1. Saide u lobi sama di abi pasensi?

 ALA u lobi te taawan abi pasensi anga u. We lesipeki den sama di poi wakiti wan sani anga pasensi. Ai bigi giw tu te taawan abi pasensi anga u te u meke wan fowtu. Boiti dati, ai bigi giw taki a sama di be e sutudeli anga u be abi pasensi anga u, bika u be mu fusutan den leli fu Beibel. U be mu sabi faw mu wooko anga den tu. Ai bigi giw te ye, taki Yehofa a wan Gadu di abi pasensi.​—Rom. 2:4.

2. On ten a sa taanga giw fu abi pasensi?

² We piisii te taawan abi pasensi. Ma son yuu ai taanga giw fu abi pasensi. Kande tei de aini wan langa fille, moomoo efii lati. Kande yu ati-boon fu di taawan e du sani di ya lobi. Son yuu ai taanga giw tu fu wakiti Yehofa, bika a paamisi u wan nyun goontapu. I wani abi moo pasensi? Aini a artikel ya, wo luku san a wani taki fu abi pasensi, anga saide a manii ya pelensipali. Wo luku tu saw yeepi u fu abi moo pasensi.

3. San wan sama di abi pasensi e du te sama e du sani di sa meke en ati–boon?

³ Luku fo fasi faw sa soi taki wi abi pasensi. A fosiwan, a taki wan sama di abi pasensi ati nai boon gaw. Wan sama di abi pasensi e meke moiti fu de pii, winsi sama e du sani fu meke en ati-boon. A nai pai ogii fu ogii tu. Boiti dati, winsi en ede simpan a nai taki goofu anga taawan. A fosi peesi pe Beibel e taki fu wan sama di ati nai  boon gaw, a pe ai taki: ‘Yehofa a wan Gadu di abi tyali-ati. A abi switifasi. En ati nai boon gaw. Ai du bun ala yuu. Ai du ala san a taki.’​—Ek. 34:6.

4. San wan sama di abi pasensi e du te a mu wakiti?

⁴ Du fu tu, a taki wan sama di abi pasensi poi wakiti wan sani. Efu wan sani teke moo langa moo enke san a be denki, ai wakiti anga pasensi. En ati nai boon tu (Mat. 18:26, 27). A omen okasi de pe u mu soi taki wi abi pasensi. Kande te u mu wakiti wan sama te ai taki fu wa koti en mofu (Yopu 36:2). Kande u mu abi pasensi tu te we leli wan sutudi fu u fu fusutan wan toli fu Beibel, efuso te a mu tapu anga wan takuu gwenti.

5. San a wan taa fasi faw sa soi taki wi abi pasensi?

⁵ Du fu dii, a taki wan sama di abi pasensi nai feti du sani sondee fu a denki. A tuu taki son yuu u mu du sani gawgaw. Ma te wan sama di abi pasensi mu du wan pelensipali sani, a nai feti fu du en. Ai meke ten fu sabi san a mu du. Ai meke ten tu fu du a sani di a mu du.

6. San wan sama di abi pasensi e du te tesi e miti en?

⁶ Du fu fo, a taki wan sama di abi pasensi nai kuutu te tesi e miti en. Wan sama di abi pasensi e holidoo te tesi e miti en. Aa fowtu fu taigi wan bun mati fa we fii te tesi e miti u. Wan sama di abi pasensi e pakisei den bun sani fa libi tu. Boiti dati, ai du ala san a poi fu dini Yehofa anga piisii (Kol. 1:11). Ala den fo sani di u luku ya, e soi taki Kelesten mu meke moiti fu abi pasensi. Saide? Meke u luku tu sani di e soi saide u mu du a sani ya.

7. Enke fa Yakowbesi 5:7, 8 e soi, da saide a pelensipali fu abi pasensi? (Luku a fowtow tu.)

⁷ Efu u wani fende teego libi, da u mu abi pasensi. Leti enke fa den sama di be e dini Yehofa aini a ten di pasa be abi pasensi, a so u mu abi pasensi tu fu Yehofa du den sani di a paamisi u (Heb. 6:11, 12). Beibel e maiki u anga wan sama di e paandi goon. (Leisi Yakowbesi 5:7, 8.) Wan sama di e paandi sani e wooko taanga fu paandi den sani fi en. Ai gi den wataa tu, winsi fa aa sabi pilisisi on ten den o goo. Neen meke ai wakiti anga pasensi. Ai biibi taki wan dei den sani fi en o goo, da aw piki den. A so a de anga u tu. Enke bakaman fu Yesesi we wooko taanga winsi fa ‘wa sabi on dei a Masaa fu wo kon’ (Mat. 24:42). Ma we wakiti anga pasensi, bika u sabi taki den sani di Yehofa paamisi wo kon tuu. Efu u naabi pasensi moo, wo weli. Saafisaafi wo gwe fika Yehofa tu. Boiti dati, wo bigin feti fu fende sani di we si enke o meke u de koloku. Ma efu wi abi pasensi, wo holidoo te na a kaba te enke u fii.​—Mika 7:7; Mat. 24:13.

8. Fa pasensi o yeepi u fu libi bun anga taawan? (Kolosesama 3:12, 13)

⁸ Pasensi e yeepi u tu fu libi bun anga taawan. Ai yeepi u fu aliki bun te taawan e taki (Yak. 1:19). Ai yeepi u fu libi na a wan tu. Boiti dati, efu wi abi booko-ede, pasensi e yeepi u fu wa taki efuso du sani di o hati taawan. Efu wi abi pasensi, da wi ati naw boon gaw efu wan sama du wan hati sani anga u. Pe fu u pai ogii fu ogii, ‘wo abi boo anga taawan. Wo gi den paadon anga u hii ati tu’.​—Leisi Kolosesama 3:12, 13.

9. Fa pasensi o yeepi i tei mu teke wan bosoloiti? (Odo 21:5)

⁹ Pasensi o yeepi i tu fu teke bun bosoloiti. Pe fii go feti du wan sani sondee fii denki, a moo bun fu teke ten ondoosuku sani. Bakadati dai luku san yo du. (Leisi Odo 21:5.) Meke u taki ye suku wan wooko. Te fu kaba i fende wan. Sai sa du efu a wooko e meke i go a baka a waaleiti? Efi yu abi pasensi, yo ondoosuku sani bun fosi. Kande yo luku efu a wooko de faawe, omen yuu langa yo wooko, anga den bakapisi di aw tyai gi yu osufamii. Yo luku tu efu a wooko naw poli yu anga Yehofa. Efi yu abi pasensi, i naw teke wan bosoloiti di o tyai takuu bakapisi gii.

10. Saw yeepi i fu abi moo pasensi?

¹⁰ Begi Yehofa fu abi moo pasensi. Pasensi a wan fu den manii di a santa yeye fu Yehofa e meke sama abi (Gal. 5:22, 23). Neen meke u sa begi Yehofa fa giw a santa yeye fi en. U sa begi en fa yeepi u fu abi a manii ya tu. Efu sani e miti u pe u mu soi pasensi, u sa ‘tan akisi’ Yehofa a santa yeye fi en, bika aw yeepi u fu abi pasensi (Luk. 11:9, 13). U sa begi Yehofa tu fa yeepi u fu si sani enke fa ai si sani. Baka te u begi, u mu meke moiti fu soi pasensi ala dei. Efu we tan begi Yehofa fu abi pasensi, neen we meke moiti fu abi a manii ya, aw yeepi u fu abi moo pasensi.

11-12. Fa Yehofa e soi pasensi?

¹¹ Teke ten pakisei den toli di de aini Beibel. Beibel abi tyaipi toli fu sama di be abi pasensi. Te we teke ten pakisei  den toli ya, a sani ya o yeepi u fu abi pasensi tu. Fosi u luku wantu fu den toli ya, wo luku fosi fa Yehofa e soi pasensi.

¹² Saatan poli Yehofa nen aini a dyali fu Eden. A taigi Efa taki Yehofa a wan ogii-ati Tiiman di á lobi sama. Pe fu Yehofa kii Saatan wantenwanten, a soi pasensi, a dwengi enseefi tu. Bika a sabi taki a be o teke ten fosi a kon a kiin taki neen na a moo bun Tiiman. Winsi fa Yehofa e wakiti, toku ai holidoo, bika sama e tan taki ogii fi en. Boiti dati, Yehofa e wakiti anga pasensi fu di a wani moo sama fende a okasi fu libi fu teego (2 Peit. 3:9, 15). Neen meke a omen miliyun sama sabi Yehofa nownow. Efu we poti pakisei a fa Yehofa e soi pasensi, aw moo makiliki giw fu wakiti en anga pasensi te aw poli a goontapu ya.

13. Fa Yesesi soi taki a abi pasensi enke en Dda? (Luku a fowtow tu.)

¹³ Yesesi abi pasensi enke en Dda. Di a be de a goontapu a be soi taki a abi pasensi. Ma a ná ala yuu a be e makiliki gi en fu abi pasensi, moomoo te a be e taki anga den leliman fu a Weiti anga den Faliseiman (Yoh. 8:25-27). Leti enke Yehofa, Yesesi ati á be e boon gaw. Aa be e pai ogii fu ogii te sama be e kosi en (1 Peit. 2:23). Di tesi be miti en, a holidoo anga pasensi, aa be e kuutu. Neen meke we fusutan te Beibel taki u mu ‘poti pakisei finifini na a sama di be holidoo winsi fa sondu sama be e taki ogii fi en’ (Heb. 12:2, 3). Fu di Yehofa e yeepi u, meke useefi poi holidoo tu winsi sowtu tesi e miti u.

14. San a toli fu Abalaham e leli u? (Hebrewsama 6:15) (Luku a fowtow tu.)

 ¹⁴ A omen fu u be e si enke a kaba be o kon senten. Ma a kaba á doo ete. Neen meke kande we si enke u naw libi langa sai fu si a kaba fa goontapu ya. Saw yeepi u fu tan wakiti anga pasensi? Luku a toli fu Abalaham. Di Abalaham be abi 75 yali, aa be meke pikin ete. Ma Gadu be paamisi en taki: ‘Mio meke i toon wan gaan foluku’ (Gen. 12:1-4). Abalaham be de a libi fu si fa a sani ya kon tuu? Aa si fa ala a paamisi ya kon tuu. Baka di Abalaham abaa Eufraat liba, a be wakiti 25 yali fosi en manpikin Isaki meke a wan foondoo fasi. A baka 60 yali neen den galanpikin fi en Esau anga Yakopu meke. (Leisi Hebrewsama 6:15.) Abalaham á si fa den bakapikin fi en toon wan gaan foluku. Aa si fa den teke a Paamisi Kondee tu. Toku Abalaham anga a Sama di meke en a be bun mati (Yak. 2:23). Te Abalaham o weki baka, aw poolo di aw yee taki a biibi anga a pasensi fi en meke ala den foluku fu goontapu fende belesi (Gen. 22:18). San a toli ya e leli u? Kande nownow u nai si fa den sani di Yehofa paamisi we kon tuu. Ma efu wi abi pasensi enke Abalaham, u sa biibi taki Yehofa o belesi u nownow, ma aw moo belesi wi aini a ten di e kon.​—Malik. 10:29, 30.

15. Saw sa luku te we sutudeli anga useefi?

¹⁵ A omen toli fu taa sama de aini Beibel tu di be abi pasensi (Yak. 5:10). U sa sutudeli den toli ya anga useefi. Luku a  toli fu David. b Di a be yonkuu den be salufu fi en enke kownu fu Islayeli, ma a omen yali a be mu wakiti fosi a toon kownu. Simeyon anga Ana be e dini Yehofa anga den hii ati, winsi fa den be e wakiti fa Mesiyas be kon (Luk. 2:25, 36-38). Te ye sutudeli den toli ya, luku efii poi fende den piki fu den akisi ya: San be yeepi a sama ya fu abi pasensi? Sowtu wini a fende di a soi pasensi? Fa mi sa waka neen baka? I sa leli wan sani tu fu den sama di á be abi pasensi (1 Sam. 13:8-14). Kande i sa akisi iseefi taki: ‘Saide a sama ya á be abi pasensi? San miti en fu di aa be abi pasensi?’

16. San a wantu wini di wo fende te wi abi pasensi?

¹⁶ Poti pakisei a den wini di wo fende te wi abi pasensi. Te wi abi pasensi, wo de koloku. U naw go e du sani fanyafanya. Pasensi sa yeepi u fu abi wan bun gusontu. Efu wi abi pasensi anga taawan, wo libi bun anga den. A sani ya o yeepi a kemeente fu libi na a wan. Efu wan sama kosi u, u nai meke sani kon moo ogii, bika wi ati nai boon gaw (Ps. 37:8 ; Odo 14:29). Ma san moo pelensipali, a taki te wi abi pasensi, da we waka aw Dda a hemel baka. Wi anga en e toon bun mati tu.

17. Saw de kabakaba fu du?

¹⁷ Pasensi a wan moin manii di e tyai wini giw. Winsi fa a ná ala yuu a makiliki fu abi pasensi, toku fu di Yehofa e yeepi u meke u sa abi moo pasensi. Boiti dati, winsi fa we wakiti fu a nyun goontapu doo, u sa biibi taki ‘Yehofa e poti pakisei a den sama di e lesipeki en. Ai poti pakisei a den sama di e wakiti fu a soi den bun-ati’ (Ps. 33:18). Meke u tan meke moiti fu abi pasensi.