1. Sooq inuit naammagittartut illit nuannarisarpigit?

 TAMATTA inuit naammagittartut nuannarisarpagut. Kamassarnatik utaqqisin­naassuseqartut ataqqivagut. Kukkugaangatta inuit naammagit­tarfigigaangatigut qujamasut­tarpugut. Qujamasuutigisaqaarpullu Biibilimik ilinniar­titsisutta paasiuminaatsitaqar­nitsinni, akueriuminaatsitaqar­nitsinni maleruaruminaatsitaqar­nitsinniluunniit naammagit­tarfigisarmatigut. Pingaar­nertulli, Jehovap uagutsinnik naammagit­tarfigin­ninnera qujamasuutigingaarparput. – Rom 2:4.

2. Qanoq pisoqar­tillugu naammagit­tartuunissarput sapernar­tissinnaavarput?

² Allat naammagit­tartuunerat nuannaarutigigaluarlugu imaassinnaavoq uagut naammagit­tartuunissarput sapernar­tikkipput. Assersuutigalugu biilini siuleriaattuni eqqissisimanissarput sapernar­tissinnaavarput, pingaartumik inortuiler­tilluta. Allat uumitsaap­patigut kamaammersin­naavugut. Aamma immaqa Jehovap paratiisissamik neriorsuutaata eqquunnissaa utaqqikatas­sinnaavarput. Naammagit­tarnerulerusuppit? Allaaserisami matumani sammissavarput naammagit­tartuuneq qanoq isumaqarnersoq aamma sooq taama pingaaruteqar­tigisoq. Aamma naammagit­tartuunis­satsinnut suut iluaqutigisin­naanerlugit sammissavagut.

3. Inuk naammagittartoq kamassaar­neqaraangami qanoq pissusilersortarpa?

³ Naammagit­tartuunissamik sisamatigut qanoq ersersitsisin­naanersugut sammeriartigu. Siullertut, inuk naammagittartoq kamajaatsuusarpoq. Kamassaar­neqaraangami tatineqaraangamilu eqqissisimaniartarpoq akiniaasarnanilu. Oqaaseq “kamajaatsoq” Biibilimi Jehova pillugu siullerpaamik eqqaaneqarpoq,  ima allassimasoqarami: “Guuti nallittuisoq saammaasorlu, kamajaatsoq ilumoornermik sallusuis­summillu peqangaartoq.” – Mos 2. 34:6.

4. Naammagittartoq utaqqisariaqaraangami qanoq qisuariartarpa?

⁴ Aappaattut, inuk naammagittartoq utaqqisin­naassuseqarpoq. Ilimagin­ngisamik sivisunerusumik utaqqisin­neqaraangami eqqissiveerunnanilu uumitsan­naveersaartarpoq. (Mat 18:26, 27) Ullut tamaasa naammagit­tarluta utaqqisin­naassuseqar­tariaqarpugut. Assersuutigalugu oqaluttoqar­tillugu akornusernagu tusarnaaq­qissaar­tariaqarpugut. (Job 36:2) Aamma imaassinnaavoq ilinniar­titatta Biibilimi ilumoortumik paasisaqar­nissaanut ikiornerani ileqqupalaavinillu qaangiiniarnerani naammagit­tartariaqartugut.

5. Naammagit­tartuuneq allatigut qanoq ersersin­neqarsinnaava?

⁵ Pingajuattut, inuk naammagittartoq eqqarsaq­qaarani iliuuseqapallanneq ajorpoq. Soorunami ilaannikkut iliuusepal­lattariaqar­tarpugut. Inulli naammagittartoq pingaarutilimmik suliassaqaraangami pipallan­niaannar­tanngilaq naammasiniapal­laannar­tarnanilu. Qanorli iliornissani pilersaarusioq­qaartarpaa. Taava piffissaqarfigil­luarlugu suliarisarpaa.

6. Inuk naammagittartoq misilin­neqarnermi imaluunniit ajornar­torsiornermi qanoq qisuariartarpa?

⁶ Sisamaattut, inuup naammagittartup naammagit­taallioq­qajaanani atukkani naammagalugit atortarpai. Tassunga tunngatillugu naammagittarneq nikallujuinnerlu imminnut ataqatigiipput. Soorunami misilin­neqartilluta qanoq misiginerluta ikinngutiginerpaasatsinnut oqaluttuarsin­naavugut. Inuulli naammagittartup inuunermini nuannersut aamma eqqarsaatigisarpai sapinngisaminillu nuannaarluni Jehova kiffartorfigisarlugu. (Kol 1:11) Sammeriik­katsitut naammagit­tartuuneq assigiin­ngitsutigut ersersin­neqarsinnaavoq. Sooq  kristumiutut naammagit­tartuunissarput eqqumaf­figisariaqarparput? Pissutaasut ilaat misissoriartigit.

7. Jaaku 5:7, 8-lu naapertorlugit sooq naammagittarneq pingaaruteqarpa? (Aamma assiliaq takuuk).

⁷ Annassagutta naammagit­tartuusariaqarpugut. Qanga upperluartut assigalugit Guutip neriorsuutiminik eqquutsitsinissaa utaqqisin­naasariaqarparput. (Hebr 6:11, 12) Biibilimi naasoris­saasumut assersuun­neqarpugut. (Jaaku 5:7, 8 atuakkit). Naasorissaasoq naatitsiniarluni imerteriniarlunilu suleruloortarpoq, nalusarpaali qaqugorpiaq naasoqas­sanersoq. Taamaattumik naasorissaasoq utaqqisin­naasariaqarpoq naatsorsuutigalugu inerititaqarumaarluni. Taamatuttaaq Jiisusi ilaarniarlugu tamaviaar­tarpugut naak Naalagarput “ullormi sorlermi tikiutis­sanersoq” nalugaluarlugu. (Mat 24:42) Jehovap neriorsuutini piffissaq eqqorlugu eqquutitik­kumaarai tatigalugu naammagit­tarluta utaqqivugut. Naammagit­tarunnaarutta utaqqikatalersin­naavugut Jehovamillu qimaguk­kiartuaalerluta. Maannangaaq iluatan­nissarput anguniarlugu allamut saaqqajaasin­naavugut. Naammagit­taruttali naggatissamut pinertusaarsin­naavugut annallutalu. – Mika 7:7; Mat 24:13.

8. Naammagittarneq allanut attaveqarluar­nitsinnut qanoq iluaqutigisin­naavarput? (Kolossimiut 3:12, 13)

⁸ Naammagittarneq allanut attaveqarluar­nitsinnut iluaqutigisin­naavarput. Allat oqalutsillugit tusarnaaq­qissaar­nissatsinnut iluaqutigisin­naavarput. (Jaak 1:19) Aamma naammagittarneq eqqisseqatigiis­sitsisarpoq. Tatineqar­tilluta qisuariapiluun­nginnis­satsinnut aamma nuannin­ngitsunik oqariataar­tuunngin­nissatsinnut illersuutigisin­naavarput. Aamma misigis­sutsitsigut annersin­neqarutta kamaammiaval­laassan­ngilagut. Akipiloornata ‘kamageqatigiit­tuarlutalu ilumoorluta isumakkeerfigeqatigiit­tuassaagut’. – Kolossimiut 3:12, 13 atuaruk.

9. Aalajangiiniar­tilluta naammagittarneq qanoq iluaqutigisin­naavarput? (Ussatit 21:5)

⁹ Naammagittarneq aamma aalajangiil­luarnis­satsinnut iluaqutigisin­naavarput. Aalajangipal­laannarnata iliuuseqar­tinnata misissueq­qaarlutalu eqqarsaatigin­neqqissaaq­qaassaagut. (Ussatit 21:5 atuaruk). Assersuutigalugumigooq suliffis­sarsior­nitsinni neqeroorutigineqartoq siulleq akuerivarput, naak Jehovamut kiffartor­nitsinnut akornutaasin­naagaluartoq. Naammagit­tartuuguttali eqqarsaatigeq­qissaas­savarput sumiinnersoq qanorlu sivisutigisumik sulisas­sanerluta, aamma ilaquttatsinnut Jehovamullu attaveqar­nitsinnut akornutaas­sanersoq. Naammagit­tartuugutta aalajangiinerlun­nissarput pinngitsoor­tissinnaavarput.

10. Kristumiup naammagittarneq qanoq ineriar­tortillugulu attatiin­nalersinnaavaa?

¹⁰ Naammagit­tartuunissat qinnutigiuk. Naammagit­tartuuneq anersaap inerititaanut ilaavoq. (Gal 5:22, 23) Taamaattumik Jehova anersaamik illernartumik qinnuigisin­naavarput anersaap inerititaata taassuma ineriar­tortinnissaanut ikioqqulluta. Naammagit­tassuserput misilin­neqarpat anersaaq illernartoq qinnutigiuas­savarput naammagit­tarsinnaanis­satsinnut ikioqqulluta. (Luk 11:9, 13) Aamma Jehovamut ikioqqusin­naavugut taassuma isiginnit­taasiatut isiginnit­taaseqaq­qulluta. Taava qinnutigereersimagutsigu ullut tamaasa sapinngisamik naammagit­tartuuniar­tariaqarpugut. Naammagit­tartuunissarput qinnutigiuarutsigu anguniar­tuarlugulu  uummatsitsinni sorlanitsik­kiartuaas­savarput inuttullu ilisarnaatigilerlugu.

11-12. Jehovap naammagit­tartuunini qanoq ersersippaa?

¹¹ Biibilimi maligas­saalluartut eqqarsaatigeq­qissaakkit. Inunnik naammagit­tartunik Biibilimi assersuutis­sarpassuaqarpoq. Maligas­saalluartut taakkua eqqarsaatigeq­qissaar­nerisigut qanoq naammagit­tarsinnaanerluta ilinniarsin­naavarput. Taamaaliun­nginnitsinni naammagit­tarnermik maligas­saalluar­nerpaaq Jehova sammeriartigu.

¹² Naatsiivimmi Edenimi Saatanip Eva isumaqalersin­niarpaa Jehova naapertuil­luanngitsumik asannin­ngitsumillu naalakkersuisuusoq, taamaalillunilu Jehovap aqqata tusaamaneqarnera mitallerpaa. Saatani ingerlaannaq suujunnaarsinnagu Jehovap naammagit­tartuunini imminullu naalakkersin­naassutsini ersersippai ilisimagamiuk nammineq aqutseriaatsimi pitsaanerunera piffissap ingerlanerani uppernarsineqarumaartoq. Tamanna utaqqitillugu aterminut unnerluutigin­ninnerit tamaasa naammagalugit atorpai. Aamma inuit suli amerlanerusut naassaan­ngitsumik inuuneqalersin­naaqqullugit Jehova naammagit­tarluni utaqqivoq. (Pet 2. 3:9, 15) Tamatuma kingunerisaanik inuppassuit Jehova ilisarisimalersimavaat. Jehovap naammagit­tarnerata iluaqutaanera isiginiarutsigu akuliun­nissaanut utaqqinerput ajornan­nginnerutis­savarput.

13. Jiisusip Ataatami naammagit­tartuunera qanoq ilaaqqis­saarpaa? (Aamma asseq takuuk).

¹³ Jiisusip Ataatami naammagit­tartuuneratigut assigeq­qissaarpaa, tamannalu nunarsuarmiik­kallarami ersersippaa. Tamatigulli oqitsuin­naasimanavianngilaq, pingaartumik  allakkanik ilisimasunik farisiiarinillu pisuusaartunik oqaloqateqaraangami. (Joh 8:25-27) Ataatamisorluinnaq Jiisusi kamajaatsuuvoq. Asissor­neqaraangami kamassaar­neqaraangamilu akiniaaneq ajorpoq. (Pet 1. 2:23) Jiisusip naammagit­taalliornani misilin­neqarnini naammagalugit atortarpai. Tupinnan­ngitsumik Biibilimi kajumis­saarneqarpugut ‘ajortuliortartut akerartuineranni pinertusaartoq eqqarsaatigeq­qissaaq­qullugu’. (Hebr 12:2, 3) Uaguttaaq Jehova ikiortigalugu inuunitsinni sunilluunniit misilin­neqarnitsinni naammagit­tarsinnaavugut.

14. Aaperaap naammagit­tarnera qanoq ilinniarfigisin­naavarput? (Hebræerit 6:15) (Aamma assiliaq takuuk).

¹⁴ Ilagut neriussimas­sagunaraluarput naggatissaq qangali nalliutereersimas­sagaluartoq. Maannakkullu naggatissaq angumeris­sanerlugu isumakuluutigilerpaat. Naammagit­tarnissatsinnut suna iluaqutigisin­naavarput? Aaperaat eqqarsaatigeriaruk. Aaperaat 75-nik ukioqartoq sulilu meeraqarani Jehovap neriorsorpaa ‘inuiassuan­ngortik­kumaarlugu’. (Mos 1. 12:1-4) Neriorsuutaata eqquunnera Aaperaap takuaa? Tamakkiisumiun­ngitsoq. Kuussuaq Eufrati ikaareerlugu ukiunilu 25-ni utaqqereerluni tupinnar­tuliornikkut Aaperaat Iisaamik ernertaarpoq. Ukiullu 60-t qaangiummata ernutai Eesaaui Jaakulu inunngorput. (Hebræerit 6:15 atuaruk). Aaperaalli kinguaani inuiassuan­ngortut aamma nunamik neriorsuutigisamik kingornussisut takunngilai. Taamaak­kaluartorli angut aalajaatsoq taanna Pinngor­titsisiminut qanimut attaveqarpoq. (Jaak 2:23) Aaperaallu makititaaguni uppernermi naammagit­tarnermilu kingunerisaanik nunarsuarmi inuiaat tamarmik pilluaq­qunarsisimasut takugunigit qanoq nuannaar­tigissava!  (Mos 1. 22:18) Qanoq ilinniarfigisin­naavarput? Imaassinnaavoq uagut nammineq Jehovap neriorsuutigisaasa tamakkerlutik eqquunneri ingerlaannaq misigin­ngikkigut. Aaperaatulli naammagit­tarutta qularis­sanngilarput Jehovap maanna siunissamilu suli annertunerusumik akissarsisis­sagaatigut. – Mak 10:29, 30.

15. Nammineq misissueq­qissaar­nitsinni suut eqqarsaatigisin­naavagut?

¹⁵ Biibilimi allanik naammagit­tartunik assersuutis­sarpassuaqarpoq. (Jaak 5:10) Soormi taakku pillugit misissueq­qissaaruit? b Assersuutigalugu Daavi inuusut­tuulluni Israalimut kunngissatut taninneqartoq ukiorpassuarni kunngin­ngornis­saminut utaqqisariaqarsimavoq. Simmiuup Annallu Missiarsi neriorsuutigisaq utaqqitillugu Jehova aalajaallutik kiffartorfigaat. (Luk 2:25, 36-38) Oqaluttuanik misissueq­qissaarninni uku akissutis­sarsiniakkit: ‘Pineqartup naammagit­tarnissaminut suna iluaqutigisin­naasimavaa? Naammagit­tarnini qanoq iluaqutigaa? Qanoq ilaarsin­naavara?’ Aamma naammagit­tarnermik ersersitsin­ngitsut ilinniutigisin­naavatit. (Sam 1. 13:8-14) Imminut ima aperisin­naavutit: ‘Sooruna naammagit­tangitsut? Qanorlu kingunipiloqarpa?’

16. Naammagittarneq sunik iluaqutis­sartaqarpa?

¹⁶ Naammagit­tarnerup iluaqutissartai eqqarsaatigikkit. Naammagit­taraangatta nuannaarlutalu eqqissisimasarpugut. Naammagittarneq eqqarsar­taatsikkut timikkullu peqqinnartuuvoq. Allat naammagit­tarfigisarutsigit attaveqarfigil­luarnerulersin­naavagut. Ilagiitsinni ataasius­suseqar­nerulersin­naavugut. Ajuallatsin­neqarnermi kamajaatsuugutta ajornar­torsiut ajornerulersis­sanngilarput. (Tuss 37:8; Uss 14:29) Tamanillu pingaarnermik naammagit­tarutta Ataatarput qilammiusoq ilaassavarput qaninnerulerlugulu.

17. Suna aalajangiusimas­savarput?

¹⁷ Naammagittarneq pissusiuvoq kusanartoq tamatsinnut iluaqutaasoq! Naammagit­tartuaan­nanngik­kaluarlutaluunniit Jehova ikiortigalugu naammagittarneq ineriar­tortittuarsin­naavarput. Aamma nunarsuup nutaanngornissaa naammagit­tarluta utaqqitillugu qularis­sanngilarput Jehovap ‘isai sammisut ajunngis­susianik utaqqisunut’. (Tuss 33:18) Qanortoq tamatta naammagit­tartuunissarput sulissutigiuartigu!