NKHANI YAKUPFUNZA 35
Pitirizani Kukhala Wakupirira
“Latizani . . . kupirira.” — AKOLOSE 3:12.
NYIMBO 114 “Latizani Khalidwe la Kupirira”
BZOMWE TIN’PFUNZA a
1. Thangwe ranyi mumbakomedwa na wanthu omwe ambapirira?
TENTSENEFE timbakomedwa na wanthu omwe mbakupirira. Timbalemekeza munthu omwe ambadikhirira cinthu mwakusaya kuneta. Timbatenda thangwe anzathu ambapirira nafe tikaphonya. Ndipo timbatendambo mpfunzisi wathu wa Bibliya thangwe ra kupirira nafe pomwe tikhacita nyongo ya kupfunza, kubvuma na kuphatisa basa bzomwe tikhapfunza m’Bibliya. Kuposa bzentse, timbatenda Yahova Mulungu omwe ambapirira nafe! — Aroma 2:4.
2. Kodi n’ciyani comwe cingatitazise kulatiza kupirira?
2 Napo kuti ifepano timbakomedwa thangwe ra kupirira komwe anzathu ambalatiza, nthawe zinango bzingakhale bzakunesa kwa ifepanombo kulatiza kupirira. Mwa ciratizo, tingafunike kucita nyongo kuti tikhale wakugwa mpfuwa pomwe tiri pa mseu ndipo tikutazira kufamba thangwe rakuti karo zawanda ndipo tacedwa komwe tiri kuyenda. Bzingatinese kupirira anzathu akatikalipisa. Ndipo nthawe zinango, bzingatinese kupitiriza kudikhirira dziko lipsa lomwe Yahova adatipicira. Kodi imwepo mungafune kukhala wakupirira? Mu nkhani ino, tin’pfunza thandauzo la kukhala wakupirira na kuti thangwe ranyi n’kwakufunika. Ndipo tiniwonambo bzomwe tingacite na bzomwe bzingatithandize kukulisa khalidwe limweri.
KODI KUKHALA WAKUPIRIRA KUMBATHANDAUZA CIYANI?
3. Kodi munthu wakupirira ambacita ciyani akanyosedwa?
3 Mbatiwoneni njira zinai za momwe tingalatizire kupirira. Yakuyamba, munthu wakupirira ambacedwa kukalipa. Iye ambakhala wakugwa mpfuwa ndipo ambatcenkha kubwezera akanyosedwa. Mafala yakuti “ambafulumiza lini kukalipa” yambagumanika kakuyamba m’Bibliya pomwe Yahova ambafotokozedwa kuti ni “Mulungu wantsisi ndipo ambafulumiza lini kukalipa; iye ngwakudzala na lufoyi lacadidi pabodzi na cadidi.” — Ekisodo 34:6.
4. Kodi munthu wakupirira ambacita ciyani akakhala akudikhirira cinthu?
4 Yaciwiri, munthu wakupirira ambadikhirira mwakugwa mpfuwa. Cinthu comwe akhacidikhirira cikacedwa, iye ambacita ciri-centse kuti aleke kulalewa ayai kukalipa. (Mateu 18:26, 27) Pana bzakucitika bzizinji bzomwe tin’funika kudikhirira mwakugwa mpfuwa. Mwa ciratizo, tin’funika kutetekera mwakupirira pomwe mwanzathu akulalewa ticileka kumugwata mafala. (Djobi 36:2) Ndipo tingalatizembo kupirira pomwe tikuthandiza nyakupfunza wathu kuti abvesese bzomwe tikumupfunzisa ayai kumalisa bvuto lomwe analo.
5. Kodi ni njira inango iponi yomwe tingalatizire kupirira?
5 Yacitatu, munthu wakupirira ambacita lini bzinthu mwa mphumapuma. N’cadidi kuti nthawe zinango mpsakufunika kumbacita bzinthu mwakamfulumize. Tsono, munthu wakupirira akakhala akucita basa lakufunika, iye ambacita lini bzinthu mwa mphumapuma ayai kulicita mwakamfulumize kuti limale kamangu. Koma, iye ambapambula nthawe yakukwanira kuti akonzekere bzomwe an’funa kucita ndipo ambacita basalo mwakuderekha.
6. N’ciyani comwe munthu wakupirira ambacita akagumana na mabvuto?
6 Yacinai, munthu wakupirira ambacita nyongo yakulimbana na mabvuto mwakusaya kudandaula. Mpsakuphonyeka lini kufotokozera xamwali wathu wa pa mtima momwe tikubvera thangwe ra bvuto lomwe tikugumana nalo. Tsono, munthu wakupirira ambacita ciri-centse kuti apitirize kupirira napo kuti akugumana na mabvuto. (Akolose 1:11) Ninga Akristau, tin’funika kulatiza njira zinai za kupirira zomwe tacezeranazi. Thangwe ranyi? Bwerani tiwone mathangwe yace.
THANGWE RANYI KUPIRIRA N’KWAKUFUNIKA KWENE-KWENE?
Ninga mulimi omwe ambapirira acikhulupira kuti an’dzabvuna nthawe ikakwana, ifepano timbadikhirira ticikhulupira kuti Yahova an’dzakwanirisa mapiciro yace yentse nthawe ikadzakwana (Onani ndime 7)
7. Mwakubverana na Tiyago 5:7, 8, thangwe ranyi kupirira kwakufunika kwene-kwene? (Onani cithunzi-thunzi.)
7 Kupirira kwakufunika kwene-kwene kuti tidzapulumuke. Ninga atumiki wakukhulupirika wa Yahova wakale-kale, tin’funika kupirira pomwe tikudikhira kuti Mulungu adzacite bzomwe adalewa. (Ahebereu 6:11, 12) Bibliya limbandendemezera moyo wathu wacikristau na mulimi. (Werengani Tiyago 5:7, 8.) Mulimi ambaphata basa mwa nyongo ya kubzala na kuthirizira mbeu zace, koma ambadziwa lini nthawe yomwe bzinthubzo bzin’kula. Ndipopa mulimiyo ambadikhirira mwakupirira kuti in’dzafika nthawe yomwe an’dzabvuna. Mpsibodzi-bodzimbo na ifepano. Timbapitiriza kucita nyongo pa mabasa yauzimu napo kuti ‘tin’dziwa lini ntsiku yomwe Mbuya wathu an’dzabwera.’ (Mateu 24:42) Timbadikhirira mwakupirira na cikhulupiro cakuti pa nthawe yace, Yahova an’dzacita bzentse bzomwe adalewa. Bzingadakhala kuti ndife lini wakupirira tingadaneta kudikhirira ndipo tingadasiya cadidi. Ndipo tingadayamba kunyang’ana bzinthu bzomwe bzingadaticitisa kukhala wakukondwa mu nthawe ino basi. Tsono, tikapitiriza kupirira, tin’dzatumikira Yahova mpaka kuphampha ndipo tin’dzapulumuka. — Mika 7:7; Mateu 24:13.
8. Kodi kupirira kumbatithandiza tani pomwe tikucita bzinthu na anzathu? (Akolose 3:12, 13)
8 Kupirira kumbatithandiza kukhala wakubverana na anzathu ndipo kumbatithandiza kutetekera mwatceru pomwe anzathu akulalewa. (Tiyago 1:19) Kupirira kumbacitisa kuti wanthu akhale pa mtendere. Bzimwebzi bzimbatithandiza kuti tileke kulalewa bzinthu mwakusaya kukumbuka bwino tikakhala tanyosedwa. Tikakhala wakupirira tin’dzacedwa kukalipa mwanzathu akatilewa mafala yakuipa. M’mbuto mwa kubwezera, ‘tin’dzapitiriza kupirirana na kulekererana na mtima wentse.’ — Werengani Akolose 3:12, 13.
9. Kodi kupirira kumbatithandiza tani tikakhala tikucita bzakusankhula? (Mimwani 21:5)
9 Kupirira kumbatithandizambo kuti tisankhule bzinthu mwanzeru. M’mbuto mwakucita bzinthu mwa mphumapuma, tin’dzapambula nthawe kuti tifufudze pomwe tikanati kucita bzakusankhula. (Werengani Mimwani 21:5.) Mwa ciratizo, tikakhala tikunyang’ana basa, penu ndife lini wakupirira, tingabvume basa liri-lentse lomwe lingawonekero napo kuti basalo lingadzatitazise kunamata Yahova. Tsono tikakhala wakupirira, tin’dzakhala na nthawe yakufufudza kuti tikwanise kudziwa mbuto yomwe tin’kaphatira basalo, nthawe yomwe tin’dzamala tikuphata basalo na penu basalo lingadzatipase mpata wakucita bzinthu na banja lathu na kucitambo bzinthu bzauzimu. Kukhala wakupirira kun’dzatithandiza kuti tileke kusankhula bzinthu mwakuphonyeka.
BZOMWE TINGACITE KUTI TIKHALE WAKUPIRIRA
10. N’ciyani comwe Mkristau an’funika kucita kuti akhale wakupirira?
10 Pembani kwa Yahova kuti mukhale wakupirira. Kupirira ni khalidwe libodzi lomwe mzimu wakucena umbabala. (Agalatiya 5:22, 23) Ndipopa, tingapembe kwa Yahova kuti atipase mzimu wakucena kuti utithandize kukhala wakupirira. Tikagumana na bvuto lomwe likuyeza kupirira kwathu, ifepano ‘tin’dzapitiriza kukumbira’ mzimu wakucena kuti utithandize kukhala wakupirira. (Luka 11:9, 13) Ndipo tingakumbirembo Yahova kuti atithandize kuwona bzinthu ninga momwe iye ambabziwonera. Pambuyo pakupemba tingafunike kucita nyongo ntsiku iri-yentse kuti tikhale wakupirira. Tikambapemba kwa Yahova nthawe zentse kuti atithandize kukhala wakupirira na kucita nyongo yakukhala wakupirira, khalidwe limweri lin’dzakula kwene-kwene mu mtima mwathu ndipo tin’dzakwanisa kulilatiza.
11-12. Kodi Yahova akulatiza tani kupirira?
11 Mbakumbukirani nkhani za m’Bibliya. M’Bibliya muna nkhani zizinji za wanthu omwe adakhala wakupirira. Tikambakumbukira nkhani zimwezi timbapfunza njira zakusiyana-siyana za momwe tingalatizire kupirira. Tikanati kucezerana bza nkhani zimwezi, cakuyamba bwerani tiwone ciratizo ca Yahova omwe ambalatiza kuti ngwakupirira kwene-kwene.
12 Mu zunde la Edeni, Sathani adanamizira Yahova ndipo adamulewa kuti iye ni Mtongi wakuipa omwe alibe lufoyi. Yahova adalatiza kuti ngwakupirira mwakuleka kupheratu Sathani, acizindikira kuti nthawe ndiyo yomwe ingadalatiza kuti iye ni Mtongi wabwino. Pa nthawe yomwe akudikhirira bzimwebzi, iye akupitiriza kupirira bzinthu bzakusiyana-siyana bzomwe bzimbapswipiza dzina lace. Kuthumizira bzimwebzi, Yahova akupitiriza kupirira kuti wanthu akhale na mwayi wakupfunza cadidi kuti adzagumane moyo wakusaya kumala. (2 Pedru 3:9, 15) Thangwe ra bzimwebzi, wanthu azinji afika pakumudziwa. Tikambakumbukira thangwe lomwe likucitisa Yahova kuti apirire bzin’dzakhala bzakupusa kwa ifepano kudikhirira kumala kwa dzikoli.
Kupirira kumbatithandiza kuti tileke kukulumiza kukalipa anzathu akatinyosa (Onani ndime 13)
13. Kodi Jezu adatewezera tani kupirira kwa Pai wace? (Onani cithunzi-thunzi.)
13 Jezu ambatewezera kupirira kwa Pai wace ndipo adalatiza khalidwe limweri pomwe akhali pa dziko la pantsi pano. Bziribe kukhala bzakupusa kwa iye kulatiza kupirira maka-maka kwa anembi na Afarizeu omwe akhali wanthu wacinyengo. (Juwau 8:25-27) Tsono ninga Pai wace, Jezu akhakulumiza lini kukalipa. Iye akhabwezera lini akatukwanidwa ayai kunyosedwa. (1 Pedru 2:23) Jezu adapirira mayezo mwakusaya kudandaula. Ndipopa mpsakudabwisa lini Bibliya likambatiuza kuti “kumbukirani bwino-bwino bza ciratizo ca ule omwe adapirira mafala yakunyoza ya wanthu wa pikado”! (Ahebereu 12:2, 3) Na thandizo la Yahova, ifepano tingakwanisembo kupirira mayezo yakusiyana-siyana yomwe yangabwere.
Tikatewezera kupirira kwa Abalahamu, tin’dzakhala na citsimikizo cakuti Yahova an’dzatibaira tsapano napombo mu dziko lipsa (Onani ndime 14)
14. Kodi tikupfunza ciyani na kupirira kwa Abalahamu? (Ahebereu 6:15) (Onani cithunzi-thunzi.)
14 Tani penu bzomwe tikhadikhirira pa nkhani yakumala kwa dzikoli bzikanati kucitika? Pinango tikhadikhirira lini kuti tingadafika nthawe ino dzikoli likanati kumala. Ndipo pinango tikucita thupo kuti tinifa pomwe dzikoli likanati kumala. N’ciyani comwe cingatithandize kupitiriza kupirira? Onani ciratizo ca Abalahamu. Pomwe Abalahamu akhana magole 75 ndipo akhalibe mwana, Yahova adamupicira kuti: “Inepano nin’dzakucitisa kukhala mtundu ukulu.” (Genesesi 12:1-4) Kodi Abalahamu adawona kukwanisika kwa piciro limweri? Iye alibe kuwona bzentse bzikukwanisika. Pomwe adayambuka Mkulo wa Eufrate acidikhirira magole 25, Abalahamu adawona kubadwa kwakudabwisa kwa mwana wace Izaki, ndipo pomwe padapita magole 60, azukulu wace Esau na Djakobo adabadwa. (Werengani Ahebereu 6:15.) Tsono Abalahamu alibe kuwona mbadwa zace zikuwanda zicikhala mu Dziko Lakupiciridwa. Tsono mwamuna wakukhulupirikayu akhali pa uxamwali bwakulimba na Yahova. (Tiyago 2:23) Abalahamu akadzalamusidwa, iye an’dzakomedwa kwene-kwene kudziwa kuti cikhulupiro na kupirira kwace bzidacitisa kuti mitundu yentse ya wanthu isimbidwe! (Genesesi 22:18) Kodi tikupfunza ciyani? Pinango ifepano tingawone lini mapiciro yentse ya Yahova yakukwanisika tsapanopali. Tsono, tikakhala wakupirira ninga Abalahamu, tin’dzakhala na citsimikizo cakuti Yahova an’dzatibaira tsapano napombo mu dziko lipsa. — Marko 10:29, 30.
15. Kodi n’ciyani comwe tingapfunze pa pfunziro lathu la patekha?
15 M’Bibliya muna pomwe nkhani zinango za wanthu omwe adalatiza kupirira. (Tiyago 5:10) Tani mucikhala na makonzedwe yakupfunza nkhani zimwezo? b Mwa ciratizo, napo kuti Davide adadzozedwa pomwe akhali mwana kuti akhale mambo wa Ajirayeri, iye adadikhirira magole mazinji kuti ayambe kutonga. Simiyoni na Ana adapitiriza kunamata Yahova mwakukhulupirika pomwe akhadikhirira kubwera kwa Mesiya. (Luka 2:25, 36-38) Pomwe mukupfunza nkhani zimwezi, nyang’anani mitawiro ya mibvunzo iyi: Kodi n’ciyani comwe cidathandiza munthu umweyu kukhala wakupirira? Kodi ni phindu liponi lomwe adakhala nalo thangwe ra kupirira? Kodi ningamutewezerembo tani? Imwepo mungagumanembo phindu mukapfunza bza wanthu omwe alibe kulatiza kupirira. (1 Samuyeli 13:8-14) Imwepo mungabvunze kuti: ‘Kodi n’ciyani comwe cidacitisa kuti iwo aleke kulatiza kupirira? Kodi ni mabvuto yaponi yomwe iwo adagumana nayo?’
16. Kodi ni phindu liponi lomwe timbakhala nalo tikakhala wakupirira?
16 Onani phindu lomwe limbabwera thangwe ra kukhala wakupirira. Tikakhala wakupirira, timbakhala wakukondwa na wakugwa mpfuwa. Ndipopa kupirira kumbacitisa kuti tikhale na thanzi labwino. Tikalatiza kupirira na anzathu, timbakhala wakubverana nawo. M’gwere mwathu timbakhala wakuphatana. Munthu akatinyosa, kuleka kukalipa mwakamfulumize kungacitise kuti bzinthu bzireke kuipiratu. (Salimo 37:8; Mimwani 14:29) Kuposa bzentse, tikakhala wakupirira timbatewezera Pai wathu wakudzulu ndipo timbakhala pa uxamwali bwakulimba na iye.
17. N’ciyani comwe tentsenefe tin’funika kupitiriza kucita?
17 Kulewa cadidi, kupirira ni khalidwe labwino kwene-kwene lomwe lingatithandize tentsenefe! Napo kuti bzingakhale lini bzakupusa kulatiza khalidwe limweri nthawe zentse, tsono na thandizo la Yahova, ifepano tingapitirize kulikulisa. Ndipo pomwe tikudikhirira dziko lipsa, ifepano tingakhale na citsimikizo cakuti “maso ya Yahova yambawona wale omwe ambamugopa, wale omwe ambadikhirira lufoyi lace lacadidi.” (Salimo 33:18) Bwerani tentse tipitirize kukhala wakupirira.
NYIMBO 41 Mulungu, Bvani Mpembo Wangu
a Kupirira n’kwakunesa mu dziko la Sathaniri. Ndipopa Bibliya limbatiuza kuti tikhale wakupirira. Nkhani ino in’tilatiza kuti thangwe ranyi khalidwe limweri ndakufunika na bzomwe tingacite kuti tikhale wakupirira.
b Kuti mugumane nkhani za m’Bibliya zakulewa bza kupirira, imwepo mungawone ka msolo kakuti “Paciência” mu Índice das Publicações da Torre de Vigia.
