1. Ubathandelani abantu ababekezelayo?

 SONKE siyabathanda abantu ababekezelayo. Kungani kunjalo? Siyabahlonipha labo abenelisa ukulinda bengakhononi. Siyabathanda labo abasibekezelelayo nxa siphambanisile. Kanti njalo siyababonga labo abasifundisa iBhayibhili ngoba babesibekezelela ngesikhathi sithwala nzima ukuzwisisa okufundiswa liBhayibhili, lokukwamukela kanye lokukusebenzisa ezimpilweni zethu. Phezu kwalokho siyambonga kakhulu uJehova uNkulunkulu wethu ngoba uyasibekezelela.—Rom. 2:4.

2. Kuyini okungenza kube nzima ukuthi sibekezele?

² Lanxa sibathanda abantu ababekezelayo, kwezinye izikhathi thina ngokwethu singakuthola kunzima ukuthi sibekezele. Ngokwesibonelo nxa umi elayinini ende njalo ekhanya ingatshovi futhi kulento oyijahileyo, kungaba nzima ukuthi ubekezele. Singehluleka ukuzibamba sivuke ngolaka nxa abanye bengasicaphula. Kanti njalo kungaba nzima ukuthi siqhubeke sibekezela silindele umhlaba omutsha esiwuthenjiswe nguJehova. Uyafisa yini ukuba ngumuntu obekezelayo kukho konke? Esihlokweni lesi sizaxoxa ngokuthi kutshoni ukubekezela lokuthi kuqakatheke ngani. Sizaphinda sixoxe ngokuthi singenzani ukuze senelise ukubekezela kukho konke.

3. Umuntu obekezelayo wenzani nxa angaqalwa?

³ Ake sixoxe ngezinto ezine esingazenza ukuze kukhanye ukuthi siyabekezela. Okokuqala, umuntu obekezelayo uyaphuza  ukuthukuthela. Nxa angaqalwa kavuki ngolaka futhi kaphindiseli. Kanti njalo nxa kulento emkhathazayo kaphathi abanye kubi. Umutsho othi “ophuza ukuthukuthela” siqala ukuwubona eBhayibhilini evesini echasisa ukuthi uJehova unjani. Ithi ‘nguNkulunkulu olozwelo lesihawu, ophuza ukuthukuthela, ogcwele uthando oluqotho kanye leqiniso.’—Eks. 34:6.

4. Umuntu obekezelayo wenzani nxa kulento ayilindeleyo?

⁴ Okwesibili, umuntu obekezelayo uyenelisa ukulinda ehlalisekile. Nxa kuyikuthi into abeyilindele isiphuzile, katatazeli njalo kacaphuki. (Mat. 18:26, 27) Empilweni zinengi izinto ezenzakalayo ezidinga ukuthi silinde sihlalisekile. Ngokwesibonelo nxa omunye umuntu ekhuluma kumele sibekezele, simlalelisise futhi singambambi umlomo. (Jobe. 36:2) Kanti njalo kumele sibekezele nxa sincedisa umuntu esimfundisayo ukuthi azwisise okufundiswa liBhayibhili kumbe ukuthi atshiye umkhuba omubi alawo.

5. Yiphi enye indlela esingatshengisa ngayo ukuthi siyabekezela?

⁵ Okwesithathu, umuntu obekezelayo kalamawala. Zikhona sibili ezinye izinto eziyabe zifuna ukwenziwa masinyane. Kodwa nxa kulomsebenzi oqakathekileyo okumele wenziwe, umuntu obekezelayo kabi lamawala ahle awudumele futhi kawenzi egijima. Uyazinika isikhathi sokuhlela ukuthi uzawenza njani futhi abesezinika isikhathi eseneleyo sokuwenza.

6. Umuntu obekezelayo wenzani nxa angehlelwa zinhlupho?

⁶ Okwesine, nxa umuntu obekezelayo angehlelwa yibunzima uyaqinisela engakhononi. Izikhathi ezinengi umuntu obekezelayo uyenelisa ukuqinisela. Khona akukubi ukuthi utshele umngane wakho konke okusesifubeni sakho, umtshele lokuthi uzizwa njani ngohlupho lwakho. Lanxa kunjalo umuntu obekezelayo wenza konke okusemandleni akhe ukuthi aqhubeke eqinisela njalo engalahli ithemba. (Kol. 1:11) AmaKhristu kumele azenze izinto  lezi ezine ukuze kukhanye ukuthi ayabekezela. Ngenxa yani? Asixoxeni ngezinye izizatho zakhona.

7. UJakhobe 5:7, 8 utshengisa njani ukuthi ukubekezela kuqakathekile? (Khangela lomfanekiso.)

⁷ Ukubekezela kuqakatheke kakhulu ngoba yikho okuzakwenza sisindiswe. Kumele sibekezele njengezinceku zikaJehova zakudala ezazithembekile, silindele ukuthi uNkulunkulu agcwalise izithembiso zakhe. (Heb. 6:11, 12) IBhayibhili lifanisa amaKhristu lomlimi. (Bala uJakhobe 5:7, 8.) Umlimi usebenza nzima ehlanyela futhi ethelela izilimo zakhe kodwa uyabe engakwazi ukuthi zizathela nini. Lanxa kunjalo uyabekezela alinde ekwazi ukuthi ngelinye ilanga uzavuna. Njengomlimi lathi siqhubeka sisenza okunengi emsebenzini weNkosi lanxa ‘singakwazi ukuthi iNkosi yethu izakuza ngaliphi ilanga.’ (Mat. 24:42) Siyabekezela silinde, singathandabuzi ukuthi ngesikhathi esifaneleyo uJehova uzakwenza konke asithembise khona. Kodwa nxa singaphelelwa yisineke sehluleke ukuqhubeka silindile, singaqalisa ukutshiya uJehova kancane kancane. Kanti njalo singaqalisa ukugijimisa ukwenza izinto esiyabe sicabanga ukuthi zingasenza sithokoze khathesi. Kodwa nxa sibekezela sizenelisa ukuqinisela kuze kube sekucineni besesisindiswa.—Mik. 7:7; Mat. 24:13.

8. Ukubekezela kusinceda njani ukuthi sihlalisane kuhle labanye? (UKholose 3:12, 13)

⁸ Ukubekezela kuyasinceda ukuthi sihlalisane kuhle labanye. Kuyasinceda ukuthi silalelisise nxa abanye bekhuluma. (Jak. 1:19) Ukubekezela kwenza kube lokuthula. Kuyasinceda ukuthi singabambi inhlwa ngekhanda lokuthi singakhulumi amazwi azazwisa abanye ubuhlungu nxa kulento esikhathazayo. Nxa sibekezela asisoze siphangise ukuzonda nxa omunye umuntu angasizwisa ubuhlungu. Asisoze siphindisele kodwa ‘sizaqhubeka sibekezelelana futhi sithethelelana ngenhliziyo yonke.’—Bala uKholose 3:12, 13.

9. Ukubekezela kusinceda njani ukuthi sikhethe kuhle? (IZaga 21:5)

⁹ Ukubekezela kuzasinceda lokuthi sikhethe kuhle. Asisoze senze izinqumo ngamawala kodwa sizathatha isikhathi sichwayisisa ukuze sibone ukuthi yikuphi esingakukhetha. (Bala iZaga 21:5.) Ngokwesibonelo nxa sidinga umsebenzi singalingeka ukuthi sithathe owokuqala esiwutholileyo singazange sikhangele ukuthi ungakuphambanisa njani ukukhonza kwethu. Kodwa nxa singabantu ababekezelayo sizazinika isikhathi sokucabangisisa ngokuthi sizabe sisebenzela ngaphi futhi sisebenza okwesikhathi esingakanani. Sizazibuza lokuthi umsebenzi lo uzasinika yini isikhathi eseneleyo sokuba lezimuli zethu lesokwenza izinto eziphathelane lokukhonza. Nxa singabekezela sizakhetha kuhle.

10. UmKhristu angenzani ukuze ahlale ebekezela?

¹⁰ Thandazela ukuthi uhlale ubekezela. Ukubekezela kuyisithelo somoya ongcwele. (Gal. 5:22, 23) Yikho kumele sithandaze kuJehova sicele umoya ongcwele, sicele lokuthi asincedise sibe lezithelo zawo. Nxa kungaba lolutho olungenza kube nzima ukuthi sibekezele, kumele ‘siqhubeke sicela’ umoya ongcwele ukuze usincedise ukuthi sibekezele. (Luk. 11:9, 13) Singacela lokuthi uJehova asincedise sibone izinto ngendlela yena abona ngayo. Nxa sesithandazile kuyabe sekumele senze konke okusemandleni ethu ukuthi nsuku zonke sibe ngabantu ababekezelayo. UJehova uzasincedisa ukuthi sibekezele kukho konke nxa singahlala sithandaza sicela ukuthi sibe ngabantu ababekezelayo futhi nxa singenza konke okusemandleni  ethu ukuthi sibekezele kungelani lokuthi isimo sinjani.

11-12. UJehova utshengise njani ukuthi uyabekezela?

¹¹ Cabangisisa ngezibonelo eziseBhayibhilini. IBhayibhili lilezibonelo ezinengi zabantu ababetshengisa ukuthi bayabekezela. Nxa singacabangisisa ngalokho okwakusenziwa ngabantu labo singafunda ukubekezela. Singakaxoxi ngabo ake siqale sikhulume ngoJehova, otshengisa ukuthi uyabekezela kukho konke.

¹² Ensimini yase-Edeni uSathane waqambela uJehova amanga futhi wangcolisa ibizo lakhe esithi unguMbusi ongelathando futhi ophatha kubi abantu. UJehova kazange ahle ambulale umqambimanga lo. Watshengisa ukuthi uyabekezela lokuthi uyazibamba ngoba wayekwazi ukuthi kuzathatha isikhathi ukuthi kuze kukhanye ukuthi yena ubusa kuhle. Kuze kube lamuhla uJehova uqhubeka eqinisela esalindele ukuthi abhubhise uSathane ngoba ibizo lakhe lilokhu lingcoliswa. Okunye okwenza uJehova abekezele yikuthi ufuna ukuthi abantu abanengi babe lethuba lokuthola ukuphila okungapheliyo. (2 Phet. 3:9, 15) Ukubekezela kwakhe sekuncede amamiliyoni abantu ukuthi amazi. Nxa singaqhubeka sicabangisisa ngokuthi ukubekezela kukaJehova kusinceda njani sizenelisa ukuqhubeka silindele isikhathi lapho azaqeda khona umumo lo wezinto.

13. UJesu watshengisa njani ukuthi uyabekezela kukho konke njengoYise? (Khangela lomfanekiso.)

¹³ UJesu uyabekezela njengoYise futhi ngesikhathi esemhlabeni watshengisa ukuthi uyabekezela kukho konke. Kumele ukuthi kwakungalula ngaso sonke isikhathi ukuthi abekezele ikakhulu nxa wayekhuluma lababhali labaFarisi ababengabazenzisi. (Joh. 8:25-27) Kodwa uJesu wayephuza ukuthukuthela njengoYise. Nxa abantu babemthethisa kumbe bemhlokoza ngamazwi kazange aphindisele. (1 Phet.  2:23) Langesikhathi esebunzimeni wayeqinisela engakhononi. Yikho iBhayibhili lisitshela ukuthi ‘sicabangisise ngalowo owaqiniselayo ngesikhathi izoni zikhuluma amazwi amabi’ ngaye. (Heb. 12:2, 3) Lathi uJehova angasincedisa senelise ukubekezelela loba yibuphi ubunzima obungasehlela.

14. Sifundani ku-Abrahama? (UHebheru 6:15) (Khangela lomfanekiso.)

¹⁴ Singenzani nxa sibona angani ukuphela komumo lo wezinto sekuphuzile? Mhlawumbe sasikhangelele ukuthi ukuphela kuzafika masinyane. Kungenzakala sesicabanga lokuthi akusoze kufike sisaphila. Kuyini okungasinceda ukuthi sibekezele futhi siqhubeke silindile? Cabanga ngalokho okwenzakala ku-Abrahama. Ngesikhathi eleminyaka engu-75 futhi elokhu engelamntwana uJehova wamthembisa wathi: “Ngizakwenza ube yisizwe esikhulu.” (Gen. 12:1-4) U-Abrahama wasibona sigcwaliseka yini isithembiso lesi? Kazange abone konke okwakuphathelane laso kugcwaliseka. Kwathi sekudlule iminyaka engu-25 u-Abrahama echaphe umfula uYufrathe, uJehova wenza isimangaliso. U-Abrahama waba lendodana u-Isaka njalo kwathi sekudlule eminye iminyaka engu-60 kwazalwa abazukulu bakhe u-Esawu loJakhobe. (Bala uHebheru 6:15.) Kodwa u-Abrahama kazange azibone izizukulwane zakhe zisiba yisizwe esikhulu futhi zithatha iLizwe Lesithembiso. Lanxa kunjalo indoda le eyayithembekile yaqhubeka ingumngane omkhulu kaJehova uMdali wayo. (Jak. 2:23) Nxa u-Abrahama esevusiwe uzathokoza kakhulu ukuzwa ukuthi izizwe zonke zabusiswa ngenxa yokholo lwakhe kanye lokubekezela kwakhe. (Gen. 22:18) Sifundani? Kungenzakala ukuthi lathi singaziboni zonke izithembiso zikaJehova  zigcwaliseka khathesi. Kodwa nxa singabekezela njengo-Abrahama uJehova kasoze ayekele ukusibusisa khathesi njalo uzasibusisa kakhulu emhlabeni wakhe omutsha asithembise wona.—Mak. 10:29, 30.

15. Kuyini okunye esingataditsha ngakho?

¹⁵ IBhayibhili likhuluma ngabantu abanengi ababebekezela. (Jak. 5:10) Kungaba kuhle ukuthi uzinike isikhathi sokutaditsha ngabantu laba. b Ngokwesibonelo lanxa uDavida wagcotshwa esesemncane ukuthi abe yinkosi yako-Israyeli, kwadingeka ukuthi alinde okweminyaka engakaqalisi ukubusa. USimiyoni lo-Ana bakhonza uJehova bethembekile besalindele ukuthi uMesiya othenjisiweyo afike. (Luk. 2:25, 36-38) Ngesikhathi utaditsha ngomunye umuntu oseBhayibhilini owabekezelayo, zibuze imibuzo le: Kuyini okungabe kwamnceda ukuthi abekezele? Ukubekezela kwamnceda njani? Ngingamlingisela njani? Okunye okuzakunceda yikufunda langalabo abangazange babekezele. (1 Sam. 13:8-14) Ungazibuza ukuthi: ‘Kuyini okungabe kwenza ukuthi behluleke ukubekezela? Yibuphi ubunzima obabehlelayo ngenxa yokungabekezeli kwabo?’

16. Ukubekezela kuzasinceda ngani?

¹⁶ Cabangisisa ngokuthi ukubekezela kuzakunceda ngani. Nxa sibekezela sizahlala sithokoza njalo sihlalisekile okutsho ukuthi asisoze sihlale sikhathazekile futhi sizakuba lempilakahle. Nxa sibekezelela abanye sizazwanana labo njalo kuzakuba lokumanyana ebandleni. Nxa omunye engasicaphula thina besesiphuza ukuzonda, izinto azisoze zibe zimbi kakhulu. (Hubo. 37:8, amabala angaphansi; Zaga. 14:29) Okuhle kakhulu yikuthi nxa sibekezela siyabe silingisela uBaba wethu osezulwini futhi sizakuba ngabangane bakhe abakhulu.

17. Kuyini okumele sizimisele ukukwenza?

¹⁷ Ukubekezela kuhle kakhulu njalo kuyasinceda ngendlela ezinengi. Lanxa kunzima kwezinye izikhathi ukuba ngabantu ababekezelayo, uJehova uzasincedisa ukuthi siqhubeke sizama. Sisalindele ukuthi umhlaba omutsha ufike, singaqiniseka ukuthi “amehlo kaJehova abakhangele labo abamesabayo, labo abalindele uthando lwakhe oluqotho.” (Hubo. 33:18) Asizimiseleni sonke ukuqhubeka sigqoka ukubekezela.