang  naay makapalagot niya o ma-stress siya. Ang ekspresyong “dili daling masuko” unang mabasa sa Bibliya dihang kini naghisgot kang Jehova ingong “Diyos nga maluluy-on ug mabination, dili daling masuko ug dagaya sa maunongong gugma ug kamatuoran.”—Ex. 34:6.

4. Unsay reaksiyon sa mapailobong tawo kon kinahanglan siyang maghulat?

⁴ Ikaduha, ang mapailobong tawo kalmadong makahulat. Kon kinahanglan siyang maghulat ug dugay kay sa iyang gidahom, maningkamot siya nga dili mapul-an sa paghulat o mahimong iritable. (Mat. 18:26, 27, footnote) Daghang situwasyon nga kinahanglan tang maghulat nga kalmado. Pananglitan, kinahanglang mapailobon tang maminaw samtang naay mag-estorya ug dili mosagbat. (Job 36:2) Kinahanglan pod tingali tang magpailob dihang tabangan nato ang atong Bible study nga masabtan ang gitudlo sa Bibliya o mahunong ang makadaot nga bisyo.

5. Unsa ang laing paagi nga makapakita tag pailob?

⁵ Ikatulo, ang mapailobong tawo dili magdalidali. Siyempre, naay mga situwasyon nga kinahanglan dayon tang molihok. Pero kon ang mapailobong tawo naay importanteng buluhaton nga kinahanglang himoon, dili niya kini dalidalion pagsugod o dalidalion paghuman. Hinuon, mogahin siyag igong panahon sa pagplano sa iyang himoon. Dayon, mohatag siyag igong panahon sa paghimo sa buluhaton aron maayo ang resulta.

6. Unsay reaksiyon sa mapailobong tawo dihang makaatubang siyag mga pagsulay o kalisdanan?

⁶ Ikaupat, ang mapailobong tawo maningkamot nga molahutay sa mga pagsulay, nga dili moreklamo. Niini nga kahimtang, ang pailob konektado kaayo sa paglahutay. Siyempre, dili ra sayop kon isulti nato sa atong suod nga higala ang atong gibati bahin sa pagsulay nga atong giatubang. Pero ang mapailobong tawo maningkamot nga molahutay ug magpabiling positibo. (Col. 1:11) Ingong mga Kristohanon,  kinahanglan natong ipakita ang pailob niining upat ka paagi nga gihisgotan. Ngano? Atong konsiderahon ang pipila ka rason.

7. Sumala sa Santiago 5:7, 8, nganong importante kaayo ang pailob? (Tan-awa sab ang hulagway.)

⁷ Importante kaayo ang pailob aron ta maluwas. Sama sa matinumanong mga alagad kaniadto, kinahanglang mapailobon tang maghulat nga tumanon sa Diyos ang iyang mga saad. (Heb. 6:11, 12) Ang atong situwasyon gipakasama sa Bibliya sa usa ka mag-uuma. (Basaha ang Santiago 5:7, 8.) Ang usa ka mag-uuma magkugi sa pagtanom ug pagbisbis sa iyang mga tinanom, pero wala siya mahibalo kon kanus-a gyod ni motubo. Busa mapailobon siyang maghulat ug mosalig nga makaani ra siya. Kita pod nagkugi sa espirituwal nga mga kalihokan, bisag “wala [ta] mahibalo kon unsang adlawa moabot ang [atong] Ginoo.” (Mat. 24:42) Mapailobon tang maghulat, nga kombinsido nga sa iyang gitakdang panahon, tumanon ni Jehova ang tanan niyang saad. Kon mawad-an tag pailob, basin kapoyan tang maghulat ug anam-anam nga mobiya sa kamatuoran. Posible pod nga mosugod na ta sa pagpangagpas sa mga butang nga tingali makahatag natog temporaryong kalipay. Pero kon mapailobon ta, makalahutay ta hangtod sa kataposan ug maluwas.—Miq. 7:7; Mat. 24:13.

8. Sa unsang paagi ang pailob makatabang sa atong relasyon sa uban? (Colosas 3:12, 13)

⁸ Ang pailob makatabang aron naa tay maayong relasyon sa uban. Makatabang ni nato nga maminaw pag-ayo dihang mosulti ang uban. (Sant. 1:19) Ang pailob makaamot pod sa kalinaw. Kon mapailobon ta, dili dayon ta mo-react ug mosultig sakit nga mga pulong dihang ma-stress ta. Dili pod ta daling masuko kon naay masulti o mahimo ang uban nga makapasakit nato. Imbes nga mobalos, kita ‘padayong magpailob sa usag usa ug kinasingkasing nga magpinasayloay.’—Basaha ang Colosas 3:12, 13.

9. Sa unsang paagi ang pailob makatabang dihang mohimo tag desisyon? (Proverbio 21:5)

⁹ Ang pailob makatabang pod nato sa paghimog maayong desisyon. Imbes nga magdalidali, mogahin tag panahon sa pag-research bahin sa atong mga kapilian ayha modesisyon kon unsay pinakamaayong himoon. (Basaha ang Proverbio 21:5.) Pananglitan, dihang mangita tag trabaho, basig dawaton na lang dayon nato ang unang trabaho nga itanyag kanato, bisag makababag kana sa atong pagsimba kang Jehova. Pero kon mapailobon ta, mogahin tag panahon nga konsiderahon ang lokasyon, oras, ug posibleng epekto sa trabaho diha sa atong pamilya ug espirituwal nga kalihokan. Pinaagi sa pagpailob, malikayan nato ang paghimog dili maayong desisyon.

10. Sa unsang paagi maugmad sa usa ka Kristohanon ang pailob ug padayon kanang mapakita?

¹⁰ Pag-ampo nga mahimong mas mapailobon. Ang pailob apil sa bunga sa balaang espiritu. (Gal. 5:22, 23) Busa makaampo ta alang sa balaang espiritu ug hangyoon si Jehova nga tabangan ta nga maugmad ni nga hiyas. Kon makaatubang tag situwasyon nga magsulay sa atong pailob, kita ‘magpadayon sa pagpangayo’ ug balaang espiritu aron makapakita tag pailob. (Luc. 11:9, 13) Makahangyo pod ta kang Jehova nga tabangan ta nga makita ang atong situwasyon sumala sa iyang panglantaw. Dayon humag ampo, kinahanglang maningkamot ta pag-ayo nga magpailob kada adlaw. Kon padayon tang moampo alang sa pailob ug maningkamot sa pagpakita niini, kini nga hiyas mas mogamot sa atong kasingkasing ug mahimong bahin sa atong personalidad.

11-12. Giunsa pagpakita ni Jehova ang pailob?

 ¹¹ Pamalandonga ang mga ehemplo sa Bibliya. Ang Bibliya daghag ehemplo sa mga tawong mapailobon. Pinaagi sa pagpamalandong sa ilang ehemplo, makakat-on ta kon unsaon pagpakitag pailob. Sa dili pa nato konsiderahon ang pipila niini, ato unang susihon ang pinakamaayong ehemplo sa pagkamapailobon, si Jehova.

¹² Sa tanaman sa Eden, gipasipalahan ni Satanas ang ngalan ni Jehova ug gidaot ang Iyang reputasyon ingong patas ug mahigugmaong Magmamando. Imbes nga laglagon dayon si Satanas, si Jehova nagpailob ug nagpugong sa iyang kaugalingon, kay nahibalo Siya nga nagkinahanglag panahon aron mapamatud-an nga ang Iyang pagmando maoy pinakamaayo. Ug samtang naghulat, gilahutay niya ang tanang pasipala batok sa iyang ngalan. Dugang pa, si Jehova mapailobong naghulat aron mas daghang tawo ang mahatagag kahigayonan nga makabaton ug kinabuhing walay kataposan. (2 Ped. 3:9, 15) Ingong resulta, minilyong tawo ang nakaila niya. Kon magpokus ta sa mga benepisyo sa pagpailob ni Jehova, mas sayon para nato nga magpaabot sa iyang gitakdang panahon nga taposon kining daang sistema.

13. Giunsa pagpakita ni Jesus nga gisundog niya pag-ayo ang pagkamapailobon sa iyang Amahan? (Tan-awa sab ang hulagway.)

¹³ Hingpit nga gisundog ni Jesus ang pagkamapailobon sa iyang Amahan, ug iya kining gipakita sa dinhi pa siya sa yuta. Seguradong naay mga panahon nga nalisdan siya sa pagpakitag pailob, ilabina sa salingkapaw nga mga eskriba ug Pariseo. (Juan 8:25-27) Pero sama sa iyang Amahan, si Jesus dili daling masuko. Wala siya mobalos dihang siya giinsulto o gihagit. (1 Ped. 2:23) Si Jesus mapailobong  milahutay sa mga pagsulay ug wala moreklamo. Kanay rason nga ang Bibliya nagdasig nato nga ‘tagdon pag-ayo ang usa nga nakalahutay sa pagsupak sa mga makasasala’! (Heb. 12:2, 3) Sa tabang ni Jehova, malahutay pod nato ang bisan unsang pagsulay uban ang pailob.

14. Unsay atong makat-onan sa pagkamapailobon ni Abraham? (Hebreohanon 6:15) (Tan-awa sab ang hulagway.)

¹⁴ Komosta kon wala pa gihapon moabot ang atong gidahom bahin sa kataposan? Basin nagdahom ta nga matapos ning sistemaha kaniadto pa. Ug karon basig nabalaka ta nga dili na ta makakita sa katumanan niini. Unsay makatabang nato nga padayong maghulat nga mapailobon? Konsideraha ang ehemplo ni Abraham. Si Abraham 75 anyos ug walay anak dihang gisaaran siya ni Jehova: “Himoon ka nako nga dakong nasod.” (Gen. 12:1-4) Nakita ba ni Abraham nga natuman ang maong saad? Dili sa bug-os. Human makatabok sa Suba sa Euprates, 25 ka tuig pa ang milabay ayha nakita ni Abraham ang milagrosong pagkatawo sa iyang anak nga si Isaac, ug milabay pa ang laing 60 ka tuig ayha natawo ang iyang mga apo nga si Esau ug Jacob. (Basaha ang Hebreohanon 6:15.) Pero wala makita ni Abraham nga nahimong dakong nasod ang iyang mga kaliwat ug nakapanunod sa Yutang Saad. Bisan pa niana, kining matinumanong alagad suod kaayo sa iyang Maglalalang. (Sant. 2:23) Ug dihang banhawon na si Abraham, seguradong malipay siyang mahibalo nga ang iyang pagtuo ug pailob miresultag panalangin sa tanang kanasoran! (Gen. 22:18) Unsay atong makat-onan? Tingali dili pa dayon nato personal nga makita ang pagkatuman sa tanang saad ni Jehova. Pero kon magpailob ta sama ni Abraham, seguradong  gantihan ta ni Jehova karon ug ilabina didto sa Iyang gisaad nga bag-ong kalibotan.—Mar. 10:29, 30.

15. Unsay puwede natong tun-an panahon sa atong personal nga pagtuon?

¹⁵ Ang Bibliya daghan pag ehemplo sa mga tawong mapailobon. (Sant. 5:10) Puwede nimong himoong study project ang pagsusi sa ilang ehemplo. b Pananglitan, batan-on pa kaayo si David dihang gidihogan siya ingong sunod nga hari sa Israel, pero naghulat pa siyag daghang tuig ayha siya naentrono ingong hari. Si Simeon ug Ana matinumanong nagsimba kang Jehova samtang nagpaabot sa gisaad nga Mesiyas. (Luc. 2:25, 36-38) Samtang imong tun-an ang ilang ehemplo, pangitaa ang tubag niini nga mga pangutana: Unsa kahay nakatabang nila nga magpailob? Sa unsang paagi nakabenepisyo sila sa ilang pagpailob? Unsaon nako sila pagsundog? Makakat-on pod ka kon imong tun-an kadtong wala magpakitag pailob. (1 Sam. 13:8-14) Hunahunaa ni: ‘Ngano kahang nawad-an silag pailob, ug unsay resulta niini?’

16. Unsay mga kaayohan kon magpailob ta?

¹⁶ Konsideraha ang mga kaayohan kon magpailob ta. Kon mapailobon ta, mas malipayon ta ug kalmado. Busa, ang pailob makatabang sa atong mental ug pisikal nga kahimsog. Kon magpailob ta sa uban, mas maayo ang atong relasyon nila. Ang atong kongregasyon mas magkahiusa. Kay dili man ta daling masuko, malikayan nato nga mograbe ang situwasyon kon naay makapalagot nato. (Sal. 37:8, footnote; Prov. 14:29) Pero labaw sa tanan, kon mapailobon ta, gisundog nato ang atong langitnong Amahan ug mas masuod ta kaniya.

17. Unsay determinado natong himoon?

¹⁷ Pagkanindot nga hiyas ang pailob ug kitang tanan makabenepisyo gyod niini! Usahay, malisdan tingali ta nga magpailob. Pero sa tabang ni Jehova, padayon natong maugmad kini nga hiyas. Ug samtang mapailobon tang naghulat sa bag-ong kalibotan, makaseguro ta nga “ang mata ni Jehova nagtan-aw niadtong mga nahadlok kaniya, niadtong naghulat sa iyang maunongong gugma.” (Sal. 33:18) Hinaot nga kitang tanan determinado nga padayong ugmaron ug ipakita ang pailob.