1. Pine nemen matre pi tro kö sa ce lapa memine la itre atr ka atreine xomihni?

 PI TRO kö sa ce lapa memine la itre atr ka atreine xomihni. Nge easa metrötrëne la itre atr ka atreine itreqe, nge tha ka canga elëhni kö. Easa madrine la itre xan a xomihni së, la easa tria. Ketre, easa olene kowe la ka ini Tusi koi së, ke ma hnei easë fe hna hmitr troa trotrohnin, maine trongëne la itre xaa ini. Nge tru catre kö la ole së koi Iehova, pine la aqane xomihni së hnei Nyidrë!​—Rom. 2:4.

2. Eu la itre ijin laka, jole koi së troa xomihni?

² Haawe, easa madrine la itre xan a xomihni së. Ngo ame së ke, atreine fe kö së xomihni tui angatr? Tune kaa e tru catr hnei loto, nge tare hë së? Nge tune kaa pena së la kola aelëhni së hnei ketre? Atreine kö së xomihni? Nge hapeu, jole kö koi së troa treqene la drai i Iehova? Eje hi, aja i easë asë hi troa atreine itreqe. Ame ngöne la tane mekune celë, tro sa ce wange la aliene la troa xomihni, memine la enyipiewekëne la thiina cili. Nge tro fe sa ce wange la aqane tro palahi sa huliwane la thiina cili.

3. Nemene la aqane ujë ne la atr ka atreine xomihni, la kola aelëhni angeic?

³ Tro sa ce wange la foa lao aqane tro sa amamane ka hape, ka atreine xomihni së. Ame la hnapan, ka hmitr troa elëhni la atr ka atreine xomihni. Tha angeic kö a thele troa të la kola aelëhni angeic, maine pena la angeic a hnehengazo.  Ame la kola xötrei mama la hnaewekë “ka hmitre troa elëhni” ngöne la Tusi Hmitrötr, ke kola qeje Iehova. Kola qeje Nyidrë ka hape, “Akötresie ka utipin nge ka itrotrohni, nge ka hmitre troa elëhni, nge ka tru trenge ihnimi nyipici, me nyipici.”​—Eso. 34:6.

4. Nemene la aqane ujë ne la atr ka atreine xomihnin, e kola hmitr la ketre ewekë?

⁴ Ame la hnaaluen, ka itreqe nge tha ka eetre lapa kö la atr ka atreine xomihni. Maine kola hmitr la ketre ewekë, ke tha angeic kö a eetr maine canga wesitre pena. (Mat. 18:26, 27) Ame itre xaa ijin, loi e tro sa atreine itreqe me lapa thaup. Ame la ketre a ithanata, ke loi e tro sa drei angeic hnyawa, ngo tha tro kö a thupa la angeic a ithanata. (Iobu 36:2) Ketre, nyipiewekë tro fe sa atreine itreqe e jol kowe la ka ini Tus troa trotrohnine la ketre ini, maine troa nuetrije pena la itre hna majemine ka ngazo.

5. Nemene la ketre aqane tro sa amamane ka hape, ka atreine xomihni së?

⁵ Ame la hnaakönin, ame la atr ka atreine xomihni, ke tha ka kuca nyimenyimëne kö la huliwa. Nyipici, ame itre xaa ijin, loi e tro sa canga kuca la huliwa, nge tha tro kö a hmitr. Ngo e ka nyipiewekë la huliwa hne së hna kuca, ke tha tro kö së lai a canga sesë, me anyimenyimëne la huliwa. Loi e tro pe sa pane mekune la aqane tro sa kuca la huliwa. Nge e thupen, easa xomi ijine troa kuca hnyawane la huliwa.

6. Nemene la hna kuca hnene la atr ka atreine xomihni ngöne la kola traqa la itre jol?

⁶ Ame la hnaafoan, ame la atr ka atreine xomihni, ke tha ka eetre kö la kola traqa la itre jol. Ame la easa cile kowe la itre jol, tha ka ngazo kö tro sa fe la hni së kowe la ketre sinee, me qaja asë la hne së hna melën. Ngo ame la atr ka atreine xomihni, ke angeic a madrine me isine troa nyihlue i Iehova ngacama kola traqa la  itre itupath. (Kol. 1:11) Haawe, ame së itre ka nyihlue i Iehova, nyipiewekë tro sa atreine xomihni. Pine nemen? Tro sa ce wange la itre xaa kepin.

7. Thenge la Iakobo 5:7, 8, pine nemen matre nyipiewekë tro sa atreine xomihni? (Wange ju fe la iatr.)

⁷ Maine aja së troa hetrenyi la mel ka pë pun, ke nyipiewekë tro sa atreine xomihni. Tune la itre hlue i Iehova ekö, loi e tro fe sa lapa treqene la ijine tro Nyidrëti a eatrëne la itre hna thingehnaean. (Heb. 6:11, 12) Tusi Hmitrötr a aceitunë së memine la atre eëny. (E jë la Iakobo 5:7, 8.) Ame la atre eëny, ke ka huliwa catr, angeic a jumi feja me fi itre eje lapa, ngacama thatre kö angeic la ijin tro itre ej a cia. Ngo angeic a itreqe hnyawa utihë la ijine menu. Ketre tu së fe, easa catre huliwa i Iehova ngacama “thatre kö [së] la drai ne traqa la Joxu [së].” (Mat. 24:42) Easa itreqe hnyawa utihë la ijine tro Iehova a eatrëne la itre hnei Nyidrëti hna thingehnaean. Ngo e tha xomihni kö së, tro hë së lai a thatreine itreqe me iananyi trootro qaathei Iehova. Nge tro fe së lai a thel la itre ewekë ka troa amadrinë së enehila. Ngo e tro sa atreine xomihni, ke tro së lai a cile hut utihë la pun, me mel.​—Mika 7:7; Mat. 24:13.

8. Pine nemen matre tro sa atreine ce mel me itre xan, e tro sa atreine xomihni? (Kolose 3:12, 13)

⁸ Maine ka atreine xomihni së, ke tro së lai a atreine ce mel me itre xan. Nge tro fe së lai a drenge hnyawa la angatr a ithanata. (Iako. 1:19) Ame la atr ka atreine xomihni, ke ka thele tingeting. Matre tha angeice kö a dreng akötrën me sa akökötren, la angeic a hnehengazo. Nge tha angeice kö a canga elëhni, la kola akötrë angeic. Tha angeic kö a itëkeun, ngo angeic pe a ‘xomihni me nue la ngazo.’​—E jë la Kolose 3:12, 13.

9. Pine nemen matre loi e tro sa atreine xomihni la easa axecië mekun? (Ite Edomë 21:5)

⁹ Maine ka atreine xomihni së, ke tro fe së lai a atreine axecië mekune hnyawa. Tha easë kö a canga axecië mekune menu, ngo easë pe a pane thele me mekune la nyine tro sa kuca. (E jë la Ite Edomë 21:5.) Maine easa thele huliwa, tro kö sa canga kapa la ketre huliwa ngacama tro eje lai a sewe së troa sine la itre icasikeu me cainöje trootro? Waea. E ka atreine itreqe së, tro së lai a pane mekune la enanyine la hnë huliwa, me itre hawa, me itre ethanyine kowe la fami së, me kowe la imelekeu së me Iehova. Haawe, e tro sa atreine xomihni, ke tha tro kö së lai a axecië mekune menu.

10. Nemene la ka troa xatuane la keresiano tro palahi a atreine itreqe?

¹⁰ Thithi jë matre tro palahi sa atreine itreqe. Ame la troa atreine itreqe, ke ketre igötranene la wene ne la ua. (Gal. 5:22, 23) Celë hi matre nyipiewekë tro sa sipo Iehova la uati hmitrötre i Nyidrë, matre xatua së troa huliwane la thiina cili. E jole koi easë troa atreine itreqe, ke ‘the mano kö sipon’ la uati hmitrötr. (Luka 11:9, 13) Loi e tro fe sa sipo ixatua koi Iehova matre troa xome la aqane waiewekë i Nyidrë. Nge thupene la easa thith, ke loi e tro sa isine troa huliwane la thiina cili e nöjei drai. Maine tro palahi sa thith göne troa atreine itreqe, me thel troa huliwane la thiina cili, ke tro kö Iehova a xatua së.

11-12. Tune kaa la aqane xomihni Iehova?

 ¹¹ Lapa mekune jë la tulu ne la itre ka itreqe e hnine la Tusi Hmitrötr. Alanyim la itre atr hna qaja e hnine la Tusi Hmitrötr ka atreine itreqe. Maine tro sa lapa mekun la tulu i angatr, ke tro lai a xatua së troa huliwane la thiina cili. Ngo tro sa pane ce wange la tulu ka sisitria ne atreine itreqe, ene Iehova.

¹² Ame ngöne la hlapa e Edrena, hnei Satana hna adrone la ëje i Iehova. Hnei angeic hna qaja ka hape, tha ka meköti kö la aqane musi Nyidrë, nge tha Nyidrëti kö a hnimi së. Tha hnei Iehova kö hna canga apatrenyi Satana. Ngo hnei Nyidrëti pe hna pane itreqe me xomihni, matre jelethoi angeic, me amamane kowe la itre atr ka hape, ka loi kö la aqane musi Nyidrë. Qane ju hi lai, Iehova palahi a xomihnine la itre trengathoi Satana. Ketre, Nyidrëti a xomihni matre tro la itre atr ka alanyim a hane kapa la mele ka pë pun. (2 Pet. 3:9, 15) Celë hi ka aijijëne la itre milio lao atr troa hane atre Nyidrë. Maine tro sa lapa mekune la thangane kowe la itre atr la hna xomihni hnei Iehova, tro lai a xatua së troa treqene hnyawane la drai Nyidrë.

13. Tune kaa la aqane nyitipune hnyawane Iesu la aqane xomihni Iehova? (Wange ju fe la iatr.)

¹³ Hnei Iesu hna nyitipune hnyawane la aqane xomihni Iehova. Celë hi ka mama lo nyidrëti e celë fen. Ngo tha ka hmaloi kö koi nyidrë, la nyidrëti a goeëne la aqane mele thoi ne la itretre cinyihan me angetre Faresaio. (Ioane 8:25-27) Ceitui nyidrëti hi me Iehova, ka hmitr troa elëhni. Ame la kola qaqa nyidrë, me pi isi me nyidrë, ke tha hane kö nyidrë iqaqa.  (1 Pet. 2:23) Tha hnei nyidrëti kö hna eetr, ngo hnei nyidrëti pe hna xomihni. Celë hi matre Tusi Hmitrötr a ithuecatre koi së troa “mekune hnyawa . . . la atre xomihnine la itre trenge ewekë ne imethinë hna qaja hnene la itre atre ka ngazo”! (Heb. 12:2, 3) Jëne la ixatua i Iehova, ijiji easë fe hi troa xomihnine la nöjei pengöne itupath.

14. Nemene la ini hne së hna xome qaathei Aberahama? (Heberu 6:15) (Wange ju fe la iatr.)

¹⁴ Hapeu, ekö catre hë epun treqene la drai i Iehova? Ma epun jë mekun ka hape, tha tro pë hë epuni a hane öhne la drai cili. Nemene la ka troa xatua epun troa itreqe hnyawa? Tro sa ce wang la hna melën hnei Aberahama. Ame lo nyidrëti a 75 lao macatre, nge pë palakö nekö i nyidrë, hnei Iehova hna sisinyi koi nyidrë ka hape: “Tro ni a kuca matre nöje ka tru eö.” (Gen. 12:1-4) Hnei Aberahama kö hna öhne la kola eatr la hna thingehnaeane cili? Waea. Hna hnaho Isaaka, 25 lao macatre thupen la nyidrëti a thupa la hneopegejë ne Euferata. Nge 60 lao macatre thupen, kola hnahone la lue api nyidrë, ene Esau me Iakobo. (E jë la Heberu 6:15.) Ngo tha hnei nyidrëti kö hna öhne la itre matra i nyidrë a nöje ka tru, me lö kowe la Nöje Hna Thingehnaean. Ame pe, hnei Aberahama hna mele nyipici koi Iehova utihë mec. (Iako. 2:23) Pane mekune jë la madrine i nyidrëti ngöne la fen ka hnyipixe, la nyidrëti a atre ka hape, hna amanathithine la nöjei nöje hnene la lapaun me xomihni nyidrë! (Gen. 22:18) Nemene la ini? Maine jë, tha tro pë hë sa öhne la kola eatr asë la itre hna thingehnaeane  hnei Iehova. Ame pe, e tro sa atreine xomihni tui Aberahama, tro Iehova a amanathithi së enehila me ngöne la fen ka hnyipixe.​—Mar. 10:29, 30.

15. Nemene la nyine tro sa wange, la easa ini Tusi cas?

¹⁵ Hetre itre xaa hlue i Iehova hna qaja e hnine la Tusi Hmitrötr ka hane xomihni. (Iako. 5:10) Wange ju la tulu i angatr, la epuni a ini Tusi cas. b Tui Dravita, hna ië nyidrë troa joxu ne Isaraela, lo nekönatre petre kö nyidrë. Ngo qëmeken troa acili nyidrë ke, itre macatre hnei nyidrëti hna pane itreqe. Maine pena, la tulu i Simeona me Ana. Hnei nyidroti hna catre huliwa i Iehova utihë la nyidroti a öhne la Mesia. (Luka 2:25, 36-38) Ame la epuni a ini Tusi cas, ke sa jë la itre hnyinge celë: ‘Nemene la ka xatua angeic troa itreqe? Nge nemene la thangane lai koi angeic? Tro ni a nyitipu angeic tune kaa?’ Hetre ini fe nyine tro epuni a xome qaathene la itre atr ka thatreine itreqe. (1 Sam. 13:8-14) Hnyinge jë ka hape: ‘Hnauëne laka, tha hnei angatr kö hna xomihni? Nge nemene la pune koi angatr?’

16. Nemene la itre thangane ka loi, la troa atreine xomihni?

¹⁶ Mekune jë la itre thangan ka loi, la troa atreine xomihni. Ame la atr ka atreine xomihni, ke ka madrine me tingeting. Ka lolo la mekune me ngönetrei angeic. Nge ka lolo la imelekeu i angeic me itre xan. Angeice fe a acatrene la cas ne la ekalesia. Ame la kola jele la trengehni angeic, tha angeice kö a canga elëhni, matre pë ju kö jol. (Sal. 37:8; Ite edomë 14:29) Ngo ame la ka sisitria, ke angeic a nyitipu Iehova me easenyi catr koi Nyidrë.

17. Nemene la nyine tro sa catre kuca?

¹⁷ Ketre thiina ka lolo me ka hetre thangan, la troa atreine xomihni! Tha ka hmaloi kö troa xomihni, ngo tro kö Iehova a xatua së troa huliwane la thiina cili. Lapa treqene hnyawa ju la fen ka hnyipixe, nge the luelue kö laka, “eje la lue [meke] i Iehova hui angete qoue nyidë, lo angete teqene la ihnimi nyidë.” (Sal. 33:18) Haawe, catre jë së heetrëne la xomihni!