1. Myit galu ai ni hpe anhte hpa majaw ra sharawng ai kun?

 MYIT galu ai masha ni hpe anhte yawng ra sharawng ai. Lama ma hpe myit galu let la chye ai ni hpe anhte hkungga ai. Anhte galaw shut ai aten ni hta myit galu ya ai ni hpe chyeju dum ai. Chyum Laika sharin ya ai lam langai hpe chye na na matu, hkap la na matu, tatut hkan sa na matu yak ai aten ni hta myit galu ya wa ai Chyum Laika sharin ya ai ni hpe anhte chyeju dum ai. Anhte hpe myit galu ya wa ai Yehowa Karai Kasang hpe grau pyi chyeju dum ai.—Rom 2:4.

2. Gara masa ni hta myit galu na matu yak chye ai kun?

² Kaga ni myit galu ai hpe anhte ra sharawng tim, tinang nan myit galu na matu gaw ayan na n loi ai. Ga shadawn, shara ra de sa na matu hpang hkrat nga ai shaloi, lam pat taw ai nga yang myit galu na matu yak chye ai. Kaga ni masin pawt hkra galaw ai shaloi grai pawt hkrup chye ai. Kalang marang, mungkan nnan la ra ai hpe pyi myit n galu wa chye ai. Nang grau myit galu mayu ai kun? Myit galu ai ngu ai gaw hpa rai kun? Myit galu na matu hpa majaw ahkyak ai kun? Grau myit galu hkra gara hku galaw mai ai kun? ngu ai lam ni hpe ndai sumhpa hta bawngban na re.

3. Masin pawt hkra kaga ni galaw ai shaloi, myit galu ai ai wa gaw gara hku bai htang ai kun?

³ Myit galu ai lam madun mai ai lam 4 hpe yu yu ga. Langai, myit galu ai wa gaw alawan masin n pawt ai. Masha ni pawt hkra galaw ai shaloi (sh) Myit ru ai shaloi, matut myit simsa na matu, shanhte galaw ai zawn bai n galaw na matu shakut ai. Chyum Laika hta myit galu ai ngu ai ga hkaw hpe Pru Mat 34:6 hta shawng nnan mu lu ai. Dai hta, “Yehowa sumnung ai myit hte chyeju hpring ai, myit galu ai hte n-gaw nwai re ai, matsan dum ai hte sadi sahka hpring ai” ngu tsun da ai.

4. La ra ai aten hta myit galu ai wa gaw gara hku bai htang ai kun?

 ⁴ Lahkawng, myit galu ai wa gaw myit zim let la ai. Lama ma hpe myit mada da ai hta na grau na na la ra yang, nchyi nmu n byin hkra shakut ai. (Mat 18:26, 27) Myit zim let la ra ai masa ni law law nga ai. Ga shadawn, marai langai ngai ga shaga ai shaloi lapran shang n tsun ai sha, myit galu let madat ra ai. (Yob 36:2) Chyum Laika sharin achyin ai lam langai hpe chye na na matu, n kaja ai arawn alai langai hpe tawt lai na matu, chyum ga sharin hpe karum ya ai shaloi myit galu ra chye ai.

5. Myit galu ai lam madun mai ai kaga lam langai gaw hpa rai kun?

⁵ Masum, myit galu ai wa gaw tin shapun n galaw ai. Raitim, lawan ladan galaw ra ai lam ni gaw nga chye ai. Myit galu ai wa gaw ahkyak ai lit hpe tin shapun n galaw ai, tin shapun n shangut ai. Aten la nna shajin ai, aten la nna galaw ai.

6. Yakhkak ai lam ni nga ai shaloi myit galu ai ni gaw gara hku bai htang ai kun?

⁶ Mali, myit galu ai wa gaw yakhkak hkrum ai shaloi aput angun n re ai sha hkamjan lu hkra shakut ai. Dai majaw, myit galu ai lam hte hkamjan lu ai lam gaw matut mahkai nga ai. Mayak mahkak hkrum ai shaloi hku hkau ai manang langai hpe tinang a hkamsha lam ni tsun dan ai gaw n shut ai. Raitim, myit galu ai wa gaw kaja ai ningmu matut nga hkra galaw nna, hkamjan lu hkra kaja htum matut shakut na re. (Kol 1:11) Dai lam ni yawng hta Hkristan ni myit galu ra ai. Hpa majaw kun? Lam nkau hpe yu yu ga.

7. Yaku 5:7, 8 hku nga yang, myit galu na matu hpa majaw ahkyak ai kun? (Sumla hpe mung yu u.)

⁷ Hkye hkrang la hkrum mayu yang myit galu ra ai. Moi na sadi dung ai mayam ni zawn, Yehowa a ga sadi ni hpring tsup na  matu, Karai Kasang hpe myit galu let la ra ai. (Heb 6:11, 12) Chyum Laika hta anhte hpe sun galaw ai wa hte shingdaw da ai. (Yaku 5:7, 8 hpe hti u.) Sun galaw ai wa gaw nsi naisi hkai ai, hka jaw ai. Raitim, gara aten hta tu kaba wa na hpe gaw tup hkrak n chye ai. Aten du yang dan la lu na ngu ai hpe kam nna myit galu let la ai. Anhte mung “Madu gaw gara shani e du wa na hpe n chye” tim, nawku dawjau ai lam ni hta bungli law nga ai. (Mat 24:42) Raitim, aten du yang Yehowa a ga sadi ni hpring tsup wa na ngu ai hpe kam nna, myit galu let la nga ai. Myit n galu wa yang, la ra ai hpe myit pu ba dum wa nna, teng man ai lam kaw nna angwi ngwi tsan mat wa chye ai. Ya jang akyu jaw lu ai lam ni hpe myit maju jung wa chye ai. Raitim, myit galu yang jahtum du hkra hkamjan lu nna hkye hkrang la hkrum na re.—Mik 7:7; Mat 24:13.

8. Myit galu ai gaw kaga ni hte kanawn mazum ai lam hta gara hku karum ya lu ai kun? (Kolose 3:12, 13)

⁸ Myit galu ai gaw kaga ni hte kanawn mazum ai lam hta karum ya ai. Kaga ni tsun ai ga hpe atsawm madat na matu karum ya ai. (Yak 1:19) Simsa lam nga na matu mung karum ya ai. Myit ru nga yang pyi tsawra myit n lawm ai ga ni n tsun na matu, alawan bai n htang na matu karum ya ai. Kaga ni anhte hpe myit n pyaw hkra galaw ai shaloi hta mung, alawan masin n pawt na matu karum ya ai. Matai htang na malai, “shada da hkam mana ai hte, mara langai ngai nga yang gaw, shada da raw dat kau hkat” na matu myit galu ai gaw karum ya ai.—Kolose 3:12, 13 hpe hti u.

9. Dawdan lam jahkrat ra ai shaloi myit galu ai gaw gara hku karum ya ai kun? (Ga Shagawp 21:5)

⁹ Kaja ai dawdan lam ni jahkrat lu hkra mung, myit galu ai gaw karum ya ai. Myit galu ai nga yang anhte tin shapun galaw na n re ai sha, lata ra ai lam ni hpe aten la nna hkaja na, sawn maram na re. (Ga Shagawp 21:5 hpe hti u.) Ga shadawn, bungli tam ra ai ngu saga. Zuphpawng, hkaw tsun bungli n lu sa ai nga yang pyi, mu ai bungli hpe kalang ta galaw na matu myit chye ai. Raitim, myit galu ai wa rai yang, nta hte bungli kade tsan ai, hkying kade galaw ra na, dinghku hte nawku dawjau lam hpe gara hku hkra machyi na ngu ai hpe myit shalawm na re. Myit galu ai gaw shut ai dawdan lam n jahkrat hkrup hkra karum ya ai.

10. Hkristan ni grau myit galu hkra gara hku galaw mai ai kun?

¹⁰ Grau myit galu chye hkra akyu hpyi u. Myit galu ai gaw chyoi pra ai wenyi a asi langai re. (Gal 5:22, 23) Dai majaw, chyoi pra ai wenyi lu hkra akyu hpyi u. Dai asi si lu hkra karum ya na matu Yehowa kaw “hpyi” shawn u. Myit galu ai lam hpe chyam dinglik ai masa langai hte hkrum wa yang, myit galu hkra karum ya lu ai chyoi pra ai wenyi lu na matu hpyi u. (Luk 11:9, 13) Masa lam ni hpe Yehowa a ningmu hte mu chye hkra karum ya na matu mung hpyi u. Tinang maga kaw na mung myit galu chye na matu shani shagu shakut u. Akyu hpyi na, shakut na nga yang myit galu ai wa n rai tim pyi myit galu chye wa na re.

11-12. Myit galu ai lam hpe Yehowa gara hku madun ai kun?

¹¹ Chyum Laika kaw na kasi kaja ai ni a lam hpe myit yu u. Chyum Laika hta myit galu ai lam madun wa ai kasi kaja ai masha law law a lam lawm ai. Shanhte a lam myit yu ai hku nna, myit galu ai lam madun lu ai lam ni hpe sharin la lu na re. Shawng nnan, myit galu ai  hta kaja htum kasi re ai Yehowa a lam hpe yu yu ga.

¹² Yehowa gaw tara rap ra ai, tsawra myit hte uphkang ai madu re ai hpe Ewa ntsen ai myit nga wa hkra, Edin sun hta Satan galaw ai hku nna Yehowa a mying hpe sari jahpoi wa ai. Dai zawn sari jahpoi ai wa hpe Yehowa kalang ta n jahten kau ai. Tinang a uphkang ai lam kaja htum re ai hpe sakse madun na matu aten ra ai hpe Yehowa chye ai. Dai aten hpe la nga ai laman gaw, shi a mying sari jahpoi hkrum ai hpe hkamjan wa ai. Dai hta n-ga, masha law law htani htana asak hkrung lu na matu Yehowa myit galu let la ya nga ai. (2 Pe 3:9, 15) Akyu gaw, masha wan law law Karai Kasang a lam chye wa ai. Yehowa myit galu ai majaw, lu wa ai akyu ni hpe myit maju jung yang, jahtum nhtoi hpe myit galu hte la na matu loi na re.

13. Kawa a myit galu ai lam hpe Yesu gara hku kasi la wa ai kun? (Sumla hpe mung yu u.)

¹³ Yesu mungkan ga hta nga ai shaloi, Kawa hpe kasi la nna myit galu ai lam madun wa ai. Raitim, myit galu na matu ayan na loi na n re. Grau nna gaw, hpyi hpun ai laika ka sara ni, hparishe ni hpe myit galu na matu grai yak wa na re. (Yhn 8:25-27) Raitim, Kawa zawn sha Yesu mung aloi sha masin n pawt ai. Jahpoi asawng hkrum ai, pawt hkra galaw hkrum ai aten ni hta matai bai n htang ai. (1 Pe 2:23) Mayak mahkak ni hpe aput angun ai lam n nga ai sha, myit galu let hkamjan wa ai. Dai majaw, “yubak kap ai ni a lata hte dai hte wa ndang kalang di kau hkrum sha ai wa hpe, myit dum nga mu” ngu Chyum Laika hta tsun ai. (Heb 12:2, 3) Anhte hpe mung Yehowa karum ya yang, mayak mahkak yawng hpe myit galu let hkamjan lu na re.

14. Abraham myit ai lam kaw nna hpa sharin la lu ai kun? (Hebre 6:15) (Sumla hpe mung yu u.)

 ¹⁴ Jahtum du na matu hpunau nauna nkau mi myit mada nga ai gaw grai na sai. Tinang n si shi yang jahtum n du wa ai hpe myit tsang chye ai. Myit galu let la na matu hpa gaw karum ya lu ai kun? Abraham a lam myit yu u. “Ngai nang hpe amyu kaba shatai na” ngu Abraham hpe Yehowa ga sadi jaw ai aten hta shi asak 75 ning rai sai. Kashu kasha n nga ai. (Nin 12:1-4) Dai ga sadi hpring tsup wa ai hpe Abraham mu dat ai kun? Yawng hpe gaw n mu dat ai. Uhprat Hkanu hpe rap wa nna 25 ning la ngut ai hpang, kasha Isak shangai wa ai hpe mu lu ai. Dai hpang shaning 60 na ai shaloi, kashu Esaw yan Yaku shangai ai hpe mu ai. (Hebre 6:15 hpe hti u.) Tinang a amyu lakung gaw “amyu kaba” byin wa ai, Ga Sadi Tawn Da Ai Mung hpe sali wunli hkam la lu ai hpe gaw n mu lu dat ai. Raitim, Hpan Madu hte kaja ai hku hkau lam nga wa ai. (Yak 2:23) Shi bai hkrung rawt wa ai shaloi, shi a makam masham, myit galu ai lam a majaw, masha amyu baw yawng shaman chyeju lu ai hpe chye yang, grai kabu na re. (Nin 22:18) Hpa sharin la lu ai kun? Ya aten hta Yehowa a ga sadi yawng hpring tsup wa ai hpe anhte mu yang she mu na. Raitim, Abraham zawn myit galu yang, ya aten hta Yehowa a shaman chyeju ni hkamsha lu na, mungkan nnan hta grau nna pyi hkamsha lu na re.—Mrk 10:29, 30.

15. Tinang hkrai hkaja ai lam hta hpa lam ni hkaja mai ai kun?

¹⁵ Chyum Laika hta, myit galu ai lam madun  wa ai kasi kaja ai masha law law a lam lawm ai. (Yak 5:10) Tinang hkrai hkaja ai lam hta shanhte a lam hpe hkaja yu u. b Ga shadawn, Dawi gaw Israela hkawhkam hku nna naw kaji ai aten hta namman chya hkrum wa ai. Raitim, hkawhkam byin na matu shaning law law la ra ai. Simun yan Anna gaw, ga sadi tawn da ai Meshia hpe myit mada nna, sadi dung let nawku wa ai. (Luk 2:25, 36-38) Dai labau ni hpe hkaja ai shaloi ndai ga san ni a mahtai hpe tam yu u: Myit galu ai lam madun na matu shi hpe hpa gaw karum ya wa ai kun? Shi myit galu ai majaw hpa akyu lu wa ai kun? Shi hpe gara hku kasi la lu na kun? Myit n galu ai ni a lam hkaja ai mung akyu lu shangun ai. (1 Sa 13:8-14) ‘Shi hpa majaw myit n galu wa ai kun? Myit n galu ai majaw gara zawn hkra machyi ai lam ni hkrum wa ai kun?’ ngu myit yu u.

16. Myit galu ai majaw lu na shaman chyeju nkau gaw hpa rai kun?

¹⁶ Myit galu ai majaw lu na shaman chyeju ni hpe myit yu u. Anhte myit galu yang, grau pyaw na, grau myit simsa lu na. Hkum hkrang hte myit masin mung hkamja na. Kaga ni hte mung kaja ai hku hkau lam nga na. Nawku hpung hta grau simsa na. Kaga ni masin pawt hkra galaw ai shaloi, loi loi hte npawt ai majaw manghkang n kaba sai. (Shk 37:8; Gsh 14:29) Ahkyak htum gaw, myit galu yang, sumsing Kawa hpe kasi la ai rai nna, shi hte grau hku hkau wa shangun ai.

17. Anhte hpa dawdan da ging ai kun?

¹⁷ Myit galu ai gaw akyu lu shangun ai atsam ningja langai re. Myit galu na matu ayan na n loi tim, Yehowa karum ya yang, matut myit galu ai lam madun lu ai. “Yehowa hpe hkrit kamyin ai ni hte, Shi a chyeju ala nga ai ni a ntsa e . . . Shi a myi a yu nga ai” ngu ai hpe kam yang, mungkan nnan hpe myit galu let la lu na re. (Shk 33:18, 19) Anhte yawng matut myit galu na matu dawdan da ga.