1. Morwasinke ayi tu hafesere apa vantu ava lididimike?

 NATUVENYE kuyihafera apa vantu ava lididimikire. Morwasinke? Ose kufumadeka vantu ava ava ndindire sininke songandi va hana kuhanduka. Ose kwa kara norupandu apa wopeke ava tu lididimikire apa atu tura mapuko. Ntani ose kwa kara norupandu komurongi gwetu goBibeli ogu ga tu lididimikilire ngomu ngatu kondjo kulironga Bibeli noku tura pasirugana eyi ngatu lirongo moBibeli. Unene po ose tuna kara norupandu kweyi Karunga gwetu Jehova a likida elididimiko kwetu!—Rom. 2:4.

2. Momaukaro musinke nampo nayi tu digopera kukara nelididimiko?

² Nampili ngomu atu yi hafere apa wopeke ava likida edidimiko, nye nyamwetu nampo kuvhura yi tu karere udigu kulikida edidimiko. Pasihonena, kuvhura nampo yi tu digopere kulididimikira nsene ose kuna kara momukweyo gomure, unene po nsene asi tuna hulilire kurugana yuma yongandi. Nampo kuvhura tu handuke unene apa wopeke ava tu handukisa. Ntani poyiruwo yimwe kuvhura yi tu digopere kundindira uzuni woupe ou ga tumbwidira Jehova. Ono hara kukara nedidimiko lyenene ndi? Mosirongwa esi ta tu ka zogera eyi ali tanta edidimiko ntani neyi sikara esi sa karera nomulyo. Natu ka tarurura hena eyi nayi tu vatera tu kare nedidimiko lyenene.

3. Yisinke a rugana muntu ogu ga kara nedidimiko apa vantu wopeke ava mu handukisa?

³ Tu tareni ko nonkedi ne omu natu likida edidimiko. Zokuhova, muntu ogu ga kara nedidimiko kapi a handuka usimbu. Age kuhetekera ko kukara ana litura ntani noku nyokera po kukara nonkoko apa wopeke ava mu handukisa ndi apa a kara nosinka. Nkango “kapi a handuka usimbu,” pomuhowo kwa monekere moBibeli apa Jehova va mu fatwilire asi age “Karunga gonkenda, mutjima gwendi muwa, age kapi a handuka usimbu ano eharo lyendi lyanarunye ntani age nkenye apa kusikisa mo nonkango dendi.”—Ex. 34:6.

4. Monkedi musinke omu muntu ogu ga kara nedidimiko a ndindire yuma yongandi?

 ⁴ Zauvali, muntu ogu ga kara nedidimiko kuvhura kundindira age ana litura. Nsene yimwe yigusa siruwo kupitakana omu ana yi ndindire, age kunyokera po kuhanduka usimbu. (Mat. 18:26, 27) Pwa kara maukaro gomanzi omu twa hepa kulikida elididimiko ndi kundindira noku kara tuna litura. Pasihonena, twa hepa kupurakena nelididimiko nsene gumwe kuna kuuyunga ose twa hana kumudonganesa. (Joba 36:2) Twa hepa hena edidimiko apa atu vatere murongwa goBibeli a kwate egano marongo gomoBibeli ndi a nyokere po nkareso zondona.

5. Monkedi musinke hena zimwe natu likida edidimiko?

⁵ Zautatu, muntu ogu ga kara nedidimiko kapi a genderere kurugana yininke ga hana kugazadara ko. Momaukaro gamwe, twa hepa kurugana yininke mongenderera. Nye nampili ngoso, apa muntu ogu ga kara nedidimiko a kara nosirugana somulyo esi na vhura kusikisa mo, age kuhetekera ko yipo a dire ku si genderesa moku si sikisamo. Nye mevango lyoyo, age kudivilisa asi ana kara nosiruwo sosinzi yipo a li wapayikire eyi na rugana. Makura age kuruganesa siruwo oso yipo a sikise mo situmbukira oso.

6. Yisinke a rugana muntu ogu ga kara nedidimiko apa a ligwanekere nomaudigu?

⁶ Zaune, muntu ogu ga kara nedidimiko kuhetekera ko kulididimikira maudigu ga hana kusivana. Nye nampili ngoso, ayo kapisi epuko kutantera ko kaume gwetu gomunene kuhamena omu tuna kulizuvha kuhamena udigu ou tuna kuligwanekera nawo. Nye nampili ngoso, muntu ogu ga kara nelididimiko, nga twikira kurugana paapa ga hulira yipo a twikire kulididimika ntani noku twikira kukarera Jehova noruhafo. (Koros. 1:11) NgoVakriste, twa hepa kulikida elididimiko mononkedi nadinye edi. Morwasinke? Tu zeni tu ka zogere ko nokonda dongandi.

7. Kuliza naJakopo 5:7, 8, morwasinke edidimiko lyakarera nomulyo unene? (Tara hena efano.)

⁷ Elididimiko mulyo unene mokuninka asi nga tu ka gwane mwenyo gwanarunye. Ngwendi  moomu tupu va yi rugene vakareli vaJehova wovalimburukwi womosiruwo sanare, twa hepa kundindira nelididimiko yipo Karunga nga ka sikise mo matumbwidiro gendi. (Heb. 6:11, 12) Bibeli kuhetakanesa ukaro wetu komunandima. (Resa Jakopo 5:7, 8.) Munandima kurugana unene yipo a kune nokutekera yimeno yendi. Nye age kapi ga diva nawa-nawa asi siruwo musinke ngayi kura. Yipo nye, munandima kundindira nedidimiko ntani nokukara nehuguvaro asi nga zangura. Mokulifana, twa hepa kulitura mo unene moyirugana yopampepo, nampili ngomu twa dira ‘kudiva ezuva eli nga wiza Hompa gwetu.’ (Mat. 24:42) Twa hepa kundindira nelididimiko noku kara nehuguvaro asi Jehova nga sikisa mo nayinye eyi ga tumbwidira posiruwo souhunga esi ga tura po. Nsene tu dira kukara nelididimiko, ose kuvhura ngatu tameke kulizuvha asi ose kuna kundindira siruwo sosire ntani noku siga Jehova kanunu-kanunu. Ntani kuvhura tu ya tameke kudemenena koyininke eyi natu gazara asi kuvhura yi tu hafese ngesi. Nye nsene tu didimika dogoro kouhura, ose ngatu ka gwana eparu.—Mika 7:7; Mat. 24:13.

8. Ngapi omu elididimiko ali tu vatere tu kare nelikwatakano lyewa kumwe novakwetu? (Vakorosi 3:12, 13)

⁸ Twa hepa elididimiko mokuninka asi tu kare nelikwatakano lyewa kumwe novakwetu. Alyo kutuvatera tu purakene nelituromo apa vakwetu ava uyunga. (Jak. 1:19) Elididimiko kutuvatera hena tu kare nombili kumwe nava wopeke. Alyo kutuvatera tu dire kugenderera kuuyunga ndi tu uyunge yuma apa atu kara nosinka. Ntani nsene tu kara nedidimiko, ose kapi ngatu genderera kuhanduka apa gumwe ngatu koresa. Mevango lyokutengwida nkoko, twa hepa ‘kutwikira kulididimikira-didimikira nokulidongwenena-dongwenena po nomutjima nagunye nsene wopeke vana tu zonene.’—Resa Vakorosi 3:12, 13.

9. Ngapi omu edidimiko ali tu vatere apa atu tura po matokoro? (Yisewe 21:5)

⁹ Elididimiko kuvhura hena kutuvatera tu ture po matokoro gomawa. Mevango lyokugenderera kutura po matokoro, ose ngatu ruganesa siruwo setu yipo tu rugane epaparo ntani nokutara asi etokoro musinke lyewa eli natu vhura kutura po. (Resa Yisewe 21:5.) Pasihonena, nsene asi ose kuna kupapara yirugana, nampo kuvhura tupu tu tambure sirugana sokuhova esi nasi moneka, nampili yi kare asi sirugana oso nga si donganesa ukareli wetu. Nye nampili ngoso, nsene tu lididimika ose ngatu ruganesa siruwo setu yipo tu gazadare ko kevango oku nga si karera sirugana oso nonovili edi nga si vhura kugusa ntani nomu nga si kundama epata lyetu nelikwatakano lyetu naJehova. Apa atu kara nedidimiko, ose kuvhura kunyokera po kutura po etokoro lyedona.

10. Yisinke na rugana Mukriste yipo a kare nosikara sedidimiko ntani noku twikira kukara naso?

¹⁰ Kanderera kwaJehova yipo o kare nedidimiko lyenene. Edidimiko kuna kara sikara simwe soyiyimwa yompepo zokupongoka. (Gar. 5:22, 23) Yipo nye, kanderera yipo o gwane mpepo zokupongoka ntani pura Jehova yipo a ku vatere o tunge po sikara esi. Nsene kuna kuligwanekera noukaro ou una kuheteka edidimiko lyetu, twa hepa ‘kutwikira kuhundira’ mpepo zokupongoka yipo zi tu vatere tu kare nedidimiko. (Ruk. 11:9, 13) Ose kuvhura tu pure hena Jehova yipo a tu vatere tu tare yininke ngwendi moomu a yi tara age. Ano konyima zokukanderera, twa hepa kurugana paapa twa hulira yipo tu kare nedidimiko nkenye ezuva. Moomu tuna kukanderera unene ntani nokukondja yipo tu kare nedidimiko, yimo hena ngatu likida momunene sikara esi sedidimiko meparu lyetu.

11-12. Ngapi omu Jehova ga likida elididimiko?

¹¹ Teda ko koyihonena yomoBibeli. MoBibeli kwa kara mo yihonena yoyinzi yovantu ava va kere nelididimiko. Pokuteda ko koyihonena yangoso, ose kuvhura kudiva nonkedi omu natu vhura kulikida elididimiko. Komeho tu ka zogere  yihonena yimwe, pomuhowo tu tareni sihonena sosinene po saJehova, kuhamena omu a likida elididimiko.

¹² Mosikunino saEdeni, Satana kwa swawire edina lyaJehova, pokuninkisa Eva a kare nomasinganyeko asi Jehova kapisi Karunga gomuwa ntani asi age kapisi Mupangeli geharo. Mevango lyokuninka asi Jehova a zonagure po poopo muswauli ogu, age kwa tokwere kulikida elididimiko ntani nelipangero morwa gayi divire asi ayo ngayi gusa siruwo mokuyilikida asi upangeli wendi yiwo wouwa po. Ntani ngomu ana kundindira siruwo oso, age kulididimikira maswauro nagenye aga va retera edina lyendi. Mokugwedera ko, Jehova kwa ndindira nelididimiko yipo vantu wovanzi va gwane mpito zo kuka gwana mwenyo gwanarunye. (2 Pet. 3:9, 15) Ngoyitundwamo, vantu mamiliyona kwa ya mu diva. Nsene tu teda ko komauwa aga ali reta edidimiko lyaJehova, ayo ngayi tu karera ureru mokundindira siruwo apa nga reta ehagero lyouzuni ou.

13. Ngapi omu Jesus ga honenene nawa-nawa elididimiko lyoGuhwe? (Tara hena efano.)

¹³ Jesus kuhonena nawa-nawa elididimiko lyoGuhwe ntani age kwa likidire sikara esi apa ga ya kere pevhu. Ayo nampo kapi ya mu karerere ureru nkenye apa mokulikida elididimiko unene po kovalirongi womatjangwa ntani noVafalisayi ava ngava linenepeke. (Joh. 8:25-27) Nye nampili ngoso, ngwendi moomu tupu va kara oGuhwe, Jesus kapi nga handuka usimbu. Age kapi nga tengwida kuwoko apa ngava mu swaura ndi apa ngava mu handukisa. (1 Pet. 2:23) Jesus kwa lididimikilire maudigu ga hana kusivana. Yipo nye, ose kuvhura tu dimburure eyi Bibeli azi tu tantere asi “Gazadareni ko kosihonena sogu ga lididimikilire maswauro govantu”! (Heb. 12:2, 3) Nevatero lyaJehova, nose kuvhura tu kare nelididimiko pokulididimikira nkenye maudigu.

14. Yisinke natu lirongera ko kelididimiko lyaAbirahamu? (Tara hena efano.)

 ¹⁴ Ngapi nsene asi ehuguvaro lyetu lyokuhamena uhura wouzuni ou kapi lya sika mo? Vamwe vetu nampo kwa ndindilire asi uhura wouzuni ou ngano wa wizire tupu nomvhura dononzi dina ka pita, ano ngesi ose nampo tuna kara nosinka asi kuvhura ngatu fe ose twa hana kumona uhura wouzuni ou. Yisinke nayi tu vatera tu ndindire nelididimiko? Tu tareni sihonena saAbirahamu. Apa Abirahamu ga kere nonomvhura 75 age ga hana kureta nampili munona gumwe, Jehova kwa mu tumbwidilire asi: “Ame ngani ninka ruvharo roge ru kare muhoko gomunene.” (Gen. 12:1-4) Ngoso Abirahamu ga mwene omu etumbwidiro eli lina kusikilira mo ndi? Age kapi ga li mwene omu lyasikiliremo nalinye. Konyima zokutaguruka mukuro gwaEfurata ntani noku ndindira nomvhura 25, Abirahamu ga ya mwene ehampuruko lyopasitetu lyamunendi gomumati Isaka ntani ga mwene konyima zonomvhura 60 apa va hampurukire vatekuru vendi, Esau naJakopo. (Resa Vahebeli 6:15.) Nye Abirahamu kapi ga mwene omu ruvharo rwendi rwa vhukire ru kare muhoko gomunene ntani noku gusa Sirongo sEtumbwidiro. Nye nampili ngoso mugara ogu gomulimburukwi kwa kere nelikwatakano lyenene kumwe noMusiti. (Jak. 2:23) Ntani apa Abirahamu ngava ka mu vhumbura, age nga ka hafa sili pokukadiva asi epuro lyendi ntani nelididimiko lyendi kwa ninkisa nomuhoko nadinye depevhu va di tungike! (Gen. 22:18) Sirongwa musinke tuna kulirongera ko? Ose nampo kuvhura tu dire kumona ngesi matumbwidiro nagenye gaJehova omu gana kusikilira mo. Nye nampili ngoso, nsene tu kara nelididimiko ngwendi Abirahamu, ose kuvhura kukara nehuguvaro asi Jehova nga tu futa ngesi ntani unene po komeho mouzuni wendi woupe ou ga tumbwidira.—Mar. 10:29, 30.

15. Yisinke natu vhura kukona-kona pelirongo lyanyamwetu lyoBibeli?

 ¹⁵ MoBibeli kwa kara mo hena yihonena yoyinzi yovantu ava va kere nedidimiko. (Jak. 5:10) Ayo nayi wapa nsene o kona-kona yihonena oyo. b Pasihonena, nampili ngomu Ndafita va mu gwavekere apa ga kere munona, yipo a ya kare hompa gokomeho gwaIsraeli, age ga hepere kundindira nomvhura dononzi komeho a ya kare hompa. Simiyoni naAna kwa karerere Jehova noulimbuukwi ngomu va ndindilire Mesiyasa getumbwidiro. (Ruk. 2:25, 36-38) Ngomu ono kulironga yihorokwa oyo, papara malimbururo komapuro aga gana kukwama ko: Yisinke nampo ya vaterere muntu ogu yipo a likide edidimiko? Ngapi omu ga gwanenemo uwa pokukara nedidimiko? Ngapi omu nani mu honena? Ove kuvhura hena nampo o gwanene mo uwa pokulironga kuhamena vantu ava va dilire kulikida edidimiko. (1 Sam. 13:8-14) Ove nampo kuvhura o lipure asi: ‘Yisinke ya va ninkisire va dire kukara nedidimiko? Yitundwamo musinke yoyidona va li gwanekerere nayo?’

16. Mauwa musinke gamwe atu gwanene mo pokukara nedidimiko?

¹⁶ Koneka mauwa aga atu gwanene mo pokukara nedidimiko. Apa atu kara nedidimiko, ose kuhafa ntani kukara tuna litura. Yipo nye, edidimiko kutuvatera tu kare noukanguki wouwa panandunge ntani parutu. Apa atu kara nedidimiko novantu wopeke, ose kuhafera elikwatakano lyewa kumwe nawo. Mbungakriste zetu nga zi kara mouumwe wounene. Ano nsene gumwe a tu handukisa ntani nsene tu dira kuhanduka usimbu, ayo nga yi ninkisa ukaro owo u dire kudida unene. (Epis. 37:8; Yis. 14:29) Nye unene po apa atu kara nedidimiko, ose kuhonena Guhyetu gemeguru ntani kumuhedera unene pepi.

17. Yisinke twa hepa kutokomena kurugana?

¹⁷ Yosili edidimiko kuna kara sikara sosiwa esi asi tu retere mauwa natuvenye! Nampili ngomu ayi dili kutukarera nkenye apa ureru mokukara nedidimiko, nevatero lyaJehova, ose kuvhura kutwikira kutunga po sikara esi. Ntani ngomu tuna kundindira uzuni woupe nedidimiko, ose kuvhura kukara nehuguvaro asi ‘HOMPA kutara eho ava ava mu tjira, ava ava ndindire eharo lyendi lyanarunye.’ (Epis. 33:18) Ngano natuvenye tu tokomeneni kutwikira kukara nedidimiko.