1. Ngatta magustuammu i totolay nga minappasensia?

 KAKAYÀ tam ngamin i totolay nga minappasensia. Atannang i paningattam ta totolay nga mawayya da i maginnag nga ari nga mapporay. Appresiattam gapa ta pasensian ittam na tanakuan maski nu makkamali ittam. Mappabalo ittam ta pinasensian ittam na nangi-Bible study ta nittam maski nu marigatan ittam nga gigiammuan, akseptan, onu iyaplika i tadday nga tuddu na Biblia. Ngem i pinaka-ipappabalo tam ay pasa-pasensian ittam na Dios tam nga si Jehova!—Roma 2:4.

2. Anni ira nga situasion i awayya na tu marigatan ittam nga mappasensia?

² Maski nu magustuattam nu minappasensia i tanakuan, baka marigatan ittam nu mittan nga mabbalin tu minappasensia. Angngarigan na, awayya na tu marigatan ittam nga mappasensia nu grabe i trafik, mas nu ma-late ittam ngana. Baka mapporay ittam nu egga i kuan na tanakuan nga maka-irita ta nittam. Nu mittan gapa, baka molang ittam ngana ta paginnag ta nipromesa ni Jehova nga bagu nga mundo. Ikaya mu kari i mabbalin tu mas minappasensia? Taw nga artikulo, gigiammuattam nu anni i kebalinan na pabbalin tu minappasensia anna nu ngatta kuruga importante yatun. Ammuattam gapa nu anni i makoffun ta nittam tapenu mammungan i pasensia tam.

3. Anni i kuan na minappasensia nga tolay nu egga i kuan na tanakuan nga maka-irita ta nisa?

³ Egga i appa nga makua tam tapenu mepasingattam i pasensia. Ollu, ari insigida nga mapporay i minappasensia nga tolay. Ikaguman na nga mattalupaddian nga kalmadu anna ari yayya nga mangibalo maski nu marake i pattratu nisa na tanakuan onu ma-stress yayya. Ta Biblia, ollu nga mabibbig i uvovug ira nga “ari insigida nga mapporay” turi ta nadeskriba si Jehova nga “Dios nga minangngikallo anna minangngikabbi, ari insigida  nga mapporay anna abundansia ta matalo nga aya anna kinakurug.”​—Ex. 34:6.

4. Anni i kuan na minappasensia nga tolay nu mawag na i maginnag?

⁴ Mekadua, kalmadu nga maginnag i minappasensia nga tolay. Nu mabayag i iinnaggan na, ari yayya nga mavurung onu mairita. (Mat. 18:26, 27) Aru i situasion nga mawag tu kalmadu ittam nga maginnag. Angngarigan na, mawag tu mapasensia tam nga ginnan i tanakuan nu mabbida ira anna ari ittam nga makigiddang nga mabbida. (Job 36:2) Mawag tam gapa i pasensia nu uffunattam i Bible study tam tapenu malippawa na i tadday nga tuddu na Biblia onu tapenu meyemmang na i bisiu na.

5. Anni paga i makua tam tapenu mepasingan i pasensia?

⁵ Mekatallu, ari nga mappabibibi i minappasensia nga tolay. Kurug tu egga ira i situasion nga mawag tu mappabibibi ittam. Ngem nu egga i importante nga trabahu nga mawag nga kuan na minappasensia nga tolay, ari yayya nga mappabibibi nga igafu yatun onu balinan insigida yatun. Siguraduan na lallagu nga egga i makalanno nga tiempo na tapenu mapannonopan na tu mapia nu anni i kuan na. Tapus iddan na tu makalanno nga tiempo yatun nga trabahu adde ta mabalin na.

6. Anni i kuan na minappasensia nga tolay nu meparubang yayya ta kapurueba onu ziga-riga?

⁶ Meka-appa, ikaguman na minappasensia nga tolay nga attamman i kapurueba ira anna ari yayya nga marreklamo. Ipasingan natun nga konektadu i pappasa-pasensia ta pagatta-attam. Siempre, ari gapa marake nga ikagi tam ta madukko nga kofuttam i kurug nga mataga-tageno tam meyannung ta kapurueba tam. Ngem kuan na minappasensia nga tolay i adde na mawayya na tapenu kanayun lagapa yayya nga positibo durante nga magattattam yayya. (Col. 1:11) Bilang Cristiano, mawag nga ipasingattam i pasensia tatun ira nga situasion. Ngatta? Ammuattam i karuan nga rason.

7. Segun ta Santiago 5:7, 8, ngatta kuruga importante i pasensia? (Innan gapa i letratu.)

⁷ Importante i pasensia tapenu mapaliag ittam. Mawag nga mapasensia tam nga innaggan i ketuppal na promesa ira na Dios, gitta na matalo ira nga aripan na ta nappasa. (Heb. 6:11, 12) Nikumpara ittam na Biblia ta tadday nga kusetcheru. (Bibbigan i Santiago 5:7, 8.) Malallappo nga mammula anna mabbaya i kusetcheru ngem ari na nga ammu nu kanni nga dumakal i nimula na. Yari tu mapasensia yayya nga maginnag anna mattalo yayya nga magga egga saw i apitan na. Malallappo ittam gapa ta espiritual ira nga aktibidad maski nu ‘ari tam nga ammu nu anni nga aggaw’ i aggangay na Yafu tam. (Mat. 24:42) Mapasensia ittam nga maginnag anna mattalo ittam nga ta mepangngo nga tiempo, tuppalan noka ni Jehova i ngamin nga nipromesa na. Nu mofu gare i pasensia tam, baka molang ittam ngana nga maginnag tapus sisinu tam ngana nga panawan si Jehova. Baka mamegafu paga lagu nga pagolluattam i gannug ira nga abbo tam nga mangiyawa tu kurug nga pagayayya sangawe. Ngem nu minappasensia ittam, makapagattam ittam adde ta panuppalan anna mapaliag ittam.​—Mik. 7:7; Mat. 24:13.

8. Kunnasi makoffun i pasensia ta pakilallang tam ta tanakuan? (Colosas 3:12, 13)

⁸ Makoffun i pasensia ta pakilallang tam ta tanakuan. Angngarigan na, nu mabbida i tanakuan, ginnattam ira tu mapia. (Sant. 1:19) Marresulta gapa ta imammo i pasensia. Nu mapasensia ittam, ari ittam insigida nga mabbida anna makkagi tu makapataki nu ma-stress ittam. Nu minappasensia ittam, ari ittam insigida nga mapporay maski nu sinakitan na tanakuan i panageno tam. Imbes tu mangibalo ittam, itulu-tuloy tam lallagu i “makkapasa-pasensia anna makkapaka-pakoma.”​—Bibbigan i Colosas 3:12, 13.

9. Kunnasi nga makoffun nittam i pasensia nu mawag tam i maddesision? (Proverbio 21:5)

⁹ Makoffun gapa i pasensia tapenu makangngua ittam tu makasta ira nga desision. Imbes tu gavva-gavva ittam nga maddesision, mar-research ittam labbi anna pannonopattam tu mapia i pappiliattam ira. (Bibbigan i Proverbio 21:5.) Angngarigan na, nu magaleg ittam tu trabahu, baka matenta ittam nga alawatan i ollu nga trabahu nga meyofer ta nittam, maski nu ari tam nga maatendeyan i karuan nga study onu ari ittam kuruga makalawan. Ngem nu minappasensia ittam, pannonopattam labbi tu mapia i kapaddu na biahe tam, nu piga oras ittam nga mattrabahu, anna i efekto natun ta familia tam anna ta relasiottam kani Jehova. Nu minappasensia ittam gafu, malillitattam i makangngua tu ugal nga desision.

10. Kunnasi nga mammungan na tadday nga Cristiano i pasensia na, anna kunnasi na nga mepasingan yatun kanayun?

¹⁰ Ipakimallo nga mammungan i pasensiam. Tadday ta aspeto na vunga na masanto nga espiritu i pasensia. (Gal. 5:22, 23) Yari tu ikiddaw tam kani Jehova i masanto nga espiritu na anna mappoffun ittam tapenu mepasingan i vunga natun. Nu egga ittam ta situasion nga mamurueba ta pasensia tam, mawag nga itulu-tuloy tam i “makkiddaw” tu masanto nga espiritu tapenu moffunan ittam nga mabbalin tu minappasensia. (Luc. 11:9, 13) Awayya tam gapa nga mappoffun kani Jehova tapenu masingattam i ganna-gannug segun ta pagimamma na. Tapus kabalittam nga makimallo, mawag tu kuattam i adde na mawayya tam tapenu mabbalin tu mapasensia ta kada aggaw. Nu mas ipakimallo tam i pasensia anna ikagumattam nga ammungan i  pasensia tam, mas mabi ngana nga mepasingattam yatun nga ugali anna mabbalin ngana yatun tu parte na kata-katoletam.

11-12. Kunnasi nga nangipasingan si Jehova tu pasensia?

¹¹ Pannonopan tu mapia i ehemplo ira ta Biblia. Aru nga ehemplo na minappasensia nga tolay i mabibbig tam ta Biblia. Nu pannonopattam danatun, magigiammu tam nu kunnasi ittam mangipasingan tu pasensia. Nige tam nga ammuan danatun nga ehemplo, gigiammuattam i kakastan nga ehemplo na pappasensia—si Jehova.

¹² Ta hardin na Eden, pinara-parake ni Satanas i ngagan ni Jehova anna zinaral na i reputasion ni Jehova bilang patas anna minaggiddu nga Mammaguray. Ngem ari insigida nga zinaral ni Jehova yatun nga minammara-parake. Nappasensia yayya anna finugaddan na i baggi na. Ammu na gare nga kawagan i tiempo tapenu mapakurug na nga i pammagurena i kapianan. Habang iinnaggan na nga mesimmu yatun, inattamman na i pamara-parake ta ngagan na. Fuera paga tatun, mapasensia yayya nga maginnag tapenu mas aru nga totolay i meddan tu chansa nga mattolay tu mannanayun. (2 Ped. 3:9, 15) Megafu tatun, minillion nga totolay i nakannammu ta nisa. Nu agga-nono tam i benefisio ira na pappasensia ni Jehova, mas mabi para ta nittam nga innaggan i tiempo na pangirattal na ta panuppalan.

13. Kunnasi nga perfekto nga naparigan ni Jesus i pasensia na Yama na? (Innan gapa i letratu.)

¹³ Perfekto nga naparigan ni Jesus i pasensia na Yama na. Nipasingan na yatun nga ugali ta kegga na ta davvun. Magga mariga para ta nisa nga kanayun nga ipasingan i pasensia, mas ngana ta minaggappappe ira nga eskriba anna Fariseo. (Juan 8:25-27) Ngem gitta na Yama na, ari insigida nga napporay  si Jesus. Ari yayya nga nangibalo maski nu ininsulto da yayya onu pinallussaw. (1 Ped. 2:23) Mapasensia nga inattamman ni Jesus i kapurueba ira anna ari yayya nga narreklamo. Yatun i gafu na nu ngatta kagian nittam na Biblia nga ‘nonopattam nu kunnasi na nipagatta-attam na ta nepallo nga pangontra sa na minattagaruli ira’! (Heb. 12:2, 3) Ta uffun ni Jehova, maattammattam gapa i maski anni laman nga kapurueba nga meparubang ta nittam.

14. Anni i magigiammu tam ta pappasensia ni Abraham? (Hebreo 6:15) (Innan gapa i letratu.)

¹⁴ Mabayag ngana nga iddanaman na karuan ta nittam nga duttal ngana nakuan i panuppalan. Yayya nga baka mavurung ittam nga ari tam ngana nga mennaggan yatun. Anni i makoffun tapenu tulu-tuloy ittam nga mapasensia nga maginnag? Nonopan i nesimmu kani Abraham. Turi ta 75 i dagun ni Abraham anna awan tu ana na, nipromesa nisa ni Jehova: “Kuattaka tu dakal nga nasion.” (Gen. 12:1-4) Nasingan kari ni Abraham i ketuppalan natun nga promesa? Ari tu ngamin. Kabalin nga nakkantay si Abraham ta Bannag Eufrates anna naginnag tu 25 dagun, nasingan na i milagro nga keyana na ana na nga si Isaac. Tapus kabalin na 60 dagun, neyana gapa i áfu na nga da Esau anna Jacob. (Bibbigan i Hebreo 6:15.) Ngem ari vuluvuga nasingan ni Abraham nga nabbalin tu dakal nga nasion i gaka-gaka na anna narensia da i Nepromesa nga Davvun. Ngem napeggan yatun nga matalo nga lalaki tu madukko nga relasion ta Namaratu ta nisa. (Sant. 2:23) Sonu mapaginnolay si Abraham, siguradu nga magayayya yayya nga mammuan nga megafu ta pangurug anna pappasensia na, nabendisionan i ngamin nga nasion! (Gen. 22:18) Anni i magigiammu tam tatun? Awayya na tu  ari tam masingan sangawe i ketuppalan na ngamin nga promesa ni Jehova. Ngem nu mappasensia ittam gitta ni Abraham, makasiguradu ittam nga bala-balakkan ittam ni Jehova sangawe anna mas ngana sonu napabagu nga mundo nga nipromesa na.​—Mar. 10:29, 30.

15. Anni i awayya tam nga i-personal study?

¹⁵ Aru paga nga ehemplo na totolay nga nappasensia i mabibbig ta Biblia. (Sant. 5:10) Makasta nu i-personal studym danatun. b Angngarigan na, maski nu allabbing nga natunno si David bilang patul na Israel, mawag tu piga ragun yayya nga maginnag nige na nga mammaguray. Matalo gapa nga nasserbi kani Jehova si Simeon anna si Ana durante nga ininnaggadda i nepromesa nga Mesias. (Luc. 2:25, 36-38) Ta paggigiammum ta ehemplo da, tabbagammu yaw ira nga pakkiavu: Anni i nakoffun tatun nga tolay nga mappasensia? Kunnasi yayya nga nammakapia ta pappasensia na? Kunnasì yayya nga maparigan? Mammakapia ka gapa nu gigiammuammu danuri ari nga nakepasingan tu pasensia. (1 Sam. 13:8-14) Awayyam nga iyavu ta baggim: ‘Ngatta ari yayya nakepasingan tu pasensia? Anni ira i marake nga nesimmu ta nisa megafu ta ari yayya nga nappasensia?’

16. Anni i karuan nga benefisio na pappasensia?

¹⁶ Pannonopan i benefisio ira na pappasensia. Nu mapasensia ittam, mas magayayya anna kalmadu ittam. Mapakasta gafu na pappasensia i mental anna pisikal nga gawa-gawayyattam. Nu pasensiattam i tanakuan, mas makasta i relasiottam ta nira anna mas mattaradday i kongregasiottam. Nu pinallussaw ittam na tanakuan, ari nga maggrabe i situasion nu ari ittam insigida nga mapporay. (Sal. 37:8; Prov. 14:29) Ngem i kakastan ta ngamin, nu mappasensia ittam, maparigattam i Yama tam ta langi anna mas maddukko ittam ta nisa.

17. Sitaw ittam nakuan nga determinadu?

¹⁷ Talaga makasta nga ugali i pappasensia anna pammakapiattam ngamin yatun! Nu mittan, mariga i mappasensia. Ngem ta uffun ni Jehova, metulu-tuloy tam nga mepasingan yatun nga ugali. Habang mapasensia nga innaggattam i napabagu nga mundo, makasiguradu ittam nga “tangngallan na YAFU i mammakakua ira sa, nga mammakatalo [“maginnag,” NW] ta ari manguli nga pangaya na.” (Sal. 33:18) Determinadu ittam nakuan gafu ngamin nga kanayun nga mappasensia.