1. Hadia mbörö wa omasi ita ba niha si so faʼebolo dödö?

 OMASI ita na so niha sangoromaʼö faʼebolo dödö. Taʼameʼegö tödö niha sombaloi si lö fatahi-tahi. Taʼandrö saohagölö ba niha sangoromaʼö faʼebolo dödö ba ginötö tafalua zala khönia. Ba taʼandrö göi saohagölö khö zamahaʼö yaʼita ba Zura Niʼamoniʼö börö me ebolo dödönia wanolo yaʼita ba wamahaʼö, ba wanemaʼö hegöi ba wamalua si no tafahaʼö yaʼita. Ba sabölö tohudenia, taʼandrö sibai saohagölö khö Yehowa, börö me ebolo dödönia khöda!—Rom. 2:4.

2. Hezo manö abua khöda ba wangoromaʼö faʼebolo dödö?

² Hewaʼae taʼameʼegö tödö sibai niha sangoromaʼö faʼebolo dödö, hizaʼi tola manö abua khöda ba wangoromaʼö faʼebolo dödö andrö. Duma-dumania, abua khöda ba wangoromaʼö faʼebolo dödö ba ginötö so ita ba lala si no fasösö moto, mendrua manö na no farege ginötö. Tola mofönu ita na so niha sangandrö horöda. Ba börö me lö khöda faʼebolo dödö, itaria abua khöda ba wombaloi nifabuʼu Yehowa sanandrösa ba gulidanö si bohou. Hadia omasiʼö na tedou ndraʼugö ba wangoromaʼö faʼebolo dödö? Ba artikel daʼa, tatutunö dania hadia geluaha waʼebolo dödö ba hana wa moguna sibai daʼö. Tatutunö göi hadia zanolo yaʼita ba wondrouʼö faʼebolo dödö niʼokhögöda.

3. Hadia nifalua niha sebolo tödö na so niha sangandrö fönunia?

³ Datatutunö hewisa wangoromaʼöda faʼebolo dödö ba zi öfa lala andre. Si oföna, lö alio mofönu niha sebolo tödö. Na so niha sangandrö fönunia, ihöna khönia wanaha tödö, ba lö  isulöni nifaluara. Lö ilau mbakhu dödönia ba niha hewaʼae no fawuka gera-erania. Ngawua wehede ”lö alio mofönu”, muʼogunaʼö ia si oföna sibai ba Zura Niʼamoniʼö me mututunö wa Yehowa andrö ”Lowalangi sahakhö tödö, . . . si sökhi böwö, lö alio mofönu ba fahöna waʼomasi si lö faröi ba faʼaduhu”.—2 Mo. 34:6.

4. Hadia nifalua niha sebolo tödö na so nibaloinia?

⁴ Si dua, niha sebolo tödö so khönia wombaloi ba fanaha tödö. Na ara alua nidöna-dönania, iforege enaʼö lö khönia faʼaombö dödö ba lö alio aukhu ia. (Sango. 7:8) Moguna taforomaʼö wanaha tödö ba ngawalö zalua ba waʼaurida. Duma-dumania, moguna tahaogö wamondrondrongo na fahuhuo zi samösa niha, ba tataha dödöda enaʼö lö tataba dalu huhuonia. (Yob. 36:2) Moguna göi ebolo dödöda ba ginötö tatolo niha enaʼö aboto ba dödönia wamahaʼö ba Zura Niʼamoniʼö hegöi ba wamöhöli amuata si lö sökhi nifaluania.

5. Hadia lala tanö böʼö ba wangoromaʼö faʼebolo dödö?

⁵ Si tölu, niha sebolo tödö lö ihalö gangetula ba waʼaösö. Itaria, moguna böi tataha-taha ba wangai angetula. Na so halöwö si tohude, niha si so faʼebolo dödö lö iʼanemaiʼö ifalua daʼö ba waʼaösö. Hizaʼi, ibeʼe ginötönia ba woʼangeragö hadia zinangea ifalua. Ba lö göi iʼasiwai halöwö andrö ba waʼaösö. Itatugöi enaʼö sökhi wamaluania halöwö andrö.

6. Hadia nifalua niha sebolo tödö na alua khönia gabula dödö?

⁶ Si öfa, niha sebolo tödö lö mokökö-kökö ia ba ginötö alua khönia gabula dödö. Eluahania, moʼamakhaita waʼebolo dödö andrö ba waʼanau gölö. Tatu manö, lö fasala na tatutunö ba niha nifaduhusida tödö hadia gabula dödö salua khöda ba hewisa dödöda ba zalua andrö. Hizaʼi, niha si so faʼebolo dödö iʼangerönusi zi sökhi salua ba waʼaurinia ba ifalua wondrege zi sökhi ba wangai halöwö khö Yehowa si fao faʼomuso dödö. (Kol. 1:11)  Fefu nono mbanua Yehowa, moguna laʼoʼö zi öfa lala andre ba wangoromaʼö faʼebolo dödö. Hadia mbörö? Datatutunö.

7. Moloʼö Yakobo 5:7, 8, hana wa moguna so khöda waʼebolo dödö? (Faigi gambara.)

⁷ Moguna so khöda waʼebolo dödö ba wangokhögö faʼauri si lö aetu. Simane ono mbanua Lowalangi si lö faröi me götö föna, moguna tabaloi si fao faʼebolo dödö irege ifalua fefu nifabuʼunia andrö Lowalangi. (Heb. 6:11, 12) Ifagölösi waʼaurida andre Sura Niʼamoniʼö simane sananö sinanö. (Baso Yakobo 5:7, 8.) Iforege sananö sinanö ba wananö hegöi ba wombuwui sinanönia, hizaʼi lö iʼila ifaso ginötö waʼatedou zinanönia andrö. Börö daʼö, moguna ibaloi si fao faʼebolo dödö ba faduhu sibai dödönia wa hasambalö manöi zinanönia andrö. Simanö göi ita, lö tebulö tafalua halöwö ba wamati hewaʼae ’lö taʼila ginötö waʼatohare Zoʼaya’. (Mat. 24:42) Tabaloi si fao faʼebolo dödö ba faduhu dödöda wa hasambalö ifalua Yehowa fefu zi no ifabuʼu ba ginötö si no itatugöi. Na lö khöda faʼebolo dödö, tola manö atage ita wombaloi ba ibörögö faröi ita ba zindruhu. Te ibörögö tedönisi dödöda ba wolohi faʼomuso dödö si lö arara. Hizaʼi, na so khöda waʼebolo dödö, tola anau gölöda irugi gamozua ba teʼorifi ita.—Mi. 7:7; Mat. 24:13.

8. Hewisa waʼebolo dödö möi fanoloda ba wangokhögö fahuwusa si sökhi ba niha böʼö? (Kolose 3:12, 13)

⁸ Möi fanoloda waʼebolo dödö ba wangokhögö fahuwusa si sökhi ba niha böʼö. Daʼö zanolo yaʼita enaʼö tahaogö wamondrondrongo ba ginötö fahuhuo niha böʼö. (Yak. 1:19) Faʼebolo dödö göi zanolo yaʼita ba wondrorogö faʼatulö. Daʼö zolumöʼö yaʼita enaʼö lö tafalua mazui tawaʼö wehede si lö fakhamö taʼangeragö ba ginötö fawuka wangera-ngerada. Na so khöda waʼebolo dödö, lö alio mofönu ita na so zangafökhöiʼö tödöda. Moroi na tasulöni, abölö sökhi na ’lö tebulö khöda waʼebolo dödö zamösana ba faoma taʼefaʼö zala nawöda soroi ba dödö’.—Baso Kolose 3:12, 13.

9. Hewisa waʼebolo dödö möi fanoloda ba ginötö tahalö gangetula? (Amaedola 21:5)

⁹ Tola itolo ita faʼebolo dödö ba wangai angetula sabölö sökhi. Moroi na aösö-aösö ita ba wangai angetula, tahaogö woʼangeragö hadia gangetula nihalöda ba tafili hezo gangetula sabölö sökhi. (Baso Gamaedola 21:5.) Duma-dumania, na taʼalui halöwö, tola manö aoha khöda ba wanemaʼö halöwö sawena tasöndra hewaʼae na lua-luania lö möi ita ba gangowuloa hegöi ba wanuriaigö. Hizaʼi, na so khöda wombaloi si fao faʼebolo dödö, tahaogö taʼangeragö ua sakali hawaʼaröu nahia wohalöwö andrö, hawaʼoya ginötöda ba wohalöwö, ba hadia lua-luania ba nösi nomoda hegöi ba gamakhaitada khö Yehowa. Na so khöda waʼebolo dödö, lö tahalö gangetula si lö tefaudu.

10. Hewisa zi samösa niha Keriso ba wondrouʼö hegöi ba wondrorogö faʼebolo dödö?

¹⁰ Angandrö enaʼö tedou waʼebolo dödömö. Faʼebolo dödö andrö no bua moroi ba geheha niʼamoniʼö. (Gal. 5:22, 23) Börö daʼö, tola taʼandrö geheha niʼamoniʼö hegöi fanolo moroi khö Yehowa enaʼö tola taʼokhögö waʼebolo dödo. Na alua gabula dödö sanandraigö faʼebolo dödöda, ’böi taböhöli wangandrö’ eheha niʼamoniʼö enaʼö tola taforomaʼö waʼebolo dödö. (Luk. 11:9, 13) Taʼandrö göi wanolo moroi khö Yehowa enaʼö tola taʼokhögö lala wangera-ngerania. Na no aefa mangandrö, moguna göi taforege ba wangoromaʼö faʼebolo dödö ero maʼökhö. Na lö mamalö mangandrö ita enaʼö so khöda waʼebolo dödö hegöi ba  wangoromaʼö amuata andrö, hasambalö itolo ita Yehowa enaʼö tedou waʼebolo dödöda, hewaʼae na tenga niha sebolo tödö ita mböröta.

11-12. Hewisa Yehowa ba wangoromaʼö faʼebolo dödö?

¹¹ Angerönusi duma-duma si so ba Zura Niʼamoniʼö. Oya duma-duma niha sebolo tödö nisura ba Zura Niʼamoniʼö. Na taʼangerönusi duma-duma andrö, tola tafahaʼö ita hadia manö lalada ba wangoromaʼö faʼebolo dödö. Fatua lö tadunö-dunö duma-duma andrö, datatutunö duma-duma fondrege zi sökhi sanandrösa ba wangoromaʼö faʼebolo dödö, yaʼia daʼö Yehowa.

¹² Ba Kabu Edena, iböbögö zi lö duhu ba iʼobousi döi Yehowa Satana, irege aombö dödö Khawa wa Yehowa andrö Samatörö fondrege zatulö ba safönu faʼomasi. Hizaʼi, lö iʼanemaiʼö ihori zanandrawa andrö Yehowa. Iforomaʼö waʼebolo dödö hegöi fanaha tödö, börö me iʼila wa moguna mubeʼe ginötö ba wangoromaʼö wa Famatörönia no fondrege zi sökhi. Sagötö wombaloinia, itaögö fefu zi lö duhu niböbögö khönia. Börö me ibaloi si fao faʼebolo dödö, ato niha sangokhögö dötönafö ba wanema faʼauri si lö aetu. (2 Fe. 3:9, 15) Buania, zuta niha tola lafahaʼö ira sanandrösa khö Yehowa. Sindruhu sa, oya mbua si sökhi börö waʼebolo dödö Yehowa. Na taʼosambuaʼö dödöda ba daʼö, aoha khöda ba wombaloi Yehowa ba wangohori ulidanö si lö sökhi andre.

13. Hewisa wangoromaʼö Yesu wa moʼahonoa ia ba woloʼö faʼebolo dödö Namania? (Faigi göi gambara.)

¹³ Moʼahonoa Yesu ba woloʼö faʼebolo dödö Namania, ba iforomaʼö gamuata daʼö me so ia ba gulidanö. Tatu lö aoha khönia ba wangoromaʼö faʼebolo dödö andrö, mendrua manö me fahuhuo ia ba niha sangila amakhoita hegöi khö ndra Farizaiʼo. (Yoh. 8:25-27) Hizaʼi, simane Amania, lö alio mofönu Yesu.  Lö ilau mbalönia ba ginötö lafakao mazui laʼandrö wönunia. (1 Fe. 2:23) Ebolo dödönia ba wanaögö ngawalö wamakao ba lö mokökö-kökö ia. Andrö wa ifarou ita Sura Niʼamoniʼö enaʼö ’tatörö-törö tödöda ia, sanau ölö ba wanaha tödö me lalawa ia ira niha sebua horö ba wehede’! (Heb. 12:2, 3) Börö wanolo moroi khö Yehowa, tola göi anau gölöda si fao faʼebolo dödö ba wanaögö ngawalö wamakao salua khöda.

14. Hadia wamahaʼö nihalöda moroi ba waʼebolo dödö Gaberahamo? (Heberaiʼo 6:15) (Faigi göi gambara.)

¹⁴ Hewisa na lö nasa alua nidöna-dönada sanandrösa ba gamozua götö danö andre? Te no ara tabalo-baloi waʼatoharenia, ba ataʼu ita alai na lö fakhamö taʼila dania waʼaluania. Hadia zanolo yaʼita enaʼö tabaloi ia si fao faʼebolo dödö? Angeragö duma-duma Gaberahamo. Me 75 fakhe ndröfinia ba lö nasa soʼono ia, ifabuʼu khönia Yehowa, ”Ubaliʼö ndraʼugö soi sebua.” (1 Mo. 12:1-4) Hadia ahori iʼila Aberahamo waʼalua nifabuʼu andrö? Löʼö. Me no aefa iʼötö Nungo Nidanö Oiferati, ibaloi mato 25 fakhe tö awena tumbu khönia Gizaʼaki, ba 60 fakhe aefa daʼö awena tumbu maʼuwunia sotöi Ezau hegöi Yakobo. (Baso Heberaiʼo 6:15.) Hizaʼi, lö fakhamö iʼila hewisa me tobali soi sebua ngaʼötönia ba laʼokhögö Danö Amabuʼula. Hewaʼae simanö, lö mamalö waʼomuso dödönia börö me iʼokhögö wahuwusa saro khö Zomböi yaʼia. (Yak. 2:23) Na tesusugi dania Gaberahamo, hawaʼomuso dödönia me iʼila wa fefu soi ba gulidanö andre latema mbua moroi ba wamati hegöi faʼebolo dödönia! (1 Mo. 22:18) Hadia wamahaʼönia khöda? Te lö taʼila fefu waʼalua nifabuʼu Yehowa. Hizaʼi, na so khöda waʼebolo dödö simane Aberahamo, faduhu dödöda wa  hasambalö ifahowuʼö ita Yehowa iadaʼa hegöi ba gulidanö si bohou si no ifabuʼu ba zi so miföna.—Mrk. 10:29, 30.

15. Hadia zinangea taʼangeragö sagötö tafalua wamahaʼö samösa?

¹⁵ Oya duma-duma niha sebolo tödö si no tesura ba Zura Niʼamoniʼö. (Yak. 5:10) Sökhi na tafahaʼö ita ba daʼö ba tafalua riset. b Duma-dumania, awuyu-wuyu ndröfi Dawido me latuyu ia tobali razo ba ndraono Gizaraʼeli ba moguna ibaloi mato hauga fakhe fatua lö tebeʼe khönia dadaoma waʼarazo. Lö faröi Zimeoni hegöi Ana ba wamosumange Yehowa, ba labaloi waʼatohare Mesia si no mufabuʼu. (Luk. 2:25, 36-38) Sagötö öfahaʼö ndraʼugö ba waö-waö waʼaurira andre, angeragö wanofu-nofu daʼa: ’Hadia zanolo yaʼira ba wangoromaʼö faʼebolo dödö? Hadia mbua nitemara börö me so khöra waʼebolo dödö? Hewisa woloʼöda duma-dumara?’ Tola göi öfahaʼö ndraʼugö ba duma-duma niha si lö mangoromaʼö faʼebolo dödö. (1 Sa. 13:8-14) Sofu khöu samösa: ’Hana wa lö khöra faʼebolo dödö? Hadia lua-luania daʼö?’

16. Hadia mbua nitemada na so khöda waʼebolo dödö?

¹⁶ Angeragö mbua nitemau na öforomaʼö waʼebolo dödö. Na so khöda waʼebolo dödö, hasambalö tarasoi waʼomuso dödö hegöi faʼahono dödö. Lö göi alio mofökhö ita ba lö fawuka gera-erada. Na ebolo dödöda ba niha böʼö, tola taʼokhögö wahuwusa si sökhi khöra ba itugu teʼosambuaʼö göi mbanua niha Keriso si farahu yaʼita. Na so zangandrö fönuda, lö alio aukhu ita ba lö taʼebua-buaʼö gabula dödö andrö. (Si. 37:8, nis.; Amd. 14:29) Hizaʼi sabölö tohude, na so khöda waʼebolo dödö, no taʼoʼö Namada si so ba zorugo ba itugu ahatö ita khönia.

17. Hadia gangetula sinangea tahalö?

¹⁷ Faʼebolo dödö andrö no amuata si sökhi sibai ba oya mbua nitemada na taʼokhögö ia! Hewaʼae abua ba wangokhögö faʼebolo dödö, hizaʼi börö wanolo moroi khö Yehowa tola tadouʼö ita ba wangoromaʼö amuata andrö. Ba sagötö wombaloida ulidanö si bohou si fao faʼebolo dödö, tola faduhu dödöda wa ”hörö Yehowa zondrorogö niha samosumange yaʼia, sanötöna faʼomasinia si lö faröi”. (Si. 33:18) Datahalö gangetula ba wangoromaʼö faʼebolo dödö.