1. Tumkam pasiens dakhoupi munxam kiteak avoddttat?

 AMKAM sogleank pasiens dakhoupi munxam khub avoddttat. Karonn tankam kitea-i pasot ravonk poddlem zalear, tim bejar zainant. Toxench, ami chuki kortat tednam tim sompeponnim amcher ragar zainant. Tea bhair, amkam kitem-i xikonk vell lagta zalear, tim pasiensan vagtat. Zoxem, Bible obheas kortana, tantuntli ek umkich xikounn somzonk, manun gheunk vo apnnaunk amkam khub vell laglo astolo. Tori astana, amcho Bible xikoupi amchea sangata pasiensan vaglo mhunn ami kitlim upkari asat nhoi! Ani sogleam-von mhotvachem mhunnttlear, Jehova Dev amkam pasiens dakhoita mhunn ami tache ekdom chodd upkari!—Rom. 2:4.

2. Amkam khoinchea poristhitimnim pasiens dakhounk kotthin zaunk xokta?

² Dusrim pasiens dakhoitat tednam amkam borem dista. Punn amkam thodde pavtti pasiens dakhounk kotthin zaunk xokta. Udharonnak, ami traffic jam-ant asat, ani khas korun amkam khoim tori pavonk vell zata zalear, xant ravonk amkam kotthin zaunk xokta. Toxench, dusrim amkam bejar kortat tednam ami rokddinch ragar zaunk xoktat. Tea bhair thodde pavtti, Jehovan bhasailʼlea novea sonvsarachi pasiensan vatt polloit ravonk amkam kotthin zaunk xokta. Tor tumkam anikui pasiens dakhounk zai? Toxem zalear, pasiens mhunnttlear kitem, ho gunn kiteak gorjecho ani to tumi koso vaddounk zata tem tumkam hea lekhant zannam zaunk mellttolem.

3. Pasiens dakhoupi munxak konnui tiddok haddtta tednam to kitem korta?

³ Ami khoinchea char vattamnim pasiens dakhounk zata tem polloum-ia. Poilem mhunnttlear, pasiens dakhoupi munis rokddoch  ragar zaina. Taka konnui tiddok haddtta tednam to xant ravta, ani vaittak-vaittan farik korina. Toxench, to tension-ant asa zalear pasun, to krur toren vagona. Bible-ant “rokddoch ragar zaina” him utram amkam poile pavtt tednam vachunk mellttat, jednam Jehova aplea vixim oxem mhunntta: “Sorvespor, doiall-movall Kallzacho Dev! To rokddoch ragar zaina, punn bhov dulob ani visvaxi.”—Sutt. 34:6.

4. Pasiens dakhoupi munxak ravonk poddtta tednam to kitem korta?

⁴ Dusrem mhunnttlear, pasiens dakhoupi munxak ravonk poddtta tednam, to xantponnim vatt polloita. Umkench kitem tori ghoddonk, to chintʼtalo tachea poros chodd vell lagta tednam to abuz vo bejar zaina. (Mt. 18:26, 27) Amkam zaitea poristhitimnim xant ravonk poddtta. Udharonnak, dusrim uloitat tednam ami modem tondd ghalinastana xantponnim tanchem aikonk zai. (Job 36:2) Toxench, Bible-antli ek umkich xikounn somzonk, vo ek vaitt sonvoim soddunk ami amchea Bible vidʼdheartheak modot kortat tednam amkam pasiens asonk zai.

5. Pasiens dakhoupi munis anik kitem korta?

⁵ Tisrem mhunnttlear, pasiens dakhoupi munis chintinastana vo goddboddin kam korina. Hem khorem ki thoddim kamam amkam rokddinch korchim poddttat. Punn pasiens dakhoupi munxak mhotvachem kam asta tednam, tem suru korunk vo sompounk to goddbodd korina. Tachea bodlek, tea kamant kitem soglem mellon asa tem chintunk ani tem kam korunk, to goroz titlo vell gheta.

6. Oddchonneancho fuddo kortana pasiens dakhoupi munis kitem korta?

⁶ Chovtem mhunnttlear, pasiens dakhoupi munis gunngunnʼnna, punn apleacher ietat teo oddchonneo khuxalkaien sosta. Tor pasiens dakhovop mhunnttlear sosnikai dakhovop. Aple oddchonne vixim apleak koxem bhogta, vo aplea kallzant kitem asa tem eka lagxilʼlea ixttak sangop chukichem nhoi tem khorem. Punn pasiens dakhoupi munis tachea jivitant kitem borem ghoddtta tacherui dhean dita, ani khuxalkaien Jehovachi seva korit ravonk tachean zata tem soglem korta. (Kol. 1:11) Jehovachea sevokamnim  soglea vattamnim pasiens dakhounk zai. Kiteak tem fuddem polloum-ia.

7. Jakob 5:7, 8-a pormonnem, pasiens dakhovop kiteak itlem gorjechem? (Chitr pasun polloiat.)

⁷ Ami pasiens dakhoitat zalear ami salvar zaunk xoktat. Jehovan bhasailam tem to purnn korta mhunnosor, ami tachea adlea kalla voilea visvaxi sevokam bhaxen pasiensan tachi vatt polloit ravonk zai. (Heb. 6:11, 12) Bible-ant amchi poristhiti eka xetkarak sor kelea. (Jakob 5:7, 8 vachat.) Xetkar bim vompunk ani tem ximpunk khub vavr korta. Punn tem kednam pik ditolem tem tankam khobor asona. Tori astana, taka pik zatolench mhunn visvas dovrun to pasiensan tachi vatt polloita. Heach bhaxen, ‘amcho Somi khoinchea disak ieta tem amkam khobor na.’ (Mt. 24:42) Tori astana, tacho pattlav korunk ami khub vavr kortat. Toxench, Jehovan bhasailam tem soglem to sarkea vellar purnn kortolo mhunn amkam khatri asa dekhun, ami pasiensan tachi vatt polloitat. Ami pasiens dakhovop soddun dilem zalear, to dis azun ieunk na mhunn ami niraxi zaunk xoktat, ani sovkas-sovkas korun Jehovak soddun vochonk xoktat. Itlench nhoi, amkam rokddich khuxalkai ditat toslea vostum fattlean ami dhanvonk xoktat. Punn ami pasiens dakhoilem zalear ami xevott poriant thir ravonk pavtolim ani salvar zaunk xoktolim.—Mik. 7:7; Mt. 24:13.

8. Pasiens aslolean ami dusream sangata koxim vagtolim? (Koloskarank 3:12, 13)

⁸ Pasiens dakhoilʼlean dusream sangata amcho sombond boro urtolo. Dusrim uloitana ami kan diun aikotolim. (Jak. 1:19) Toxench, dusream sangata ami xanti samballunk pavtolim. Tension aslear pasun ami chintinastana ulounchimnant vo dukhoita toxem kainch mhunnchimnant. Tea bhair, amkam konnui dukhoita zalear ami rokddinch ragar zaunchimnant. Ami vaittak-vaittan farik korchimnant, punn ‘eka-mekak soxit ravtolim ani eka-mekak kallzant thaun bhogxit ravtolim.’—Koloskarank 3:12, 13 vachat.

9. Pasiens dakhoilʼlean amkam bore nirnnoi gheunk koxi modot zatoli? (Mhonnʼnneo 21:5)

⁹ Pasiens dakhoilʼlean amkam bore nirnnoi gheunk pasun modot zaunk xokta. Chintinastana vo goddboddin nirnnoi gheunchea bodlek, kitem kelear borem zatolem tea vixim sodh korunk ami vell ghetolim. (Mhonnʼnneo 21:5 vachat.) Udharonnak, amkam ek oslem kam mellonk xokta, zaka lagon amkam thoddeo mittingo chukounk poddot vo amkam chodd porgottnni korunk mellona. Ani amkam kamachi goroz asa dekhun, ami tem korunk toiar asonk xoktat. Punn ami pasiens dakhoitat zalear tem kam kitlea voranchem, thoim ieunk-vochonk amkam kitlo vell lagtolo, ani tea kamak lagon amchea familicher, toxench Jehova sangata amchea ixttagoticher koslo porinnam zatolo tem chintunk ami vell ghetolim. Tor hea toren pasiens dakhoilʼlean ami bore nirnnoi gheunk pavtolim.

10. Pasiens vaddoit ravonk eka Kristanvan kitem korunk zata?

¹⁰ Magnnem korat. Pasiens povitr xoktechea follacho bhag zaun asa. (Gal. 5:22, 23) Tor pasiens vaddounk Jehova lagim povitr xokti magat. Ani eka umkeach poristhitint tumkam pasiens dakhounk kotthin zata zalear, povitr xokti “magot ravat.” (Luk. 11:9, 13) Toxench, tea poristhitik Jehovachea nodren pollounk tachea lagim modot magat, ani uprant dor disa pasiens dakhounk tumchean zata tem soglem korat. Pasiens dakhounk jitlim ami magnnem ani vavr kortolim, titlinch ami anikui chodd pasiens dakhounk pavtolim, ani oxem korunk amkam sonvoim zatoli.

11-12. Jehovan pasiens koxem dakhoilam?

¹¹ Bible-antlea udharonnancher niall korat. Pasiens dakhoilʼlea zaitea munxanchim udharonnam amkam Bible-ant mellttat. Tanchea  udharonnancher ami niall kortat tednam, ami koxe toren pasiens dakhounk zata tem amkam kollon ieta. Punn tem zannam zaunchea poilim, ami Jehovachea udharonnacher dhean dium-ia. Karonn pasiens dakhoupant tannem sogleam-von bori dekh dovorlea.

¹² Eden bagent Soitanan fott marun Jehovachem nanv piddʼddear kelem. Toxench, to sarke toren ani mogan razvottki choloina mhunn boglantt ghatlem. Soitanacho tednanch nas korchea bodlek, Jehovan pasiens dakhoilem ani svotacher tabo dovorlo. Karonn ho vixoi suttavo korunk khub vell lagtolo mhunn to zannam aslo. Ani itlo-i temp poriant aplea nanvacho opman zata to Jehova soxit asa. Toxench chodd ani chodd lokank sasnachem jivit mellchem mhunn Jehova pasiensan ravla. (2 Ped. 3:9, 15) Oxem kelʼlean, aiz lakʼkhamnim lok Jehovak vollkhonk pavla. Tor Jehovan pasiens dakhoilʼlean koso faido zata tacher ami dhean ditat tednam, xevott haddunk tannem zo vell tharaila tachi pasiensan vatt polloit ravonk amkam sompem zatolem.

13. Pasiens dakhounchea vixim Jezun poripurnn toren aplea Bapachi dekh koxi ghetlea? (Chitr pasun polloiat.)

¹³ Pasiens dakhounchea vixim Jezu poripurnn toren aplea Bapachi dekh gheta. Ani prithumer astana tannem zaite pavtti pasiens dakhoilem. Punn oxem korop taka sodanch sompem naslem. Khas korun dhongi xastri ani Farizevam lagim uloitana. (Ju. 8:25-27) Tori punn aplea Bapai bhaxen, to pasun rokddoch ragar zainaslo. Tacho opman kelo vo rag haddlo tednam tannem vaittak-vaittan farik korunk na. (1 Ped. 2:23) Taka oddchonneo sosunk poddleo tednam to gunngunnunk na, punn pasiensan soglem sosun ghetlem. Dekhun Bible-ant oxem sanglam, “Tannem koxe bhaxen Apnnacher add patkiancho virodh soslo tem niallat.” (Heb. 12:2, 3) Tor amchea mukhar kosleo-i oddchonneo ieum, Jehovachea modotin ami pasun teo pasiensan sosunk pavtolim.

14. Abrahaman jea toren pasiens dakhoilem tantuntlean ami kitem xiktat? (Hebrevank 6:15) (Chitr pasun polloiat.)

 ¹⁴ Amchea modlim thoddim zannam, zaitea tempa thaun xevott ieunchi vatt polloitat astolim. Punn atam amkam disonk xokta ki xevott ieta meren, ami ghoddie jivim urchimnant. Tori astana pasiensan tachi vatt polloit ravonk amkam koxi modot zatoli? Amkam Abrahamachem borem udharonn asa. To 75 vorsancho aslo ani tankam bhurgem naslem. Punn Jehovan taka oxi bhas dilʼli: “Hanv tuje thaun ek vhodd porza upzoitolom.” (Ut. 12:1-4) Hi bhas ghoddon aili tem Abrahaman polloilem kai? Taka purnn toren pollounk mellonk na. Eufrates Nodi par korun 25 vorsam uprant, Jehovachea vizmita udexim tankam Izak zolmolo, ani tachea 60 vorsam uprant tache natu Esau ani Jakob zolmole. (Hebrevank 6:15 vachat.) Punn tachi sonsot ek vhodd raxttr zalem, ani tim Bhasailʼlea Desant gelim tem Abrahaman pollounk na. Tori astana, to Jehovak visvaxi ravlo ani tachea Rochnnara sangata tachi ixttagot ekdom ghott asli. (Jak. 2:23) Abraham jivont zatolo tednam to visvaxi aslo ani tannem pasiens dakhoilem dekhun, soglea raxttrank besanvam mellʼllim mhunn zannam zaun to kitlo khuxal zatolo tea vixim chintat. (Ut. 22:18) Hantuntlean ami kitem xiktat? Jehovan dilʼli dor ek bhas purnn zata tem ami ghoddie pollounk pavchimnant. Punn ami Abrahama bhaxen pasiens dakhoitat zalear, Jehova amkam atam, toxench tannem bhasailʼlea novea sonvsarant anikui chodd besanvam ditolo mhunn ami khatri dovrunk zata.—Mk. 10:29, 30.

15. Svotachea obheasant ami kitea vixim xikonk zata?

¹⁵ Pasiens dakhoilem toslea anikui zaitea munxanchim udharonnam Bible-ant dileant. (Jak. 5:10) Tor svotacho obheas kortana tanche vixim xikonk ami sodh korunk zata kai? b Udharonnak,  Davidak Izraelacho raza zaunk makhlolo tednam, to khub tornnatto aslo tem khorem. Punn razvottki cholounk taka zaitim vorsam ravonk poddlem. Toxench, Simeon ani Anʼnak khub temp poriant bhasailʼlea Mesiasachi vatt pollounk poddli tem khorem. Punn tim visvaxiponnan Jehovachi seva korit ravlim. (Luk. 2:25, 36-38) Hea munxam vixim obheas kortana ami amkanch vicharunk zata: Hea munxak pasiens dakhounk koxi modot zali astoli? Pasiens dakhoilʼlean taka koso faido zalo? Hanvem tachi dekh koxi gheunk zata? Toxench pasiens dakhounk na tanche koddlean pasun ami xikonk zata. (1 Sam. 13:8-14) Tanchea vixim obheas kortana ami oxem vicharunk zata: ‘Tannem pasiens kiteak hogddailem zait? Pasiens hogddailʼlean taka koslo porinnam bhogunk poddlo?’   

16. Pasiens dakhoilʼlean koso faido zata?

¹⁶ Pasiens dakhoilʼlean koso faido zata tea vixim chintat. Jednam ami pasiens dakhoitat, tednam ami chodd khuxal ani xant astat. Ani taka lagon amchi bholaiki bori urta ani gorje bhair tension zaina. Toxench, dusream sangata pasiensan vaglolean tanchea sangata amchem natem borem urta, ani sobhent pasun ekvott vaddtta. Amkam konnui rag haddtta zalear ami rokddinch ragar zainant, ani hea toren poristhiti bigddonk pavona. (St. 37:8; Mho. 14:29) Punn sogleam-von mhotvachem mhunnttlear, ami pasiens dakhoitat tednam ami amchea sorginchea Bapachi dekh ghetat, ani taka anikui lagim soronk pavtat.

17. Ami kitem korunk ghott nichov korum-ia?

¹⁷ Khorench, pasiens kai boro gunn zaun asa nhoi! Ani ho gunn dakhoilʼlean zaite faide pasun asat. Pasiens dakhovop sodanch sompem asona, punn Jehovachea modotin ami ho gunn vaddoit ravonk xoktat. Ani ami pasiensan novea sonvsarachi vatt polloit asat tea meren, “Sorvesporachi konn bhokti kortat, Tachea maiemogacher konn visvas tthevtat, toslea monxancher Tachi nodor boslea” hi khatri ami dovrunk zata. (St. 33:18) Tor pasiens ho gunn sodanch apnnaunk ami ghott nichov korum-ia.