1. Aˬ htoꞈ ma te nawˬ yeunˇ hkanˍ ve chaw htaꞈ dawˇ cawˇ ve le?

 Ngaˬ hui teˇ gʼaˇ le le yeunˇ hkanˍ ve chaw htaꞈ dawˇ cawˇ ve yoˬ. Aˬ htoꞈ ma pa taw le? Yeunˇ hkanˍ leh nyi ma maˇ zuhˆ ve chaw htaꞈ ngaˬ hui dawˇ cawˇ ve yoˬ. Leh ngaˬ hui te yaꞈ htaˇ awˬ nu ve chaw ngaˬ hui htaꞈ yeunˇ hkanˍ laˇ ve kaꞈ awˬ bon uiˍ jaˇ ve yoˬ. Chi hkʼoˆ kaꞈ, Liꞈ hpu maˍ ve chaw ngaˬ hui htaꞈ Liꞈ hpu maˍ laˇ htaˇ yeunˇ hkanˍ laˇ ve, leh ngaˬ hui coˇ caˇ leh beˆ maˍ laˇ ve htaꞈ yuˬ yehˇ htaˇ, yeunˇ hkanˍ laˇ ve kaꞈ awˬ bon uiˍ jaˇ ve yoˬ. A yeˇ uiˍ jaˇ ve lehˬ, Yaˬhoˉvaˬ ngaˬ hui htaꞈ yeunˇ hkanˍ ve awˬ bon uiˍ jaˇ!—Roˉmaꞈ 2:4.

2. Ngaˬ hui yeunˇ hkanˍ ve haˍ jaˇ tehꞈ dawˇ ve hkʼaˬ hkʼe htaˇ le?

² Yeunˇ hkanˍ ve chaw htaꞈ ngaˬ hui dawˇ cawˇ ve htawˇ, teˇ pawˆ pawˆ kʼo ngaˬ hui kaꞈ yeunˇ hkanˍ ve cawˬ tuˬ sha ve maˇ heˆ tehꞈ dawˇ ve yoˬ. Tawˇ pa haˉ te kʼo, teˇ kaˬ lo kʼai tuˬ naiˇ jaˇ˗oˬ leh yaꞈ kʼaw hkʼoˆ lo kaˇ maˇ jaˇ ve tehꞈ dawˇ htaˇ, nyi ma gawˬ lehˍ cawˬ tuˬ maˇ sha. Awˬ nu ve chaw ngaˬ hui nyi ma maˇ sha tuˬ te laˇ htaˇ, ngaˬ hui yeunˇ hkanˍ maˇ gʼaˇ˗o leh deˇ hkʼawꞈ gaˇ jaˇ ve yoˬ. Teˇ pawˆ pawˆ kʼo miˬ guiˬ awˬ suhˉ ve awˬ lawn Yaˬhoˉvaˬ ka tiꞈ te taˍ laˇ ve htaꞈ law tuˬ maˇ sha ve yoˬ. Nawˬ chi aꞈ kehˉ yeunˇ hkanˍ ve chaw hpehꞈ gaˇ˗aw laˇ? Yeunˇ hkanˍ ve chaw lehˬ hkʼaˬ hkʼe ve htaꞈ kʼoˆ gaˇ ve leh aˬ htoꞈ ma te a yeˇ uiˍ jaˇ ve le, awˬ lawn chi ve hkʼaw teˇ geh henˇ tuˬ yoˬ. Chi hkʼoˆ kaꞈ, ngaˬ hui hkʼa dehꞈ yeunˇ hkanˍ gʼaˇ tuˬ aˬ htoꞈ ma ga laˇ gʼa ve kaꞈ teˇ geh henˇ tuˬ yoˬ.

3. Shu nyi ma zuhˆ tuˬ te laˇ htaˇ yeunˇ hkanˍ ve chaw lehˬ hkʼaˬ hkʼe hpehꞈ ve le?

³ Ngaˬ hui yeunˇ hkanˍ ve chaw hpehꞈ ve tehꞈ hpeuꞈ maw piˇ tuˬ 4 ceuˬ htaꞈ teˇ geh nyi sheˍ. Awˉ lawˉ teˇ ceuˬ lehˬ yeunˇ hkanˍ ve chaw haˆ maˇ beuꞈ puiˉ. Yawˇ nyi ma maˇ sha htaˇ, awˬ nu ve chaw htaꞈ kʼoˆ ve leh maˇ daꞈ ve maˇ te piˇ. Maˇ heˆ leh a shu teˇ gʼaˇ yawˇ nyi ma zuhˆ tuˬ te piˇ ve kʼo, yawˇ nyi ma gawˬ lehˍ cawˬ tuˬ coˇ caˇ leh yawˇ nyi ma naˬ tuˬ te laˇ ve chaw htaꞈ maˇ te hkʼawꞈ piˇ. Tawˆ kʼai ve liꞈ 34:6 hkʼaw ‘nyi ma haˆ maˇ zuhˆ’ tawˇ hkawˇ chi ve Liꞈ hpu hkʼaw awˉ lawˉ teˇ pawˆ kʼoˆ taˍ ve yoˬ. Chi ve teˇ tawn Yaˬhoˉvaˬ lehˬ “ha kʼaˉ puiˉ leh  awˬ bon te piˇ puiˉ ve Gʼuiˬ sha hpehꞈ leh, nyi ma dawˇ zuhˬ gaˇ zuhˬ ve Gʼuiˬ sha, haꞈ pehnˇ uiˍ leh ka tiꞈ yeˬ ve Gʼuiˬ sha hpehꞈ ve yoˬ.”—Tawˆ kʼai ve 34:6.

4. Yeunˇ hkanˍ ve chaw lehˬ teˇ ceuˬ ceuˬ htaꞈ law chehˇ htaˇ yawˇ hkʼaˬ hkʼe te ve le?

⁴ Nyiˇ ceuˬ teˇ ceuˬ lehˬ, yeunˇ hkanˍ ve chaw nyi ma gawˬ lehˍ cawˬ ve. Yawˇ dawˇ taˍ ve aꞈ kehˉ gʼa law maw jaˇ htaˇ, yawˇ nyi ma maˇ zuhˆ leh maˇ beuꞈ. (Maꞈhtehˍ 18:26, 27) Ngaˬ hui law chehˇ htaˇ nyi ma gawˬ lehˍ cawˬ leh yeunˇ hkanˍ cawˇ ve laiˉ hkʼaˇ cawˬ ve yoˬ. Tawˇ pa haˉ te kʼo, chaw teˇ gʼaˇ ngaˬ hui htaꞈ tawˇ yaw laˇ ve kʼo, coˇ caˇ leh hkʼa dehꞈ na taˍ piˇ cawˇ ve yoˬ. (Yawˇbaˆ 36:2) Liꞈ hpu henˇ ve chaw Liꞈ hpu hkʼaw teˇ lawn lawn htaꞈ hkʼa dehꞈ na gʼa tuˬ ngaˬ hui ga piˇ htaˇ, leh yawˇ te hkʼaˇ dawˇ hkʼaˇ teˇ ceuˬ ceuˬ maˇ daꞈ ve htaꞈ pa tuˬ ngaˬ hui ga piˇ htaˇ kaꞈ gʼa yeunˇ hkanˍ cawˇ ve yoˬ.

5. Ngaˬ hui yeunˇ hkanˍ ve chaw hpehꞈ ve tehꞈ hpeuꞈ maw piˇ tuˬ awˬ nu ve teˇ ceuˬ lehˬ aˬ htoꞈ ma le?

⁵ Shehˆ ceuˬ teˇ ceuˬ lehˬ, yeunˇ hkanˍ ve chaw maˇ dawˇ nyi sheˍ htaˇ laꞈ haˉ maˇ te. Teˇ pawˆ pawˆ kʼo, laꞈ haˉ te ve lehˬ daꞈ ve yoˬ. Yaꞈ hkʼaˇ, a yeˇ uiˍ jaˇ ve awˬ lawn hpehꞈ ve kʼo, yeunˇ hkanˍ ve chaw lehˬ awˬ hkʼaˇ maˇ gu sheˍ htaˇ laꞈ haˉ maˇ te. Yawˇ aˬ htoꞈ ma te tuˬ awˬ hkʼaˇ gu htaˇ awˬ yanˇ yehˇ maw leh kanˉ chi ve htaꞈ yawˇ te htaˇ haˆ haˆ peuˬ tuˬ vaiˇ vaiˇ ve hkʼaw maˇ te.

6. Yeunˇ hkanˍ ve chaw lehˬ yawˇ shoꞈ shaꞈ ve leh tuꞈ ve hkanˍ ve gʼa hpuˇ htaˇ hkʼaˬ hkʼe te ve le?

⁶ Awˇ ceuˬ teˇ ceuˬ lehˬ, yawˇ shoꞈ shaꞈ ve leh tuꞈ ve hkanˍ ve gʼa hpuˇ htaˇ, maˇ hkʼanˇ. Ngaˬ hui shoꞈ shaꞈ ve leh tuꞈ ve hkanˍ ve gʼa hpuˇ htaˇ, ngaˬ hui hkʼaˬ hkʼe dawˇ ve, meuˆ daꞈ ve awˬ chawˇ htaꞈ kʼoˆ maˍ piˇ ve maˇ yaꞈ. Yaꞈ hkʼaˇ, yeunˇ hkanˍ ve chaw lehˬ daꞈ ve hpawˇ coˇ caˇ leh dawˇ nyi ve pa taw, yawˇ shoꞈ shaꞈ ve gʼa hpuˇ ve htawˇ, Yaˬhoˉvaˬ ve kanˉ ha lehˬ ha kʼa ve hkʼaw te gʼa ve yoˬ. (Kawˇlawˇsehˇ 1:11) Ngaˬ hui yeunˇ hkanˍ ve chaw hpehꞈ tuˬ gʼa te cawˇ ve 4 ceuˬ htaꞈ gʼa henˇ˗oˬ ve yoˬ. Ngaˬ hui teˇ gʼaˇ le le Yaˬhoˉvaˬ ve chaw hpehꞈ ve pa taw, chi ve hkʼa peu˗eˬ gʼa te cawˇ ve yoˬ. Chi hkʼe ve ngaˬ hui gʼa te cawˇ ve aˬ htoꞈ ma awˬ hkʼaˇ cawˬ sheˍ ve teˇ geh kʼawꞈ henˇ tuˬ yoˬ.

7. Yaˍkoˆ liꞈ 5:7, 8 hkʼaw kʼoˆ taˍ ve hkʼe, aˬ htoꞈ ma te yeunˇ hkanˍ ve chaw hpehꞈ ve lehˬ a yeˇ uiˍ jaˇ ve le?

⁷ Ngaˬ hui gʼa ponˬ tuˬ yeunˇ hkanˍ ve chaw hpehꞈ ve lehˬ a yeˇ uiˍ jaˇ. Oˇ htaˇ teˇ co˗e Yaˬhoˉvaˬ ve kanˉ te ve chaw law taˍ ve hkʼa shuˍ, Yaˬhoˉvaˬ ka tiꞈ te taˍ laˇ ve awˬ tehˬ hpehꞈ la tuˬ ngaˬ hui kaꞈ gʼa law cawˇ ve yoˬ. (Heˍbrehˇ 6:11, 12) Liꞈ hpu hkʼaw ngaˬ hui lehˬ muiˬ caˇ paˍ htaꞈ tehˆ taˍ ve yoˬ. (Yaˍkoˆ 5:7, 8 gʼaw sheˍ.) Muiˬ caˇ paˍ lehˬ kaiˬ ve hkʼaw ti leh iˉ kaˆ pfuhˍ ve yoˬ. Yawˇ hui ti ve awˬ ceuˬ hkʼaˬ hkʼe htaˇ yeˬ tawˆ la tuˬ maˇ shiˍ ve htawˇ, yawˇ hui awˬ yanˇ cawˇ ve hkʼaw awˬ shiˍ awˬ nu gʼa gʼeuꞈ tuˬ yoˬ tehꞈ yonˍ leh yeunˇ hkanˍ ve yoˬ. Chi ve hkʼa shuˍ shuˍ, chi beuꞈ teˇ co˗e ngaˬ hui kaꞈ Gʼuiˬ sha ve kanˉ kaiˬ ve hkʼaw te leh Hkriꞈ yaˇ ve awˬ vuiˬ te ve yoˬ. ‘Awˬ jawˇ mawˇ hkʼaˬ ve teˇ nyi kʼawꞈ gaˬ la tuˬ ve htaꞈ ngaˬ hui maˇ shiˍ ve’ htawˇ Yaˬhoˉvaˬ yawˇ tinˍ taˍ ve awˬ yanˇ gaˬ kʼo, chi awˬ tehˬ hpehꞈ la tuˬ yoˬ tehꞈ yawˇ ka tiꞈ te taˍ laˇ ve htaꞈ ngaˬ hui yeunˇ hkanˍ leh law taˍ cawˇ ve yoˬ. (Maꞈhtehˍ 24:42) Yaꞈ hkʼaˇ, ngaˬ hui hkʼaˬ hkʼe htaˇ maˇ yeunˇ hkanˍ˗o ve kʼo, Yaˬhoˉvaˬ ka tiꞈ te taˍ laˇ ve htaꞈ maˇ law gaˇ ve yoˬ. Peuˬ leh ngaˬ hui yawˇ geh awˬ meu˗eˇ awˬ meu˗eˇ maˇ meuˆ daꞈ tuˬ yoˬ. Chi teˇ hkui ceh ha lehˬ tuˬ te laˇ gʼa ve awˬ ceuˬ htaꞈ ngaˬ hui gʼaꞈ ca la ve yoˬ. Chi htaꞈ pa taw, ponˬ laˇ ve htaꞈ gʼa tuˬ ngaˬ hui awˬ leh hkʼa gaˬ gʼa yeunˇ hkanˍ ve yoˬ.—Miˆhkaˍ 7:7; Maꞈhtehˍ 24:13.

8. Yeunˇ hkanˍ ve chaw hpehꞈ ve lehˬ ngaˬ hui awˬ nu ve chaw geh cawˇ daꞈ hawˍ daꞈ tuˬ hkʼaˬ hkʼe ga laˇ gʼa ve le? (Kawˇlawˇsehˇ 3:12, 13)

⁸ Yeunˇ hkanˍ ve chaw hpehꞈ ve lehˬ ngaˬ hui awˬ nu ve chaw geh cawˇ daꞈ hawˍ daꞈ tuˬ ga laˇ gʼa ve yoˬ. Chi ve awˬ nu ve chaw tawˇ yaw htaˇ ngaˬ hui hkʼa dehꞈ na taˍ piˇ tuˬ ga laˇ gʼa ve yoˬ. (Yaˍkoˆ 1:19) Chi hkʼoˆ kaꞈ, ngaˬ hui yeunˇ hkanˍ ve chaw hpehꞈ ve kʼo, ngaˬ hui awˬ nu ve chaw geh awˬ chawˇ te gʼa ve yoˬ. Ngaˬ hui nyi ma maˇ sha htaˇ, kʼoˆ ve leh maˇ daꞈ ve awˬ ceuˬ maˇ te. Awˬ nu ve chaw ngaˬ hui nyi ma naˬ tuˬ te laˇ ve htawˇ, laꞈ haˉ maˇ beuꞈ leh maˇ te hkʼawꞈ. Yaꞈ hkʼaˇ, ngaˬ hui “teˇ gʼaˇ leh teˇ gʼaˇ yeunˇ hkanˍ daꞈ˗oꞈ. Teˇ gʼaˇ leh teˇ gʼaˇ venˇ baˆ taˍ daꞈ kuiˬ cawˬ kʼo, venˇ baˆ hpehˇ daꞈ˗oꞈ.”—Kawˇlawˇsehˇ 3:12, 13 gʼaw sheˍ.

9. Yeunˇ hkanˍ ve chaw hpehꞈ ve lehˬ ngaˬ hui dawˇ cheˆ htaˇ hkʼaˬ hkʼe ga laˇ gʼa ve le? (Tawˇ naˉ ve 21:5)

⁹ Yeunˇ hkanˍ ve chaw hpehꞈ ve lehˬ ngaˬ hui hkʼa dehꞈ dawˇ cheˆ gʼa tuˬ ga laˇ ve yoˬ. Ngaˬ hui yeunˇ hkanˍ ve chaw hpehꞈ ve kʼo, ngaˬ hui hkʼa dehꞈ maˇ dawˇ nyi sheˍ htaˇ, haˆ maˇ dawˇ cheˆ. Hkʼaˬ hkʼe dawˇ cheˆ gʼa tuˬ ngaˬ hui awˬ yanˇ yehˇ ve hkʼaw hpfuhˆ nyi leh hkʼa dehꞈ dawˇ nyi sheˍ ve yoˬ. Leh daꞈ jaˇ ve awˬ ceuˬ htaꞈ leuˆ yuˬ tuˬ yoˬ. (Tawˇ naˉ ve 21:5 gʼaw sheˍ.) Tawˇ pa haˉ te kʼo, ngaˬ hui kanˉ ca ve, awˬ nu ve chaw kanˉ te tcuh laˇ tuˬ kʼoˆ laˇ ve, kanˉ chi ve ngaˬ hui hpawnˬ daꞈ kuiˬ lo hkʼa dehꞈ kʼai maˇ gʼa ve, maˇ heˆ leh Gʼuiˬ sha ve kanˉ hkʼa dehꞈ maˇ te gʼa ve kʼo, kanˉ chi ve htaꞈ te tuˬ yoˬ tehꞈ laꞈ haˉ kʼoˆ piˇ tuˬ ve laˇ? Yaꞈ hkʼaˇ, ngaˬ hui yeunˇ hkanˍ ve chaw hpehꞈ ve kʼo, maˇ dawˇ cheˆ sheˍ htaˇ awˉ lawˉ dawˇ nyi sheˍ ve yoˬ. Tawˇ pa haˉ te kʼo, kanˉ chi ve htaꞈ te ve kʼo, ngaˬ hui gʼa kʼai vuiˇ tuˬ ve laˇ? Kanˉ hkʼaˬ nyiˇ naˍ riˍ gʼa te cawˇ ve, dawˇ nyi sheˍ ve yoˬ. Maˇ heˆ leh kanˉ chi ve ngaˬ hui ve yehˬ kʼa htaꞈ heuˆ la kuiˬ hkʼaˬ hkʼe cawˬ ve leh, ngaˬ hui Yaˬhoˉvaˬ geh meuˆ daꞈ ve htaꞈ heuˆ la kuiˬ cawˬ sheˍ ve laˇ tehꞈ, dawˇ nyi sheˍ ve yoˬ. Chi htaꞈ pa taw, ngaˬ hui yeunˇ hkanˍ ve chaw hpehꞈ ve kʼo, chi ngaˬ hui dawˇ cheˆ htaˇ maˇ yaꞈ tuˬ ga laˇ gʼa ve yoˬ.

10. Ngaˬ hui leuˉ leh yeunˇ hkanˍ ve chaw hpehꞈ tuˬ, te hkʼaˇ dawˇ hkʼaˇ chi ve hkʼaˬ hkʼe te hkʼa dehꞈ cawˬ gʼa tuˬ le?

¹⁰ Yeunˇ hkanˍ ve chaw hpehꞈ tuˬ bon lawˬ sheˍ. Yeunˇ hkanˍ ve lehˬ Gʼuiˬ sha ve awˬ ha hpu ve awˬ shiˍ hkʼaw ve teˇ ceuˬ hpehꞈ ve yoˬ. (Gaˍlaˍtiˆ 5:22, 23) Chi htaꞈ pa taw, ngaˬ hui yeunˇ hkanˍ ve chaw hpehꞈ gaˇ ve kʼo, Gʼuiˬ sha ve awˬ ha hpu gʼa tuˬ bon gʼa lawˬ cawˇ ve yoˬ. Ngaˬ hui yeunˇ hkanˍ ve htaꞈ lawˇ nyi laˇ ve gʼa hpuˇ htaˇ, “lawˬ loˬ. Lawˬ kʼo gʼa tuˬ yoˬ.” Leh ngaˬ hui chi hkʼe te ve kʼo Yaˬhoˉvaˬ ga laˇ tuˬ yoˬ. (Luˉkaꞈ 11:9, 13) Yaˬhoˉvaˬ dawˇ ve hkʼe  ngaˬ hui dawˇ tuˬ yawˇ ga laˇ tuˬ bon lawˬ gʼa ve yoˬ. Chi hkʼoˆ kaꞈ, bon lawˬ peuˬ hkʼawꞈ nawˉ teˇ nyi le le ngaˬ hui yeunˇ hkanˍ gʼaˇ tuˬ gʼa coˇ caˇ ve yoˬ. Ngaˬ hui bon lawˬ leh yeunˇ hkanˍ ve tehꞈ hpeuꞈ maw piˇ ve kʼo, ngaˬ hui yeunˇ hkanˍ gʼaˇ tuˬ Yaˬhoˉvaˬ ga laˇ leh chi lehˬ ngaˬ hui hkʼaˬ htaˆ kaꞈ te jaw ve hkʼe hpehꞈ tuˬ yoˬ.

11-12. Yaˬhoˉvaˬ yeunˇ hkanˍ ve tehꞈ hkʼaˬ hkʼe hpeuꞈ maw laˇ ve le?

¹¹ Liꞈ hpu hkʼaw ve awˬ lawn htaꞈ dawˇ nyi sheˍ. Liꞈ hpu hkʼaw yeunˇ hkanˍ gʼaˇ ve laiˉ gʼaˇ ve awˬ lawn cawˬ ve yoˬ. Yawˇ hui ve awˬ lawn htaꞈ caˉ daꞈ ve ngaˬ hui dawˇ nyi htaˇ, ngaˬ hui yeunˇ hkanˍ ve awˬ hkʼaˇ shiˍ la tuˬ yoˬ. Awˬ lawn chi ve teˇ hpaˍ htaꞈ caˉ daꞈ ve ngaˬ hui maˇ gʼa henˇ sheˍ htaˇ, yeunˇ hkanˍ ve awˬ lawn daꞈ jaˇ ve henˇ yuˬ tuˬ hpehꞈ ve Yaˬhoˉvaˬ ve awˬ lawn htaꞈ teˇ geh nyi sheˍ.

¹² Eˍdenˍ hko hkʼaw Saˍtanˍ lehˬ Yaˬhoˉvaˬ htaꞈ she pfuhˍ piˇ leh yawˇ ve awˬ meh luˬ tuˬ kaꞈ te piˇ ve yoˬ. Gʼuiˬ sha lehˬ hteˇ ve cawˇ ve hkʼaw uˉ peunˍ leh chaw yaˇ htaꞈ awˬ tehˬ haꞈ ve laˇ tehꞈ Saˍtanˍ Eˇvaꞈ htaꞈ htawˇ dawˇ nawˬ dawˇ cawˬ tuˬ te piˇ ve yoˬ. Yaꞈ hkʼaˇ, Yaˬhoˉvaˬ Saˍtanˍ htaꞈ laꞈ haˉ te luˬ cawˇ ve htawˇ, yawˇ yeunˇ hkanˍ leh a shu yawˇ awˬ to htaꞈ yuˬ tiˍ sheˍ ve yoˬ. Hkʼe te leh, yawˇ uˉ peunˍ ve daꞈ jaˇ ve htaꞈ chaˬ nyi tuˬ, awˬ yanˇ teh taˍ piˇ ve yoˬ. Awˬ yanˇ chi ve hkʼaw Gʼuiˬ sha htaꞈ she pfuhˍ piˇ ve hkʼaˬ htaˆ kaꞈ gʼa yeunˇ hkanˍ chehˇ sheˍ ve yoˬ. Chi hkʼoˆ kaꞈ, chaw yaˇ co co taiˍ taiˍ ve a shaꞈ htaꞈ gʼa tuˬ, Yaˬhoˉvaˬ yeunˇ hkanˍ chehˇ sheˍ ve yoˬ. (2 Peˍtruˆ 3:9, 15) Chi ve lehˬ laiˉ lanˬ gʼaˇ Yaˬhoˉvaˬ htaꞈ shiˍ la ve yoˬ. Yaˬhoˉvaˬ yeunˇ hkanˍ ve aˬ htoꞈ ma awˬ bon gʼa ve le tehꞈ ngaˬ hui dawˇ nyi ve kʼo, haiˬ ve miˬ guiˬ chi htaꞈ Yaˬhoˉvaˬ te luˬ tuˬ law chehˇ htaˇ, ngaˬ hui yeunˇ hkanˍ gʼaˇ tuˬ yoˬ.

13. Yeˍsuˆ Yaˬhoˉvaˬ yeunˇ hkanˍ ve htaꞈ hkʼaˬ hkʼe te hkʼa dehꞈ henˇ yuˬ gʼa ve le? (Awˬ han htaꞈ nyi sheˍ.)

¹³ Yeˍsuˆ miˬ guiˬ hkʼoˆ lo chehˇ htaˇ, Yaˬhoˉvaˬ yeunˇ hkanˍ ve htaꞈ hkʼa dehꞈ henˇ yuˬ gʼa ve yoˬ. Bon awˬ hoˉ leh Hpaˍriˍsehˇ hui geh Yeˍsuˆ gʼa yeunˇ  hkanˍ jaˇ ve yoˬ hehˉ. (Yoˇhanˬ 8:25-27) Yeˍsuˆ yawˇ ve Awˬ pa hkʼa shuˍ nyi ma haˆ maˇ zuhˆ puiˉ. Shu deˇ piˇ ve maˇ heˆ leh nyi ma zuhˆ tuˬ kʼoˆ piˇ htaˇ, Yeˍsuˆ maˇ kʼoˆ hkʼawꞈ. (1 Peˍtruˆ 2:23) Yeˍsuˆ tuꞈ ve hkanˍ ve htaꞈ kaꞈ yeunˇ hkanˍ leh maˇ hkʼanˇ. ‘Venˇ baˆ yaˇ hui ve laꞈ sheh awˬ hkʼaw lo chi taw taw hkʼa mvuhˇ hkʼa na te leh tawˍ taˍ ve htaꞈ gʼa hkanˍ ve Yeˍsuˆ htaꞈ dawˇ nyi˗o’ tehꞈ Liꞈ hpu hkʼaw ngaˬ hui htaꞈ chi hkʼe kʼoˆ laˇ ve na gʼa ve yoˬ. (Heˍbrehˇ 12:2, 3) Ngaˬ hui kaꞈ hkʼa shuˍ shuˍ, Yaˬhoˉvaˬ htaꞈ ga laˇ tcuh ve kʼo, tuꞈ ve hkanˍ ve aˬ htoꞈ ma gʼa hpuˇ ve htawˇ, yeunˇ hkanˍ gʼaˇ tuˬ yoˬ.

14. Aˍbraˍhanˍ yeunˇ hkanˍ ve awˬ lawn ngaˬ hui htaꞈ aˬ htoꞈ ma maˍ laˇ ve le? (Heˍbrehˇ 6:15) (Awˬ han htaꞈ nyi sheˍ.)

¹⁴ Haiˬ ve miˬ guiˬ chi awˬ leh meuˇ gaˬ la tuˬ ve htaꞈ ngaˬ hui teˇ gʼaˇ le le gʼa mawˬ tuˬ dawˇ law taˍ leh oˇ ve teˇ nyi ngaˬ hui maˇ gʼa mawˬ la ve htaꞈ dawˇ haˍ ve yoˬ. Yaꞈ hkʼaˇ, ngaˬ hui caˉ leh yeunˇ hkanˍ tuˬ aˬ htoꞈ ma ga laˇ gʼa ve le? Aˍbraˍhanˍ ve awˬ lawn htaꞈ dawˇ nyi sheˍ. “Ngaˬ nawˬ htaꞈ awˬ ceuˬ awˬ hkʼaˇ maˇ maˇ piˇ laˇ” tuˬ yoˬ tehꞈ Yaˬhoˉvaˬ Aˍbraˍhanˍ htaꞈ ka tiꞈ te piˇ htaˇ, yawˇ a shaꞈ 75 hkʼawꞈ gaˬ˗oˬ leh yaˇ maˇ cawˬ sheˍ ve yoˬ. (Awˬ hkuiˉ puiˍ 12:1-4) Aˍbraˍhanˍ lehˬ ka tiꞈ chi awˬ tehˬ hpehꞈ la ve htaꞈ gʼa mawˬ˗aw laˇ? Yawˇ hkʼa peu˗eˬ maˇ gʼa mawˬ. Uˉhpaˍraˆ gʼuiˬ ma htaꞈ hkanˍ tawˆ˗e peuˬ hkʼawꞈ nawˉ, yawˇ ve yaˇ paˍ Iˉcaˆ paw la tuˬ ve 25 hkʼawꞈ gʼa law sheˍ ve yoˬ. Leh 60 hkʼawꞈ peuˬ hkʼawꞈ nawˉ yawˇ ve awˬ hawehˍ Iˉsawˇ leh Yaˍkoˆ htaꞈ gʼa mawˬ sheˍ ve yoˬ. (Heˍbrehˇ 6:15 gʼaw sheˍ.) Aˍbraˍhanˍ yawˇ ve awˬ ceuˬ awˬ hkʼaˇ chaw ceuˬ lonˉ hpehꞈ la ve htaꞈ maˇ gʼa mawˬ leh Gʼuiˬ sha ka tiꞈ te taˍ piˇ ve mvuhˇ miˬ hkʼaw yawˇ ve awˬ hawehˍ awˬ haˆ gʼa loꞈ˗e ve htaꞈ kaꞈ yawˇ maˇ gʼa mawˬ ve yoˬ. Yaꞈ hkʼaˇ, Aˍbraˍhanˍ Yaˬhoˉvaˬ geh meuˆ daꞈ ve yoˬ. (Yaˍkoˆ 2:23) Awˬ gʼuˇ suhˍ hpawˇ yawˇ kʼawꞈ teꞈ tu la htaˇ, yawˇ yonˍ yeˬ ve htaꞈ gʼa shiˍ ve ha lehˬ jaˇ leh yawˇ yeunˇ hkanˍ ve htaꞈ pa taw, chaw teˇ ceuˬ le le awˬ bon gʼa ve htaꞈ gʼa shiˍ ve kaꞈ ha lehˬ jaˇ ve yoˬ. (Awˬ hkuiˉ puiˍ 22:18) Ngaˬ hui htaꞈ  aˬ htoꞈ ma maˍ laˇ ve le? Yaˬhoˉvaˬ ka tiꞈ te taˍ ve hkʼa peu˗eˬ awˬ tehˬ hpehꞈ la˗oˬ ve htaꞈ chi teˇ hkui ngaˬ hui maˇ gʼa mawˬ ve yoˬ hehˉ. Yaꞈ hkʼaˇ, ngaˬ hui Aˍbraˍhanˍ hkʼa shuˍ yeunˇ hkanˍ ve kʼo, chi teˇ hkui kaꞈ Yaˬhoˉvaˬ ngaˬ hui htaꞈ laꞈ shawnˍ peꞈ laˇ leh yawˇ ka tiꞈ te taˍ ve miˬ guiˬ awˬ suhˉ hkʼaw kaꞈ laꞈ shawnˍ maˇ maˇ peꞈ laˇ tuˬ yoˬ tehꞈ yonˍ gʼa ve yoˬ.—Maˍkuˆ 10:29, 30.

15. A shu yawˇ hkʼaˇ yawˇ Liꞈ hpu henˇ htaˇ ngaˬ hui aˬ htoꞈ ma awˬ lawn htaꞈ dawˇ nyi cawˇ ve le?

¹⁵ Liꞈ hpu hkʼaw yeunˇ hkanˍ ve laiˉ gʼaˇ ve awˬ lawn cawˬ ve yoˬ. (Yaˍkoˆ 5:10) Aˬ htoꞈ ma te yawˇ hui ve awˬ lawn hpfuhˆ nyi leh maˇ henˇ nyi ve le? b Tawˇ pa haˉ te kʼo, Daˍviˆ a shaꞈ i chehˇ sheˍ htaˇ kaꞈ Iˉsaˍreˍlaˆ chaw ve jawˇ mawˇ te tuˬ leuˆ yuˬ piˇ ve htawˇ, yawˇ jawˇ mawˇ gʼa te tuˬ laiˉ hkʼawꞈ gʼa law sheˍ ve yoˬ. Chi hkʼoˆ kaꞈ, Suˉmonˍ leh Aˍnaˆ ve awˬ lawn kaꞈ cawˬ ve yoˬ. Ka tiꞈ te taˍ ve hkʼe Meˍsiˉyaꞈ htaꞈ gʼa mawˬ tuˬ yawˇ hui law chehˇ ve awˬ yanˇ htaˇ, yawˇ hui ka tiꞈ yeˬ ve hkʼaw Yaˬhoˉvaˬ ve kanˉ te ve yoˬ. (Luˉkaꞈ 2:25, 36-38) Yeunˇ hkanˍ ve chaw ve awˬ lawn nawˬ henˇ chehˇ ve awˬ yanˇ htaˇ, a shu yawˇ awˬ to htaꞈ na nyi cawˇ ve, ‘yawˇ yeunˇ hkanˍ gʼaˇ tuˬ aˬ htoꞈ ma ga piˇ ve le? Yawˇ yeunˇ hkanˍ ve aˬ htoꞈ ma awˬ bon gʼa ve le? Ngaˬ yawˇ htaꞈ hkʼaˬ hkʼe henˇ yuˬ gʼa ve le?’ Chi hkʼoˆ kaꞈ, maˇ yeunˇ hkanˍ ve chaw awˬ lawn nawˬ henˇ htaˇ, nawˬ htaꞈ aˬ htoꞈ ma maˍ laˇ sheˍ ve le? (1 Saˍmo˗eˍlaˆ 13:8-14) Nawˬ a shu yawˇ awˬ to htaꞈ nyi na cawˇ ve, ‘aˬ htoꞈ ma te yawˇ maˇ yeunˇ hkanˍ ve le? Leh yawˇ htaꞈ heuˆ la kuiˬ hkʼaˬ hkʼe cawˬ ve le?’

16. Ngaˬ hui yeunˇ hkanˍ ve chaw hpehꞈ ve lehˬ aˬ htoꞈ ma awˬ bon gʼa ve le?

¹⁶ Yeunˇ hkanˍ ve chaw hpehꞈ ve lehˬ awˬ bon gʼa ve htaꞈ dawˇ nyi sheˍ. Ngaˬ hui yeunˇ hkanˍ gʼaˇ htaˇ, ha lehˬ ve leh nyi ma gawˬ lehˍ cawˬ tuˬ yoˬ. Chi ve ngaˬ hui chehˇ sha cawˬ sha hpawˇ leh nyi ma sha tuˬ kaꞈ ga laˇ ve yoˬ. Chi hkʼoˆ kaꞈ, ngaˬ hui awˬ nu ve chaw geh yeunˇ hkanˍ htaˇ, ngaˬ hui yawˇ hui geh meuˆ daꞈ tuˬ yoˬ. Hkriꞈ yaˇ awˬ moˍ hkʼaw kaꞈ teˇ moˍ tiˉ hpehꞈ tuˬ yoˬ. Leh awˬ nu ve chaw ngaˬ hui nyi ma zuhˆ tuˬ te laˇ htaˇ, ngaˬ hui nyi ma haˆ maˇ zuhˆ ve lehˬ, awˬ lawn oˇ ve gu gʼa sha ve yoˬ. (Chiˇ mvuh ve 37:8; Tawˇ naˉ ve 14:29) A yeˇ uiˍ jaˇ ve lehˬ, ngaˬ hui yeunˇ hkanˍ ve chaw hpehꞈ ve kʼo, Awˬ pa Yaˬhoˉvaˬ htaꞈ henˇ yuˬ chehˇ ve yoˬ. Chi ve ngaˬ hui yawˇ geh meuˆ daꞈ maˇ la tuˬ te laˇ ve yoˬ.

17. Ngaˬ hui aˬ htoꞈ ma te tuˬ dawˇ teh taˍ cawˇ ve le?

¹⁷ Yeunˇ hkanˍ ve lehˬ te hkʼaˇ dawˇ hkʼaˇ daꞈ jaˇ leh ngaˬ hui awˬ pon awˬ bon cawˬ jaˇ. Ngaˬ hui hkʼaˬ htaˆ kaꞈ yeunˇ hkanˍ ve chaw hpehꞈ tuˬ maˇ sha ve htawˇ, Yaˬhoˉvaˬ ga laˇ tuˬ lawˬ sheˍ. Chi hkʼe te ve kʼo, ngaˬ hui yeunˇ hkanˍ gʼaˇ tuˬ yoˬ. Miˬ guiˬ awˬ suhˉ gaˬ la tuˬ ngaˬ hui law chehˇ htaˇ, Yaˬhoˉvaˬ lehˬ “yawˇ htaꞈ yawˆ yan ve chaw leh, yawˇ ve haꞈ pehnˇ ve htaꞈ gʼaˇ va ve chaw hui htaꞈ haꞈ shaˉ piˇ chehˇ ve yoˬ” tehꞈ ngaˬ hui yonˍ gʼa ve yoˬ. (Chiˇ mvuh ve 33:18) Ngaˬ hui teˇ gʼaˇ le le leuˉ leh yeunˇ hkanˍ ve cawˬ tuˬ te sheˍ.