1. Ánni nga sasénnili josʼín je chjota xi tsejta.

 NGATSʼIÑÁ nga sasénná nga je nimiyoaa chjota xi tsejta. Tobʼelañá, ʼyaxkónñá je chjota xi tsín tokjoán masile tsa jme xi tíkoyale, nda sʼe tokoán nga sakóná kjoatsejta tsa jñani tsín nda nʼia. Kʼoati bʼailee kjoanda je xi kitsoyaná Biblia nga tsejta koan tsa jñani tsín ndi̱to̱n koanjinná kʼoa tsa ñʼai koanná nga kinitjosoán jmeni xi kichotʼayá. Tonga xi ngisa bʼailee kjoanda jé Jeobá nga̱ tsejta kjima xi kao ñá (Rom. 2:4).

2. Kʼiáni nga ñʼai maná kʼianga tsejta maa.

² Nda sʼe tokoán nga bakóná kjoatsejta xi ngikʼa, tonga sakʼoa ñʼai maná nga tsejta maa. Tobʼelañá, tsakui nichxin ngotjo koa̱nsininá nga toya kijnanʼio je carro xi tiyoyá nga nkjín carro tjín ya yandiaa, ngisaa tsa xátíná. Tsakui nichxin kjitʼanangi si̱jtilee yaoná tsa ʼya xi jokuitsoná. Kʼoa tsa sakʼoa kʼoasʼin si̱kjaʼaitsjeenje̱ nga tsín ndi̱to̱n tífaʼaikao Niná je sonʼnde chjotse. Kuinga machjénni nga tsejta koaan. I̱ kjoaʼmiya jebi kui chótʼayajiaan jósʼin tíjna nga tsejta maa kʼoa ánni nga nʼio chjínile. Kʼoati jcha kʼa kjoafaʼaitsjen xi koasenkaoná nga tsejta koaan.

3. Jósʼín jngo chjota xi tsejta tsa ʼya xi jokuitsole.

³ Ñola koya kataʼyaa josʼín jngo chjota xi tsejta. Xi títjon, alikui tokjoán síjtile yaole. Tsejtaa ma ninga ʼya xi jotsole kʼoa alikui síjndangajaoni tsa jme xi matʼain. Kʼianga bʼaxki̱ títjon je Biblia je én xi kjoatsejta tso jé Jeobá  nchja̱ni, nga̱ “jngoo Niná xi tjínle kjoamatokon kʼoa xi mamake chjota, likui tokjoan síjtile yaole kʼoa nʼio tjínle xi ñaki kjoatsjoacha kʼoa kao xi ñaki kʼoatjín” (Éx. 34:6, xi majaoni nota).

4. Jósʼín jngo chjota xi tsejta kʼiatsa machjén nga skóya.

⁴ Xi majaoni, je chjota xi tsejta ngasin nganda koya, alikui yaole síjtile kʼoa alikui masile ninga kʼoachxinle xi tíkoyale (Mat. 18:26, 27). Nkjín koya josʼin bakoá nga tsejtaa. Tobʼelañá, alikui ñá nokjoachjoá kʼiatsa tjín jme xi tíbʼéyanajmíná tsa ʼyani (Job 36:2). Kʼoati tsejta maa nga binyakoaa je xi ʼmiyalee Biblia tsa tsín tokjoán majinle jotjínni je Énle Niná kʼoa tsa ñʼai male nga síkʼéjna xi tsín ndatjín.

5. Jósasʼin bakoá nga tsejtaa.

⁵ Xi majanni, je chjota xi tsejta kosonnile jmeni xi sʼín. Ningalani machjén sakʼoa nga kjitʼanangi kʼoasʼiaan tsa jmeni, tonga jngo chjota xi tsejta ngasin nganda bʼéndajin jmeni xi nʼio tjínle kjoandosin kʼoa alikui xitso xiská kʼoasʼín. Síkʼayaa nichxin nga bʼéndajin jmeni xi sʼin, kʼoa xijema kʼiaa kʼoasʼín jmeni xi tjínndajinle.

6. Jósʼín jngo chjota xi tsejta kʼianga kjoa faʼatojin.

⁶ Xi mañoni, je chjota xi tsejta chókjoajinle jme kjoa xi faʼatojin. Basenkaoná nga bʼeyanajmílee je miyoná josʼe tokoán kʼiatsa jme kjoa bitjatojiaan. Nga tsejtaa alikui nikinroajeen tokoán ninga kjoa bitjatojiaan kʼoa tosi tonda kao kjoatsjoa nixálee Jeobá (Col. 1:11). Xi chjotale Cristo maa machjén nga tosi tonda tsejta koaan. Kataʼyala ánni.

7. Tojo tso Santiago 5:7, 8, ánni nʼio chjínile nga tsejta maa (kʼoati chótsenlai sén xi faʼaitʼa).

⁷ Machjén nga tsejta koaan ánni nga koa̱n kuitjontjainilee yaoná nichxin xi  sʼa nroa. Tojo kisʼin je choʼndale Niná xi tsakatio nichxin kjoatse, tjínnele chóyaa saʼnda nga sitjoson Niná jmeni xi tso (Heb. 6:11, 12). Je Biblia yaa síngósonkaoná jngo chjota xi tsojmintje bántje (tʼexkiai Santiago 5:7, 8). b Jngo chjota xi tsojmintje bántje nʼio sixá nga bántje, tonga alikui be kʼiáni kuiso̱ je tsojmintje xi kabántje, tsejta ma nga koya josaʼnda nga majchá je tsojmintjele. Tikʼoasʼinni ñá xi chjotale Cristo maa, kao kjoatsjoa tinixálee Jeobá ninga likui ʼyaa kʼiáni kjoaʼaí nichxinle Nainá (Mat. 24:42). Tsejtaa kjimaa nga tichoyá, ñaki tjínjngoo tokoán nga sitjoson jmeni xi tso je Jeobá. Kʼiatsa tsín titsejta koa̱nñá, koa̱nsijinná kʼoa yajin kjuinroani nga tsín tije Jeobá si̱xánilee, kʼoa kuijin ngisa kuenta sʼiaan jmeni xi tongotjo tsjoa kʼoe tokoán. Tonga tsa tsejtaa, chókjoajinná josaʼnda nga kjoetʼa jme xi chon sonʼnde kʼoa kuitjo̱ntjailee yaoná (Miq. 7:7; Mat. 24:13).

8. Jósʼin basenkaoná nga tsejta maa nga nda mangínkoaa xíngiaa (Efesios 4:32; Colosenses 3:12).

⁸ Nga tsejta maa basenkaoná nga nda mangínkoaa xíngiaa kʼoa nda binyañolee kʼianga fákaonajmíná (Sant. 1:19). Nga kʼoanʼia nda mangínkoaa xíngiaa. Kʼiatsa tsín sin tjín tokoán alikui toxkia nokjoaa, alikui xitso xiská kʼoanʼia tsa jmeni, alikui tokjoán yaoná nijtilee kʼoa tsín nijndangajaoñá tsa ʼya xi jokuitsoná kʼoa tsa josikaoná. Tosaa tsejta maa kʼoa nichatʼalee xíngiaa (tʼexkiai Efesios 4:32; c Colosenses 3:12 d).

9. Josʼin basenkaoná nga tsejta maa kʼianga jme xi chjoejiaan (Proverbios 21:5).

⁹ Nga tsejta maa nda chjoejiaan jmeni xi nʼia. Kʼianga jme xi chjoejiaan alikui xitso xiská kʼoanʼia, tosaa nikʼayaa nichxin nga fasjaiyaa jmeni xi sʼiaan (tʼexkiai Proverbios 21:5). e Tobʼelañá, tsa xá tifasjee tsakui nichxin tokjoan kui chjoé je xá xi kʼoaitʼaná ninga tsín tikoa̱nʼaniná nga kʼuínyasoán kʼoa nga koanngián kjoajtín. Tonga tsa tsejtaa, títjonjinkjoanla kjoásjaiyaa jñani kjuinni̱xá, jmé xá xi sʼiaan, kʼoa tsa ya si̱xá kuijin kuenta sʼiaan jósʼin kuiyoaa kao familianá kʼoa kao Jeobá. Kʼiatsa tsejtaa koasenkaoná nga kui chjoéjiaan xi ndatjín.

10. Jmé xi sʼiaan nga tosi tonda tsejta koaan.

¹⁰ Kʼoakʼuínlee Jeobá nga katabasenkaoná nga ngisa tsejta katamaa. Nga tsejta maa, kʼoati ya tíjnajin je kjoanda xi tsjoáná je espíritu santo (Gál. 5:22, 23). Si̱jélee Jeobá nga katatsjoáná nganʼiotsjele kʼoa nga kʼoakatamakjoaan josʼin mele. Kʼiatsa ñʼai kjimaná nga tsejta kjimaa kʼianga kjoa tibitjatojiaan, kʼoakʼuínlee Jeobá nga katatsjoáná nganʼiotsjele (Luc. 11:9, 13). Kʼoati koa̱n kʼoakʼuínlee nga katabasenkaoná nga kʼoasʼin  si̱kjaʼaitsjeen josʼin síkjaʼaitsjen je, kʼoa kʼianga jekʼoétsʼoalee tosi tonda kui kʼoasʼiaan xi koasenkaoná nga tsejta koaan. Tsa kʼoasʼiaan kʼoa tsa ntsjaintsjai kʼoakʼuínlee Jeobá nga katabasenkaoná ngisaa tsejta koaan.

11, 12. Jósʼin tíbakó Jeobá nga tsejta.

¹¹ Si̱kjaʼaitsjenjiaan jokisʼin choʼndale Niná xi tsakatio nichxin kjoatse. Ya Biblia nkjín choa̱ faʼaitʼa tʼatsʼe choʼndale Niná xi tsejta koan. Kʼiatsa si̱kjaʼaitsjenjiaan nga kʼoakisʼin kʼoati koasenkaoná nga tsejta koaan. Chótʼayajinla kʼa choa̱le chjota jebi, tonga kuenta sʼiaan nga je Jeobá xi ngisa tsejta.

¹² Ya ʼndenaxóle Edén, je Na̱i chʼaosʼin kisikʼaxki̱ jaʼaínle Jeobá kʼoa kʼoakitso nga tsín male batéxoma kʼoa nga tsín tsjoakená. Tonga je Jeobá tsejta koan kʼoa alikui tokjoán tsakjaʼáxin je Na̱i, koanjinle nga tse nichxin machjén nga jchale nga toje xi nda male batéxoma. Nga tíkoya je Jeobá nga sʼe̱ndajin kjoa jebi, tíkale nga chʼaosʼin tíbʼaxki̱ je jaʼaínle. Xi ijngosani, nga tsejta je Jeobá millón chjota tjíobe xi tʼatsʼe kʼoa koaan koatio ngantsjai nichxin (2 Ped. 3:9, 15). Kʼiatsa si̱kjaʼaitsjenjiaan josʼin tíbichómani nga tsejta kjima Jeobá, kʼoati tsejta koaan nga chóyalee saʼnda nga kjoaʼaxin jme xi chon sonʼnde.

13. Kʼianga jaʼai Jesús i̱ Sonʼnde, jósʼin kiskenngile je Nʼaile nga tsejta (kʼoati chótsenlai sén xi faʼaitʼa).

¹³ Je Jesús kʼoatisʼin tsejta josʼín je Nʼaile. Kʼoakisʼin nga jaʼai i̱ Sonʼnde. Tonga sakʼoajin tsín choa ñʼai koanle nga tsejta koan nga̱ je chjota escriba kao chjota fariseo nʼio chʼao koankjoan (Juan 8: 25-27). Nga je Jeobá kjenngile je Jesús, alikui tokjoán yaole kisijtile. Alikui tsakʼékjaoʼakao je chjotakontrale ninga chʼaosʼin kisikʼaxki̱ (1 Ped. 2:23). Kiskale je kjoa xi jaʼatojin. Kuinga i̱ tsoni je Biblia: “Jesús xi kichojtajin kjoañʼai kʼia nga chjotajée kinchjaʼaonle. Nda tikjaʼaitsjenjion xi tʼatsʼe” (Heb. 12:3). Jé Jeobá koasenkaoná nga kʼoati chókjoajinná je kjoa xi kuitjátojiaan.

14. Jmé xi bakóyaná nga tsejta koan je Abrahán (Hebreos 6:15; kʼoati chótsenlai sén xi faʼaitʼa).

¹⁴ Jméni xi koasenkaoná nga tosi tonda chóyaa josaʼnda nga kjoetʼa jme xi chon sonʼnde. Tjínjinkʼa xi kʼoasʼin nikjaʼaitsjeen nga jetjínnele jetʼa tsakai jme xi chon sonʼnde kʼoa tsa kʼoabixoán ndʼaibi nga tsín tijchañá nga kʼoakoa̱n. Si̱kjaʼaitsjenjinla xi tʼatsʼe Abrahán. Kʼianga kʼoakitsole Jeobá nga jngo naxinandá koa̱n je ntje̱le, je Abrahán jejankan kao xjaʼaon nóle kʼoa nijngojin xti tjínle (Gén. 12:1-4). Tochoaa tsabe Abrahán josʼin kitjoson jmeni xi tsakʼinle. Kʼianga jejaʼatojin xo̱ngá Éufrates 25 nó jaʼato kʼoa kʼiaa kitsin je Isaac, kʼoa 60 nó koanskanni kʼiaa kitsin je xtindaile xi Esaú kao xi Jacob tsakʼin (tʼexkiai Hebreos 6:15). f Tonga tsín tsabe nga jngo naxinandá koanni je ntje̱le, kʼoa tsín kicho ya ʼNde jña tsakʼinle nga kʼoaile. Ninga kʼoalani, nʼio miyole koan Jeobá (Sant. 2:23). Nʼiojin tsjoa sʼe̱ kon je Abrahán nga jekjoaʼáyanile kʼianga sʼe̱jinle nga koanchikontʼain je naxinandá xi totʼatsʼe nga koankjainle kʼoa nga tsejta koan (Gén. 22:18). Jmé xi bakóyaná jebi. Tsakui nichxin tsínkjoan jchaa josʼin kuitjoson  ndʼaibi jmeni xi tso je Jeobá, tonga tsa tsejta koaan joni Abrahán, je Jeobá sichikontʼainná ndʼaibi kao nichxin xi sʼa nroa kʼianga jeʼndenaxó koa̱n (Mar. 10:29, 30).

15. Jméni xi koa̱n chótʼayajiaan kʼianga chotʼayá nga toñá.

¹⁵ Ya Biblia nkjínsa chjota síkʼaxki̱ xi kʼoati tsejta koan (Sant. 5:10). Koaan chótʼayajiaan choa̱ jebi. g Tobʼelañá, je David sʼa xti nga kitjoéjin nga je koatexomale naxinandá Israel, tonga nkjín nó kiskoya josaʼnda nga je tsakatéxoma. Je Simeón kao Ana nda kisixále Jeobá, tonga kʼoati kiskoya nga kjoaʼaí je Mesías xi tíchoyale (Luc. 2:25, 36-38). Kʼianga chótʼayajiaan choa̱le chjota jebi, si̱kjaʼaitsjenjiaan jebi: “Jméni xi tsakasenkao nga tsejta koan. Jósʼin kichomani nga kʼoakisʼin. Jósʼin koa̱n skenngile nga tsejta koan”. Tonga kʼoati tse xi bakóyaná tʼatsʼe chjota xi tsín tsejta koan (1 Sam. 13:8-14). Koaan si̱kjaʼaitsjenjiaan jebi: “Ánni nga tsín tsejta koanni. Jósʼin kichomani nga kʼoakisʼin”.

16. Tikʼaxki̱ kʼai josʼin basenkaoná nga tsejta maa.

¹⁶ Si̱kjaʼaitsjenjiaan josʼin basenkaoná nga tsejta maa. Ngisaa tsjoa satío tokoán kʼoa likui yaoná nijtilee. Basenkaoná nga tsín jme nanda chʼin sʼená kʼoa nga nda satío tokoán. Kʼoati nda mangínkoaa xíngiaa kʼoa jtín biyoaa kao je ndsʼee xi tjío ya jinjtín. Alijme kjoa sʼená kʼianga tsín tokjoán yaoná nijtilee ninga tsín sasénná josʼín xi ngikʼa (Sal. 37:8, nota; Prov. 14:29). Tonga xi ngisa chjíle kuinga je Jeobá chjenngilee kʼoa machriantʼalee kʼianga tsejta maa.

17. Jméni xi tiyondaa nga sʼiaan.

¹⁷ Tojosʼin tiʼyaa, kʼianga tsejta maa nʼio nda basenkaoná. Ningalani sakʼoa ñʼai maná, jé Jeobá koasenkaoná nga tosi tonda tsejta koaan. Nga tichoyá nga kjoaʼaí je sonʼnde chjotse, kuenta sʼiaan nga “je xko̱n Jeobá yaa tíkotsenle je xi tsokjónke, je xi tjíokoya nga koakole xi ñaki kjoatsjoacha” (Sal. 33:18). Kuinga machjénni nga tosi tonda tsejta katamaa.