1. Amu dzé mia dzing mi tèè é bôt be ne ôdzibi ?

 BIA besese bia dzing bi tèè é bôt be ne ôdzibi. Amu dzé ? Bia kang é bôt be ne yane dzam ézing kaa fun. Bia dzing naa é bôt bevoo be bo ôdzibi ya bia, éyong bia bo bikop. É nga ve fe bia n’nem mbeng, éyong n’yeghe Bible wèè a nga bo ôdzibi ya bia, éyong é mbe bia ndzukh a yeghe, a yebe, nge ki a dzale ayeghle Bible ézing. É dzam da dang bia ve mevakh k’é ne naa Jehôva a lere bia ôdzibi nga !—Bero. 2:4.

2. Ébe za bitéñ é ne bia bo ndzukh naa bi lere ôdzibi ?

² Amben bia dzing bia yen fulu ôdzibi ébe é bôt bevoo, biyong bizing, é ne bo ndzukh naa bia bebién bi lere fulu té. Éfônan, éyong bi ne atasco nge ki embouteillage été, é ne bia bo ndzukh a lere ôdzibi, dang-dang ng’é tam bi va yiène kuiñ é lôrang. Bi ne fe dzimle ôdzibi, éyong é bôt bevoo ba bo é dzam da ndaghle bia. Ye naa, biyong bizing, é ne bia bo ayèñ a yane nféféñ éning Jehôva a kiagh bia. Ye wa kômô veme ôdzibi wiè ? Ayeghle di été, bia ye yen, dzé é ne a bo ôdzibi y’amu dzé é ne édedèè éban. Bia ye fe yen é dzam é ne bia vole a veme ôdzibi wèè.

3. Aval avé é môt a ne ôdzibi a ñong mam éyong ba song ñe ?

³ N’yenghane meval menii bi ne lere ôdzibi. Ôsusua, é môt a ne ôdzibi, a ne kaa ébubu a wokh ôlun. Éyong é bôt bevoo ba bo é dzam da dzughu ñe, a baghle mvoa, kaa ki dzeng naa a bulane be é dzam be va bo ñe. Aa se ki éto-abé y’é bôt bevoo éyong n’nem ô kele ñe ôyô. Éyong ôsua bia wokh éfiè, « kaa ébubu a wokh ôlun » a Bible été, é ne éyong ba luè Jehôva naa « é Nzame a ne mvam y’a kué bôt éngôngoo,  kaa ébubu a wokh ôlun, y’a ndzalan y’édzing é ne mbèmbèè ya bebela »—Akô. 34:6.

4. Aval avé é môt a ne ôdzibi a ñong mam éyong a yiène yane ?

⁴ Édi bèè, é môt a ne ôdzibi a ne mvoa éyong a yane. Ng’é dzam ézing a va yane daa so ki avôô, é môt a ne ôdzibi a vung ki, nge ki a sum wokh abé (Mat. 18:26, 27). Bitéñ bia sili naa bi bo mvoa éyong bia yane bi ne abuiñ. Éfônan, bia yiène bèè y’ôdzibi nté môt a kobe, kaa naa bia kikh ñe nkobe (Job 36:2). É ne f’éban naa bi bo ôdzibi, éyong bia vole n’yeghe Bible wèè a tugha wokh ayeghle ézing ya Bible, nge ki a dang mbia fulu ézing.

5. Za aval afe bi ne lere ôdzibi ?

⁵ Édi lal, é môt a ne ôdzibi aa bo ki mam kaa fas. Bebela a ne naa, bitéñ bizing bia sili naa bi bo mam y’avôô. Ve, éyong é môt a ne ôdzibi a bele ésèñ é ne ñe édedèè éban, aa bo ki de mbii, naa a dzigha mam. Ndaane de, a ñong é tam da yiène naa a tugha takh é dzam a ye bo. Éd’a ve é tam da yiène naa a bo ésèñ té.

6. Aval avé é môt a ne ôdzibi a ñong mam éyong a tele bitsible nge ki minzukh été ?

⁶ Édi nii, é môt a ne ôdzibi a ve mengu’u naa a zôme minzukh kaa kè. Nfa té, fulu ôdzibi ô bele mura élat ya fulu édzip. Édi é ne été é ne naa, déé se ki abé naa bi dzô mvuiñ dzèè é dzam bia wôrane nfa ndzukh bia tubane wô. Ve, é môt a ne ôdzibi a ye tsini naa a simane mbemba be-mam me y’éning dèñ, ye ve mengu’u mese mèñ naa a tsini naa a sèhane Jehôva ya mevakh (Becol. 1:11). Bia bekristen, bia yiène lere ôdzibi meval meté mesese. Amu dzé ? N’yenghan ayôm mekalgha.

7. Aval ane nten Jacques 5:7, 8 wa lere de, amu dzé ôdzibi ô ne édedèè éban ? (A daghe fe évaghle).

⁷ Bia yiène bo ôdzibi nge bia kômô  bele éning é ne mbèmbèè. Ane be-bo bisèñ Nzame be y’ô mvus, bia yiène yane y’ôdzibi naa Nzame a mane dzale mengiagh mèñ (Behéb. 6:11, 12). Bible a vaghane étéñ dèè, y’étéñ mbéñ bidzi (A lang Jacques 5:7, 8). Mbéñ bidzi a sèñ ngu’u naa a béñ ye ve bidzi a va béñ mendzim, ve, aa yem ki ôden bidzi bité bia ye vem. Éde, mbéñ bidzi a yane y’ôdzibi, a bele ndzi-n’nem naa a ye sap bidzi a va béñ. Aval té, éde fe bia yiène bele abuiñ mam ya bo nfa ya nsisim, amben biaa « yem ki é môs Nti [wèè] a ye so » (Mat. 24:42). Bia yane y’ôdzibi, bi bele ndzi-n’nem naa é tam da yiène, Jehôva a ye dzale é mam mesese a kia-yang bia. Nge bi boo kaa bo ôdzibi, bi ne voat naa bia yane, ye naa, avitsang-avitsang bi ne sum ke Jehôva ôyap. Bi ne fe sum bembe ébe é mam bia bebién bia tem naa ma ve bia mevakh éndagha. Atoo naa, nge bi bele ôdzibi, bi ne zôme yakekuiñ amangha ye tobe nkôran—Michée 7:7 ; Mat. 24:13.

8. Aval avé ôdzibi wa vole bia a bele mbemba élat y’é bôt bevoo ? (Becolossien 3:12, 13)

⁸ Ôdzibi wa vole bia a bele mbemba élat y’é bôt bevoo. Da vole bia a tugha bèè éyong é bôt bevoo ba kobe (Jacq. 1:19). Ôdzibi wa ve fe naa mvoa é bo. Da ve naa, bi taa dzigha ñong mam abé, ye naa, bi taa ki sia dzô mbimbia dzam éyong n’nem ô ne bia abé. Éde, nge bi ne ôdzibi, biaa ye ki dzigha wokh ôlun éyong môt a ye bia ve n’nem abé. Ndaane naa bia bulan é dzam be va bo bia, bia ye « tsini naa bia zôme bevoo y’éba bevoo, ye dzame ya n’nem ôse bevoo y’éba bevoo »—A lang Becolossien 3:12, 13.

9. Aval avé ôdzibi wa vole bia éyong bia yiène ñong minkighan ? (Minkana 21:5)

⁹ Ôdzibi ô ne fe bia vole a ñong mbemba minkighan. Ndaane naa bia ñong nkighan avôô nge ki kaa tare fas, bia dzeng naa bi yen minkighane misese bi ne ñong, ôsu vèè, éyong té bia top nkighane wa dang mbeng (A lang Minkana 21:5). Éfônan, nge bia dzeng ésèñ, bi ne kômô yebe ésèñ ésese ba tare bia ve, amben dzam té é ne ve naa bi makh bisulane bizing nge ki a saghe é tam bia lôt minkanghle. Ve, nge bi ne ôdzibi, bia ye ñong tam naa bi fas é tam da ye bia ñong naa bi kuiñ é vôm ésèñ té é ne, abim mewala bia ye sèñ, y’aval ésèñ té da ye name é nda-bôt dzèè y’élat dèè ya Jehôva. A bo ôdzibi é ne fe bia vole naa bi taa ñong mbia minkighan.

10. Aval avé moan kristen a ne veme ye baghle ôdzibi ?

¹⁰ Yaghlane naa ô veme ôdzibi wiè. Ôdzibi ô ne ngap daa y’ébuma ya nsisim (Begal. 5:22, 23). Éde, bi ne yaghlane naa bi bele nfufup nsisim , bii dzaa Jehôva naa a vole bia a bele mefulu me y’ébuma ya nsisim wèñ. Nge bi tele aval étéñ da vakh ôdzibi wèè, bi ne « tsini naa bia dzaa » naa nsisim Nzame ô vole bia a bo ôdzibi (Luc 11:9, 13). Bi ne fe dzaa Jehôva naa a vole bia a yen mam ane ñe. Éde, niène bia mane yaghlan, bia yiène ve mengu’u naa bi bo ôdzibi kada môs. Nge bi tsini naa bia yaghlane nfa ya bele ôdzibi, ye dzeng naa bi lere ôdzibi kada môs, Jehôva a ye bia vole a bele fulu té, amben metam ô mvus biaa mbe ki ôdzibi.

11-12. Aval avé Jehôva a nga lere ôdzibi ?

¹¹ A binan ébe bifônan bi ya Bible. Bible a bele abuiñ bifônan bi y’é bôt be mbe ôdzibi. Éyong bia binan ébe minlang mité, bi ne yeghe meval bi ne lere ôdzibi. Kaa naa bi fas bifônane bizing bi y’été, n’targhane yen éfônan ôdzibi da dang bifônane bisese, édi Jehôva.

 ¹² Afup Eden, Satan a nga waa éyôla Jehôva mvin ye luman éwogha Dèñ, éé kômô ve naa Eva a tem naa Jehôva aa se ki Ndjié ane sôsôe y’édzing. Ndaane naa a wiñ n’nenèè té étéñ té ébién, Jehôva a nga lere ôdzibi, ye djié émién, amu a nga yem naa, nfa y’a lere naa édjié Dèñ éde da dang mbeng, da ye ñong tam. Éde, nté a yane, a zôme minèè misese ba kanghle nfa éyôla dèñ. Ya fe naa, Jehôva a tsini naa a yane y’ôdzibi nfa ye naa abuiñ bôt be bele éning é ne mbèmbèè (2 Pierre 3:9, 15). Asughlan y’été é ne naa, bizukh bi bôt bi nga yem-hang Jehôva. Nge bi bembe éb’abuan da so y’ôdzibi Jehôva, da ye bia bo ébubu naa bi yan é tam Jehôva a kighang naa a man y’émo di.

13. Aval avé Yésu a nga tugha vu ôdzibi Ésaa ? (A daghe fe évaghle).

¹³ Yésu a tugha vu ôdzibi Ésaa, ye naa, a nga lere fulu té éyong a mbe a si va. Déé nga yiène ki bo Yésu ébubu éyong ésese naa a lere ôdzibi, dang-dang ya minenèè bi escribas nge ki scribes ya be fariseos nge ki pharisiens (Jean 8:25-27). Ve, aval ane Ésaa, Yésu éé nga dzigha ki wokh ôlun. Aa dzi bulan éyong be nga tè ñe nge ki a song ñe (1 Pierre 2:23). Yésu a nga zôme minzukh y’ôdzibi kaa kè. Biaa yaghane ki, éyong Bible a dzô naa bi « tugha daghe é môt a nga zôme mbia mindzôane be-bo minsem » ! (Behéb. 12:2, 3) Y’avole Jehôva, bia fe bi ne zôme y’ôdzibi minzukh misese bia tubane mio.

14. Za ayeghle bi ne ñong ébe ôdzibi Abraham ? (Behébreu 6:15) (A daghe fe évaghle).

¹⁴ Za dzam bia ye bo nge é mam bia yane nfa amangha y’émo di méé be ki dzalban ? Éyong ézing, bi yaneyang aayap naa amangha é so. Bi ne ko wong naa  éyong amangha da ye so é kôane naa bi wuang. Dzé é ne bia vole a k’ôsu y’a yane y’ôdzibi ? N’ñonghan éfônan Abraham. Éyong Abraham a nga kuiñ mimbu 75 kaa naa a bele moan, Jehôva a nga kiagh ñe naa : « Ma ye ve naa ô bo môra ayong » (Atar. 12:1-4). Ye Abraham a nga yen ane ngiagh té da dzalban ? Éé dzi ki mane yen ane ngiagh té da mane dzalban asese. Niène a nga kighan ôshuiñ Euphrates ye yane mimbu 25, Abraham a nga yen ane y’akengha é moan wèñ Isaac a nga byale, ye naa mimbu 60 ôsu vèè, a nga yen ane bendéñ bèñ Esaú ya Jacob ba byale (A lang Behébreu 6:15). Ve, Abraham aa dzi ki yen ane é mvong dzèñ da venghane môra ayong ye ñong Si ngiagh. Afang bo aval té, sôsôe a môt té a nga buane mbemba élat ya Mvele wèñ (Jacq. 2:23). Éde, éyong Abraham a ye wômô, nté mbé da ye ñe ve mevakh, a yem naa mebun, y’ôdzibi wèñ me nga sughlane biboran akal meyong mese ! (Atar. 22:18) Za ayeghle bia ñong ? Éyong ézing bia bebién biaa ye ki yen ane mengiagh mesese Jehôva ma dzalban. Amben aval té, nge ane Abraham bi bo ôdzibi, bi ne tobe ndzi-n’nem naa, Jehôva a ye borane bia éndagha, ye naa biborane bité bia ye dang nféféñ éning A kiagh bia—Marc 10:29, 30.

15. Bi ne fas za dzam ayeghle dèè bia bebién ?

¹⁵ Bible a bele abuiñ bifônane bife bi y’é bôt be nga lere ôdzibi (Jacq. 5:10). Amu dzé wamièn waa fakh ki bifônane bité ayeghle duè wamièn b ? Éfônan,  amben be nga top David naa a bo kéza y’Israel a too mong, a nga yiène yane abuiñ mimbu nfa ye naa a ñong éto ndjié. Simeon ba Anna be nga sèhane Jehôva sôsôe nté be nga yane asoo Mesías (Luc 2:25, 36-38). Nté wa yeghe bifônane bité, dzenghe biyalane bi ye minsili mi : Éyong ézing, dzé é nga vole môt té naa a lere ôdzibi ? Aval avé a nga buan ôdzibi wèñ ? Aval avé me ne ñe vu ? Ô ne fe ñong abuan éyong wa yeghe bifônan é bôt béé dzi ki lere ôdzibi (1 Sam. 13:8-14). Ô ne sili naa : ‘Dzé é mbe ve naa be taa bo ôdzibi ? Mesughlane me y’été me mbe ya ?’

16. Za biborane bizing bi ne ñong éyong bi ne ôdzibi ?

¹⁶ Yeneghe biboran ô ne ñong éyong ô ne ôdzibi. Éyong bi ne ôdzibi, éñe bia dang mevakh ya mvoa vèè. Bi ne fe bele mvoa y’ôtemgha ya mvoa y’a nsôn. Éyong bi ne ôdzibi y’é bôt bevoo, bia bele mbemba élat ya be. Ékôan dèè, daa fe é ne édedèè élat. Nge môt a song bia, amu biaa ye ki wokh abé avôô, dzam té da ye ve naa, nge bi bele ntsiè ya môt té, ô taa vem (Bya 37:8, atoan ; Mink. 14:29). Édi da dang mbeng é ne naa, éyong bi ne ôdzibi, bia vu Ésaa wèè a ne a dzôp été, ye tugha ñe yit bebéñ.

17. Za dzam bia yiène ñong nkighane naa bia bo ?

¹⁷ Ôdzibi ô ne faa mbemba fulu da ve naa bia besese bi buane nga ! Déé se ki ébubu naa bi lere ôdzibi tam ésese, ve, y’avole Jehôva bi ne k’ôsu y’a bele fulu té. Nté bia yane nféféñ éning y’ôdzibi, bi ne bele ndzi-n’nem naa, « é dzis Jehôva da kale é bôt ba ko ñe wong, é bôt ba bunu édzing é ne mbèmbèè dèñ » (Bya 33:18). Bia besese, n’ñonghane nkighane naa bia k’ôsu y’a boar ôdzibi.