1. Nama kebuah nuan rindu orang ke sabar?

 KITAI rindu orang ke sabar. Nama kebuah? Kitai kagum enggau orang ke enda ringat tang ulih nganti enggau sabar ke sesiti utai. Kitai besyukur lebuh orang sabar enggau kitai maya kitai ngaga penyalah. Kitai mega besyukur enggau pengajar Bup Kudus ke sabar enggau kitai. Maya nya, kitai engka tusah deka belajar, nerima, tauka nitihka ajar Bup Kudus. Tang ke pemadu penting, kitai amat beterima kasih laban Petara Jehovah sabar enggau kitai!—Rom. 2:4.

2. Ni maya kitai engka tusah deka sabar?

² Taja pan kitai rindu lebuh orang ngayanka penyabar, tang kekadang kitai engka tusah deka ngayanka sifat tu. Ambika chunto, kitai engka tusah deka sabar ba traffic jam, kelebih agi enti kitai udah laun. Kitai engka tusah deka sabar lebuh orang terus ngereja utai ke ngasuh kitai ringat. Lalu kekadang, kitai engka tusah deka nganti enggau sabar laban dunya baru ke disemayaka Jehovah baka ke laun datai. Kati nuan deka nyadi orang ke sabar agi? Dalam artikel tu, kitai deka berandauka: (1) Baka ni kitai ulih ngayanka penyabar? (2) Nama kebuah ngayanka penyabar nya amat penting? (3) Nama ulih nulung kitai sabar agi?

3. Nama digaga orang ke sabar lebuh orang bukai ngasuh iya ringat?

³ Peratika empat iti chara kitai ulih ngayanka penyabar. Kesatu, orang ke sabar lubah ringat. Lebuh orang bukai ngereja  utai ke ngasuh iya ringat, iya mengkang tenang lalu enda malas utai ke dikereja sida. Lebuh iya stres, iya mega enda kasar enggau orang bukai. Rambai jaku “lubah ringat” keterubah iya ayan lebuh Bup Kudus madahka Jehovah nya ‘Petara ti kasih sereta siru, lubah ringat sereta mandangka penetap ati enggau pengerindu ti besai.’—P-sut. 34:6.

4. Nama digaga orang ke sabar lebuh iya patut nganti?

⁴ Kedua, orang ke sabar ulih nganti enggau tenang. Nama deka digaga orang ke sabar lebuh utai ke dianti iya lama ari ke dijangka? Orang ke sabar mengkang tenang, lalu enda nyadi geram. (Mat. 18:26, 27) Bisi mayuh situasi alai kitai patut nganti enggau tenang. Ambika chunto, kitai patut ninga enggau sabar lebuh orang bukai bejaku. Kitai nyeliahka diri ari nyelepak jaku sida. (Jop 36:2) Kitai mega patut sabar lebuh nulung pemelajar kitai meretika ajar Bup Kudus tauka lebuh nulung sida mutarka tebiat ti enda manah.

5. Nama siti agi chara kitai ulih ngayanka penyabar?

⁵ Ketiga, orang ke sabar enda berumban. Amat, sekeda utai patut dikereja enggau lengkas. Taja pia, lebuh bisi pengawa ti penting ke patut dikereja, orang ke sabar enda beguai-guai ngepunka pengawa nya, tauka berumban nembuka pengawa nya. Tang, iya netapka awak ti chukup merambu utai ke deka dikereja iya. Udah nya, iya ngena awak ti chukup nembuka pengawa nya enggau manah.

6. Nama digaga orang ke sabar lebuh napi penguji tauka penusah?

⁶ Keempat, orang ke sabar enda mutap lebuh ngenatka penguji. Ba konteks tu, penyabar bisi kaul enggau pengeliat ati. Amat, enda salah enti kitai madahka utai ke nyadi ba pengidup kitai ngagai kaban rapat kitai. Maya nya, kitai engka bekunsika asai ati kitai bekaul enggau penguji nya. Taja pia, orang ke sabar mega berundingka utai ti manah ba pengidup iya, lalu iya mega deka bebendar nyembah Jehovah enggau gaga ati. (Kol. 1:11)  Nembiak Jehovah patut ngayanka penyabar ba semua utai tu. Nama kebuah nya penting? Aram beratika sekeda kebuah.

7. Nitihka James 5:7, 8, nama kebuah penyabar nya amat penting? (Peda mega gambar.)

⁷ Kitai mesti sabar ngambika bulih pengidup ti meruan belama iya. Baka nembiak Petara ti tetap ati kelia, kitai patut sabar nganti maya Petara ngamatka semaya Iya. (Heb. 6:11, 12) Bup Kudus mandingka situasi kitai enggau orang ke betanam. (Bacha James 5:7, 8.) Orang nya bebendar nanam sereta manjah utai ke ditanam iya, tang iya enda nemu ni maya utai nya deka tumbuh. Nya alai, iya patut nganti enggau sabar, lalu arap utai nya deka tumbuh. Baka nya mega, kitai bebendar nyadi murid Jesus, taja pan kitai “enda nemu kemaya Tuan [kitai] deka datai.” (Mat. 24:42) Kitai nganti enggau sabar lalu andal Jehovah deka ngamatka semua semaya Iya ba maya ti udah ditetapka Iya. Enti kitai enda sabar, kitai engka lelak nganti, lalu belubah-lubah ngenyauhka diri ari Jehovah. Kitai engka berengkah ngereja utai ke dikumbai kitai ulih meri pengaga ati diatu. Tang enti kitai sabar, kitai ulih tan nyentukka ujung lalu diselamatka.—Mik. 7:7; Mat. 24:13.

8. Baka ni penyabar nulung kitai ngembuan kaul ti manah enggau orang bukai? (Kolosi 3:12, 13)

⁸ Baka ni penyabar nulung kitai ngembuan kaul ti manah enggau orang bukai? Enti kitai bisi sifat sabar, nya nulung kitai ninga enggau manah lebuh orang bukai bejaku. (Jas. 1:19) Sifat tu mega nulung kitai bebaik enggau orang bukai. Enti kitai sabar, kitai enda jampat pedis ati lalu enda nyebut utai ke ulih ngemediska ati orang bukai, taja pan enti kitai benung stres. Pia mega, enti kitai sabar, kitai lubah ringat lebuh orang ngemediska ati kitai. Ari ke malas utai ke digaga sida, kitai “terus liat ati enggau pangan diri sereta ngampunka pangan diri ari ati.”—Bacha Kolosi 3:12, 13.

9. Baka ni penyabar nulung kitai lebuh kitai patut ngaga pemutus? (Jaku-Dalam 21:5)

⁹ Sifat sabar nulung kitai ngaga pemutus ti manah agi. Kitai enda berumban lebuh ngaga pemutus, tauka nitihka asai ati aja. Tang kitai ulih ngena awak mansik pilihan ke bisi, lalu udah nya milih ni bagi ke pemadu manah. (Bacha Jaku-Dalam 21:5.) Ambika chunto, enti kitai benung ngiga kereja, kitai engka deka nerima tawaran kereja ti keterubah ke diterima kitai, taja pan kereja nya ulih ngachau pengawa sembah kitai ngagai Jehovah. Taja pia, enti kitai sabar, kitai deka ngena awak berundingka sekeda pekara tu: Dini kereja nya? Berapa jam aku patut gawa? Enti aku nerima kereja tu, nama kesan iya ba ruang bilik aku sereta ba kaul kami sebilik enggau Jehovah? Amat, enti kitai sabar, kitai ulih nyeliah ari ngaga pemutus ti salah.

10. Baka ni orang Kristian ulih ngemansangka penyabar, lalu enda lenyau sifat nya?

¹⁰ Besampi ngambika sabar agi. Sifat sabar siti aspek ari buah kuasa kudus. (Gal. 5:22, nota kaki, 23) Nya alai, kitai ulih besampi minta kuasa kudus, lalu minta Jehovah nulung kitai ngemansangka buah kuasa kudus. Enti bisi situasi ke nguji penyabar kitai, “anang badu minta” kuasa kudus kena nulung kitai sabar agi. (Luk. 11:9, 13) Kitai mega ulih minta Jehovah nulung kitai ngembuan runding Iya. Lalu pengudah besampi, kitai patut bebendar ngayanka penyabar ninting hari. Enti kitai majak besampi ngambika ulih sabar agi lalu bebendar ngayanka sifat nya, Jehovah  deka nulung kitai nyadi sabar agi nyentukka sifat nya nyadi sebagi ari personaliti kitai.

11-12. Baka ni Jehovah ngayanka penyabar?

¹¹ Belematika teladan ari Bup Kudus. Bup Kudus ngundan mayuh teladan orang ke sabar. Lebuh belematika teladan sida, kitai ulih belajar chara ngayanka penyabar. Tang sebedau kitai beratika teladan sida, aram kitai belajar ari Jehovah. Iya teladan ti pemadu manah bekaul enggau sifat tu.

¹² Ba taman Eden, Sitan udah ngenyaika nama Jehovah enggau reputasi Iya. Iya ngasuh Awa kakang ati sekalika Jehovah nya pemerintah ti lurus enggau bepengerindu tauka enda. Jehovah enda tekala nya ngemunaska Sitan, tang Iya ngayanka Diri sabar sereta nemu nagang diri. Iya nemu, kena nunjukka chara Iya merintah nya pemadu badas, nya begunaka awak. Lalu seraya Iya nganti, Iya patut sabar lebuh orang ngenyaika nama Iya. Nambahka nya, Jehovah benung nganti enggau sabar ngambika mayuh agi orang tau bulih peluang ngulihka pengidup ti meruan belama iya. (2 Pet. 3:9, 15) Ketegal nya, bejuta iku orang udah ngelala Iya. Enti kitai betumpu ngagai penguntung ke diulih ketegal Jehovah udah ngayanka penyabar, tu deka nulung kitai senang agi nganti enggau sabar nyentuk ngagai maya Jehovah mai pengujung dunya tu.

13. Baka ni Jesus neladan penyabar Apai iya enggau sempurna? (Peda mega gambar.)

¹³ Jesus neladan penyabar Apai iya enggau sempurna, lalu iya ngayanka sifat tu lebuh iya ba dunya. Bisi maya iya, Jesus engka tusah deka ngayanka penyabar, kelebih agi ngagai penulis Adat enggau orang Parisi ke pura-pura ngapa. (Jhn. 8:25-27) Tang baka Apai  iya, Jesus mega lubah ringat. Iya enda malas lebuh orang ngeleseka iya tauka ngasuh iya ringat. (1 Pet. 2:23) Jesus ngenatka penguji enggau sabar, lalu iya enda mutap. Nya meh kebuah Bup Kudus ngasuh kitai ‘bebendar beratika iya ke udah ngenatka diri lebuh orang ke bedosa bejaku jai pasal iya’! (Heb. 12:2, 3) Enggau tulung ari Jehovah, kitai mega ulih sabar ngenatka sebarang penguji.

14. Nama ulih dipelajarka kitai ari penyabar Abraham? (Hebrew 6:15) (Peda mega gambar.)

¹⁴ Sekeda ari kitai engka ngarapka pengujung dunya datai betaun-taun suba. Lalu diatu, kitai irau kitai enda sempat meda pengujung dunya datai. Nama deka nulung kitai terus nganti enggau sabar? Peratika teladan Abraham. Lebuh Abraham beumur 75 taun, iya agi bedau bisi anak. Tang maya nya, Jehovah besemaya: “Aku deka ngasuh peturun nuan nyadi bansa ti besai.” (P-kal. 12:1-4) Kati Abraham bisi meda semaya nya dikeamatka? Bisi, tang ukai semua semaya nya. Pengudah meraka Sungai Eupratis, enggau pengudah nganti 25 taun, Abraham meda anak iya Isak ada, lalu iya patut nganti 60 taun da agi sebedau uchu iya Esau enggau Jakop ada. (Bacha Hebrew 6:15.) Tang Abraham enda sempat meda peturun iya nyadi bansa ti besai lalu bempu menua ti udah disemaya. Taja pia, iya bisi kaul ti rapat enggau Jehovah. (Jas. 2:23) Lalu lebuh Abraham diangkatka idup baru ila, iya tentu gaga ati lebuh nemu pengarap enggau penyabar iya udah mai berekat ngagai semua bansa ba dunya! (P-kal. 22:18) Nama ulih dipelajarka kitai? Kitai empu engka enda meda semua semaya Jehovah dikeamatka diatu. Tang, enti kitai sabar baka Abraham, kitai ulih yakin Jehovah  deka ngupah kitai diatu lalu deka meri upah ti besai agi ba dunya baru ke disemayaka Iya.—Mrk. 10:29, 30.

15. Nama ulih dipelajarka kitai lebuh belajarka Bup Kudus kediri empu?

¹⁵ Bup Kudus ngundan mayuh agi teladan bukai pasal orang ke sabar. (Jas. 5:10) Endang manah enti nuan ulih mansik pasal sida. b Ambika chunto, David agi biak lebuh iya dipilih nyadi raja orang Israel. Tang iya patut nganti betaun-taun sebedau iya ulih nyadi raja. Simion enggau Ana nyembah Jehovah enggau tetap ati seraya seduai iya nganti penatai Messiah ti disemaya. (Luk. 2:25, 36-38) Lebuh nuan belajarka teladan sida, giga meh saut ngagai sekeda ari tanya tu: Nama udah nulung iya ngayanka penyabar? Nama penguntung ke udah diulih iya ketegal iya sabar? Baka ni aku ulih neladan iya? Nuan mega tau bulih penguntung lebuh belajar pasal chunto sida ke enda sabar. (1 Sam. 13:8-14) Nuan ulih nanya: ‘Nama kebuah sida enda sabar? Nama penyadi iya lebuh sida enda sabar?’

16. Nama sekeda penguntung iya enti kitai sabar?

¹⁶ Peratika penguntung iya enti kitai sabar. Enti kitai sabar, kitai deka gaga ati sereta lantang agi. Kitai deka gerai agi ba mental enggau ba tubuh. Enti kitai sabar enggau orang bukai, kitai deka bisi kaul ti manah agi enggau sida. Raban gempuru kitai deka beserakup agi. Enti bisi orang ngasuh kitai geram, lalu kitai enda jampat ringat, penanggul nya enda nyadi balat agi. (Mas. 37:8; J-lam. 14:29) Tang ke pemadu penting, enti kitai sabar, kitai neladan Apai kitai ke di serega lalu majak semak enggau Iya.

17. Nama utai ti keran digaga kitai?

¹⁷ Endang amat, penyabar nya siti sifat ti manah ke mai penguntung ngagai semua kitai! Bisi maya iya, kitai engka tusah deka sabar. Tang enggau tulung ari Jehovah, kitai ulih terus ngemansangka sifat tu. Lalu seraya kitai enggau sabar nganti dunya baru, kitai ulih yakin, ‘Jehovah ngemataka semua orang ke ngasika Iya, ke manggaika diri ba pengerindu Iya ti meruan belama iya.’ (Mas. 33:18) Arapka semua kitai terus bebendar ngayanka penyabar.