1. Ahabw’enki nookunda abantu abarikugumisiriza?

 TWENA nitukunda abantu abarikugumisiriza. Ahabw’enki? Nituha ekitiinisa abarikutegyereza batagwirwe kubi. Twakora enshobe abandi bakatugumisiririza nitwehurira gye. Kandi nitusiima owaatwegyeise Baibuli ahabw’okugira ngu akatugumisiririza obu twabaire nitugumirwa kwega, kwikiriza nari kugyendera aha bi Baibuli erikwegyesa. Okukira munonga, nitusiima Yehova Ruhanga ahabw’okutugumisiririza.—Rom. 2:4.

2. Ni mbeera ki ezirikubaasa kutureetera kugumirwa kugumisiriza?

² N’obu turaabe nitusiima abantu abarikugumisiriza, obumwe nitubaasa kugumirwa kugumisiriza. Nk’eky’okureeberaho, nitubaasa kutaguma twikaikaine twamara obwire bwingi tutegyereize omu runyiriri kandi obwo tukyerereirwe. Nitubaasa kurahuka kugira ekiniga abandi baatugwisa kubi. Kandi obumwe nikibaasa kutugumira kuguma tutegyereize ensi ensya ei Yehova arikuturaganisa. Okaayenzire kwongyera kugumisiriza? Omu kicweka eki, nituza kureeba okugumisiriza nikimanyisa ki, n’ahabw’enki ni kikuru kukugira. Nituza n’okushwijuma ebirikubaasa kutuhwera kwongyera kugumisiriza.

3. Omuntu orikugumisiriza naatwaza ata baamugwisa kubi?

³ Yetegyereze emiringo ena oku turikubaasa kworeka okugumisiriza. Ogw’okubanza, omuntu orikugumisiriza tarikurahuka  kugira ekiniga. Naateeraho kuguma aikaikaine kandi tarikuhoora enzigu abandi baamugwisa kubi. Ebigambo “otarahuka kugira ekiniga” nibibanza kugambwaho omu Baibuli ahu Yehova arikugambwaho nka “Ruhanga ow’okusaasira n’embabazi, otarahuka kugira ekiniga, oijwire embabazi n’amazima.”—Kur. 34:6.

4. Omuntu orikugumisiriza naatwaza ata kyamwetengyesa kutegyereza?

⁴ Ogwa kabiri, omuntu orikugumisiriza naategyereza aikaikaine. Eki arikuba ategyereize kyakyerererwa, omuntu ogwo naaguma atuurize kandi tarikuguubwa kubi. (Mat. 18:26, 27) Hariho embeera nyingi ahu kirikutwetengyesa kugumisiriza twikaikaine. Nk’eky’okureeberaho, twine kuhurikiza omuntu yaaba naagamba, tutamushazire ekirimi. (Yob. 36:2) Kandi nikibaasa kutwetengyesa kugumisiriza twaba nituhwera omwegi kwetegyereza enyegyesa ya Baibuli nari kusingura omuze mubi.

5. Ni muringo ki ogundi oku turikubaasa kworeka okugumisiriza?

⁵ Ogwa kashatu, omuntu orikugumisiriza naayetwara. N’amazima hariho embeera ezirikwetengyesa kugira ekyakorwa ahonaaho. Kwonka omuntu orikugumisiriza yaaba aine ekintu kikuru eki aine kuhikiiriza, tarikurahukiiriza kutandika kukikora nari kukiheza. Kureka naataho obwire buringaniire kutebeekanisa eki araakore. Kandi akoresa obwire burikumara kukihikiiriza.

6. Omuntu orikugumisiriza naatwaza ata yaagyezibwa nari yaahikwaho oburemeezi?

⁶ Ogwa kana, omuntu orikugumisiriza naateeraho kwemera oburemeezi atarikwetomboita. Amazima gari ngu tikigwire kugambira munywani waawe ow’aha mara oku orikwehurira ahabw’oburemeezi obu orikurabamu. Kwonka omuntu orikugumisiriza  naakora kyona ekirikubaasika kuguma aine emiteekateekyere mirungi. (Kol. 1:11) Abakristaayo twena, twine kworeka ngu nitugumisiriza omu miringo egyo yoona. Ahabw’enki? Ka tureebe zimwe aha nshonga.

7. Kurugiirira ahari Yakobo 5:7, 8, ahabw’enki okugumisiriza ni kukuru munonga? (Reeba n’ekishushani.)

⁷ Twine kugumisiriza kubaasa kucungurwa. Nk’abaheereza ba Yehova abeesigwa aba ira, twine kutegyereza tugumisirize kuhitsya obu araahikiirize ebiraganiso bye. (Heb. 6:11, 12) Baibuli neegyeragyeranisa embeera yaitu n’ey’omuhingi. (Shoma Yakobo 5:7, 8.) Omuhingi naakora n’amaani kubyara n’okwitirira ebimera bye, kwonka naaba atarikumanya obu biraamere. N’ahabw’ekyo omuhingi naategyereza agumisiriize, aine obwesigye ngu naija kusharuura ebihingwa bye. Nikyo kimwe, nituguma nitwehenenga omu mirimo y’Obukama, n’obu turaabe ‘tutarikumanya kiro eki Mukama waitu araizireho.’ (Mat. 24:42) Nitutegyereza tugumisiriize, turikumanya ngu Yehova naija kuhikiiriza ebiraganiso bye byona omu bwire bwe obuhikire. Twaba tutagumisiriize nitubaasa kuruha kutegyereza kandi mporampora tutandikye kuruga omu mazima. Nitubaasa kutandika kusherura ebintu ebirikutureetera okushemererwa kwa kaanya kakye. Kwonka twagumisiriza kuhitsya aha muheru nitwija kujunwa.—Mik. 7:7; Mat. 24:13.

8. Okugumisiriza nikutuhwera kuta omu ku turikutwariza abandi? (Abakolosai 3:12, 13)

⁸ Okugumisiriza nikutuhwera kutwariza gye abandi. Nikutuhwera kuhurikiza gye abandi baaba nibagamba. (Yak. 1:19) Okugumisiriza nikureetaho obusingye. Nikuturinda kutarahuka kugira eki twakora nari kugamba kubi twaba twine amaganya. Kandi twaba nitugumisiriza, titurikwija kurahuka kugira ekiniga haagira owaatutwariza kubi. Omu mwanya gw’okuhoora enzigu, nitwija ‘kugumisiririzana’ kandi ‘tusaasirane.’—Shoma Abakolosai 3:12, 13.

9. Okugumisiriza nikutuhwera kuta twaba twine eki turikwenda kucwamu? (Enfumu 21:5)

⁹ Okugumisiriza nikubaasa kutuhwera n’okucwamu gye. Omu mwanya gw’okurahukiiriza nari kucwamu tutabandize kuteekateeka, nitwija kuteeraho kucondooza n’okushwijuma ebi turikwenda kucwamu. (Shoma Enfumu 21:5.) Nk’eky’okureeberaho, twaba nitusherura omurimo nitubaasa kwohibwa kugwikiriza n’obu gwakuba nigutaahataaha omu ntebeekanisa yaitu y’okuramya Yehova. Kwonka twagumisiriza, nituteekateeka aha birikutwarirwamu, nk’omwanya, obwire, oku omurimo guraakwate aha ka yaitu n’aha mukago gwaitu na Yehova. Twagumisiriza nitwetantara kucwamu kubi.

10. Omukristaayo naabaasa kwongyera ata kugumisiriza?

¹⁰ Shaba kwongyera kugumisiriza. Okugumisiriza ni gumwe aha mitwarize y’omwoyo gurikwera. (Gal. 5:22, 23) N’ahabw’ekyo nitubaasa kushaba Yehova kutuha omwoyo gurikwera n’okutuhwera kugira emitwarize yaagwo. Twahikwaho embeera erikugyeza okugumisiriza kwaitu, nituguma nitushaba omwoyo gurikwera kutuhwera kugumisiriza. (Luk. 11:9, 13) Kandi nitushaba Yehova kutuhwera kureeba enshonga nk’oku arikuzireeba. Bwanyima y’okushaba, twine kukora ekirikubaasika kugumisiriza buri izooba. Twayongyera kushaba kugira omutwarize gw’okugumisiriza kandi tukateeraho kugworeka, nitwija kwongyera kugugira.

11-12. Yehova ayorekire ata okugumisiriza?

 ¹¹ Teekateeka aha by’okureeberaho by’omu Baibuli. Baibuli neegamba aha bantu baingi abaabaire nibagumisiriza. Twateekateeka aha by’okureeberaho ebyo, nitwega oku turikubaasa kworeka okugumisiriza. Tutakashwijumire bimwe aha by’okureeberaho ebi, ka tubanze tureebe eky’okureeberaho ky’okugumisiriza ekirikukirayo, ekya Yehova.

¹² Omu musiri Edeni Sitaane akashiisha eiziina rya Yehova nari ou ririkujwekyera, arikworeka ngu ti mutegyeki oine rukundo kandi omuringaaniza. Yehova omu mwanya gw’okucwekyereza omunyabishuba ogwo ahonaaho, akooreka okugumisiriza n’okwezibira arikumanya ngu nikiija kutwara obwire kworeka ngu obutegyeki bwe nibwo burikukirayo oburungi. Kandi, agumisiriize ebijumo ebirikugambwa aha eiziina rye. Ekindi, Yehova ategyereize agumisirize ngu abantu baingi babaase kugira omugisha gw’okutunga amagara agatahwaho. (2 Pet. 3:9, 15) N’ekirugiremu, abantu baingi babaasize kwega ahari Yehova. Twata omutima aha birungi by’okugumisiriza kwa Yehova, nikiija kutworobera kutegyereza ekiro kye.

13. Yesu akatooreza ata okugumisiriza kwa Ishe omu muringo oguhikiriire?

¹³ Yesu naatooreza okugumisiriza kwa Ishe omu muringo oguhikiriire, kandi omutwarize ogu akagworeka obu yaabaire ari omu nsi. Nikibaasa kuba ekyabaire kitoorobi kugumisiririza abandi, okukira munonga abahandiiki n’Abafarisaayo endyarya. (Yoh. 8:25-27) Kwonka nka Ishe, akaba atarikurahuka kugira ekiniga. Tarabagaruriize ku baamujumire nari bakamutwariza kubi. (1 Pet. 2:23) Yesu akagumisiririza okugyezibwa atarikwetomboita. Niyo nshonga ahabw’enki Baibuli erikutuhiga eti: “Muteekateekye ahari  ogwo owaagumisiririize okwangwa kutyo oku abasiisi baamwangire.” (Heb. 12:2, 3) Ahabw’obuhwezi bwa Yehova, naitwe nitubaasa kugumisiririza okugyezibwa kwona.

14. Nitwegyera ki aha kugumisiriza kw’Abrahamu? (Abaheburaayo 6:15) (Reeba n’ekishushani.)

¹⁴ Kwonka shi ku twakuba nitureeba ngu emperu ekyerereirwe? Obundi bamwe omuriitwe nituteekateeka ngu emperu ekaabaire yaahikire, kandi hati twerarikirire ngu nitubaasa kutagireeba. Niki ekiraatuhwere kutegyereza tugumisiriize? Teekateeka aha ky’okureeberaho ky’Abrahamu. Obu Abrahamu yaabaire ari omugurusi w’emyaka 75, kandi ataine mwana Yehova akamuraganisa ati: ‘Ninyija kukuhindura eihanga rihango.’ (Kut. 12:1-4) Mbwenu shi Abrahamu akareeba okuraganisa okwo nikuhikiirira? Tarakureebire nikuhikiirira omu bwijwire. Bwanyima y’Abrahamu kwambuka Omugyera Furaati akategyereza kumara emyaka 25, reero omutabani Isaaka yaazaarwa omu muringo gw’eky’okutangaaza, kandi bwanyima y’emyaka 60, baijukuru be Esau na Yakobo nabo bakazaarwa akihuriire. (Shoma Abaheburaayo 6:15.) Kwonka Abrahamu tarabaasize kureeba baijukuru be barikuba eihanga rihango kandi barikuhungura ensi Eyaaraganisiibwe. Kwonka, omushaija ogwo omwesigwa akaba aine omukago guhami n’Omuhangi we. (Yak. 2:23) Kandi Abrahamu ku araazookye, ka naija kushemererwa kumanya ngu okwikiriza n’okugumisiriza kwe kukareetera amahanga maingi kutunga emigisha! (Kut. 22:18) Eky’okwega? Naitwe nitubaasa kutareeba byona ebi Yehova arikuraganisa birikuhikiirira. Kwonka, twagumisiriza nk’Abrahamu nitubaasa kugira obwesigye ngu Yehova  naija kutuha emigisha hati n’omu nsi ensya ei arikuturaganisa.—Mak. 10:29, 30.

15. Nitubaasa kucondooza ahari ki omu kweyegyesa kwaitu?

¹⁵ Baibuli erimu eby’okureeberaho bingi eby’abantu abaagumisiriize. (Yak. 5:10) Taho ekigyendererwa ky’okwega aha bantu nk’abo. b Nk’eky’okureeberaho, n’obu Daudi araabe yaatoorainwe kuba omugabe wa Israeli akiri muto, akaba aine kutegyereza kutandika kutegyeka. Simeoni na Anna bakaramya Yehova omu bwesigwa bategyereize Mesia owaaraganisiibwe. (Luk. 2:25, 36-38) Waaba nooyega ebirikukwata aha bantu abo teeraho kusherura eby’okugarukamu by’ebibuuzo ebi: Niki ekyahweraire omuntu ogu kworeka okugumisiriza? Akagasirwa ata ku yaagumisiriize? Nimbaasa kumutooreza nta? Kandi noobaasa kugasirwa waayegyera n’ahari abo abataragumisiriize. (1 Sam. 13:8-14) Noobaasa kwebuuza oti: ‘Niki ekyabareetaire kutagumisiriza? Bakatunga buremeezi ki ahabw’okutagumisiriza?’

16. Ni birungi ki ebirikuruga omu kugumisiriza?

¹⁶ Teekateeka aha birungi ebirikuruga omu kugumisiriza. Twaba nitugumisiriza, nitushemererwa kandi nituguma twikaikaine. N’ahabw’ekyo okugumisiriza nikutuhwera kugira amagara marungi. Twagumisiririza abandi, nitugira enkoragana nungi nabo. Ekibiina kyaitu nikyongyera kugira obumwe. Omuntu yaatugwisa kubi, twaba tutarikurahuka kugira ekiniga nitureetera embeera kutongyera kusiisikara. (Zab. 37:8; Enf. 14:29) Ekikuru munonga, twagumisiriza nituba nitutooreza Tataitwe ow’omu iguru kandi nitwongyera kumwirira haihi.

17. Twine kumariirira kukora ki?

¹⁷ Okugumisiriza ka n’omutwarize murungi ogurikutugasira! N’obu kitoorobi kugumisiriza obutoosha, nitubaasa kworeka omutwarize ogu ahabw’obuhwezi bwa Yehova. Twagumisiriza tutegyereize ensi ensya, nitubaasa kugira obwesigye ngu ‘eriisho rya [Yehova] niriguma aha barikumutiina’ abarikutegyereza ngu abagirire rukundo etarikuhinduka. (Zab. 33:18) Ka tumaririire kugumizamu nitujwara okugumisiriza.