1. ¿Kʼãrẽa ãba bakĩrãpanʉ ẽbẽrarã jʉ̃ã kʼawuabʉbawarara?

 DAYIRÃRA ãba bakĩrã ẽbẽrarã jʉ̃ã kʼawuapanʉbawarara. ¿Bʉabida abarika krĩchabʉka? Dayirãba nekʼãrẽ aña obʉrʉde dayirãba biga diapanʉ ẽbẽra abaʉta maʉ̃ kʼarea mejãcha kĩrʉ ẽ bʉrʉ. Akʉza biga diapanʉ dayirã nejaradiabariba jʉ̃ã kʼawuabasi baera dayita zarebaside oũdubita daya kʼawua wãta. Mamina audre biga diapanʉ Jeowaʼa iya dayirãta jʉ̃ã kʼawuabʉ baera (Rom. 2:4).

2. ¿Kʼãrẽ berabaribʉrʉde zarea baseabʉ daya jʉ̃ã kʼawuabʉ ũdubita?

² Dayirãbara biga diapanʉ ẽbẽra abaʉba jʉ̃ã kʼawuabʉta ũdubibʉde. Mamina dayi mawũã bʼaira edaʉde zarea baseabʉ. Bari jaraita zarea baseabʉ dayi ospital eda wãbʉrʉde jʉ̃ãita ẽbẽrarãta mejãchabʉ baera, mawũã medikoba dayita akʉita. Akʉza mejãcha kĩrʉseabʉ wuabemaraba dayimabʉta oda ẽãne. Adewara zarea baseabʉ dayirãba jʉ̃ãpanaita Jeowaba ʉ̃ra zeide nebia weya abʉ ʉ̃rʉ. ¿Jʉ̃ã kʼawuabʉta audre ũdubikĩrãbʉka? Naʉ̃ artikulode akʉdayi kʼãrẽta jarakĩrãbʉta jʉ̃ã kʼawua bʼaita akʉza kʼãrẽa yibiata jʉ̃ã kʼawuabʉta ũdubidaita. Akʉza kʼawuadayi kʼãrẽba kʼarebaseabʉta jʉ̃ã kʼawua bʼaita.

3. ¿Sãwũãbʉ ẽbẽra jʉ̃ã kʼawuabʉra iyita kĩrʉbidara?

³ Nekimare akʉdadrʉ sãwũã jʉ̃ã kʼawuabʉta ũdubidaita. Yi nããrabemata, ẽbẽra jʉ̃ã kʼawuabʉra mesera kĩrʉ ẽ. Ẽbẽra jʉ̃ã kʼawuabʉbara iyita kĩrʉbisidabʉrʉ, mesera  kĩrʉ ẽ akʉza iyita bia edada ẽ basibʉrʉ, iyara krĩcha ẽ abarika oita. Akʉza krĩcha zroma onʉmʉnera wuabemarãra kĩrʉ bedʼea ẽ. Bedʼea «kĩrʉmia ẽãra» Daizeze Bedʼeade nãã bʉsida jara ũrĩbita Jeowa sãwũãbʉ ʉ̃rʉ. Jeowaba iyi ʉ̃rʉ jarasi: «So zʉbʉria akʉbʉ akʉza nebia obʉ, kĩrʉmia ẽ akʉza kãga jõka mejãcha erbʉ akʉza wãrĩnuara» (Éx. 34:6). 

4. ¿Kʼãrẽta obʉ ẽbẽra jʉ̃ã kʼawuabʉbara iya mejãcha jʉ̃ãibarabʉrʉ?

⁴ Ũme, ẽbẽra jʉ̃ã kʼawuabʉbara jʉ̃ãbʉ aduʼa. Iya mejãcha jʉ̃ãibarabʉrʉ zarea obʉ kĩrʉ ẽ baita (Mat. 18:26, 27). Dayirãba nemejãchade ũdubidaibara jʉ̃ã kʼawuabʉta. Bari jaraita, daya pikãga ũrĩbarade daya bedʼeapanʉne akʉza eda bedʼea toto ẽã (Job 36:2). Adewara nesidapanʉ jʉ̃ã kʼawuabʉ ũdubita dayi nekʼawuabaria jaradiabʉde Daizeze Bedʼeata. Mawũã ẽ bʉrʉ nekʼãrẽ iya nãã obadata idubʉmarẽã.

5. ¿Akʉza sãwũã ũdubiseapanʉ jʉ̃ã kʼawuabʉta?

⁵ Ũbea, ẽbẽra jʉ̃ã kʼawuabʉbara nãã bia krĩchabʉ nekʼãrẽ oi nãã. Mamina edaʉde daya nekʼãrẽ oitabʉra ñabasea oibara. Mamina ẽbẽra jʉ̃ã kʼawuabʉbara iya nekʼãrẽ oibʉra ñabasea jõbi kʼarea mesera oẽ, mia ñabasea ojʉ̃drʉ ẽ. awuarabʉrʉ ewari jʉrʉbʉ iya bia krĩcha kʼãrãpe tẽã bia oita.

6. ¿Ẽbẽra jʉ̃ã kʼawuabʉbara kʼãrẽta obʉ bedʼea zroma ũdubʉrʉdera?

⁶ Kimare, ẽbẽra jʉ̃ã kʼawuabʉra wuabemara kĩrʉ bedʼea ẽ iyi sãwũã berabarinʉmʉ kʼarea, mia bedʼea zroma erbʉde. Naʉ̃ba ũdubikĩrãbʉ, jʉ̃ã kʼawua bʼaita awuantaibarata. Kayirua ẽ dayi neũdukʼawuaʉ̃me bedʼeaira akʉza jaraita dayi sãwũã wãta. Mamina yi ẽbẽra jʉ̃ã kʼawuabʉbara iyara sobiade  awuanta kʼawuayi (Col. 1:11). ¿Kʼãrẽa Kristianorabara naʉ̃ra ũbeade jʉ̃ã kʼawuabʉta ũdubibara? Akʉdaya kʼãrẽa.

7. Santiago 5:7, 8​ba jarabʉdebara, ¿kʼãrẽa yibia jʉ̃ã kʼawua bʼaira? (Akʉra potota).

⁷ Dayirãbara erpanaibara jʉ̃ã kʼawuaita ewari jõmaʉ̃nẽpanaita. Naweda ẽbẽrarã Jeowa ode pananaraba jʉ̃ãbada kĩrãkʼa, dayirãbida jʉ̃ã kʼawuaibara Jeowaba iya jarada aripe berabaribiyeda (Heb. 6:11, 12). Daizeze Bedʼeaba jarabʉ dayirãra ne umia kĩrãkʼabʉta (akʉra Santiago 5:7, 8). Ne umiara mejãcha zarea trajabʉ iyi ne u ubʉrʉde bia pãwãramarẽã. Mamina iya kʼawua ẽ sõbede pãwãraira. Dayirãbara zarea opanʉ Jesuba oda kĩrãkʼa oita, dayirãba kʼawua ẽ mina sõbede zeita Daizeze Nokʼora (Mat. 24:42). Dayirãba kʼawuapanʉ Jeowaba aripe berabaribita iya nekʼãrẽ weya adara iyi ewaride. Dayirãba jʉ̃ã kʼawuabʉta ũdubi ẽ bʉrʉ wiña wiñane aduaseabʉ dayirãba jʉ̃ãbʉra akʉza Jeowadeba jĩgara wãseabʉ. Dayirãba jʉrʉseabʉ nekʼãrẽ naʉ̃ drʉadebʉta mawũã atia edabʉrʉ sobia bʼaita, mamina dayirãba jʉ̃ã kʼawuapanʉbʉrʉ awuantadayi akʉza ewari jõmaʉ̃nẽ baseabʉ (Miq. 7:7; Mat. 24:13).

8. ¿Jʉ̃ãbaiba sãwũã kʼarebabʉ wuabemarabawara bia bʼaita? (Colosenses 3:12, 13).

⁸ Wuabemarabawara bia wãita jʉ̃ã kʼawuabʉta ũdubibara. Naʉ̃ba kʼarebabʉ wuabemara bedʼeabʉde kĩrãkita ũrĩta (Sant. 1:19). Kʼarebabʉ jʉrʉita wuabemarabawara aduʼa bʼaita. Dayirãba jʉ̃ã kʼawuabʉta ũdubibʉbʉrʉ ãya dayi sopuabibʉrʉde mesera panʉ ẽ akʉza dayi mejãcha krĩcha zroma obʉde ãya kĩrʉ bedʼea ẽ awuarabʉrʉ jʉrʉbʉ jʉ̃ã bʼaita akʉza ibiade kĩrãduayi dayi ʉ̃rʉ nemitiata osidamina (akʉra Colosenses 3:12, 13). 

9. ¿Jʉ̃ã kʼawua bʼaiba sãwũã kʼarebabʉ nekʼãrẽ bia jida kʼawuaita? (Proverbios 21:5).

⁹ Jʉ̃ã kʼawuabʉba kʼarebabʉ nekʼãrẽ jidabʉrʉde bia jida kʼawuaita. Dayirãba jidabʉrʉde nekʼãrẽ mesera jidai nãã, zarea obʉ bia kʼawuaita saʉ̃ta audre yibiata mawũã bia jidaita (akʉra Proverbios 21:5). Bari jaraita, dayi trajo neẽãne jʉ̃ã kʼawuabʉta ũdubi ẽ bʉrʉ, daya trajo nãã diabʉdata jidaseabʉ maʉ̃ba Daizezedeba jĩga bʼaimina. Jʉ̃ã kʼawuabʉta ũdubibʉbʉrʉ, nãã krĩchayi maʉ̃ trajo kʼãrẽaba jĩgachuta, kʼãrẽ ũmadaʉbayeda trajaita, mebẽrãne maʉ̃ra sãwũã bʼaita akʉza sãwũã Jeowadeba jĩga babiseabʉta. Daya jʉ̃ã kʼawuabʉta ũdubibʉbʉrʉ nekʼãrẽ jidabʉrʉde bia jida kʼawuayi.

10. ¿Kristianorabara kʼãrẽta oibara jʉ̃ã kʼawuabʉ erbaita akʉza oũdubita?

¹⁰ Yiwidʼira mejãcha jʉ̃ã kʼawuabʉta erbamarẽã. Jʉ̃ã kʼawua bʼaira neta jauredebema (Gál. 5:22, 23). Maʉ̃ kʼarea widibara Jeowaʼa iyi jaure zareata diamarẽã mawũã audre jʉ̃ã kʼawua bʼaita. Dayirãma zera dayi kĩrʉbiseabʉta, Jeowa yiwidʼibʉde widibara audre diamarẽã jʉ̃ã kʼawua bʼaita (Luc. 11:9, 13). Akʉza Jeowaʼa widiseabʉ iya akʉbʉ kĩrãkʼa akʉbimarẽã. Dayi yiwidʼida tẽã zarea oibara jʉ̃ã kʼawuabʉ ũdubita. Dayirãba Jeowaʼa widibʉbʉrʉ jʉ̃ã kʼawua bʼaita akʉza zarea obʉbʉrʉ jʉ̃ã  kʼawua bʼaita, mawũãra maʉ̃ nebiara dayirã sode erbayi akʉza oũdubiyi.

11, 12. ¿Jeowabara sãwũã ũdubi zebʉrʉ jʉ̃ã kʼawua bʼaira?

¹¹ Krĩchara yizara Daizeze Bedʼeadebema ʉ̃rʉ. Daizeze Bedʼeabara mejãcha jara ũrĩbibʉ Jeowa pʉwʉrʉba sãwũã jʉ̃ã kʼawuabada ʉ̃rʉ. Maʉ̃ra yiza ʉ̃rʉ krĩchabʉrʉde dayirã kʼarebaseabʉ jʉ̃ã kʼawua bʼaita. Maʉ̃ra yiza akʉi nãã akʉdayi sãwũã Jeowaba jʉ̃ã kʼawuabʉta ũdubisita. Jeowara audre yiza biata jʉ̃ã kʼawua bʼai ʉ̃rʉ.

¹² Jardin Edénʼnera Diarura imitia bedʼeasi Jeowa ʉ̃rʉ. Evaʼa krĩchabisi Daizezebara iyira kãga ẽãta akʉza bia zokʼabe ẽãta. Jeowaba Diaru mesera beai kaude ũdubisi jʉ̃ã kʼawuabʉta akʉza iduaribisi Diaruba zokʼamarẽã wuabemaraba kʼawuadamarẽã kʼaiba bia zokʼaseabʉta. Jeowabara jʉ̃ã kʼawuabʉta ũdubibʉ baera awuanta zebʉrʉ iyi trʉ̃ ʉ̃rʉ imita bedʼeapanʉta. Adewara Jeowabara jʉ̃ã kʼawuabʉta ũdubibʉ mawũã ẽbẽrarãta ewari jõmaʉ̃nẽpanamarẽã (2 Ped. 3:9, 15). Jeowaba kʼãwũã jʉ̃ã kʼawuabʉta ũdubibʉ baera ẽbẽrarã mejãchaʉta iyi o eda zebʉda. Dayirãba akʉpanʉbʉrʉ sãwũã Jeowaba jʉ̃ã kʼawuabada ʉ̃rʉ, maʉ̃ba kʼarebayi dayirãbida jʉ̃ã kʼawua bʼaita iyi ewari zeyeda.

13. ¿Sãwũã Jesubara abarika osi Jeowaba oda kĩrãkʼa jʉ̃ã kʼawua bʼai ʉ̃rʉ? (Akʉra potota).

¹³ Jesubara yi Zeze Jeowaba oda kĩrãkʼa jʉ̃ã kʼawuabʉta ũdubisi, audre nama egoro eda zeside. Jesuitara edaʉde zarebasi jʉ̃ã kʼawuabʉ ũdubita pariseora akʉza eskribara (Juan 8:25-27). Jesubara mesera kĩrʉbʉta ũdubi ẽ basi yi Zeze Jeowade kĩrãkʼa. Adewara abarika  oita krĩcha ẽ basi iyi ʉ̃rʉ imitia jarasidade (1 Ped. 2:23). Jesubara jʉ̃ã kʼawuabʉta ũdubisi iyi bedʼea zroma ũduside, maʉ̃ kʼarea Daizeze Bedʼeaba dayirãʼa maʉ̃ta omarẽã jarabʉ: «Biʼia krĩchara sãwũã yi kayiruaba imitia jaradata akʉza zʉbʉriabibadata, mawũã odara paeda ẽ bayi akʉza awuantadayi» (Heb. 12:2, 3). Jeowa kʼarebadeba dayirãbida awuantaseabʉ kʼãrẽ bedʼea zroma zebʉrʉde.

14. Abrahánba jʉ̃ã kʼawuabadadebara, ¿kʼãrẽta kʼawuaseapanʉ? (Hebreos 6:15 akʉra potota).

¹⁴ Dayirã mejãchaʉba dããraba Daizeze ewari zemarẽã jʉ̃ãpanʉta. Mamina idi ewadera mejãcha krĩcha zroma opanʉ krĩchabʉ baera maʉ̃ ewarita ũdu ẽ baita. ¿Kʼãrẽba kʼarebaseabʉ dayirãba jʉ̃ã kʼawuabʉ erbaita? Krĩchaidua Abrahán ʉ̃rʉ. Iyi 75 poagabaside akʉza wũãwũã neẽ baside Jeowaba jarasi: «Mʉaʼa bʉra pʉwʉrʉ zroma babiyi» (Gén. 12:1-4). Abrahánbara maʉ̃ jaradapeadara ¿ũdusika? Jõma ũdu ẽ basi. Abrahánbara do Éufrates berabarida tẽã 25 poaga jʉ̃ãibarabasi ũduita yi warra Isaac todapeadata, akʉza 60 poaga berabarida tẽã ũdusi Isaac warrarata Esaúta Jacobʼʉ̃me (akʉra Hebreos 6:15). Mamina ũdu ẽ basi sãwũã iyideba zedarãra pʉwʉrʉ zroma bʼaira akʉza ũdu ẽ basi Jeowaba drʉa diaya adama wãita, mamina Abrahánʼra audre Jeowa kʼawabasi (Sant. 2:23). Akʉza Abrahánʼra jẽda piradrʉbʉrʉde, mejãcha sobiayi iya kʼãwũã jʉ̃ãbadadeba akʉza ĩjãbadadeba ẽbẽrarã mejãchaʉta nebia ũdui baera (Gén. 22:18). ¿Kʼãrẽta  kʼawuapanʉ? Dayirãbida ũdu ẽ baseabʉ ʉ̃kʉrʉ propesia Jeowaba jaradara. Dayirãba jʉ̃ã kʼawuabʉta ũdubibʉbʉrʉ Abrahánba oda kĩrãkʼa wãrĩnu ĩjãseapanʉ Jeowaba nebia diaita dayirã idi ewade akʉza ʉ̃ra zeide (Mar. 10:29, 30).

15. Dayidobaʉba Daizeze Bedʼea akʉbʉrʉdera, ¿kʼãrẽta estudiaseabʉ?

¹⁵ Daizeze Bedʼeadera mejãchabʉ eda sãwũã maʉ̃ra ẽbẽrarãba jʉ̃ã kʼawuabada ʉ̃rʉ (Sant. 5:10). Yibia maʉ̃ra yiza ʉ̃rʉ bʉa estudiamarẽã. b Bari jaradaita, Davidʼra warrarabasi Jeowaba jidaside Israel pʉwʉrʉ nokʼo bamarẽã, mamina iyara poaga bio jʉ̃ãibarabasi maʉ̃ zokʼa zeira. Simeónta Anaʉ̃mera Jeowa ode kʼẽrẽpapanasi ãya jʉ̃ãpanʉena Dayirã ẽdrʉbibari zeyeda (Luc. 2:25, 36-38). Bʉa maʉ̃ra yiza ʉ̃rʉ lebʉeda bʉyikʉza widira: «¿Kʼãrẽba kʼarebasi maʉ̃ ẽbẽraba jʉ̃ã kʼawuabʉ ũdubita? ¿Kʼãrẽ nebiata ũdusi mawũã jʉ̃ã kʼawuabʉ ũdubibʉba? ¿Sãwũã abarika oseabʉ?». Akʉza bʉara kʼawuaseabʉ ẽbẽrarã jʉ̃ã kʼawuabʉta ũdubida ẽãra ʉ̃rʉ (1 Sam. 13:8-14). Bʉyikʉza widiseabʉ: «¿Kʼãrẽa ãyara jʉ̃ã kʼawuabʉta ũdubi ẽ basi? ¿Maʉ̃ba kʼãrẽ bedʼea zromata ũdusi?».

16. ¿Kʼãrẽ nebiata ũduseabʉ jʉ̃ã kʼawuabʉba?

¹⁶ Krĩchara kʼãrẽ nebiata ũduseabʉta jʉ̃ãbaiba. Dayirãba jʉ̃ã kʼawuabʉta ũdubibʉbʉrʉ audre sobiapanʉ akʉza aduʼapanʉ. Dayirãba jʉ̃ã kʼawuabʉta erbʉbʉrʉ wuabemarabawara ãba bʼaita ũdubʉ. Dayirã kongregasionʼra audre ãba baseabʉ. Dayirãta kĩrʉbisidabʉrʉ akʉza maʉ̃ta dayirãta abarika kĩrʉpanʉ ẽ bʉrʉ kʼarebabʉ aukʼara bedʼea zroma ba ẽ baita (Sal. 37:8, nota; Prov. 14:29). Jʉ̃ã kʼawuabʉta ũdubipanʉbʉrʉ audre Jeowa kʼawa baseabʉ, akʉza iya obʉ kĩrãkʼa obʉta ũdubiseabʉ.

17. ¿Kʼãrẽta odaibara?

¹⁷ Jʉ̃ã kʼawuabʉ nebiara arigʉ yibia. Zareamina jʉ̃ã kʼawua bʼai erbaira maʉ̃ta oũdubi wãseabʉ Jeowa kʼarebadeba. Dayirãba ẽjũã kĩrãwãreã zeyeda jʉ̃ãbʉ naʉ̃ nebiata: «Akʉidua. Jeowa dabʉbara akʉbʉ iyi wawiapanʉrata, iyi kãga jõka jʉ̃ãpanʉra ʉ̃rʉ» (Sal. 33:18). Zarea oidua ewari jõmaʉ̃nẽ jʉ̃ã kʼawuabʉta ũdubidaita.