1. Kifer nou kontan bann dimounn ki ena pasians?

 NOU tou nou bien kontan kan bann dimounn ena pasians. Kifer? Parski nou respekte bann dimounn ki kapav atann san ki zot ankoler. Nou kontan osi kan lezot ena pasians anver nou kan nou fer bann erer. Ek sirman nou bien rekonesan anver sa Temwin ki’nn fer nou letid la, parski li’nn ena pasians anver nou kan nou ti pe gagn difikilte pou aksepte enn lansegnman, ouswa pou met an pratik bann prinsip Labib. Me pli inportan, nou bien rekonesan anver nou Bondie Zeova parski Li montre boukou pasians anver nou!​—Rom. 2:4.

2. Sit bann sitiasion kot kitfwa nou trouv sa difisil pou ena pasians.

² Mem si nou kontan kan lezot ena pasians, kitfwa nou nou gagn difikilte pou ena pasians. Par exanp, kitfwa nou gagn difikilte pou res kalm kan nou’nn tase dan sirkilasion, sirtou si nou an retar. Kitfwa osi nou sap lor kal vit kan lezot agas nou. Ek parfwa, kitfwa nou trouv sa difisil pou atann ki Zeova realiz so bann promes. Eski to ti pou kontan ena plis pasians? Dan sa lartik-la, nou pou gete ki savedir ena pasians, ek nou pou gete kifer sa bien inportan. Nou pou gete osi ki kitsoz kapav ed nou pou ena plis pasians.

3. Enn kikenn ki ena pasians, kouma li reazir kan lezot provok li?

³ Anou get kat fason kouma nou kapav montre ki nou ena pasians. Premierman, enn kikenn ki ena pasians pa ankoler vit. Kan lezot fer enn kitsoz ki agas li, li res kalm ek li pa rann lemal pou lemal. Li pa tret lezot osi dan enn move fason kan li strese. Premie fwa ki Labib servi lexpresion “ki pa ankoler vit,” li fer sa kan li dekrir Zeova kouma “enn Bondie ki ena mizerikord ek konpasion, ki pa ankoler vit ek ki ena lamour fidel ek laverite an-abondans.”​—Ex. 34:6.

4. Enn kikenn ki ena pasians, kouma li reazir kan li bizin atann?

 ⁴ Deziemman, enn kikenn ki ena pasians li res kalm pandan ki li pe atann. Kan enn kitsoz pe tarde pou arive, enn kikenn ki ena pasians li pa pou agase. (Mat. 18:26, 27) Ena boukou sitiasion kot nou bizin atann ek res kalm. Par exanp, kan enn kikenn pe koz ar nou, kitfwa nou pou bizin ena pasians ek ekout li, san ki nou koup li. (Zob 36:2) Nou bizin ena pasians osi kan nou pe ed nou etidian pou konpran bann lansegnman ki ena dan Labib ouswa pou rezet bann move labitid ki li ena.

5. Sit enn lot fason kouma enn dimounn kapav montre ki li ena pasians.

⁵ Trwaziemman, enn kikenn ki ena pasians li pa azir san reflesi. Li vre ki dan sertin sitiasion, nou bizin azir vit-vit. Selman, kan enn kikenn ki ena pasians ena enn travay inportan pou fer, li pa pou degaze pou fer enn travay brit. Okontrer, li pou pran letan pou reflesi lor kouma li pou fer travay-la, ek apre sa, li pou pran letan pou fer travay-la kouma bizin.

6. Enn kikenn ki ena pasians, kouma li reazir kan li gagn bann difikilte?

⁶ Katriemman, enn kikenn ki ena pasians li fer zefor pou andir bann difikilte san ki li plengne. Dan enn sertenn fason, bizin ena pasians pou kapav andire. Biensir, kan nou gagn enn difikilte, pena nanye demal pou partaz nou santiman ar nou kamarad. Selman, enn kikenn ki ena pasians li pou fer so best pou li kontign andire, ek li pou res pozitif. (Kol. 1:11) Bann serviter Zeova bizin ena pasians dan sa kat domenn-la. Anou get de-trwa rezon kifer.

7. Dapre Zak 5:7, 8, kifer pasians bien inportan? (Get zimaz osi.)

⁷ Nou bizin ena pasians pou ki nou  kapav gagn lavi sov. Parey kouma bann fidel serviter Zeova dan lepase, nou bizin atann avek pasians ki Zeova realiz so bann promes. (Ebre 6:11, 12) Labib konpar bann Kretien ar enn planter. (Lir Zak 5:7, 8.) Enn planter bizin travay bien dir. Li bizin sem bann lagrin ek li bizin aroz zot. Me li pa kone kan exakteman so bann pie pou sorti dan later. Akoz sa, li bizin atann avek pasians ziska ki ler arive pou li rekolte seki li’nn seme. Dan mem fason, nou osi nou bizin res bien okipe dan nou bann laktivite spiritiel, mem si nou “pa kone ki zour [nou] Segner pe vini.” (Mat. 24:42) Nou atann avek pasians, parski nou sir ki Zeova pou realiz tou so bann promes dan ler ki bizin. Si nou koumans perdi pasians, kitfwa nou pou koumans fatige ar atann, ek akoz sa, nou riske al lwin ar laverite. Kitfwa osi nou pou rod satisfer nou bann plezir deswit. Parkont, si nou ena pasians, nou pou andire ziska lafin, ek nou pou gagn lavi sov.​—Mish. 7:7; Mat. 24:13.

8. Kouma pasians ed nou pou ena enn bon relasion ar lezot? (Kolosien 3:12, 13)

⁸ Nou bizin ena pasians si nou anvi ena enn bon relasion ar lezot. Enn kikenn ki ena pasians, li ekoute kan lezot koze. (Zak 1:19) Pasians ede osi pou ki ena lape. Si nou ena pasians, nou pa pou azir brit, ek nou pa pou dir bann move kitsoz kan nou strese. Kan nou ena pasians, nou pa ankoler vit kan lezot bles nou, ek nou pa rod tir vanzans. Okontrer, nou ‘kontign siport sakenn nou kamarad ek pardonn sakenn nou kamarad avek tou nou leker.’​—Lir Kolosien 3:12, 13.

9. Kouma pasians kapav ed nou pou pran bann bon desizion? (Proverb 21:5)

⁹ Pasians pou osi ed nou pou pran bann pli bon desizion. Olie ki nou azir vit ouswa brit, nou pou reflesi lor bann swa ki nou ena, pou ki nou kapav pran enn pli bon desizion. (Lir Proverb 21:5.) Par exanp, si nou pe rod enn travay, kitfwa nou pou aksepte premie travay ki nou gagne, mem si sa travay-la anpes nou servi Zeova kouma bizin. Parkont, si nou ena pasians, nou pou pran letan pou reflesi lor bann kitsoz kouma komie lertan nou pou bizin travay, kotsa travay-la ete, ek ki lefe sa travay-la pou ena lor nou fami ek lor nou lamitie ar Zeova. Nou pou evit pran bann move desizion kan nou ena pasians.

10. Ki kitsoz enn Kretien bizin fer pou ki li ena pasians?

¹⁰ Priye Zeova pou gagn plis pasians. Pasians form parti frwi lespri sin Bondie. (Gal. 5:22, 23) Alor, nou bizin priye Zeova ek demann Li pou ed nou pou devlop bann kalite ki form parti frwi lespri sin. Si nou dan enn sitiasion kot nou bien bizin ena pasians, nou bizin ‘kontign demann’ Zeova so lespri sin pou ki Li ed nou pou ena pasians. (Lik 11:9, 13) Nou kapav osi demann Zeova pou ed nou pou trouv bann kitsoz parey kouma Li. Lerla, apre ki nou’nn fini priye Li, nou bizin fer nou maximum pou ki nou ena pasians toulezour. Plis nou priye ek nou fer zefor pou ena pasians, plis sa kalite-la pou form parti nou personalite.

11-12. Kouma Zeova pe montre pasians?

¹¹ Reflesi lor bann lexanp ki ena dan Labib. Labib koz lor boukou dimounn ki ti ena pasians. Kan nou reflesi lor zot lexanp, nou pou trouve seki nou bizin fer pou ki nou ena pasians. Me avan ki nou  examinn sertin parmi sa bann lexanp-la, anou gete kifer Zeova pli bon lexanp konsernan pasians.

¹² Dan zardin Edenn, Satan inn koz manti lor Zeova ek li’nn gat So repitasion kan li’nn dir Ev ki Zeova pa enn bon Dirizan. Olie ki Li detrir Satan deswit, Zeova inn montre pasians ek Li’nn kontrol Limem, parski Li ti kone ki sa ti pou pran letan pou montre ki Limem meyer Dirizan ki ena. Pandan ki Li pe atann, Zeova pe andir tou bann mansonz ki bann dimounn pe fane lor so nom. Pasians Zeova pe permet boukou dimounn gagn lavi eternel. (2 Pier 3:9, 15) Parski Zeova pe atann avek pasians, bann milyon dimounn pe gagn lokazion pou aprann konn Li. Kan nou res konsantre lor bann bienfe ki nou gagne gras-a pasians Zeova, li pou pli fasil pou nou atann avek pasians zour kot Li pou detrir sa move lemond-la.

13. Kouma Zezi inn montre ki li imit pasians so Papa dan enn fason parfe? (Get zimaz osi.)

¹³ Zezi imit pasians so Papa Zeova dan enn fason parfe. Kan li ti lor later, li’nn montre ki li ti ena pasians mem si sa pa ti touletan fasil, sirtou anver bann exper lalwa ek bann Farizien ki ti bien ipokrit. (Zan 8:25-27) Selman, parey kouma so Papa, Zezi pa ti ankoler vit. Li pa ti tir vanzans kan bann-la ti maltret li ouswa ti provok li. (1 Pier 2:23) Zezi ti andir so bann difikilte avek pasians ek li pa ti plengne. Nou konpran kifer Labib ankouraz nou pou “reflesi bien lor sa kikenn ki’nn andir sa kantite koze kontrer” la! (Ebre 12:2, 3) Avek led Zeova, nou osi nou pou kapav ena pasians ek andir ninport ki difikilte ki nou gagne.

14. Ki nou kapav aprann ar pasians Abraam? (Ebre 6:15) (Get zimaz osi.)

 ¹⁴ Sertin parmi nou kitfwa ti panse ki lafin ti pou fini arive depi bien lontan. Ek aster-la ki zot inn vie, kitfwa zot trakase parski zot panse ki zot pa pou reisi trouv lafin. Ki kitsoz kapav ed nou pou kontign atann avek pasians? Anou get lexanp Abraam. Kan li ti ena 75 an ek ki li pa ti ankor ena zanfan, Zeova ti fer li sa promes-la: “Mo pou fer twa vinn enn gran nasion.” (Zen. 12:1-4) Eski Abraam inn trouv sa promes-la realize? Li’nn trouv enn parti realize, me li pa’nn trouv promes-la realiz net. Apre ki li’nn travers larivier Efrat ek ki li’nn atann pandan 25 an, Abraam ti trouv nesans so garson Izaak, ki ti ne gras-a enn mirak. Ek 60 an plitar, li’nn osi trouv nesans so bann ti-zanfan, Ezai ek Zakob. (Lir Ebre 6:15.) Me Abraam pa’nn trouv so bann desandan vinn enn gran nasion, ek li pa’nn trouv zot rant dan Later Promiz. Selman, sa zom fidel la ti ena enn bon lamitie ar Zeova. (Zak 2:23) Ek kan li pou resisite, li pou bien kontan pou aprann ki, gras-a so lafwa ek so pasians, tou bann nasion inn gagn bann benediksion! (Zen. 22:18) Ki leson nou aprann? Kitfwa azordi nou pa pe trouv tou bann promes Zeova realize. Selman, si nou ena pasians parey kouma Abraam, nou kapav sir ki Zeova pou rekonpans nou depi aster-la mem, ek ki Li pou rekonpans nou plis ankor kan nou pou dan lemond nouvo.​—Mark 10:29, 30.

15. Ki kitsoz to kapav etidie dan to letid personel?

¹⁵ Labib koz lor bann lezot serviter  Zeova ki ti ena pasians. (Zak 5:10) Eski to kapav etidie zot lexanp dan to letid personel? b Par exanp, mem si David ti bien zenn kan Zeova ti swazir li pou vinn lerwa lor Izrael, li ti bizin atann plizir lane avan ki li reisi vinn lerwa. Simeon ek Ana ti kontign servi Zeova avek fidelite pandan ki zot ti pe atann Lemesi. (Lik 2:25, 36-38) Kan to etidie lor lexanp sa bann serviter Zeova la, rod repons pou bann kestion kouma: Ki kitsoz inn ed sa dimounn-la pou ena pasians? Ki bienfe li’nn gagne parski li’nn ena pasians? Kouma mo kapav swiv so lexanp? To kapav osi tir bann leson ar lexanp bann dimounn ki pa ti ena pasians. (1 Sam. 13:8-14) Par exanp, to kapav demann tomem: ‘Kifer zot pa ti ena pasians? Ki konsekans zot inn gagne akoz sa?’

16. Sit sertin bienfe ki nou gagne kan nou ena pasians.

¹⁶ Reflesi lor bann bienfe ki nou gagne kan nou ena pasians. Kan nou ena pasians, nou pa trakase plis ki bizin, ek nou pli ere. Alor, kan enn kikenn ena pasians, li ena enn pli bon lasante mantal ek fizik. Kan nou pasian ar lezot, nou ena enn pli bon relasion avek zot. Lerla, ena plis linite dan lasanble. Kan enn kikenn provok nou, nou pa ankoler vit, ek sa ede pou ki sitiasion-la pa anpire. (Ps. 37:8; Prov. 14:29) Me pli inportan, kan nou ena pasians, nou imit nou Papa Zeova ek nou vinn pli pros ar Li.

17. Ki kitsoz nou bien deside pou fer?

¹⁷ Pasians li vremem enn zoli kalite, ek nou gagn boukou bienfe kan nou ena li. Mem si parfwa nou kapav gagn difikilte pou ena pasians, avek led Zeova nou kapav kontign devlop sa kalite-la. Ek pandan ki nou pe atann avek pasians lemond nouvo, nou kapav sir ki “lizie Zeova lor tou bann ki ena enn gran respe pou li, lor tou bann ki atann so lamour fidel.” (Ps. 33:18, NW) Alor, anou bien deside pou kontign abiy nou ar pasians.