1. Tae-i ǃaroma du ǃnūǃnâxa khoena ra ǃgôaǃgâ?

 HOADA ge ǃnūǃnâxa khoena kaise ra ǃgôaǃgâ. Tae i ǃaroma? Khoen hîna xū-e ǁaixa tamase a ǃâu ǁkhāna da ge ra ǃgôaǃgâ. Dīsa da ga ra, o da ge ra ǃgôaǃgâ naun ga sida ǀkha ǃnūǃnâxa o. Tsî da ge kaise ge gangan Elobmîsa gere ǁkhāǁkhā da khoe-i ge sida ǀkha ǃnūǃnâxa i amaga. Aiǃgû tsî da ge Elobmîsa xu da gere ǁkhāǁkhāsen xūna ūǃoa tsî gere ûiǂui ǁaeb ai. Hoan ǂamai ta ge kaise ra ǃgôaǃgâ Jehovab sida ǀkha a ǃnūǃnâxa amaga.—Rom. 2:4.

2. Mâǁaegu ai i a ǃgom ǁkhā ǃnūǃnâxasiba ūhâsa?

² Nau khoen di ǃnūǃnâxasiba da ge kaise ra ǃgôaǃgâ, xawe da ge sida a ǃgombahe ǁkhā ǃnūǃnâxasa. Aiǁgause da ge ǃnāsase ǃgomsiba a hōǃâ ǁkhā ǃnomsase hâsa, ǀhabese da ga ǃkhai-i ai ǃâu o. ǀNîsi ta ge a ǁaixa ǁkhā ǂhanihe da ga o. Tsî ǀnî ǁaegu ai da ge a ǃgombahe ǁkhā Jehovab di mîmâis ǀasa ǃhūbaib xa hâsa ǃâuǀgarasa. ǃNāsase du ra ǃnūǃnâxa ǂgao? Nē ǁkhāǁkhāǃâs ǃnâ da ge nî ǃhoaǃgao mati da ǃnūǃnâxasiba a ǁgau ǁkhāsa tsî tae-i ǃaroma i a ǂhâǂhâsasa. ǃHoaǃgaos tsîna da ge nî hî tae-i a huida ǁkhāsa î da ǃnāsa ǃnūǃnâxasiba ūhâ.

3. ǃNūǃnâxa khoe-e tae-e ra dī, khoe-i xa i ga ǂhanihe o?

³ Kō re mati da ǃnūǃnâxasiba saora haka ǃâgu ǃnâ a ǁgau ǁkhā ǀgausa. ǂGurose, ǃnūǃnâxa khoe-i ge ǃhaese ǁaixa  tama. ǁAixa kaihe i ga, o î ge ǃnomsase ra hâ tsî i ge ǁnā khoe-e dī tamas ka io mîǃoa tama hâ ǁaixa i ga xawe. “ǃHaese ǁaixa tama” ti hâ mîs ge ǂguro ǃnās ase ra sîsenūhe, Jehovaba i sao rase ra ǁguiǃā o. “Tita ǃKhūta ge ǀkhomxasib tsî ǀkhommi xa ǀoa hâ, ǃhaese ǁaixa tama tsî ǃnāǂamsa ǀnammi tsî ǂgomǂgomsasiba ra ǁgau Elota.”—Eks. 34:6.

4. ǃNūǃnâxa khoe-e mati ra tanisen, ǃâu î nîs ga o?

⁴ ǀGamǁîse, ǃnūǃnâxa khoe-i ge ǃnomsase ra ǃâu ǀgara. ǃÂubasen tama i hâse i ga xū-e gaxuse ū, o i ge ǃnūǃnâxa khoe-e ǁaixa tamas ka io ǂhanihe tsoatsoa tama hâ. (Mat. 18:26, 27) ǀNî mâsigu ge ra ǂgaoǀkhā î da ǃnomsase ǃâu. Aiǁgause khoe-i ga ǃhoa, o da ge ǃnūǃnâxase ǂhani tamase nî ǃgâ. (Job. 36:2) ǃNūǃnâxasiba da ge ǂhâ hâ Elobmîsa da ra ǁkhāǁkhā khoe-e huisa î-i xū-e ǁnâuǃā tamas ka io ǁgai ǁnaetiba ǀû.

5. Mapa a ǀkhara ǀgau ǃnūǃnâxasiba da a ǁgau ǁkhāba?

⁵ ǃNonaǁîse, ǃnūǃnâxa khoe-i ge ǃnoesase xū-e dī tama. Xawe ǀnî ǁaegu ai i ge ǂhâbasa î da ǃkhaese xū-e dī. ǃNūǃnâxa khoe-i ga ǂhâǂhâsa sîsenne ūhâ, o i ge ǃnoesase ǁî-e dī tama hâ. Xawe i ge ǁaeba ra ǁamaǂui nē xū-e ǀapeǁguisa tsî ǁaeba ra ū sîsenne ǃgâise dīsa.

6. ǃNūǃnâxa khoe-e mati ra tanisen ǃgomsiba i ga ra hōǃâ o?

⁶ Hakaǁîse, ǃnūǃnâxa khoe-i ge ǃgomsin ǃnâ ra mâǀgai ǃgae tamase. Nē ǀgaub ǃnâ i ge ǃnūǃnâxasiba mâǀgais ǀkha a ǀgui. Ama-as ge ǀgū ǀhosa-e da ge tsâ da ra ǀgauba a mîba ǁkhā. Xawe ǃnūǃnâxa khoe-i ge ǃgâi xūn hîna ǁî-i ûib ǃnâ ra īn xa nî ǂâi tsî Jehovaba ǃgâiaǂgaob ǀkha nî ǃoaba ǀgara. (Kol. 1:11) Jehovab di khoen ge ǃnūǃnâxasiba hoa ǀgaugu ǃnâ nî ǁgau. Tae-i ǃaroma? ǀKhī re î da saora ǃaromade kō.

7. Jakobub 5:7,8 ǃoagu i ǃnūǃnâxasiba tae ǃaroma a ǂhâǂhâsa? (Ai-īsiba mû re.)

⁷ ǀAmo ûiba da ga hō ǂgao, o da ge ǃnūǃnâxasiba nî ūhâ. Jehovaba ge ǃkharu ge kurigu ǃnâ gere ǃoaba khoen khami da ge nî ǃâu ǀgara. Elob ǁîb di mîmâide nî dīǀoaǀoas kōse. (Heb. 6:11, 12) Elobmîs ge sida hâǃnâ mâsiba ǃhana ǂgā-aob ǀkha ra ǀgopeǀnō. (Khomai re Jakobub 5:7, 8 sa.) ǃHana ǂgā-aob ge ǁîb di ǃhanaba ǂgā tsî ra ǂnâ xaweb ge a ǀū mâǁae i nî ǂoaxasa. Xaweb ge ǃhana ǂgā-aoba ǃnūǃnâxase ra ǃâu ǂgom ra se ǁîb ge ǃhana xūn nî ǂoasa. ǁNās khami da ge gagasi xūn ǀkha nî ǀkhabe. ‘Mâ tsēs aib [sida] ǀhonkhoeba nî hāsa’ da a ǀū amaga. (Mat. 24:42) ǃNūǃnâxasib ǀkha da ge ra ǃâu ǂgomǃgâsiba ūhâse, Jehovab mîmâib ge xūna ǀgūǁae nî dīǀoaǀoasa. ǃNūǃnâxa tama da ga io da ge tsau tsî amaba nî ǁnāxū. Tsî da ge ǀnîsi nēsi nî ǂkhîǂkhî da xūn ai ǂâisa nî ǂnûi tsoatsoa. Xawe da ga ǃnūǃnâxa o da ge ǀamosib kōse mâǀgai tsî nî sâuhe.—Mix. 7:7; Mat. 24:13.

8. ǃNūǃnâxasiba mati nauna da ra hâ-ū ǀgaub ǃnâ ra huida? (Koloseǁîn 3:12, 13)

⁸ ǃNūǃnâxasiba da ge ǂhâhâ naun ǀkha da ga ǃgâi ǀhōsagusisa ga ra ūhâ ǂgao o. ǁÎ i ge ra huida i da ǃgâise ǃgâ naun ga ra ǃhoa ǁaeb ai. (Jak. 1:19) ǃNūǃnâxasib tsîn ge ǂkhîba ra aiǃgû kai. ǁÎ i ge ra huida î da ta xū-e ǃkhaese mî tamas ka io dī stres da ra hîna. Tsî ǃnūǃnâxa da ga, o da ge ǃkhaese ǁaixa tide nau khoe-i ga tsûtsû da o. ǃKhamǃoas xa da ge, ‘nē-e nau-e taniǀnam tsî ǃKhūb ge ǁkhāti sada ǀûbas ǁkhās khammi da ge sada tsîna nî ǀûba.’ Khomai re Koloseǁîn 3:12, 13 sa.

9. ǃNūǃnâxasiba mati ra huida ǃgâi mîǁguiga da ra dī ǁaeb ai? (ǂKhoamîdi 21:5)

⁹ ǃNūǃnâxasib tsîn ge a huida ǁkhā ǃgâi mîǁguiga dīsa. ǃNoesase xū-e dīs xa da ge ǁaeba ǁamaǂui tsî ôaǃnâde māhe da hâ xūn xa nî dī. (Khomai re ǂKhoamîdi 21:5 sa.) Aiǁgause da ga sîsenne ga ra ôa, o da ge hō da ra sîsenni hoa-e ra ū ǂgao. Nēs ge nî ǃaroma î da ǀhaodi tsî aoǁnâ sîsenni ǃnâs tsîna ǀorose hâ. ǃNūǃnâxasiba da ga ra ūhâ, o da ge ǁaeba ǁamaǂui tsî nî ǂâiǃgâ. Matikō ǃnūse i nē sîsenne hâs, matikō īrga da nî sîsens tsî mati i nē sîsen-e sada omarisa nî tsâǀkhās. Tsî mati i Jehovab ǀkha da ūhâ ǀhōsagusis tsîna nî tsâǀkhāsa. ǃNūǃnâxasiba ūhâs ǀkha da ge ǁgai mîǁguiga dīsa xu a ǂgōsen ǁkhā. Mati da ǃnāsase a ǃnūǃnâxa ǁkhā?

10. Mati i Xristeǁî-e ǃnūǃnâxasiba omkhai tsî nî ūhâ ǀgara?

¹⁰ ǃNāsa ǃnūǃnâxasiba ǀgoreba. ǃNūǃnâxasib ge gagab ǂûn di ǀgui. (Gal. 5:22, 23) ǁNā-amaga da ge ǀgore tsî ǃanu gagab Jehovab diba nî ǂgan, îb huida î da ǁnā gagab di ǂû-e omkhai. Sada ǃnūǃnâxasiba ra ǃâitsâ mâsiba da ga hōǃâ, o da ge ǃanu gagaba nî ‘ǂgan ǀgara’ îb huida î da ǃnūǃnâxasiba ūhâ ǀgara. (Luk. 11:9, 13) Jehovaba da ge ǂgan ǁkhā îb huida, î da ǁîb da mû khami xūna mû. ǀGore toa da ga, o da ge tsēs hoasa nî dītsâ î da ǃnūǃnâxasiba ǁgau. ǃNāsase da ǃnūǃnâxasiba ra ǀgoreba, khamib ge nē ǀgauba sada di ǂgaogu ǃnâ nî ǀgai tsî nî sada ûib ǃgâ tsoatsoa.

11-12. Jehovaba mati ǃnūǃnâxasiba ge ǁgau?

¹¹ Elobmîs di aiǁgaudi xa ǂâiǃgâ. Elobmîs ge ǂgui aiǁgaude ūhâ ǃnūǃnâxa ge i  khoen dina. ǁNā aiǁgaudi xa da ga ra ǂâiǃgâ, o da ge ǃnūǃnâxasiba da a ǁgau ǁkhā ǀgaugu xa ra ǁkhāǁkhāsen. ǁNā aiǁgaude da nî ǃhoaǃgaos aiǃâ, ǀkhī re î da kō ǂoaǂamsa ǀgaub ǃnâ ge ǃnūǃnâxasiba a ǁgau khoe-i di aiǁgausa, ǁnās ge Jehovab disa.

¹² Edenni ǃhanab ǃnâb ge Satanna Jehovab di ǀonsa ge ǃkhāǃkhā. Evasa ǂgomǀoro kais ǃnâ-ū Jehovab a ǂhanu-ai tsî ǀnamxaǃnâ tama hâsa. Jehovab ge ǁnā ǃkhāǃkhā-aoba ǃkhais ai ge dīkākā tama hâ i. Xaweb ge ǃnūǃnâxasib tsî ǃkhō-oasens tsîna ge ǁgau, ǂan i ge i amaga ǁaeba i nî ūsa ǁîb ǂgaeǂguis a ǂhanusa ǁgausa. Tsî ǃâub hâ ǁaeb ǃnâb ge ǁîb ǀons noxopa ra ǃkhāǃkhāhe hîna ra mâǀgai. ǁNās xōǀkhāb ge Jehovaba ǃnūǃnâxase ǃâu ǀgara hâ, ib ǃnāsa khoena ǃēsa mā ǀamo ûiba hōsa. (2Pet. 3:9, 15) ǁNās xa ǃaromahe hâse i ge ǂgui khoena ǁîba ge ǂan tsoatsoa. Jehovab di ǃnūǃnâxasiba xu da ra hō ǃgâib xa da ga ǂâi, o da ge nî supubahe ǃâu ǀgarasa ǁîb ǀamsa nî haus kōse.

13. Matib ge Jesuba ǀoasase ǁGûb di ǃnūǃnâxasiba ǁgae?

¹³ Jesub ge ǀoasase ǁîb di ǁGûb di ǃnūǃnâxasiba ra ǁgae tsîb ge ǁnāsa ǃhūbaib aib ge hâ io ge ǁgau. ǀNîsi i ge hoaǁae supu tama ge hâ i ǃnūǃnâxasiba ǁgausa. ǃGōsase ǁnā ǀgamǂgaoxa ǁkhāǁkhā-aogu tsî Farisegu ǃoagu. (Jhn. 8:25-27) Xawe ǁîb di ǁGûb khamib ge Jesuba ǃkhaese ge ǁaixa tama ge hâ i. ǀGoe-e tsîb gere ǃkhāǃkhāhe ob ge dīǃoa tama ge hâ i. (1Pet. 2:23) Jesub ge ǁîb di ǃgomsigu ǃnâ ǃgae tamase ǃnūǃnâxasib ǀkha ge mâǀgai. ǁNā-amagas ge Elobmîsa ra  mîba da “ǂâiro re mâ ǀgaub aib ge Jesuba ǁhōǁhōsa khakhoeb ǁîb ǃoagu ge ǁōre aona ūhâ ība tanisa.” (Heb. 12:2, 3) Jehovab di huib ǀkha da ge sida tsîna ǃnūǃnâxasib ǀkha sada di ǃgomsigu ǃnâ a mâǀgai ǁkhā.

14. Tae-e da Abrahammi di ǃnūǃnâxasiba xu a ǁkhāǁkhāsen ǁkhā? (Hebreǁîn 6:15) (Ai-īsiba mû re.)

¹⁴ Sada ǃâubasens ǀams xa hâs ga dīǀoaǀoahe tama ios? ǀNî khoe da ge ǀnîsi gere ǃâubasen ǀams ga ǀnai hā hâsa. Tsî da ge ra ǂâiǂhansen ǀnîsi da ûi ǃkharu tsî ǁnā tsēsa mû tidesa. Tae-e a huida ǁkhā î da ǃnūǃnâxasib ǀkha ǃâu? Abrahammi di aiǁgausa kōre. Abrahammi ge ge 75 kurixa i tsî ǀgôa-e ge ūhâ tama hâ i. Jehovab ge ge mîmâiba bi “Tita ge satsa ǂgui suriga nî mā tsîn ge ǁîna kai ǁaese nî ī.” (Gen. 12:1-4) Abrahamma ǁnā mîmâis ge dīǀoaǀoahe ǀgauba mû i ge ? Hî-i ǀoasaseb ge mû tama hâ. Eufratǃāb ge ǃkharu toa tsî i 25 kuriga ǃâu, hînab ge Abrahamma buruxa xū-e ge mû. ǁÎb di ǀgâob Isaki ge ge ǃnaehe. Tsî 60 kurigu khaoǃgâ i ge ǁîb di ǁnurisakha Esaub tsî Jakobi tsîna ge ǃnae-e. (khomai re Hebreǁîn 6:15 sa.) Xawe Abrahammi ge mû tama ge hâ i, ǁîb surib ge mati kai ǁae kai tsî mîmâisa ǃhūb ǃnâ a ǂgâ ǀgausa. Xawe ǁnā ǂgomǂgomsa-aob ge ǀgū ǀhōsagusisa ǁîb di Kuru-aob ǀkha ge ūhâ i. (Jak. 2:23) Abrahammi ga khâisa hō, ob ge kaise nî ǂkhî ǁnâub ga o, ǁîb di ǃnūǃnâxasib. Tsî ǂgoms ǃaroma i ge hoa ǃhaode ǃhūbaib ai ǀkhaehesa. (Gen. 22:18) Tae-e da ra ǁkhāǁkhāsen? ǀNîsi da ge Jehovab ge mîmâi xūn hoan ra dīǀoaǀoahe ǀgausa  nēsi mû tide. Xawe Abrahammi khami da ga ǃnūǃnâxa, o da ge ǂgomǃgâsiba Jehovab ǃnâ ūhâ ǁkhā. ǁÎb nēsi tsî ǃnāsase ǀasa ǃhūbaib ǃnâ nî mādawa-am dasa.—Mrk. 10:29, 30.

15. Tae-e da aitsama da Elobmîsa ra ôaǃnâ ǁaeb ǃnâ a dī ǁkhā?

¹⁵ Elobmîs ge ǀkhara aiǁgaudi ǃnūǃnâxa ge i khoen din tsîna ūhâ. (Jak. 5:10) Kaise i ge nî ǃgâi ǁîn xa du ga ǁkhāǁkhāsen o. b Aiǁgause, Davib ge ǂkhammi a hîna gao-aose ge ǂkhauhe. Xaweb ge ǂgui kuriga ge ǃâu Israeli gao-oaseb nî ǂgaeǂguis âiǃâ. Simeonni tsî Ana hâra ge ǂgomǂgomsase Jehovaba ge ǃoaba ǀgara Mesiaba ra ǃâuhâse. (Lukab 2:25, 36-38) ǁNāti i ǃnaeǃkhaidi xa du ra ǁkhāǁkhāsen khami saora dîdi ǃereamde ôare. Tae-e ǀnîsi nē khoe-e ge hui i-i ǃnūǃnâxasiba ǁgau? ǁÎ-i di ǃnūǃnâxasiba xū-i ge mati ǃgâiba hō? Mati ta ǁî-e ǁgae ǁkhā? ǀNîsi du ge ǃgâib tsîna nî hō ǁnān hîna ge ǃnūǃnâxasiba ǁgau tama hâ în xa ôaǃnâsa. (1Sam. 13:8-14) ǀNîsi du ge a dîsen ǁkhā: ‘Tae-e ge ǃaroma în nē khoena tā ǃnūǃnâxa? Tae-e ǁîn ǀkha ge ī ǃnūǃnâxa taman ge ī amaga?’

16. Mâ ǃgâiba da ra hō ǃnūǃnâxa da ga o?

¹⁶ Kō re ǀnî ǃgâi xūn hîna da ra hōǃâna ǃnūǃnâxa da ga o. ǃNūǃnâxa da ga o da ge ǃnāsase ǂkhî tsî a ǃnomsa. ǁNās ǃnâ-ū i ge ǃnūǃnâxasiba sada sorosi ǂurusib tsî ǂâis ǃaroma a ǃgâi. Nau khoen ǀkha da ga ǃnūǃnâxa, o da ge ǁîn ǀkha ǃgâi ǀhōsagusisa ra ūhâ tsî i ge sada di ǀhaohâb tsîna ra ǀguiǃnâxa. Khoe-i ga ǀara kai da xawe da ga ǃkhaese ǁaixa tama io da ge mâsiba ǁgaiǂoa kai tide. (Psa. 37:8, ǂKhm. 14:29) Xawe hoan ǂamai ǃnūǃnâxa da ga, o da ge sada di ǀhomsi ǁGûba hoaǁae ra ǁgae tsî da ge ǁîba ra ǀgū.

17. Tae-e da nî mîǁgui dīsa?

¹⁷ ǃNūǃnâxasib ge kaise îsa tsî ǃgâi ǀgauba. Hoaǁae i ge supu tama hâ ǃnūǃnâxasiba ǁgausa. Xawe Jehovab di huib ǀkha da ge aiǃgû tsî nē ǀgauba a omkhâi ǁkhā. ǃNūǃnâxasib ǀkha da ǀasa ǃhūbaiba ra ǃâu hîna da ge saora xū-i ǃnâ ǂgomǃgâsiba a ūhâ ǁkhā. “Mû, ǃKhūb di mûs ge ǁnān ǁîba ra ǃaoǃgân ai hâ ǁnān ǁîb di hâhâ ra ǀnammi” ai ra ǃâuna. (Psa. 33:18) A da sida hoada aiǃgû tsî ǃnūǃnâxasiba ana re.