1. Muloñadi chimwakeñela antu adiwunjika?

 WEJIMA wetu twakeña antu adiwunjika. Muloñadi? Twalemesha antu ahembelelaña chuma chakadi kuhilashana. Twasakililaña akwetu chadiwunjikañawu nanetu neyi tunaluwañeshi. Nawa twasakililaña hakwiluka netu muntu watudizishileña Bayibolu wadiwunjikileña nanetu chitwakabakeneña hakwila tudizi, kwiteja, hela kuzatisha yuma yamuBayibolu yitwadizileña. Chabadika, twasakililaña kwiluka netu Yehova Nzambi wadiwunjika nanetu!—Rom. 2:4.

2. Mpinjinyi yinateli kutukalila kwikala adiwunjika?

² Hela chakwila twalemesha antu adiwunjika, chinateli kutukalila kudiwunjika mpinji jikwawu. Chakutalilahu, chinateli kutukalila kudiwunjika neyi tunemani mumusululu hakukandama mumotoka, sweje-e neyi kudi kutunakutemukila. Tunateli kushikena kuhila neyi akwetu atuluwañesha. Nawa mpinji jikwawu, chinateli kutukalila kutwalekahu kuchiñilila chikaninu chaYehova chakaayi kakaha. Komana mukukeña kusweja kwikala adiwunjika? Muchinu chibaaba, tukuhanjeka mwatalisha kwikala wadiwunjika nichichalemena. Tukuhanjeka cheñi yuma yinateli kutukwasha kusweja kwikala adiwunjika.

3. Muntu wadiwunjika welaña ñahi neyi anamuvuloki?

³ Talenu yuma yiwana mutwatela kumwekeshela kudiwunjika. Chatachi, muntu wadiwunjika wazuwaña swayi wanyi. Wazataña nañovu kwikala wadiwunjika nikubula kufuntisha katama neyi anamuvuloki hela kubula kwila chuma chatama neyi kudi chuma chinakumwakamisha. Mukuku wamazu wakwila nawu “hazuwaña swayiku” wamwekena katachi muBayibolu hamutenawu Yehova nawu “Nzambi wukweti luwi niwushona, hazuwaña swayiku nawa wavulisha kukeña kwakashinshi nichalala.”—Kwid. 34:6.

4. Muntu wadiwunjika welaña ñahi neyi anamuleji kuchiñilila?

 ⁴ Chamuchiyedi, muntu wadiwunjika wachiñililaña nakudiwunjika. Neyi chuma chinakutalilayi chishimbula, muntu wadiwunjika watondolwelaña kwila yuma lufuchi hela kuhilashana. (Mukwa. 7:8) Kudi yuma yayivulu yakeñekaña etu kuchiñilila nakudiwunjika. Chakutalilahu, twatela kutiyilila nakudiwunjika neyi muntu nakuhosha, chakadi kumuketwisha. (Yoba 36:2) Tunateli cheñi kwikala adiwunjika neyi tunakukwasha kadizi kutiyishisha nsañu yamuBayibolu hela kutondolwela chaaku chatama.

5. Njilanyi yikwawu mutwatela kumwekeshela kudiwunjika?

⁵ Chamuchisatu, muntu wadiwunjika helaña yuma mulufuchiku. Hela chochu, yuma yikwawu yakeñekaña kuyizatilahu swayi. Ilaña neyi muntu wadiwunjika wukweti mudimu walema wunakukeñayi kuzatilahu, hanyakalaña kuwutachika; hela kuwumanisha swayiku. Ilaña, wekalañaku nampinji yeneni yakutoñojokahu chakuwuzata. Kuhiñahu wazataña mudimu windi mumesu awunda.

6. Muntu wadiwunjika welaña ñahi neyi nakumona kukala hela yihuñu?

⁶ Chamuchiwana, muntu wadiwunjika wazataña nañovu kuumika kukala chakadi kutooba. Muniyi njila, tukuhosha netu kudiwunjika kwendelaña hamu chikupu nakuumika. Kafwampi, chatama wanyi kuleja mukwetu itwadikunda nindi chitunakutiya hakukala kutunakuhitamu. Hela chochu, muntu wadiwunjika wukuzata nañovu kutwalekahu kuumika chakadi kumwekesha nindi nakuhita mukukala. (Kol. 1:11) Etu akaKristu twatela kumwekesha kudiwunjika muniyi yuma yejima. Muloñadi? Tuhanjekenu hayuma yantesha yaleteshaña.

7. Kwesekeja naYakoba 5:7, 8, kudiwunjika kwalemenadi? (Talenu cheñi mwevulu.)

⁷ Hakwila twakapuluki twatela kwikala adiwunjika.  Neyi chelileñawu ambuña aNzambi ashinshika kunyima, twatela kuchiñilila nakudiwunjika kulonda Nzambi ashikiji yikaninu yindi. (Heb. 6:11, 12) Bayibolu yatwesekejaña nandimi. (Tañenu Yakoba 5:7, 8.) Ndimi wazataña nañovu kutumba nikutukumwina mbutu yindi, ilaña helukaña mpinji yiyakakulaku. Dichi ndimi wachiñililaña nakudiwunjika, nakukuhwelela nindi wakaañula. Munjila yoyimu, ninetu twatwalekañahu kuzata nañovu munyidimu yakuspiritu, hela chakwila ‘hituneluki ifuku dakenzayi Mwanta wetuku.’ (Mat. 24:42) Twachiñililaña nakudiwunjika, nakukuhwelela netu hampinji yindi yatoñolayi, Yehova wakashikija yuma yejima yakanayi. Neyi tuleka kudiwunjika, tunateli kuzeya nakuleka kuchiñilila nawa tukutachika kufuma kudi Yehova chovu-chovu. Tunateli cheñi kutachika kufwila yuma yakudizañalesha hohu etu aweni chayinu mpinji. Ilaña neyi tudiwunjika, tukuumikaña kushika nikunsa nawa akatwamwina.—Mika 7:7; Mat. 24:13.

8. Kudiwunjika kwatukwashaña ñahi kwikala nawubwambu wawuwahi nawakwetu? (AKolosi 3:12, 13)

⁸ Kudiwunjika kwatukwashaña kwikala nawubwambu wawuwahi nawakwetu. Kwatukwashaña kutiyilila nakanañachima neyi akwetu anakuhosha. (Yak. 1:19) Kudiwunjika kwatukwashaña cheñi kwikala mukuwunda. Kwatukiñaña kulonda tubuli kwila yuma lufuchi nakuhosha mazu atama neyi kudi yuma yinakutwakamisha. Nawa neyi twadiwunjika, tukuzuwa swayi wanyi neyi kudi muntu wunatuneñeshi. Chatela tufuntishi katama nakatama, tukutwalekahu “[kuditiyilila] wumu namukwawu nikudanakena wumu namukwawu chakufuma hamuchima.”—Tañenu AKolosi 3:12, 13.

9. Kudiwunjika kwatukwashaña ñahi neyi kudi chuma chitunakukeña kufuukula? (Yishimu 21:5)

⁹ Kudiwunjika kunateli cheñi kutukwasha kufuukula chiwahi. Chatela tunyakali kufuukula, twatela kwikala nampinji yakusandujola nikutoñojoka hayuma yitunakukeña kwila. (Tañenu Yishimu 21:5.) Chakutalilahu, neyi tunakukeña mudimu, hadaha tunateli kwiteja mudimu wutunashikeni kuwana katachi, hela chakwila owu mudimu wukutukañeshaña kudifukula kudi Yehova. Ilaña neyi twadiwunjika, tukutoñojoka haniyi yuma chidi neyi iluña kutunawanini mudimu, maora itukuzataña, niyuma yikufumamu kutalisha hawubwambu wetu nachisaka niYehova neyi twiteja iwu mudimu. Neyi twikala adiwunjika, tukutondolwelaña kufuukula chatama.

10. MukaKristu nateli kwikala ñahi nachilwilu chakudiwunjika nikutwalekahu kwikala nachu?

¹⁰ Lombenuña kulonda musweji kwikala adiwunjika. Kudiwunjika kwekala hakachi kanyikaabu yaspiritu. (Ñal. 5:22, 23) Dichi twatela kulomba spiritu yajila kudi Yehova kulonda yitukwashi kwikala naniwu mukaabu. Neyi tudi mukukala kukuletesha tubuli kwikala adiwunjika, ‘twalombaña’ spiritu yajila kulonda yitukwashi kwikala adiwunjika. (Luka 11:9, 13) Tunateli cheñi kumulomba Yehova kulonda atukwashi kumona yuma neyi chayimonañayi. Kuhiñahu, hanyima yakulomba, twatela kuzata nañovu kulonda twikaleña adiwunjika ifuku niifuku. Neyi tulombaña mpinji yejima kwikala adiwunjika nawa tuzataña nañovu kudiwunjika, ichi chilwilu chikushimata mumuchima wetu nawa tukuchimwekeshaña mpinji yejima.

11-12. Yehova wamwekeshaña ñahi nindi wadiwunjika?

¹¹ Toñojokenuña chikupu hadi antu ashimunawu muBayibolu. MuBayibolu mwekala antu amavulu adiña adiwunjika. Neyi tutoñojokaña hadi awa antu, tunateli kudizilaku chakumwekesha chilwilu chakudiwunjika. Henohu kanda tuhanjeki hadi awa antu, tuhanjekenu ntahi hadi Muntu wamwekeshaña chikupu chilwilu chakudiwunjika, Yehova.

 ¹² Mwitempa daEdeni, Satana watamishili ijina daYehova kuhitila mukumuletesha Eva kujinoka neyi chakwila Yehova wekala chiwahi nawa hiNyuuli wamuwahi. Chatela ashikeni kumukisañana ona sakutwamba, Yehova wamwekesheli chilwilu chakudiwunjika nikudiyuula, nanochu chelukiliyi nindi hakuhita mpinji yayilehi hakwila amwekeshi nindi chiyuulu Chindi dichabadika. Nawa hampinji yinakuchiñililayi, nomiki kasawuntu kakavulu kaletañawu hejina dindi. Kubombelahu, Yehova nachiñilili nakudiwunjika kulonda antu amavulu akekali nakukooleka kwakwikala nawumi wahaya nyaaka. (2 Pet. 3:9, 15) Chinafumimu, antu amavulu anamwiluki. Neyi tutoñojokaña hayuma yayiwahi yinakufuma mukudiwunjika kwaYehova, chikutupelelaña kuchiñilila mpinji yindi yakaletayi kukuma.

13. Yesu wamwimbujolaña ñahi chikupu Tata yindi mukumwekesha kudiwunjika? (Talenu cheñi mwevulu.)

¹³ Yesu wamwimbujolaña chikupu Tata yindi mukumwekesha kudiwunjika, nawa wamwekesheli ichi chilwilu hadiñayi hamaseki. Chatela chamupeleleleña wanyi mpinji yejima kumwekesha kudiwunjika, sweje-e kudi ansoneki niaFwarisi anfwikiji. (Yow. 8:25-27) Ilaña neyi chochekalayi Tata yindi, Yesu hazuwileña swayiku. Hafuntishileña katama nakatama neyi amuhosha kasawuntu hela kumuvulokaku. (1 Pet. 2:23) Yesu womikileña kukala nakudiwunjika chakadi kutooba. Dimuloña waweni watulejelaña Bayibolu “[kutoñojoka] chikupu hadi muntu womikili nhoshelu yakudikaña yawakanshidi”! (Heb. 12:2, 3) Nawukwashu waYehova, ninetu tunateli kuumika nakudiwunjika kukala kwejima kutunateli kumona.

14. Chumanyi chitunateli kudizila kukudiwunjika kwaAbarahama? (AHeberu 6:15) (Talenu cheñi mwevulu.)

¹⁴ Indi neyi kukuma kunakwinza wanyi kwesekeja nachitwakuhweleleli? Hadaha twakuhweleleli netu kukuma chiña kwenjili dehi  kunyima oko-o. Indi kwiji tunakwakamena netu twakashikaku wanyi hakwila twakamoni kukuma chikwakenza. Chumanyi chinateli kutukwasha kutwalekahu kuchiñilila nakudiwunjika? Talenu chuma chamumwekeneni Abarahama. Hampinji yadiñayi Abarahama nayaaka 75 chakadi mwana, Yehova wamukanini nindi: “Nakakwilisha kwikala muza weneni.” (Kutach. 12:1-4) Komana Abarahama wamweni chashikijeweli ichi chikaninu? Chejima wanyi. Chelili nachiñilili dehi yaaka 25 kufuma hazambukiliyi Kaloña Yufurati, Abarahama wamweni mwanindi Isaka chavwalikiliyi muchihayamisha, nawa chimwahitili yaaka 60, ejikulu indi aEsawu naYakoba niwena avwalikili. (Tañenu AHeberu 6:15.) Ilaña Abarahama hamweni anyanindi chekaliliwu muza weneni nichaswaniniwu Ituña daChikaninuku. Hela chochu, ona iyala washinshika wadiña nawubwambu wakola naNleñi yindi. (Yak. 2:23) Nawa neyi Abarahama anamusañuli, wakatiya kuwaha nankashi hakwiluka nindi muloña wachikuhwelelu nikudiwunjika kwindi, nyuza yejima hamaseki ayikiswilili! (Kutach. 22:18) Chumanyi chitunakudizilaku? Hitunateli kushikena kumona kushikijewa kwayikaninu yaYehova yejimaku. Hela chochu, neyi tudiwunjika neyi Abarahama, tunateli kukuhwelela chikupu netu Yehova wukutukiswilaña chayinu mpinji nawa wakasweja kutukiswila mukaayi kindi kakaha kashiikayi.—Maku 10:29, 30.

15. Yumanyi yitunateli kudiza hakudiza kwankawetu?

¹⁵ MuBayibolu ashimunamu antu amakwawu adiña adiwunjika. (Yak. 5:10) Kwila mufuukulahu kusandujolelahu nsañu yayivulu hadi awa antu hakudiza kwankawenu nehi? b Chakutalilahu,  hela chakwila Davidi amuwayishili hachidiñayi kansi kulonda akekali mwanta waIsarela kumbidi, wachiñilili hadi yaaka yayivulu henohu kanda amuswanishi hawanta. ASimiyoni naAna adifukwileña kudi Yehova nakashinshi hadiña nakuchiñililawu kulonda amoni Mesiya akaniniwu. (Luka 2:25, 36-38) Hampinji yimunakudiza haniyi nsañu, akulenu awa malwihu: Chumanyi chamukwashili iwu muntu kwikala wadiwunjika? Yumanyi yayiwahi yafumini mukudiwunjika kwindi? Nateli kumwimbujola ñahi? Munateli cheñi kwilukilahu yuma yikwawu neyi mudizaña hadi ana antu abulili kudiwunjika. (1 Sam. 13:8-14) Munateli kudihula nenu: ‘Chumanyi chaletesheli abuli kwikala adiwunjika? Yumanyi yatama yafuminimu?’

16. Yumanyi yayiwahi yafumañamu neyi twikala adiwunjika?

¹⁶ Talenu yuma yayiwahi yafumaña mukudiwunjika. Neyi twadiwunjika, twekalaña namuzañalu nawa awunda. Dichi kudiwunjika kunateli kutukwasha kwikala nayitoñojoka yayiwahi nawa akola kumujimba. Neyi twikala adiwunjika nawakwetu, tukwikala nawubwambu wawuwahi nawena. Muchipompelu chetu mukwikala kunuñañana nankashi. Neyi muntu natuvuloki, kubula kuzuwa swayi kunateli kuletesha kukala kubula kuswejelaku. (Mas. 37:8, tth.; Yish. 14:29) Ilaña chasweja kubadika, neyi twikala adiwunjika, tukumwimbujolaña Tata yetu wamwiwulu nawa tukuswina chikupu kwakwihi nayena.

17. Chumanyi chitukufwilaña kwila?

¹⁷ Kudiwunjika hichilwilu chachiwahi nankashi nawa chatukwashaña! Hela chakwila hichikwikalaña chaswayi kwikala adiwunjika mpinji yejimaku, nawukwashu waYehova, tunateli kutwalekahu kwikala nanichi chilwilu. Nawa hampinji yitunakuchiñilila nakudiwunjika kwinza kwakaayi kakaha, tunateli kukuhwelela chikupu netu “disu daYehova datalaña antu ejima amutiyaña woma, antu achiñililaña kukeña kwindi kwakashinshi.” (Mas. 33:18) Dichi wejima wetu tufwileña kutwalekahu kuvwala muchima wakudiwunjika.