1. Ino nceebonshi mulibasuni bantu bakalika moyo?

 SOONSE tulibasuni bantu bakalika moyo. Ino nceebonshi? Tulabalemeka bantu beenga balindila cintu cimwi kwakubula kukalala. Tulalumba ceebo cakwaamba ayi bamwi balatukalikila moyo na twaciita shilubo. Alimwi tulabalumba abo bakalinga kutwiisha Baibo mukwiinga bakatukalikila moyo ndyetwakalinga kweelesha kwiiya, kusumina, na kukonkela njiisho imwi yamu Baibo. Alimwi ciinditeewo, tulalumba abuumbi mukwiinga Yehova Lesa alatukalikila moyo!​—Loma. 2:4.

2. Ino mbukaalo nshi ndyeenga catubeta ciyumu kukalika moyo?

² Nabi kwaamba ayi tulibasuni bantu bakalika moyo, mpashi swebo teshi lyoonse ndyecitubeta cuubu kukalika moyo. Kucakubonenaako, mpashi inga catuyumina kukalika moyo ndyetwiimfwi mumulaini kulindila shintu shimwi, bunene bunene na kuli nkotutoocicila. Mpashi inga twakalala abuumbi na bamwi batukalasha. Alimwi cimwi ciindi, inga catuyumina kulindila cishi cipya Yehova ncaakatushomesha. Sa inga mwasuna kunookalika moyo abuumbi? Mumutwi uyu, tutokwiiya mbweenga twatondesha kukalika moyo ancociyandikila kucita boobo. Alimwi tutokwiiya asheenga shatucafwa kwaamba ayi tunookalika moyo abuumbi.

3. Ino muntu ukalika moyo alacita buyani na wakalashikwa?

³ Amuleke tubandike panshila shili 4 mbweenga twatondesha kukalika moyo. Nshila yakutaanguna, muntu ukalika moyo ngumuntu utafwambaani kukalala.  Aleelesha kulicata akuleya kuboosha cibiibi pa cibiibi na wakalashikwa nabi na walisukama. Ciindi cakutaanguna maswi akwaamba ayi ‘utafwaambani kukalala’ ndyaakalembwa mu Baibo, nciindi Baibo ndyeyaamba pali Yehova ayi ‘ngu Lesa uswite nkuumbu alimwi ulekelela, utafwambaani kukalala, uswite lusuno lutamani alimwi ushomeka.’​—Kulo. 34:6.

4. Ino muntu ukalika moyo alacita buyani na kuli cintu cimwi ncaatolindila?

⁴ Nshila yabili, muntu ukalika moyo inga walindila cintu cimwi  kwakubula kucimwa. Na cintu ncaatolindila cacelwa kushika, muntu ukalika moyo alaleya kucimwa na kukalala. (Mate. 18:26, 27) Kuli bukaalo bupusenepusene ndyeenga twayandika kulindila cakukalika moyo. Kucakubonenaako, tulyeelete kukutika cakukalika moyo umwi ndyaatokwaamba, kwakubula kumunjila mukanwa. (Jobo 36:2) Alimwi inga twayandika kukalika moyo ndyetutocafwa shikwiiya Baibo kunyumfwishisha njiisho imwi yamu Baibo na kucileka cilabo cimwi citabete kabotu.

5. Ino ninshila nshi aimwi mbweenga twatondesha kukalika moyo?

⁵ Nshila yatatu, muntu ukalika moyo taaingani kucita shintu. Kwalo, cimwi ciindi inga twayandika kucita shintu cakufwambaana. Nacibi boobo, na kuli ncito imwi iyandika njaaelete kukumanisha, muntu ukalika moyo aleelesha kuteengana kwiitalika na kwiimanisha. Muciindi cakucita boobo, alashinisha kwaamba ayi waba aciindi cikwene cakuyeeya mbweshi akumanishe ncito iyo. Lyalo alatalika kusebensa ncito iyo camoyonteeka.

6. Ino muntu ukalika moyo alacita buyani ndyaatokwiinda mumeelesho na mumapensho?

⁶ Nshila yane, muntu ukalika moyo aleelesha kuliyumya ndyaatokwiinda mumapensho, kwakubula kutongooka. Mubukaalo ubu, kukalika moyo kuleendelana akuliyumya. Kwalo, teshi cibiibi kulwiitaako shicibusa ngotunyumfwanaakwe, mbotutolinyumfwa palipenshi ndyetutokwiindaamo. Nacibi boobo, muntu ukalika moyo alacita nsheenga wacikonsha kwaamba ayi atolelele kuliyumya, akutolelela kusebensela Yehova calusangalalo. (Kolo. 1:11) Bantu bakwe Yehova balyeelete kutondesha kukalika moyo munshila shoonse ishi nshetwabandikaawo. Ino nceebonshi? Amuleke tubandike pasheebo shimwi shiniini.

7. Kweelana a Jemusi 5:7, 8, ino nceebonshi kukalika moyo kulayandika abuumbi? (Amubone acikope.)

⁷ Kukalika moyo kulayandika kwaamba ayi tukapuluke. Bweenka mbuli basebenshi bakwe Lesa bashomeka bakale kale, tulayandika  kulindila cakukalika moyo, kwaamba ayi Lesa akumanishe shishomesho shakwe. (Ebu. 6:11, 12) Baibo ilatukoshanisha ku mulimi. (Amubelenge Jemusi 5:7, 8.) Mulimi alasebensa cankusu kushanga akutilila shishango shakwe, sombi taashibiiwo ndyeshi shikakomene. Aboobo mulimi alalindila cakukalika moyo, akushoma kwaamba ayi alaakutebula. Aswebo tulatolelela kubikila maano kukucita shintu shakumushimu, nabi kwaamba ayi ‘tatucishiwo bushiku Mwaami wesu ndyeshi akese.’ (Mate. 24:42) Tulalindila cakukalika moyo, katushomete cakutatoonsha kwaamba ayi paciindi ceelete, Yehova alaakukumanisha shoonse nshaakatushomesha. Na twaalilwa kukalika moyo, inga twalema kulindila akutalika kuswa kuli Yehova paniini paniini. Alimwi inga twatalika kubikila maano kushintu nshotuyeeya ayi inga shatupa kusangalala pacecino ciindi. Sombi na katukalika moyo, inga twatolelela kuliyumya kushikila kumamanino akupulushikwa.​—Mika 7:7; Mate. 24:13.

8. Ino kukalika moyo kulatucafwa buyani kwaamba ayi tube abushicibusa bubotu abamwi? (Bene Kolose 3:12, 13)

⁸ Kukalika moyo kulatucafwa kwaamba ayi tube abushicibusa bubotu abamwi. Kulatucafwa kukutika cakubikila maano bamwi ndyebatokwaamba. (Jemu. 1:19) Alimwi kukalika moyo kulayuminisha luumuno. Kulatucafwa kuleya kucita shintu cakwiingana na kwaamba maswi atabete kabotu ndyetwalisukama. Alimwi na katukalika moyo, teshi tukafwambaane kukalala na umwi watukalasha. Muciindi cakuboosha cibiibi pacibiibi, ‘tulaakutolelela kunyumfwilana nkumbu akulekelelana camoyo woonse.’​—Amubelenge Bene Kolose 3:12, 13.

9. Ino kukalika moyo kulatucafwa buyani ndyetutosalawo shakucita? (Tushimpi 21:5)

⁹ Kwiilikaawo, kukalika moyo inga kwatucafwa kunoosala kabotu shakucita. Muciindi cakwiingana kusalawo shakucita, tulaakucana ciindi cakulangoola makani akuyeeya pasheesho nshetusuni kucita. (Amubelenge Tushimpi 21:5.) Kucakubonenaako, na tutoolangoola ncito, mpashi inga twasumina kunjila ncito ili yoonse njeenga twacaana, nabi kwaamba ayi incito iyo inanoopa kwaamba ayi cimwi ciindi tunoolofwa kumabungano na kutanokwaabanamo lubasu lyoonse muncito yakushimikila. Nacibi boobo, na katukalika moyo, tulaakutaanguna kuyeeya mushinso ngweshi tunokweenda kuya kuncito, mawoola ngeshi tunooyandika kusebensa, alimwi a nciito iyo mbweshi ikakume mukwashi wesu abushicibusa bwesu a Yehova. Na katukalika moyo, inga twaleya kusala kucita shintu shitabete kabotu.

10. Ino Mwineklistu inga wacita buyani kwaamba ayi abe amubo wakukalika moyo akutolelela kutondesha mubo uyu?

¹⁰ Amupaile kwaamba ayi mwiiye kunookalika moyo abuumbi. Kukalika moyo ndubasu lwa shisepo shamushimu usalashi. (Gala. 5:22, 23) Aboobo inga twapaila kuli Yehova kumusenga mushimu usalashi, akumusenga kwaamba ayi atucaafwe kuba ashisepo shamushimu. Na twalicana mubukaalo bweenga bwapa kwaamba ayi citubete ciyumu kukalika moyo, tulyeelete kutolelela kusenga mushimu usalashi kwaamba ayi utucaafwe kukalika moyo. (Luka 11:9, 13) Alimwi inga twasenga Yehova kwaamba ayi atucaafwe kunoobona shintu bweenka mbwaashibona. Lyalo pesule lyakupaila, tulyeelete kucita nsheenga twacikonsha kunookalika moyo bushiku abushiku. Na twatolelela kupaila kwaamba ayi tube bantu bakalika moyo, akweelesha kutondesha mubo uyu, Yehova alaakutucafwa kuba bantu bakalika moyo abuumbi, nabi kwaamba ayi pakutaanguna twakalinga muntu utakaliki moyo.

11-12. Ino Yehova watolelela buyani kukalika moyo?

¹¹ Amukutumane kuyeeya pashakubonenaako shamu Baibo. Mu Baibo muli shakubonenaako shiinji sha bantu bakalinga kukalika moyo. Kukutumana kuyeeya pashakubonenaako isho, inga kwatucafwa kushiba nshila mbweenga twatondesha kukalika moyo. Katutana kubandika pashakubonenaako  shimwi sha bantu bakalinga kukalika moyo, amuleke tutaangune kubandika pacakubonenaako ciinditeewo cakukalika moyo, cakwe Yehova.

¹² Mumuunda wa Edeni, Satana wakasebanya liina lyakwe Yehova akubisha mpuwo yakwe, kwiinda mukweelesha kupa Efa kutoonsha na Yehova ngumweendeleshi uli kabotu alimwi ucite lusuno. Muciindi cakucaya Satana peenkapo, Yehova wakakalika moyo a kulicata, mukwiinga wakalinga kucishi ayi palaakwiinda ciindi kwaamba ayi atondeshe ayi bweendeleshi bwakwe mbobwiinditeewo. Alimwi ndyaatolindila, watolelela kuliyumya kububeshi boonse bwaambwa pa liina lyakwe. Kwiilikaawo, Yehova atoolindila cakukalika moyo, kwaamba ayi bantu baanji bakabe acoolwe cakuba abuumi butamaani. (2 Pit. 3:9, 15) Aboobo bantu baanji bamushiba. Na twabikila maano ku shibotu shitooswaamo mukukalika moyo kwakwe Yehova, cilaakutubeta cuubu kulindila ciindi ndyeshi akalete mamanino acishi cino.

13. Ino Yesu wakacikonkela buyani cakubonenaako ca Baishi cakukalika moyo? (Amubone acikope.)

¹³ Yesu wakakonkela cakumaninina cakubonenaako ca Baishi cakukalika moyo, alimwi wakatondesha mubo uyu ndyaakalinga pacishi capanshi. Cilyeelete teshi lyoonse ndyecakalinga kumubeta cuubu kukalika moyo, bunene bunene ku balembi aku baFalisi abo bakalinga kwaamba shipusene anshobakalinga kucita. (Joni 8:25-27) Nacibi boobo, bweenka mbuli Baishi, Yesu taakalinga kufwambaana kukalala. Alimwi taakalinga kuboosha cibiibi pa cibiibi na bamucobola nabi kumukalasha. (1 Pit. 2:23) Yesu wakaliyumya cakukalika moyo ndyaakalinga kwiinda mumapensho, kwakubula kutongooka. Nceceeco Baibo ncoitulwiitila ayi “amuyeeye mbwaakapenshekwa abuumbi, ceebo ca lupato lunene abuumbi lwa bamucita shibiibi”! (Ebu. 12:2, 3, NWT) Aswebo Yehova inga watucafwa kuliyumya cakukalika moyo, ndyetutokwiinda mubweelesho buli boonse.

14. Ino nshiinshi nsheenga tweeya kuswa kucakubonenaako cakwe Abulaamu cakukalika moyo? (Bene Ebulu 6:15) (Amubone acikope.)

 ¹⁴ Ino mbuyani na nshetwalinga kulangila pamakani amamanino acishi cino tashina kukumanishikwa? Sobamwi mpashi twakalinga kulangila ayi mamanino nakwiinga akesabo kale kale. Mpashi tulalisukama ayi teshi tukaboneeko ndyeshi akese. Ino nciinshi ceenga catucafwa kutolelela kulindila cakukalika moyo? Amuyeeye pacakubonenaako cakwe Abulaamu. Abulaamu ndyaakalinga kucite myaaka 75, katacitewo nabi mwaana, Yehova wakamushomesha ayi: “Ndaakulengesha ayi bamulunyungu lwako bakafuule.” (Mata. 12:1-4) Sa Abulaamu wakabonaako kukumanishikwa kwa cishomesho ici? Teshi shoonse nshaakabona kashikumanishikwa. Pesule lyakusubuka Mulonga wa Yufuletisi akulindilaako kwamyaaka 25, Abulaamu wakabona cankaamiko Isaki mwanaakwe ndyaakashalwa. Alimwi ndyepakeenda myaaka 60, wakabona Esau a Jakobo beshikulu bakwe ndyebakashalwa. (Amubelenge Bene Ebulu 6:15) Sombi Abulaamu taakwe kubonaako bamulunyungu lwakwe ndyebakaba mushobo unene, akupyana Cishi Cakashomeshekwa. Nacibi boobo, musankwa uyu ushomeka wakalinga kucite bushicibusa buyumu a Mulengi wakwe. (Jemu. 2:23) Alimwi na Abulaamu akabushikwe, alaakusangalala abuumbi kushiba ayi ceebo calushomo akukalika moyo kwakwe, mishobo yoonse yapacishi yakatambula shoolwe! (Mata. 22:18) Ino nciinshi ncetutokwiiyawo? Mpashi teshi shintu shoonse Yehova nshaakatushomesha, nsheenga twaboona kashikumanishikwa pacecino ciindi. Nacibi boobo, na katukalika moyo bweenka mbuli Abulaamu, inga twashooma ayi Yehova alaakutupa shoolwe pacecino ciindi alimwi ayi alaakutupa shoolwe shiinji mucishi cipya ncaakatushomesha.​—Maako 10:29, 30.

15. Ino nshiinshi nsheenga tweeya paciiyo capalweesu?

 ¹⁵ Mu Baibo muli shakubonenaako ashimwi shiinji shabantu bakalinga kukalika moyo. (Jemu. 5:10) Inga cabota na mwacaana ciindi cakwiiya pashakubonenaako isho. b Kucakubonenaako, nabi kwaamba ayi Defedi wakalinga mwanike ndyaakananikwa kuba mwaami wa bene Isilaeli, wakalinga kweelete kulindila kwamyaaka iinji kwaamba ayi atalike kweendelesha mbuli mwaami. Simyoni alimwi Ana bakalinga kulambila Yehova cakushomeka, ndyebakalinga kulindila kubona Mesiya wakashomeshekwa. (Luka 2:25, 36-38) Ndyemutokwiiya pashakubonenaako ishi, amucane shikumbulo kumiipusho itokonkelaawo: Ino nciinshi cakacafwa muntu uyu kukalika moyo? Ino kukalika moyo kwakamucafwa buyani? Ino cakubonenaako cakwe inga ndacikonkela buyani? Alimwi kwiiya shakubonenaako shabaabo bakaalilwa kukalika moyo, inga kwamucafwa. (1 Samwe. 13:8-14) Inga mwaliipusha ayi: ‘Ino nciinshi cakapa kwaamba ayi baalilwe kukalika moyo? Ino nshibiibi nshi shakabacitikila ceebo cakwaalilwa kukalika moyo?’

16. Ino nshibotu nshi shimwi shiswaamo na katukalika moyo?

¹⁶ Amuyeeye pashibotu shiswaamo na kamukalika moyo. Na katukalika moyo, tulaakuba basangalete alimwi teshi tunoolisukama bunene. Aboobo kukalika moyo inga kwatucafwa kunooyeeya kabotu akuba abuumi buli kabotu. Na katubakalikila moyo bamwi, tulaba abushicibusa bubotu ambabo. Libungano lilaba licatene abuumbi. Na umwi watukalasha, kutafwambaana kukalala inga kwatucafwa kuleya kupa kwaamba ayi shintu shibicileeko. (Kulu. 37:8; Tus. 14:29) Sombi ciyandika abuumbi, na katukalika moyo tulakonkela cakubonenaako cakwe Ishiwesu wakwiculu akuba abushicibusa buyumu anguwe.

17. Ino nciinshi ncotweelete kuba bashinishite kucita?

¹⁷ Ncakutatoonsha kwaamba ayi kukalika moyo ngumubo ubotu utucafwa soonse! Nabi kwaamba ayi teshi lyoonse ndyeenga catubeta cuubu kukalika moyo, kwiinda mulucafwo lwakwe Yehova, inga twatolelela kwiiya kutondesha mubo uyu. Alimwi ndyetutolindila cakukalika moyo kusa kwa cishi cipya, inga twashoma cakutatonsha kwaamba ayi ‘meenso akwe Yehova ali pa baabo bamulemeka, abo balindila lusuno lwakwe lutamaani.’ (Kulu. 33:18) Soonse atube bashinishite kutolelela kulifwalika kukalika moyo.