1. Akoz ou apresye bann dimoun ki demontre pasyans?

 NOU tou nou apresye bann dimoun ki demontre pasyans. Akoz sa? Parski nou annan respe pour bann dimoun ki kapab espere pour en keksoz san ki zot fristre. Nou apresye ki lezot i demontre pasyans anver nou ler nou fer fot. Nou osi rekonesan ki sa dimoun ki ti etidye Labib avek nou, ti demontre pasyans ler nou ti pe fer zefor pour aprann, aksepte oubyen aplik en lansennyman dan Labib. Pli enportan ankor, nou rekonesan ki Zeova i demontre pasyans anver nou.​—Rom. 2:4.

2. Kan ki nou kapab vwar li difisil pour demontre pasyans?

² Menm si nou apresye ler lezot i demontre pasyans, i pa toultan fasil pour nou demontre pasyans. Par egzanp, i kapab ki nou vwar li difisil pour reste kalm ler nou’n pri dan trafik, sirtou si nou an retar. I kapab ki nou perdi pasyans ler lezot i fer nou ankoler. Osi, parfwa nou kapab vwar li difisil pour espere pour Zeova akonpli son bann promes konsernan nouvo lemonn. Eski ou ti a kontan annan plis pasyans? Dan sa lartik, nou pou vwar ki mannyer nou kapab demontre pasyans e akoz i enportan pour fer sa. Nou pou osi vwar kwa ki kapab ed nou pour devlop plis pasyans.

3. Ki mannyer en dimoun ki annan pasyans i reazir ler lezot i fer li ankoler?

³ Annou vwar kat fason ki nou kapab demontre pasyans. Premyerman, en dimoun ki annan pasyans pa ankoler vitman. Ler lezot i fer en keksoz pour fer li ankoler, i reste kalm e i pa tret zot parey zot tret li. I osi pa tret lezot dan en fason brit ler i strese. Sa premye fwa ki sa lekspresyon  “pa ankoler vitman” i ganny servi dan Labib, i ler Labib i dir ki Zeova i “en Bondye ki annan pitye ek konpasyon, i pa ankoler vitman e i annan en kantite lanmour fidel ek laverite.”​—Egz. 34:6.

4. Ki mannyer en dimoun ki annan pasyans i reazir ler i bezwen espere?

⁴ Dezyenmman, en dimoun ki annan pasyans i reste kalm ler i bezwen espere. Si en keksoz i pran plis letan ki i pe ekspekte, sa dimoun pou fer zefor pour pa ankoler. (Mat. 18:26, 27) I annan plizyer sityasyon kot nou bezwen reste kalm ler nou pe espere. Par egzanp, nou bezwen demontre pasyans e ekoute ler en dimoun pe koze e pa enteronp li. (Zob 36:2) Nou osi bezwen demontre pasyans ler nou pe ed en etidyan pour konpran en lansennyman Labib oubyen pour aret en move labitid.

5. Ki en lot fason nou kapab demontre pasyans?

⁵ Trwazyenmman, en dimoun ki annan pasyans pa azir vitman san reflesir. Byensir, parfwa nou bezwen azir vitman. Me ler en dimoun ki annan pasyans i annan en keksoz enportan pour fer, i pa degaze pour konmans sa keksoz oubyen degaze pour fini. O kontrer i fer sir ki i annan ase letan pour plàn sa ki i pou fer. Apre i pran letan pour fer sa keksoz byen.

6. Ki mannyer en dimoun ki annan pasyans i reazir ler i annan problenm?

⁶ Katriyenmman, en dimoun ki annan pasyans i fer zefor pour andire ler i annan problenm e i pa konplent. Dan en sans, pasyans i relye avek landirans. Byensir, i pa mal pour koz avek en zanmi lo lafason ki en problenm pe fer ou santi. Me en dimoun ki annan pasyans pou osi mazin lo bann bon keksoz ki i annan dan son lavi e i pou fer son mye pour kontinyen servi Zeova avek lazwa. (Kol. 1:11) Konman pep Zeova, nou bezwen demontre pasyans dan tou sa bann fason. Akoz sa? Annou vwar serten rezon.

7. Dapre Zak 5:7, 8, akoz i vreman enportan pour nou annan pasyans? (Vwar portre.)

⁷ Pour nou ganny sove, nou bezwen annan pasyans. Parey bann serviter fidel dan lepase, nou bezwen esper Zeova avek pasyans ziska ler i akonpli son bann promes. (Ebr. 6:11, 12) Labib i konpar nou sityasyon avek sa ki pour en fermye. (Lir Zak 5:7, 8.) En fermye i travay dir pour plante e aroz son bann plant me i pa konnen kan ki son bann plant pou pouse. Alor sa fermye i esper avek pasyans e i annan konfyans ki son bann plant pou raporte. Pareyman, nou reste okipe dan nou bann aktivite spirityel menm si nou “pa konnen ki zour [nou] Senyer pe vini.” (Mat. 24:42) Nou esper avek pasyans e nou annan konfyans ki dan son moman apropriye, Zeova pou akonpli tou son bann promes. Si nou napa pasyans, i kapab ki nou konmans fatige esper Zeova e nou konmans elwannyen avek li. Nou kapab osi konmans konsantre lo bann keksoz ki nou krwar pou fer nou ere la konmela. Me si nou annan pasyans, nou pou kapab andire ziska lafen e nou pou ganny sove.​—Mik. 7:7; Mat. 24:13.

8. Ki mannyer ler nou annan pasyans, sa i ed nou pour annan bann bon lanmitye avek lezot? (Kolosyen 3:12, 13)

⁸ Nou bezwen annan pasyans pour nou kapab annan bann bon lanmitye avek lezot. Pasyans i ed nou pour ekout atantivman ler lezot i koze. (Zak 1:19) I osi ed nou fer lape avek lezot. Si nou annan pasyans, nou pa pou reakte tro vit ler nou strese e dir en keksoz ki pou bles lezot. Nou osi pa pou ankoler vitman ler lezot i bles nou santiman. Olye rann mal pour mal, nou pou “kontinyen siport kanmarad e pardonn kanmarad volonterman.”​—Lir Kolosyen 3:12, 13.

9. Ki mannyer ler nou annan pasyans, sa i ed nou ler nou bezwen fer en desizyon? (Proverb 21:5)

⁹ Ler nou annan pasyans, sa i kapab ed nou fer bann pli bon desizyon. Olye fer bann desizyon vit oubyen san reflesir, nou pou pran letan pour fer resers pour vwar bann opsyon ki nou annan e apre nou pou deside kwa ki pli bon. (Lir Proverb 21:5.) Par egzanp, si nou pe rod en travay, petet nou kapab anvi aksepte sa premye travay ki nou trouve menm si sa travay pou fer nou mank enn de renyon oubyen fer mwens dan predikasyon. Me si nou annan pasyans, nou pou pran letan pour reflesir lo kote sa travay i ete, ki kantite letan nou pou bezwen travay e lo ki lefe sa travay pou annan lo nou fanmir e lo nou lanmitye avek Zeova. Ler nou annan pasyans, nou pou evite fer bann move desizyon.

10. Ki mannyer en serviter Zeova i kapab devlop pasyans e kontinyen annan pasyans?

¹⁰ Demann Zeova pour ed ou annan plis pasyans. Pasyans i enn bann kalite ki lespri sen i ed nou devlope. (Gal. 5:22, 23) Alor, nou kapab demann Zeova son lespri sen e pour ed nou devlop pasyans. Si nou pe fer fas avek en sityasyon ki fer li difisil pour nou annan pasyans, nou bezwen ‘kontinyen demann’ Zeova son lespri sen pour ed nou annan pasyans. (Lik 11:9, 13) Nou osi kapab demann Zeova pour ed nou vwar keksoz parey li i vwar. Apre ki nou’n priye, nou bezwen fer nou mye pour annan pasyans sak zour. Si nou kontinyen demann Zeova  pour ed nou annan pasyans e nou kontinyen fer zefor pour demontre pasyans, Zeova pou ed nou pour demontre plis pasyans menm si nou pa ti en dimoun ki ti annan pasyans.

11-12. Ki mannyer Zeova in demontre pasyans?

¹¹ Medit lo bann legzanp ki dan Labib. Dan Labib, i annan legzanp bann dimoun ki ti annan pasyans. Ler nou medit lo sa bann legzanp, nou kapab vwar bann fason ki nou kapab demontre pasyans. Avan ki nou vwar serten sa bann legzanp, annou vwar legzanp Zeova, ki sa pli bon legzanp lo lafason pour demontre pasyans.

¹² Dan zarden Edenn, Satan ti sali non Zeova par esey fer Ev annan dout konsernan si Zeova i en Dirizan ki annan lazistis e ki kontan bann imen. Me Zeova pa ti detri Satan deswit. O kontrer Zeova ti demontre pasyans e i ti annan kontrol lo son lekor parski i ti konnen ki i ti pou pran letan pour montre ki son fason dirize i sa enn ki pli bon. Pandan sa letan, Zeova in andire menm si son non in kontinyen ganny sali. Osi, Zeova pe espere avek pasyans pour ki plis dimoun i kapab ganny sa loportinite pour viv pour touzour. (2 Pyer 3:9, 15) Sa i fer ki plizyer milyon dimoun in aprann konn li. Si nou konsantre lo byenfe ki pasyans Zeova i anmennen, i pou pli fasil pour nou espere ziska ki Zeova i met en lafen avek sa lemonn.

13. Ki mannyer Zezi in demontre pasyans parey son Papa? (Vwar portre.)

¹³ Zezi i swiv legzanp son Papa dan en fason parfe e in demontre pasyans. I ti demontre sa kalite ler i ti lo later. I bezwen ki i pa ti toultan fasil pour li demontre  pasyans, sirtou anver bann profeser lalwa ek bann Farizyen ki ti ipokrit. (Zan 8:25-27) Me parey son Papa, Zezi pa ti ankoler vitman. I pa ti rann mal pour mal ler zot ti ensilte li e esey fer li ankoler. (1 Pyer 2:23) Zezi ti andire ler i ti annan problenm e i pa ti konplent. I pour sa rezon ki Labib i dir nou “reflesir byen lo legzanp sa enn ki ti bezwen siport bann koze kontrer sorti kot bann dimoun.” (Ebr. 12:2, 3) Avek led Zeova, nou osi nou kapab andire ler nou annan problenm.

14. Ki nou kapab aprann avek pasyans ki Abraam ti demontre? (Ebre 6:15) (Vwar portre.)

¹⁴ Petet serten parmi nou ti krwar ki lafen ti pou’n vini depi byen lontan e aprezan nou enkyet ki i pa pou ariv dan nou letan e ki nou pa pou vwar lafen arive. Kwa ki kapab ed nou pour kontinyen espere avek pasyans? Annou vwar legzanp Abraam. Ler Abraam ti annan 75 an e i ti napa zanfan, Zeova ti promet li: “Mon pou fer ou vin en gran nasyon.” (Zen. 12:1-4) Eski Abraam ti vwar sa promes ganny akonplir? Pa vreman. Abraam ti bezwen travers Larivyer Efrat e esper 25 an avan ki son garson, Izaak ti ne e i ti bezwen esper ankor 60 an avan ki son bann pti zanfan, Ezai ek Zakob, ti ne. (Lir Ebre 6:15.) Me Abraam pa ti vwar kot son desandans ti vin en gran nasyon e kot zot ti ganny donnen Later Promiz. Me sa zonm fidel ti annan en lanmitye pros avek son Kreater. (Zak 2:23) Ler Abraam i resisite, i pou kontan pour aprann ki akoz son lafwa ek pasyans, tou nasyon lo later in ganny beni. (Zen. 22:18) Ki leson nou kapab aprann? Petet nou pa pou vwar tou bann promes Zeova ganny akonplir me si nou annan pasyans parey Abraam, nou  kapab asire ki Zeova pou rekonpans nou la konmela e dan sa nouvo lemonn ki i’n promet.​—Mark 10:29, 30.

15. Ki nou kapab etidye lo la pandan nou letid personnel?

¹⁵ Dan Labib, i annan legzanp bann dimoun ki ti demontre pasyans. (Zak 5:10) Petet ou kapab etidye sa bann legzanp. b Par egzanp, menm si David ti ganny swazir pour vin lerwa Izrael ler i ti ankor zenn, i ti bezwen esper plizyer lannen avan i vin lerwa. Simeon ek Ann ti kontinyen servi Zeova fidelman anmezir ki zot ti esper sa Mesi ki ti’n ganny promet. (Lik 2:25, 36-38) Anmezir ki ou etidye bann resi koumsa, rod larepons pour sa bann kestyon swivan: Kwa ki ti ed sa dimoun pour demontre pasyans? Ki byenfe i ti gannyen ler i ti demontre pasyans? Ki mannyer mon kapab swiv son legzanp? Ou kapab osi ganny bann byenfe par etidye bann resi konsernan bann ki pa ti demontre pasyans. (1 Sam. 13:8-14) Ou kapab demann ou lekor: ‘Kwa ki’n fer zot pa demontre pasyans? Ki ti arive ler zot pa ti demontre pasyans?’

16. Ki serten byenfe nou gannyen ler nou annan pasyans?

¹⁶ Mazin bann byenfe ki ou gannyen ler ou demontre pasyans. Ler nou annan pasyans, nou pli zwaye e nou pli kalm. Alor ler nou annan pasyans, sa i kapab fer nou annan en pli bon lasante mantal e fer nou pli an bonn sante. Ler nou annan pasyans avek lezot, nou kapab annan bann pli bon lanmitye avek zot. Sa i fer ki nou kongregasyon i vin pli ini. Si en dimoun i esey fer nou ankoler, nou pa pou ankoler vitman e sa pou anpese ki sa sityasyon i vin pli grav. (Ps. 37:8; Prov. 14:29) Me pli enportan ankor, ler nou annan pasyans, nou swiv legzanp nou Papa ki dan lesyel e nou vin pli pros avek li.

17. Ki nou devret determinen pour fer?

¹⁷ Pasyans i en zoli kalite ki anmenn byenfe pour nou tou. Menm si i pa toultan fasil pour nou demontre pasyans, avek led Zeova, nou kapab kontinyen devlop sa kalite. Anmezir ki nou esper nouvo lemonn, nou kapab asire ki “lizye Zeova i vey lo tou bann ki annan en gran respe pour li, lo bann ki annan lespwar dan son lanmour fidel.” (Ps. 33:18) Alor nou tou annou determinen pour kontinyen demontre pasyans.