1. ¿Keyej tikonuelita tionmouikas iniuan akin amo yolijsiuij?

 TINOCHIN tikuelitaj iniuan timouikaskej akin amo yolijsiuij. ¿Keyej? Porin tikuelitaj maj amo yolijsiuikan maski amo mochiua teisa kemej kinekiaj. No tiktasojkamatij maj oksekin amo yolijsiuikan keman timopolouaj. Uan no semi tiktasojkamatiliaj akin techmachtij ika Biblia porin amo yolijsiuik touan keman teisa amo niman tikajsikamatkej oso amo niman tikchiujkej. Uan okachiok tiktasojkamatij maj Jehová amo yolijsiui touan (Rom. 2:4).

2. ¿Kemanian okachi techouijmaka amo tiyolijsiuiskej?

² Tinochin tikuelitaj maj oksekin amo yolijsiuikan. Sayoj ke okachi ouij techkisa keman tejuan moneki ijkon tikchiuaskej. Xa keman tikchixtokej tepos uan amo niman panoua, okachi ouij techkisa amo tiyolijsiuiskej uan okachiok komo moneki niman tiajsiskej okseko. Oso xa aksa uelis techkualantis. Uan kemansa xa hasta uelis tiknemiliskej ke Jehová tel uejkauakya uan amo niman kichiuani tein motenkauani. Tinochin tiknekij okachi amo tiyolijsiuiskej. Itech nejin tamachtilis tikitaskej toni kijtosneki maj amo se yolijsiui uan keyej semi moneki. No tikitaskej seki taman tein techpaleuis maj okachi amo tiyolijsiuikan.

3. ¿Toni kichiua akin amo yolijsiui keman oksekin kikualantiaj?

³ Maj tikitakan naui taman tein kichiua akin amo yolijsiui. Yekinika, amo niman kualantikisa. Keman oksekin kinekij kikualantiskej mochikaua yolseujtos uan amo momakepa. Uan maski amo kuali momachilia, kuali kinnojnotsa oksekin. Tajtolmej “amo niman kualani” yekinika ixnesij itech  Biblia keman ika tajtoua ke Jehová “se Dios teiknelijkej, amo niman kualani uan inetasojtalis tein amo tami semi ueyi uan nochipa kijtoua tein melauj” (Éx. 34:6, segunda nota).

4. ¿Toni kichiua aksa akin amo yolijsiui keman moneki mochias?

⁴ Ojpatika, akin amo yolijsiui kichia teisa ika nejmachkayot. Amo motekipachoua oso amo kualani keman amo niman mochiua tein kineki (Mat. 18:26, 27). Itech miak taman tein tikpanouaj moneki timochiaskej uan amo tiyolijsiuiskej. Xa keman aksa techtapouia se taman, moneki tikakiskej ika nejmachkayot uan amo tiktajtolkotonaskej (Job 36:2). No moneki ika nejmachkayot tikpaleuiskej se akin tikmachtiaj Biblia maj kiajsikamati se taman oso maj amo kichiuaok teisa tein kichiuaya.

5. ¿Keniuj no tiknextiaj ke amo tiyolijsiuij?

⁵ Expatika, akin amo yolijsiui achto kuali kinemilia toni kichiuas. Kemansa kemaj moneki niman tikchiuaskej teisa. Sayoj ke keman moneki tikchiuaskej se ueyi tekit, amo ijsiujka tikpeualtiaj nion tiknekij ijsiujka timatamiskej. Ta achto kuali tiknemiliaj keniuj tikchiuaskej uan timokuiliaj tiempo tein monekis para kuali techkisas.

6. ¿Toni kichiua akin amo yolijsiui keman kipanoua ouijkayomej?

⁶ Naujpatika, akin amo yolijsiui mochikaua kixikos ouijkayomej uan amo moyolkokojtok. Nejon kinextia ke akin amo yolijsiui no taxikoua. Sayoj ke nejin amo kijtosneki ke amo uelis tiktapouiskej se akin iuan timouikaj tein techpanotok uan keniuj timomachiliaj. Akin amo yolijsiui mochikaua tanemilis kemej moneki uan kisentoka yolpaki keman kitekitilia Jehová (Col. 1:11). Akin tikchiuaj kemej Cristo moneki tikchiuaskej nochi nejin tein achto tikitakej. ¿Keyej? Maj tikitakan seki taman.

7. Kemej kijtoua Santiago 5: 7, 8, ¿keyej semi moneki maj amo tiyolijsiuikan? (No xikonita taixkopimej).

⁷ Komo tiknekij timakisaskej, moneki amo tiyolijsiuiskej. Ijkon kemej itekitikauan Dios ne uejkauj, tejuan no moneki amo tiyolijsiuiskej uan tikchiaskej maj Jehová kichiua tein motenkauak (Heb. 6:11, 12). Biblia kijtoua ke tejuan tikchiuaj kemej aksa akin tatoka (xikonixtajtolti Santiago 5:7, 8). Akin tatoka semi kiyekpia uan kiatekia tatok. Sayoj ke amo kiyekmati kemanian takis. Yejua ika, amo yolijsiui uan takuaujtamati ke kitekis tein kitokak. No ijkon, akin kichiuaj kemej Cristo semi kitekitiliaj Jehová maski amo kimatij kemanian ualas ininTekotsin (Mat. 24:42). Amo tiyolijsiuij uan tikneltokaj ke Jehová kichiuas tein motenkaujtok keman kiixtalijtok. Komo tiyolijsiuiskiaj, amo tiknekiskiajok timochiaskej uan yolik tikauaskiaj Jehová. Uan no, xa tiknejnekiskiaj tikchiuaskej seki taman tein techyolpaktis maski sayoj se tiempo. Sayoj ke, komo amo tiyolijsiuij, uelis titaxikoskej hasta keman tamis nochi tein amo kuali uan timomakixtiskej (Miq. 7:7; Mat. 24:13).

8. ¿Keyej komo amo tiyolijsiuij kuali timouikaskej iniuan oksekin? (Colosenses 3:12, 13).

⁸ Komo amo tiyolijsiuij kuali timouikaskej iniuan oksekin. Uan nejon no kichiuas maj kuali tikinkakikan oksekin keman tajtoskej (Sant. 1:19). No titapaleuiskej maj oksekin yolseujtokan. Achto kuali tiknemiliskej tein tikchiuaskej uan amo tikijtoskej teisa tein kinyolkokos oksekin keman amo kuali timomachiliskej. Uan no, komo aksa techyolkokoua, amo tikualaniskej nion timomakepaskej. Ta tiksentokaskej timoxikojtoskej uan timotapojpoluiskej (xikonixtajtolti Colosenses 3:12, 13).

9. ¿Keyej komo amo tiyolijsiuij techpaleuia maj kuali titaixpejpenakan? (Proverbios 21:5).

⁹ Komo amo tiyolijsiuij no techpaleuia maj kuali titaixpejpenakan. Amo ijsiujka tikchiuaskej teisa, ta achto kuali tikitaskej toni okachi kuali, uan satepan titaixpejpenaskej (xikonixtajtolti Proverbios 21:5). Komo tiktemojtokej tekit xa tiknekiskej tikseliskej tein yekinika techiluiskej, maski amo tiaskej seki nechikolmej oso amo semi titanojnotsaskejok. Sayoj ke, komo amo tiyolijsiuij, achto kuali tikitaskej kani titekitiskej, kanachi horas titekitiskej, ox kinpaleuis oso kinijtakos tochankauan uan ox uelis tiksentokaskej kuali timouikaskej iuan Jehová. Komo amo tiyolijsiuij, kuali titaixpejpenaskej.

10. ¿Toni uelis tikchiuaskej para tiksentokaskej amo tiyolijsiuiskej?

¹⁰ Maj tiktajtanikan Jehová maj techpaleui maj okachi amo tiyolijsiuikan. Akin amo yolijsiui kinextia ke mokaua maj kiixyekana ichikaualis Dios (Gál. 5:22, 23). Yejua ika, uelis tiktajtaniskej Jehová maj techmaka ichikaualis uan maj techpaleui maj tikchiuakan tein kuali. Komo tikpanotokej se taman tein kichiua maj okachi ouij techkisa tiknextiskej ke amo tiyolijsiuij, maj tiksentokakan tiktajtanikan Jehová ichikaualis (Luc. 11:9, 13). No uelis tikiluiskej Jehová maj techpaleui maj tikitakan se taman kemej yejuatsin kiita. Uan satepan ke timotataujtiskej, maj tikchiuakan nochi tein tiueliskej para mojmostaj tiknextiskej ke amo tiyolijsiuij. Komo nochipa tiktajtaniaj Jehová maj techpaleui uan timochikauaj  amo tiyolijsiuiskej, okachi amo ouij techkisas tikchiuaskej.

11, 12. ¿Keniuj kinextiani Jehová ke amo yolijsiui?

¹¹ Maj itech titanemilikan tein kichiujkej sekin akin ininka motajtoua itech Biblia. Biblia ininka tajtoua miakej akin kinextijkej ke amo yolijsiuiaj. Komo itech titanemiliaj tein kichiujkej, techpaleuis maj no tiknextikan ke amo tiyolijsiuij. Axkan tikitaskej tein kinpanok sekin, sayoj ke achto maj ika titajtokan akin okachi amo yolijsiui, Jehová.

¹² Itech xochital Edén, Satanás kichiuak maj amo kuali kiitakanok Jehová uan kijtouilij ke amo kuali taixyekana uan ke amo tetasojta. Sayoj ke Jehová amo niman kiixpoloj nejon xolopij, ta kinextij ke amo yolijsiuia uan ke uelia motsakuiliaya, porin kimatia ke monekia maj pano tiempo para kinextis ke yejua okachi kuali taixyekana. Uan hasta axkan kisentoka kixikoua nochi tein kitakajkayauiliaj. Uan no, kemej Jehová amo yolijsiui, millones ueli kiixmatij uan no uelis nemiskej nochipaya (2 Ped. 3:9, 15). Komo itech titanemiliaj nochi tein kuali tein mochiuani porin Jehová amo yolijsiui, okachi amo ouij techkisas maj tikchiakan keman kiixpolos nochi tein amo kuali kemej kiixtalijtok.

13. Keman Jesús yetoya nikan taltikpak, ¿keniuj kinextij ke katka iTajtsin uan amo yolijsiuia? (No xikonita taixkopin).

¹³ Jesús kichiua kemej iTajtsin uan amo no yolijsiui. Ijkon kinextij keman yetoya nikan taltikpak. Kemansa xa semi kiouijmakak amo yolijsiuis, okachiok iniuan tajkuilouanij uan fariseos, akin katkaj taixkajkayauanij (Juan 8:25-27). Sayoj ke ijkon kemej iTajtsin, Jesús amo no niman kualania. Amo kinnajnankilij keman akin kitauelitayaj kiuijuikaltijkej uan  kitemouayaj maj kualani (1 Ped. 2:23). Ta okachi kuali amo yolijsiuik, taxikoj uan amo moyolkokoj. Yejua ika Biblia techiluia: “Kuali xikitakan akin kixikoj nochi tein kijtouilijkej tajtakolchiuanij” (Heb. 12:2, 3). Jehová no uelis techpaleuis maj tikxikokan tein yeski ouijkayot tein tikpanoskej uan maj amo tiyolijsiuikan.

14. ¿Toni techmachtia maj Abrahán amo yolijsiuini? (Hebreos 6:15; no xikonita taixkopimej).

¹⁴ Xa tisekimej desde ne uejkaujya tikchixtokej maj ejko tonal keman tamis nochi tein amo kuali, uan axkan techtekipachoua porin tiknemiliaj ke xa achtook timomikiliskej uan amo tikitaskejok keman mochiuas. ¿Toni techpaleuis maj amo tiyolijsiuikan uan maj tiksentokakan tikchiakan nejon tonal? Maj tikitakan toni kichiuak Abrahán. Keman Abrahán kipiaya 75 xiujmej uan amo kinpiaya konemej, Jehová kiluij ke kichiuaskia maj ikoneuan “motelmiakilikan” (Gén. 12:1-4). Sayoj ke Abrahán amo kiitak maj mochiuani nochi tein Jehová motenkaujka. Satepan ke kipanouij ueyiat Éufrates, monekik mochias 25 xiujmej para maj ika se milagro yoli ikonetsin Isaac. Uan 60 xiujmej satepan nenkej iixuiuan Esaú uan Jacob (xikonixtajtolti Hebreos 6:15). Sayoj ke Abrahán amo kiitak maj momiakilianij ikoneuan uan maj kiselianij tal tein Jehová motenkaujka kinmakas. Maski ijkon, tel kualtsin mouikaya iuan Dios akin tachijchiuak (Sant. 2:23). Keman Abrahán oksepa nemis, semi yolpakis keman kimatis ke Jehová kintatiochiuij ikoneuan akin nemij itech nochi altepemej porin takuaujtamatik uan amo yolijsiuik (Gén. 22:18). ¿Toni techmachtia nejin? Xa axkan amo tikitaskej maj mochiua nochi tein Jehová motenkaujtok  kichiuas. Sayoj ke komo tikchiuaj kemej Abrahán uan amo tiyolijsiuij, uelis senkis tikmatiskej ke Jehová techtatiochiuis axkan uan okachiok itech xochital (Mar. 10:29, 30).

15. ¿Toni uelis tiktemoskej keman timomachtiskej toselti?

¹⁵ Biblia no ininka tajtoua miakej akin amo yolijsiujkej (Sant. 5:10). Uelis mitsonpaleuis komo tionmomachtia tein kichiujkej. b Kemej tein kipanok David, yejua katka semi telpoch keman kiixpejpenkej maj kinixyekanani israelitas, sayoj ke monekik mochias miak xiujmej para uelis taixyekanas. Simeón uan Ana amo keman kikaujkej Jehová keman kichixtoyaj maj ejko Mesías akin moijtojka ke ualaskia (Luc. 2:25, 36-38). Keman tionmomachtijtos tein kichiujkej, xionmotajtani: “¿Toni kipaleuij maj amo yolijsiui? ¿Keniuj kipaleuij maj amo yolijsiui? ¿Keniuj no uelis ijkon nikchiuas?”. No semi mitsonpaleuis keman tionmomachtis tein kichiujkej akin yolijsiujkej (1 Sam. 13:8-14). Uelis tionmotajtanis: “¿Keyej yolijsiujkej? ¿Toni tein amo kuali kinpanok porin yolijsiujkej?”.

16. Xikonijto keniuj tapaleuia keman amo tiyolijsiuij.

¹⁶ Maj tiknemilikan keniuj techpaleuia komo amo tiyolijsiuij. Techpaleuia maj okachi tiyolpaktokan uan maj okachi tiyolseujtokan. Yejua ika ueli tipaktokej uan kuali timomachiliaj. No techpaleuia maj kuali timouikakan iniuan oksekin uan maj tinochin kuali timouikakan itech nechikol. Komo amo tikualantikisaj keman aksa techchiuilia teisa, tapaleuis maj amo okachi timokualantikan (Sal. 37:8, nota; Prov. 14:29). Sayoj ke tein okachi kuali, keman amo tiyolijsiuij techpaleuia maj tikchiuakan kemej toTajtsin uan maj okachi kuali timouikakan iuan.

17. ¿Toni moneki tikixtaliskej tikchiuaskej?

¹⁷ Semi techpaleuia tinochin komo amo tiyolijsiuij, maski kemansa ouij techkisas, Jehová nochipa techpaleuis maj amo tiyolijsiuikan. Axkan ke tikchixtokej xochital uan tiknextiaj ke amo tiyolijsiuij, uelis senkis tikneltokaskej ke “Jehová kinita akin kimojkatokaj, akin kichiaj maj kinnextili inetasojtalis tein amo tami” (Sal. 33:18). Yejua ika moneki maj tinochin tikixtalikan amo tiyolijsiuiskej.