1. Mwahaya bwaddi nigadhiveliwa okala ni athu oovilela?

 SAPAMA okala ni athu oovilela. Iyo nnowariiha athu enanda ojheha ethu-sithu ehinyanyuwile, teto sapama okala naathu enanivilelana naarive niviriganihaga. Ohiya eyo, nnomutamalela muthu anihudhihile Bibiliya mwaha onivilelana mudhidhi niilibihedhaga wihina nihudhere orumedha ni oparihedha mabasa ndhe nnahudherihu mBibiliyani. Teto yathimaya, iyo nnomutamalela vanlubale Yehova mwaha onivilelana ofiyedha peeno! — Rom. 2:4.

2. Mudhidhi baani winakaliwa ethu yorusa okala muthu oovilela?

² Ebaribari wihina iyo nnomutikina muthu oovilela, mbwenye podi wera winonirusa okala athu oovilela. Motajhiha, podi ohikala ethu yokweya ojheha nuuvilela vasimaforuni wula naaguvaga. Teto podi okala ethu yorusa okala oovilela naaligiwaga. Malabo mamodha, ojheha nuuvilela mpaganyo wa Yehova wodhela elabo exa podi ohikala ethu yokweya. We onofuna okala muthu oovilela? Ohudhera wula nnere woona enatapulela okala oovilela ni mwahaya bwaddi eyo ekala yathima. Ohiya eyo, nnere woona ethu enaanikavihere okala oovilela.

3. Muthu oovilela anakala aavi aligiwaga?

³ Kabeni noone makalelo mannayi owoniha wi nili athu oovilela. Yobajha, muthu oovilela kananyanyuwa bure-bure. Muthu oovilela aligiwaga anakala oopwaseya ni kanawelihedha kunyawunya. Oliye kanaweddiha athu amodha ni makalelo abure dhaye dhahimweddelaga pama. Madhu ala owi ‘oovilela’ enadha mBibiliya dila yobajha va Êxodos 34:6, enamuwoga Yehova ninga ‘Mulugu athagaraga ni anthebwa, oovilela, adhaleliwe odhivela ohunamala ni eebaribari.’

4. Muthu oovilela anakala aavi yahoweleyaga ojheha ethu?

⁴ Yanabiili, muthu oovilela anowanda ojheha nupwaseya. Muthu oovilela anowilibihedha ohutakaleliwa aajhehaga ethu,  thabwa-thabwa akala ethuya kinereya ninga mwajhehedhiye. (Mat. 18:26, 27) Dhihikalawo dhithu dhowinjhiva nnahowelihu ojheha nupwaseya. Motajhiha, enohoweleya onvuruwana nuuvilela muthu mmodhaya awogaga nihimugwaddile. (Jó 36:2) Podi wera enohoweleya okala oovilela namukaviheraga namahudhera ehu wonelamo ndhe anahudheriye mBibiliyani obe ogonjhiha elemelelo yabure.

5. Makalelo mamodhaya owoniha ovilela baavi?

⁵ Yanatharu, muthu oovilela kaneerana dhithudha ahubuwenle. Ebaribari wi malabo mamodha enohoweleya werana dhithudha mowaguva. Mbwenye akala muthu oovilela anafuna eerena ethu yathima, oliye kaneerana dhithudha ahaabihile wubuwela newene kaneerana dhithudha ni marulu. Ohiya eyo, oliye anopatha mudhidhi wihina ubuwele ele anafuniye werana. Amala, oliye anopwasedha werana dhithudha mwamakalelo apama.

6. Muthu oovilela anakala aavi afwanyiwaga makathamiho?

⁶ Yanenayi, muthu oovilela anowilibihedha wawanana makathamiho ni kanakala orogave. Bumwahaya ovilela malabo owinjhivene winowiwanana ni ojheeha. Ebaribari wihina kahiyo yabure onfugulela murima mukwihu wihina nimwaddele dhinanipadduwela. Mbwenye muthu oovilela, anowilibihedha osugwera dhithu dhinampadduwela mwigumini mwaaye ni anere werana ele anandiye wihina adhowegeve amulabelaga Yehova. (Col. 1:11) Adhaari a Yehova enohowela woniha ovilela mwadhatedhene. Mwaha wa ddi? Kabeni noone dhithu dhinanithukulela owoga ndo.

7. Mowiwanana ni Tiago 5:7, 8, Mwahaya bwaddi ovilela ekala ethu yathima? (Osugwe fotu.)

⁷ Akala nnofuna okalawo ni mukalakala, nnohowela okala athu oovilela. Ndala ninga  adhaari a Yehova akale, nnohowela okala oovilela wihina nande ojheha wakwanela mpaganyo dha Yehova. (Heb. 6:11, 12) Bibiliya analiganiha ovilela wa makiristawu ni ovilela anoniha namalima. (Omwileri Tiago 5:7, 8.) Namalima analaba nuviheya wihina adhale ni ahele manjhe ndhe adhanliye, mbwenye oliye kanonne mudhidhiya enafuniwa wunnuwa. Bumwahaya oliye anohowela ojheha nuuvilela aroromelaga wihina aneere ohadda ndhe adhanliye. Nimakalelo mamodhave, nnohowela okala ooviheya ni mabasa oomuzimuni naarive nahinonne nlabo anadhe Nabuya. (Mat. 24:42) Iyo nnojheha nuuvilela, nroromelaga wi Yehova anere wakwanihedha mpaganyo dhaye dhatedhene mudhidhi wofwanelela. Nahandaga ovilela, iyo podi okwerebeya ni vang’ono-vang’ono ohiya omulabela Yehova. Teto iyo podi wambela ofunaga dhithu dhamwilaboni nubuwelaga wihina dhineere onihagalasa. Mbwenye nakala oovilela nnere wanda ofiya omakuthulo ni nnere ovulusiwa. — Miq. 7:7; Mat. 24:13.

8. Ovilela winanikavihere aavi naaweddihaga athu amodha? (Colossenses 3:12, 13)

⁸ Ovilela winonikavihera okanna wandana wapama ni athu amodha. Mwaha winonikavihera ovuruwana nupwaseya amodha yawogaga. (Tia. 1:19) Ohiya eyo, ovilela winonikavihera okanna murenddele ni athu amodha. Nakala oovilela, naarive dhehu dhahineddelaga pama, kannerena newene kannawoge ethu yaapihe mbani athu amodha. Teto kannanyanyuwelege athu amodha yawoga ethu enanitakalela. Ohiya owelihedha kunyawunya, ‘mudhowegeve nvilelanaga mmodha ni mukwaye mulevelelanaga mmodha ni mukwaye mohihiyedhedha.’ — Omwileri Colossenses 3:12, 13.

9. Ovilela winanikavihere aavi nafunaga werana yothoma? (Provérbios 21:5)

⁹ Ovilela podi onikavihera nafunaga werana yothoma. Ohiya werana dhithudha ni marulu obe nahuubuwenle, nnohowela oveda mudhidhi wihina nisanyihe pamadhene museluya. Ndo nnere werana yothoma yapama. (Omwileri Provérbios 21:5.) Motajhiha, akala nnasayela mabasa iyo podi orumedha mabasa oobajha nnafwanyihu, naarive nnonaga wihina mabasaya eneere onithukulela oyelela mutugumano ni mabasa oolaleya. Mbwenye nakala oovilela nnere orajhiha wubuwela akala omabasaniwa wihilapelana ni vaade, mawora mangasi nnamaligihu nilabaga kadda labo ni makalelo mabasaya enafuniwa opatha emudhi yehu ni wandana wehu ni Yehova. Nakala athu oovilela nnere wanda werana dhothoma dhapama.

10. Mukiristawu anahowela wera ddi wihina akale muthu oovilela?

¹⁰ Olobele olobaga wihina okale muthu oovilela. Ovilela winookosa epaddi ya yowima yomuzimuni. (Gál. 5:22, 23) Bumwahaya nnohowela olobela wa Yehova nilobaga muzimu wotxena, wihina onikavihere wanda okanna dhikalelo dhinakosa epaddi ya yowima yomuzimuni. Nafwanyiwa makathamiho eneeha ovilela wehu, nnere odidela olobela nlobaga muzimu wotxena wihina onikavihere okala athu oovilela. (Luc. 11:9, 13) Teto iyo podi omuloba Yehova wihina anikavihere woona dhithudha mwamakalelo Oliye anooniye. Ohiya olobelave, nnohowela wilibihedha wihina nikale athu oovilela malabo amatene. Nalobelaga nilobaga wi nikale athu oovilela ni niilibedhaga kadda labo werana eyo, ekalelo ela ya ovilela eneere wunnuwa  mmurimani mwehu ni eneere okala epaddi ya emuthu yehu.

11-12. Yehova anooniha aavi ovilela?

¹¹ Openddege dhopadduwa dha mBibiliyani. Bibiliya anowaawoga athu owinjhiva yonihile ovilela. Naapenddaga dhopadduwa ndha, iyo podi ohudhera makalelo owoniha ovilela. Mbwenye nihinathi ohudhera dhopadduwa ndha, nnere woona yotajhiha yinlubale ya muthu oovilela, Yehova.

¹² Omundda wa Ideni Saddana ahimwinkedha Yehova, ofiyedha otakaliha emuthu yaye ni owoga wi Yehova namathonga a nrima ni ohogowa. Yehova ahafune, eere omutolosa Saddana mudhidhi yole. Mbwenye oliye ahoniha ovilela, mwaha ahinona wihina were ohoweleya mudhidhi wihina onihe wi Oliye namathonga apama wapitha anamathonga aatene. Wula ajhehaga, Yehova onovilelana dhowoota dhatedhene aninkedhiwiye peeno. Ohiya eyo, Yehova anojheha nuuvilela mwaha anoofuna wi athu owinjhiva ekalewo ni mukalakala. (2 Ped. 3:9, 15) Yokumelelavoya sowihina, athu owinjhiva ehikanna oneti yomunona Yehova. Ovilela wa Yehova winowadhana mareeliho owinjhiva. Napwasedha wasugwa mareeliho yala eneere onikweyela ojheha nuuvilela Omwene wa Mulugu ofiya.

13. Nimakalelo baani Yesu atajhihiliye pamadhene ovilela wababe? (Osugwe fotu.)

¹³ Yesu ohutajhiha pamadhene ovilela wababe ni ohoniha ekalelo ela agaali elabo yela yavati. Kayali ethu yokweya Yesu okala oovilela malabo amatene, thabwa-thabwa mwaha anamaleba ni Afarizewu yaali agwalagwambi. (João 8:25-27) Ndala ninga ababe, Yesu kaatakaleliwa bure-bure. Yamuruwanaga Yesu kawaakula nuruwana. (1 Ped. 2:23) Yesu ahivilelana dhoweha ahipambihile. Nnowanda  woonelamo mwahaya bwaddi Bibiliya agawogaga wi ‘mmutajhihe ole agonjhihile dhowoga dhohikala pama dhaathu oothega’! (Heb. 12:2, 3) Nnikavihero na Yehova, iyo podi wanda ogonjhiha makathamiho bi makathamiho nuuvilela.

14. Nnahudhera ddi ni ovilela wa Abaraawu? (Hebreus 6:15) (Osugwe fotu.)

¹⁴ Podi wera onojheha muwari mwa yakadhene ogujhuliwa wa elabo ela ya Saddana. Vano podi weera onoona wihina onere okwa omakuthulo wahinathi ofiya. Ethu baani enaanikavihere ojheha nuuvilela? Kasugwa yotajhiha ya Abaraawu. Mudhidhi ahinathi okanna mwana, aganna yaka 75 Yehova ahimpaganya: ‘Nlogo nawo nnere okala ninlubale.’ (Gén. 12:1-4) Abaraawu ahoona mpaganyo ola wakwanelaga? Hee. Oliye ahoona epaddi emodha wa mpaganyo ole wakwanelaga. Agaabuwile muhinjhe Ewufarati dhahivira yaka 25 oliye ajhehaga wakwanela mpaganyo wa Yehova. Nuwindo oliye woona obaliwa wa mwanaye Izaki. Ale yaali matikiniho manlubale. Teto nuuvira yaka 60, oliye woona obaliwa wa adhule Ezawu ni Jako. (Omwileri Hebreus 6:15.) Mbwenye Abaraawu kandile woona odhuulu waye okalaga nlogo ninlubale ni ovolowaga Elabo Yothomeliwa. Naarive dhigaali ndo, mulobwana ola oororomeleya ahikanna wandana wohuthikeya ni Yehova. (Tia. 2:23) Abaraawu avenyihiwa, aneere ohagalala onona wi mwaha ovilela ni nroromelo naye malogo amatene a elabo yavati ehireelihiwa! (Gén. 22:18) Nnahudheravo ddi? Podi wera kannande woona wakwanela wa mpaganyo dhatene dha Yehova ovanene. Mbwenye nakala oovilela ninga Abaraawu,  iyo podi okanna ebaribari wihina Yehova aneere onreeliha ovanene ni mwilaboni exa.— Marku 10:29, 30.

15. Dhopadduwa baani dha mBibiliyani dhaakale dhapama iyo ohudhera neragana ohudhera wehu wa vayeka?

¹⁵ MBibiliyani dhihikalamo dhopadduwa dha athu owinjhiva yonihile ovilela. (Tia. 5:10) Ononamo aavi ompandda porogarama wihina ohudhere wodhela dhopadduwa ndha? b Motajhiha, Davidi aali mwana muzombwene nusakuliwa wihina akale mwene, mbwenye oliye ohowela ojheha yaka dhowinjhivadhene wihina ambele othonga. Yotajhiha emodhaya sa Simiyawu ni Ana. Aliwa yomulabela Yehova nuuroromeleya ejheehaga nuuvilela odha wa Mesiya. (Luc. 2:25, 36-38) Wahudheraga dhopadduwa ndha, wawakule makoho ala: Ethu baani emukavihere muthu ola woniha ovilela? Mwahaya bwaddi okala muthu oovilela odhe omukaviherege? Ginamutajhihe aavi? Teto we podi ohudhera ni ale yahandile woniha ovilela. (1 Sam. 13:8-14) Wahudheraga dhopadduwa ndha wikohe: ‘Mwahaya bwaddi muthu ola adhe ahonihege ovilela? Makathamiho baani yakumelelevo mwaha ohivilela?’

16. Mareeliho baani nnawakelihu nakala athu oovilela?

¹⁶ Kawubuwele mareeliho onawakeliwe mwaha okala oovilela. Muthu oovilela doohagalala ni kanathabwa othuwathuwa. Ohiya eyo, ovilela podi onikavihera okanna egumi yapama. Nakala athu oovilela, nnokanna wandana wapama naathu amodha. Ohiya eyo mulogo wehu onakala wowiwanana. Muthu awoga ethu enanipiha mbani, nnowilibihedha wihina muladduya wahisuse. (Sal. 37:8, nota; Pro. 14:29) Yathimaya sowihina nakala athu oovilela, nnamutajhiha baabihu oodhulu Yehova ni nnolibiha wandana wehu ni Oliye.

17. Niikome wera ddi?

¹⁷ Mohanganyedha ovilela ekalelo yooriya vanlubale enanikavihera iyo aatene! Ebaribari wihina kahi ethu yokweya okala muthu oovilela. Mbwenye nnikavihero na Yehova, iyo podi odhowagave niilibihedhaga okanna ekalelo ela. Njhehaga nuuvilela elabo exa, iyo podi okanna ebaribari wi ‘mento a Yehova enowasugwera ale enamoova ni ale enajheha odhivela waye wahinamala.’ (Sal. 33:18) Obajha peeno odhowa osogolo, nnafuna niikome woniha ekalelo ela ya ovilela.