1. Bulagurhe onasiima abantu banalindira?

 RHWESHI rhunasiima abantu banalindira. Rhweshi rhunakenga balala banalindira chintu chilebe buzira kugwarha oburhe. Rhunagwarha obusiime amango abandi bali barhulembera omu kasanzi rhwakolere amagosa. Kandi rhugwerhe eshukrani okuntu mwalimu werhu we Biblia aliri arhulembera amango rhwaliri rhwalwisa yirhuyiga, yirhuyemera, changwa kukolesa ebirhwayigire omu Biblia. Ech’akamaro mu byoshi, rhugwerhe eshukrani bwenene okubona okuntu Yehova anarhulembera!—Ro. 2:4.

2. Muhali zihe rhwakabona oku birhukomerere kulindira?

² Chiro akaba oku rhunasiimiswa n’engeso y’okulindira y’abandi, nkabaga rhwabo rhwakabona oku birhaba biyorohere buli mango kulindira. Omufano, rhwakagambwa kuyorha rhurhulerere amango rhuli oku mustari gulehere gw’abantu bali balingiriza chintu chilebe, ahanene amango rhwachereherwe kuja oku programe ndebe. Nkabaga rhwakagwarha oburhe juba-juba amango abandi bamarhugayisa. Kandi mango maguma, byakarhukomerera kugenderera kulindira oku Yehova ayeneza echilagane chage ch’egulu lihya-hya. Ka wakasiima obe muntu onalindira bwenene? Mu gunola mwazi, rhwaganira okuntu rhwakayerekana engeso y’okulindira, na bulagurhe kuli kw’akamaro okujira ntyo. Kandi rhwashuba kuganira oku byakarhurhabala rhukuze bwenene engeso y’okulindira.

3. Gurhe omuntu ogwerhe engeso y’okulindira anajira amango bamamuhambarira (bamamuhangala)?

³ Rhuganirage ku njira ene rhwakayerekanamo okulindira. Ey’oburhanzi, omuntu ogwerhe engeso y’okulindira arhagaya juba-juba. Amango abantu bamamuhambarira, anayorha arhulerere arhanagalula amabi oku mandi. Kandi arhanakolera abandi n’oburhe amango achigwerhe omugayo. Echinwa “okurhagwarha oburhe juba-juba,” chibonekene burhanzi omu Biblia amango Yehova aderha oku ali “Mungu w’obubabale n’obonjo, orhanagwarha  oburhe juba-juba, onajira buzigire bunene bwimana n’okuli.”—Kut. 34:6.

4. Gurhe omuntu onalembera anajira akaba bimuhemere alindire?

⁴ Eyakabiri, omuntu onalindira analembera eyi anarhulerere. Akaba chintu chilebe charholere bisanzi binene okuntu rhurhalilangalire, omuntu oli ntyo anachihangana kurhagwarha oburhe, changwa kurhakaliha. (Mt. 18:26, 27) Hali, ehali zinene zakarhuhema rhulindire eyi rhunarhulerere. Omufano, birhuhemere rhuyunvirize omu kulembera amango muntu mulebe ali aganira buzira kumucha akalimi. (Yob. 36:2) Kandi byakarhuhema rhulembere, amango rhuli rhwarhabala omwanafunzi ayunve enyigirizo z’Ebiblia changwa alekane na ngeso ndebe embi.

5. Yindi njira ehe rhwakayerekanamo engeso y’okulindira?

⁵ Eyakasharhu, omuntu onalindira anarhanga kuwaza embere y’okujira chintu chilebe. Nechi, mango maguma binarhuhema rhujire juba-juba. Aliko, amango omuntu onalindira agwerhe kasi kaguma k’akamaro akwanene kuyeneza, anachihangana arhakakolaga juba-juba, changwa mpu akamale juba-juba. Ahali h’okujira ntyo, anarhanga kuchizera oku agwerhe ebisanzi bikwanene by’okupanga okuntu akakola akola kasi. Buzinda anaja arhola ebisanzi by’okukola akola kasi bwinja.

6. Gurhe omuntu onalembera anajira amango ali ahurana ebigeregezo changwa ebibazo?

⁶ Eyakane, omuntu onalindira anachihangana kulwisa ebibazo buzira kulunduma. Omu hali eli nk’eyola, okulindira kubuganene n’okulembera. Nechi, kurhali kubi okubwira mwira wawe w’okumurhima byoshi bikulazize n’okumubwira okuntu oli wachiyunva oku bilolere echigeregezo oli wahurana. Aliko kandi, omuntu onalembera akwanene kuwaza oku bintu binja agereremo omu kalamo, kandi ajira okwage koshi yagenderera kukolera Yehova eyanagwerhe obusiime. (Kol. 1:11) Abakozi ba Yehova bakenere kuyerekana engeso y’okulindira mw’ezila njira zoshi. Bulagurhe? Lekaga rhuganire ku mpanvu zigeke.

7. Nk’oku olwandiko lwa Yakobo 5:7, 8 luyerekene, bulagurhe engeso y’okulindira eli y’akamaro bwenene? (Olole n’efoto.)

⁷ Birhuhemere kugwarha engeso y’okulindira yinjirhuyokolwa. Kuguma n’abakozi bemana b’omusiku zagerere, birhuhemere okulindira eyi rhunali rhwalembera oku Mungu ayeneza ebilagane byage. (Ebr. 6:11, 12) Ebiblia ehuzenye ehali yerhu n’eyomuhinzi. (Osome Yakobo 5:7, 8.) Omuhinzi anakola bwenene y’abyala n’okumimira eby’ahingaga, aliko arhaba amenyere kanuni mangochi bikwanene kukula. Aliko omuhinzi analindira omu kulembera, ey’analangalire oku nj’ashalula eby’ahingaga. Konakuguma nerhu, rhunayorha rhugwerhe binene by’okukola omu makasi m’ekiroho chiro akaba “rhurhamenyere lusiku luhe Waliha [werhu] ayinja.” (Mt. 24:42) Rhunalindira omu kulembera eyi rhunalangalire oku, Yehova nj’ayeneza oku kasanzi kenja byoshi alaganyize. Nka rhuli bantu barhalembera, rhwakachiyunva rhuluhire omu kugenderera kulindira, na kubuyabuya-kubuyabuya rhwanaleka Yehova. Nkabaga kandi rhwakahwanza kuchiseza oku bintu byakarhulerhera obusiime mu ganola mango. Aliko, nka rhuli bantu b’okulindira rhwakalembera kuhika oku buzinda n’okuyokolwa.—Mik. 7:7; Mt. 24:13.

8. Gurhe engeso y’okulindira enarhurhabala rhulame bwinja haguma n’abandi? (Wakolosai 3:12, 13)

⁸ Engeso y’okulindira (kulembera) enarhurhabala rhulame bwinja haguma n’abandi. Enarhurhabala rhuyunvirize bwinja-bwinja amango abandi bali baganira. (Yak. 1:19) Kandi engeso y’okulembera enarhurhabala rhugwarhe omurhula haguma n’abandi. Echola chinarhulanga kushubiza juba-juba changwa kuderha ebinwa bibi amango rhugwerhe oburhe. Kandi akaba rhuli bantu b’okulembera, rhurhagaya juba-juba amango muntu mulebe arhugayisize. Ahali h’okumugalulira, rhwaka “genderera kulemberana n’oku babalirana buli muguma n’owindi oku bulonza.”—Osome Wakolosai 3:12, 13.

9. Gurhe engeso y’okulindira enarhurhabala amango rhukenere kurhola esimikiro? (Mezali 21:5)

⁹ Okulindira kwakarhurhabala rhurhole esimikiro zinja. Ahali h’okuyigirizwa n’engaruka zebijiro byerhu, rhwarhola ebisanzi by’okulonza emyazi oku bilolere esimikiro rhukola kurhola, naho rhwanaja rhwachishoga echirhwajira. (Osome Mezali 21:5.) Omufano, akaba rhuli rhwalonza akasi, hali oku rhwakayemera akasi k’oburhanzi rhwabwene, chiro akaba oku akola kasi kakarhuma rhurhagera oku mbuganano ziguma-ziguma changwa okurhayinja rhwahika omu kasi k’amahubiri oku kahunda. Aliko, akaba rhuli bantu b’okulindira, rhwawaza saa zinga byalema byarhuhema yi rhuhika oku kasi, rhwalema rhwakola saa zinga, na gurhe akola kasi kakahuma oku mulala gwerhu n’okubwira bwerhu haguma na Yehova. Nka rhuli bantu b’okulindira, echola chakarhuma rhurharhola esimikiro zibi.

10. Gurhe Omukristu akakuza n’okugenderera kugwarha engeso y’okulindira?

¹⁰ Osalire y’ogwarha engeso y’okulindira bwenene. Okulindira (kulembera) chili chigabi ch’etunda lye roho. (Gal. 5:22, 23) Bobola rhwakasalira yirhugwarha eroho lichesibwa, kandi rhwakasalira Yehova arhurhabale rhuyerekane ebyola bigabi by’etunda lye roho. Akaba yirhwahurana ehali eli yarhuma okulindira kwerhu kwageregezwa “rhwakagenderera kuhema” eroho lichesibwa lirhurhabale rhugenderere kulindira. (Lu. 11:9, 13) Kandi rhwakahema Yehova arhurhabale yi rhubona ebintu nk’oku naye anabibona. Naho enyuma y’okusalira, birhuhemere rhujire okwerhu koshi yi rhulembera buli lusiku. Akaba rhuli rhwagenderera kusalira yirhulembera n’okugenderera kuchihangana kuyerekana okulembera, Yehova nj’arhurhabala yirhuba  bantu bakagala kulembera bwenene chiro akaba oku rhurhaliri bantu banalindira bwenene omu mango magerere.

11-12. Gurhe Yehova ayerekene engeso y’okulindira?

¹¹ Okengere bwenene oku mifano eli omu Biblia. Ebiblia ederhere oku mifano minene y’abantu baliyerekene okulindira. Okukengera kw’eyola mifano, kwarhurhabala rhumenye mu njira zihe rhwakayerekanamo okulembera. Lekaga rhurhange rhuganire oku mufano gw’akamaro bwenene g’okulindira, k’okuderha, Yehova.

¹² Omu bustani ye Edeni, Shetani ashobeka ezino lya Yehova n’okumuhezeza erenge omu kuchihangana kushumika Eva agwarhe engangane oku Yehova arhali murhegesi mwinja onagwerhe obuzigire. Ahali h’okulimbula ahoh’anahola oyola mubeshi, Yehova ayerekene oku ajira engeso y’okuchigala eyi anayinji oku ebyola byarhola akasanzi yayerekana oku oburhegesi bwage b’obukwanene kulusha obwindi boshi. Oku Yehova anali alindira, alembeere obubeshi boshi Shetani ashobekere ezino lyage. Oku bwindi, Yehova agenderere kulindira omu kulembera omu kuntu bantu banene nji bagwarhe orozo l’okulama akalamo k’esiku n’amango. (2 Pe. 3:9, 15) Bobola, amamiliyoni m’abantu mahikire kumumenya. Rhukagenderera kuseza obwenge bwerhu oku nyungu rhuli rhwapata kugerera okulindira kwa Yehova, rhwabona oku birhuyorohere kulindira amango ahebereho m’okulerha obuzinda bwalinola gulu.

13. Gurhe Yesu aliyiganyize oku bushinganyanya okulembera kw’Eshe? (Olole n’efoto.)

¹³ Yesu aliri ayiganya oku bushinganyanya okulembera kw’Eshe, aliyerekene eyola ngeso amango aliri hanola oku gulu. Bikwanene kuba eyi birhalimuyorohere buli mango okuyerekana eyola ngeso y’okulembera, ahanene amango aliri haguma n’abandisi b’endyalya n’Abafarisayo. (Yoh. 8:25-27) Kuguma n’Eshe, Yesu naye arhaliri agwarha oburhe juba-juba. Arhaliri agalula amabi oku mandi amango  baliri bamuhambarira changwa kumudukanga. (1 Pe. 2:23) Yesu alilembere ebigeregezo buzira kulunduma. Rhwakabona bulagurhe Ebiblia erhubwirire oku “rhuwaze bwenene k’olala walembere ebinwa bikalihire nk’ebyola kurhenga oku banya-byaha”! (Ebr. 12:2, 3) Kugerera oburhabale bwa Yehova, nerhu rhwakagala kulembera echigeregezo choshi-choshi chakarhuhikira.

14. Bichi rhwakayiga kugerera omufano gwa Abrahamu g’okulindira? (Waebrania 6:15) (Olole n’efoto.)

¹⁴ Gurhe si byakaba, akaba ebilagane rhulirhwalingiriza oku bilolere obuzinda birhaza kuyenera? Nkabaga rhwamalingiriza obuzinda mu myaka minene yamagera. Aliko na zene, rhugwerhe obuba oku rhurhagenderera kulama kugera amango rhwabona gurhe obuzinda bwahika. Bichi byakarhurhabala rhugale kulindira omu kulembera? Lekaga rhuganire oku mufano gwa Abrahamu. Amango Abrahamu aligwerhe myaka 75 buzira kugwarha omwana, Yehova amulanganya ntya: “Nji na kujira shanja lizibu-zibu.” (Mwa. 12:1-4) Abrahamu alichibwenere si oku echola chilagane chayenera? Arhabonaga okw’echola chilagane choshi chayenera. Enyuma w’okumala kuyambuka Olwinji lwe Efrati n’okulindira mu myaka 25, Abrahamu alibwene okuburhwa k’omugala Isaka kugerera echisomerene, n’enyuma wayindi myaka 60, abona oku abanjukulu bage baburhwa, k’okuderha, Esau na Yakobo. (Osome Waebrania 6:15.) Aliko, Abrahamu arhabonaga gurhe oluburho lwage lwaba shanja lizibu-zibu yilushokola Echihugo Chilaganano. Aliko, oyola mulume mwimana aligwerhe obwira bukomere haguma n’Omulemi wage. (Yak. 2:23) Amango Abrahamu nja fuuka, nj’achiyunva asiimire bwenene okubona oku obwemere bwage n’okulindira kwage kwalerhere migisho minene oku mashanja moshi! (Mwa. 22:18) Bichi birhuyigirize? Nkabaga rhurhabona gurhe ebilagane byoshi bya Yehova  byayenera ahoh’anaho. Aliko, nka rhuyerekene okulindira kuguma na Abrahamu, rhwakachizera oku Yehova arhugisha zene n’ahanene nj’ashuba kurhugisha bwenene omu gulu lihya-hya arhulaganyize.—Mk. 10:29, 30..

15. Bichi rhwakayiga amango m’efunzo lyerhu-lyerhu?

¹⁵ Ebiblia eli mw’eyindi mifano minene y’abantu bayerekene okulindira. (Yak. 5:10) Bulagurhe rhurhakachiheberaho eprograme y’okuyiga eyola mifano omu funzo lyerhu-lyerhu? b Omufano, chiro akaba oku Daudi alichishogerwe ashigwe amavurha y’aba mwami we Izraeli amango alichili musole, alikwanene kulindira myaka minene y’ayimikwa nka mwami. Simeoni na Ana, baliri baharamya Yehova oku bwimana oku banali balindira Masiya walilaganyizwe. (Lu. 2:25, 36-38) Amango oli wayiga engani zili nk’ezola ochihangane kulonza ebishubizo by’ebila bibazo: Bichi byakaba eyi by’ebyarhabalaga oyula muntu kuyerekana engeso y’okulindira? Nyungu zihe alipatire omu kulindira? Nka gurhe nani nakamuyiganya? Wakayunguka kandi omu kuyiga oku bilolere balala barhayerekanaga engeso y’okulindira. (1 Sa. 13:8-14) Wakachibaza ntya: ‘Nkabaga bichi byarhumaga barhayerekana engeso y’okulindira? Ngaruka zihe zibi zabahikiraga eju y’okurhalindira kwabo?’

16. Nyungu zihe ziguma abanalindira banagwarha?

¹⁶ Waza oku nyungu abanalindira banagwarha. Amango rhugwerhe engeso y’okulindira, rhwakagwarha obusiime kandi eyi rhunarhulerere. Rhukagwarha engeso y’okulindira, rhwagwarha amagala menja n’obwenge bwerhu bwakola bwinja. Amango rhuli rhwalembera abandi, rhwasiimira obwira bukomere haguma nabo. Echibaga cherhu chagwarha obuguma bugenderere. Amango muntu mulebe amarhuhambarira, rhurhagwarha oburhe juba-juba, echola charhabala ebintu bimenye byabiha kulusha. (Zb. 37:8, amahugulo m’eshishi; Mez. 14:29) Aliko, ahanene nkarhuli rhwalembera, rhwanaba eyirhuli rhwayiganya Darha w’embingu n’okushuba kumuyegera bwenene.

17. Bichi rhukwanene kuhigirira kujira?

¹⁷ Engeso y’okulindira eli nyinja bwenene bulala yakarhulerhera enyungu rhweshi! Chiro akaba oku buli mango birhaba biyorohere okuyerekana engeso y’okulindira, kugerera oburhabale bwa Yehova rhwakagenderera kukuza eyola ngeso. Kandi oku rhunali rhwalingiriza omu kulembera egulu lihya-hya, rhwakachizera oku “elisho lya Yehova linayinja lyalolereza balala banamuyubaha, balala bali balingiriza obuzigire bwage bwimana.” (Zb. 33:18) Rhweshi rhujage rhwahigirira kugenderera kugwarha engeso y’okulindira.