1. Akin et labalabay tayo ray totoon maanos?

 LABALABAY tayo iray totoon maanos. Akin ey? On ta no say sakey et maanos, andukey so pasensia to. Ag-onsyodot ya tampol tan mainomay toy mamerdona. Seguradon misatsalamat ka ta inanosan ka na samay angiyaral ed sika na Biblia anggano wala ray pagkakataon ya agmon tampol atalosan, naawat, o naiyaplika so sakey ya bangat na Biblia. Tan manuna ed amin, misatsalamat tayod Aman Jehova ta agaylay inkaanos tod sikatayo!—Roma 2:4.

2. Diad anto ran situasyon ya nasubok so inkaanos tayo?

² Tua, labalabay tayo ray totoon maanos. Pero aminen tayo ya no maminsan et agtayo naipapanengneng itan ya ugali. Singa bilang, ompan onsyodot tayo no agaylay trapik, lalo la no manaapura tayo. Ompan mainomay tayon nairita ed ugali na arum. Tan no maminsan, ompan isipen tayo ya abaybayag tayo lan aalagaren so isabi na Paraiso. Sika ey? Kasin nanairapan kan ipanengneng so inkaanos? Pantongtongan tayod sayan artikulo no panon tayon naipanengneng so inkaanos, tan no akin ya importante itan ya ugali. Amtaen tayo met no anto ray gawaen tayo pian magmaliw tayon mas maanos.

3. No say sakey et maanos, antoy reaksion to anggano makapasyodot so situasyon?

³ Pantongtongan tayoy apatiran paraan pian naipanengneng tayoy inkaanos. Unona, say toon maanos et matantan ya manpasnok. Labay ton ibaga, aliwan mipepetang so ulo to. Kanian anggano makapasyodot o makapa-stress so situasyon, kalmado labat. Tan ag-ombabawi anggano aliwliwa so impantrato ed sikato. Amay deskripsion ya “matantan a manpasnok” et unonan abitla ed Biblia diad Exodo 34:6, ya ditan et adeskribe si Jehova ya “Dios a mapangasi tan maabagey, matantan a manpasnok.”

4. No say sakey et maanos, antoy reaksion to anggano kailangan toy manalagar?

 ⁴ Komadua, say toon maanos et amta toy manalagar. Aliwan maingongot, anggano nababayagan la ed panaalagar to. (Mat. 18:26, 27) Dakel so situasyon ya importantin kalmado tayo labat ya manalagar. Singa bilang, no walay mansasalita, ondengel tayo tan agtayo onsasalet. (Job 36:2) Ompan kaukolan tayo met ya dukeyan so anos tayo diad saray iyaaralan tayo, lalo la no agdan tampol natalosan so sakey ya bangat na Biblia o nanairapan iran itunda so sakey ya bisyo o kagagawa.

5. Anto ni sakey ya paraan ya naipanengneng tayoy inkaanos?

⁵ Komatlo, say toon maanos et aliwan apurado. Siempre, wala ray panaon ya kaukolan tayoy onkiwas ya tampol. Pero say toon maanos, no walay importantin gawaen to, iplano ton maong antis ya onggapo. Tan seseguradoen to ya walay sapat ya panaon to ya gawaen itan, ta agto labay ya inapura so kimey to.

6. No say sakey et maanos, antoy reaksion to anggano ondadalan ed subok?

⁶ Komapat, say toon maanos et itetepel toy irap tan agmanreklamo anggano ondadalan ed subok. Siempre, agmet mauges no istoryaen tayod saray kakaaro tayo iray dadalanen tayon problema. Pero no maanos tayon too, aliwan puros negatibo so ibaga tayo ta sankanonot tayo nin siansia iray bendisyon ya iiter nen Aman Jehova. (Col. 1:11) Komon ta nanengneng ed sikatayo irayan apatira ya atalakay tayo. Akin et importante ya maanos tayo? Pantongtongan tayoy pigaran rason.

7. Base ed Santiago 5:7, 8, akin et importante so inkaanos? (Nengnengen met so litrato.)

⁷ Importante so inkaanos pian naawat tayoy bilay ya andi-anggaan. Aligen tayo iray matoor ya lingkor na Dios nensaman ya maan-anos dan inalagar so pakagawa na saray sipan nen Jehova. (Heb. 6:11, 12) Inkompara itayo  na Biblia ed dumaralos. (Basaen so Santiago 5:7, 8.) Makulikuli ya mantanem tan manparanum so dumaralos. Anggano agto amta no kapigan so eksakton ibaleg na saray intanem to, maan-anos ya manalagar ta amta to ya onsabi panaon et manani lanlamang. Ontan tayo met iran Kristiano. Makulikuli tayo ed kimey ya panagpulong tan panagbangat anggano “[agtayo] amta no anton agew so isabi na Katawan.” (Mat. 24:42) Maan-anos tayon manalagar ta kombinsido tayo ya diad dugan panaon et tooren nen Jehova so amin ya insipan to. No agtayo mananos, ompan onsawa tayo lan manalagar tan agtayo nalilikas ya onaarawi tayo lad si Jehova. Ompan magmaliw tayo lan makasarili tan agtayo la isipen so pansumpalan na saray desisyon tayo, ta say sankanonot tayo labat et no antoy mamaliket ed sikatayo natan. Pero no maanos tayo, manmatoor tayo anggad anggaan tan seguradon iliktar itayo nen Jehova.—Miq. 7:7; Mat. 24:13.

8. Antoy nitulong na inkaanos ed pipiulop tayod arum? (Colosas 3:12, 13)

⁸ No maanos tayo, maong so pipiulop tayod arum. Singa bilang, no walay mansasalita, alisto tayon ondengel. (Sant. 1:19) Naiwasan met so barongan no maanos tayo. Anggano makapa-stress lay situasyon, agtayo man-react ya tampol tan agtayo mansalitay ansakit. Tan no maanos tayo, kontrolen tayoy emosyon tayo anggano asakitan tayo ed imbaga o ginawa na arum. Imbes ya ombawi, “itultuloy [tayon] itepel . . . tan mabulos a perdonaen so sakey tan sakey.”—Basaen so Colosas 3:12, 13.

9. Panon ya makatulong so inkaanos no mandedesisyon tayo? (Proverbio 21:5)

⁹ Makatulong met so inkaanos ed panagdesisyon. No maanos tayo, agtayo padalus-dalos. Man-research tan man-isip tayo nin maong pian naamtaan tayo no antoy sankaabigan ya gawaen. (Basaen so Proverbio 21:5.) Singa bilang, panon to no manaanap kay trabaho? No atanggap ka ed unonan inaplayan mo, ompan awaten mon tampol anggano antam ya naapektoan so panagdayew mod si Jehova. Pero no maanos ka, isipen mo nin maong so kaarawi, eskedyul na trabaho, tan no antoy epekto to ed pamilyam tan ed espiritualidad mo. On no maanos tayo, naiwasan tayoy makagawa na desisyon ya pagbabawian tayo lanlamang.

10. Antoy importantin gawaen na sakey ya Kristiano pian magmaliw ya mas maanos?

¹⁰ Ipikasim ya magmaliw kan mas maanos. Say anos et kaiba ed bunga na masanton espiritu na Dios. (Gal. 5:22, 23) Kanian pian magmaliw tayon maanos, ipikasi tayod si Jehova ya ikdan to tayo na masanton espiritu to. No wala ray situasyon ya nasubok so inkaanos tayo, ‘itultuloy tayoy onkerew’ na masanton espiritu. (Luc. 11:9, 13) Ipikasi tayo met ed si Jehova ya tulongan to tayo pian naalig tayoy inkaanos to. Tan siempre, man-effort tayo pian nipanengneng tayoy inkaanos kada agew. No mabetbet tayon ipikasi ed si Jehova ya tulongan to tayon mananos tan gawaen tayo met so betang tayo, mas mainomay tayo lan naipanengneng iyan ugali.

11-12. Akin et nibaga tayon si Jehova so sankaanosan ed amin?

¹¹ Dalepdep mo iray alimbawa ed Biblia. Dakel so nabasa tayod Biblia ya lingkor na Dios ya makapabilib so inkaanos da. No dalepdepen moy alimbawa ra, makaaral ka no panon mo met ya nipanengneng so inkaanos. Pero antis tayon pantongtongan so alimbawa na  sarayan totoo, nengnengen tayo ni so alimbawa nen Aman Jehova, say sankabayagan lan manaanos ed interon uniberso.

¹² Diad hardin na Eden, pinauges nen Satanas so ngaran tan reputasyon nen Aman Jehova. Pinapaway to ni ingen ya say Dios et masiblet tan aliwan maaro. Pero agan tampol dineral nen Jehova si Satanas. Intepe-tepel nen Aman Jehova iman ya agawa, tan kinontrol toy sarili to ta amta to ya kaukolan ya palabasen so andukey ya panaon pian napatunayan ya Sikato so sankaabigan ya manuley. Anggad natan et aanosan ni nen Jehova so panederal na totoo ed ngaran to. Pero ag-onsasawan mananos ta labay to ya dakel nin totoo so naikdan na tsansa ya manbilay na andi-anggaan. (2 Ped. 3:9, 15) Lapud anos to, sikatoy akabat na milyon-milyon ya totoo tan naamtaan da no antoy tua tungkol ed sikato. No isipen tayo so maong ya resulta na panaanos nen Aman Jehova, agtayo onsawan manalagar ed isabi na Armagedon.

13. Antoy pakapatnagan ya inalig nen Jesus so inkaanos nen Ama to? (Nengnengen met so litrato.)

¹³ Inalig nen Jesus so inkaanos nen Ama to, tan sankapatnagan itan ya ugali to nen wadiad dalin. Dakel so inarap ton situasyon ya asubok so anos to, lalo la no katongtong to ray eskriba tan Fariseo ya agmanisia ya sikato so Anak na Dios. (Juan 8:25-27) Pero singa si Aman Jehova, andukey so pasensia nen Jesus. Anggano sikatoy ininsulto, agan balot binmawi. (1 Ped. 2:23) Inanosan to iray subok tan agbalot nanreklamo. Kampegan ibabaga na Biblia ya nonoten tayon maong so alimbawa nen Jesus ta “nansungdo ed makapainsulton panagsalita na saray makasalanan.” (Heb. 12:2, 3) Diad tulong nen Jehova, naanosan tayo met so antokaman ya subok ya onsabi.

14. Antoy naaralan tayo ed inkaanos nen Abraham? (Hebreo 6:15) (Nengnengen met so litrato.)

 ¹⁴ Amin tayo et labalabay tayo lan onsabi so Armagedon. Panon to no say pakalikna tayo et singa abaybayag tayo lan manaalagar? Ompan isipen tayo ya agtayo la nanengneng so isabi na anggaan ta walay graben sakit tayo odino ontatatken tayo la. Antoy ontulong pian agtayo onsukon manalagar? Makaaral tayod alimbawa nen Abraham. Nen 75 so taon nen Abraham, oniay insipan nen Jehova ed sikato anggano anggapo ni anak to: “Pagmaliwen ta kan baleg a nasyon.” (Gen. 12:1-4) Kasin tinoor itan nen Jehova? On, pero agla anengneng nen Abraham so amin ya kasumpalan na satan ya sipan. Manlapud imbaliw nen Abraham ed Ilog Eufrates, sikatoy nanalagar ni na 25 ya taon insan ira awalaan nen Sara na anak, si Isaac. Tan linmabas lamet so 60 ya taon insan awalaan na apo, si Esau tan Jacob. (Basaen so Hebreo 6:15.) Pero agla anengneng nen Abraham ya nanayam ed Insipan ya Dalin iray ilalak to ya anggad nagmaliw iran baleg a nasyon. Anggaman ontan, nibaga tayon sulit so impananos nen Abraham ta sikatoy inturing nen Aman Jehova ya malet ya kaaro. (Sant. 2:23) Tan diad balon mundo, no sikatoy bilayen la nen Aman Jehova, seguradon malikeliket no naamtaan to ya abendisyonan so “amin a nasyon ed dalin” lapud pananisia tan impananos to! (Gen. 22:18) Antoy naaralan tayo? Singa si Abraham, ompan agtayo nanengneng ya mismo so kasumpalan na arum ya sipan nen Jehova. Pero no maanos tayo ya singa sikato, seguradon natan ni labat et bendisyonan itayo la nen Jehova, tan lalo la diad balon mundo!—Mar. 10:29, 30.

15. Antoy balibalin i-personal study tayo?

¹⁵ Dakel ni ray nabasa ed Biblia ya matoor  a lingkor na Dios ya impanengneng day inkaanos. (Sant. 5:10) Marakep no i-personal study tayo iratan. b Singa bilang, ugaw ni si David nen sikatoy nilanaan pian magmaliw ya ari ed Israel, pero nanalagar ni na dakel ya taon antis ya man-ari. Maan-anos met ya inalagar nen Simeon tan Ana so isabi na Mesias, tan nanmatoor irad si Jehova legan iran manaalagar. (Luc. 2:25, 36-38) No ipe-personal study’m irayan salaysay, anap moy ebat ed sarayan tepet: ‘Antoy akatulong ed sayan lingkor nen Jehova akin et akapan-anos? Antoy maong ya resulta na impananos to? Panon kon naalig so alimbawa to?’ Makaaral tayo met ed lingo na saray aga akapan-anos. (1 Sam. 13:8-14) Legan mon ipe-personal study so tungkol ed sikara, anap moy ebat ed sarayan tepet: ‘Akin et aga akapan-anos iyan too? Tan anto laingen so nansumpalan to?’

16. Anto ray maabig ya resulta no maanos tayo?

¹⁶ Isip mo iray maabig ya resulta no maanos ka. Mas mareen tan maliket so bilay na saray totoon maanos. Lapud satan, aliwan maguloy isip da tan dakel so naiwasan dan sakit. Mas labalabay itayo na totoo no amta ran maanos tayo. Sakey ni, onelet so ulopan diad kongregasyon tan walay pankakasakey. Anggano wala bilang so pakakasyodotan tayo, palabasen tayo la pian agla ombaleg so isyu. (Sal. 37:8, paimanod leksab; Pro. 14:29) Tan say sankaimportantian, no maanos tayo, mas aroen itayo nen Aman Jehova lapud nanenengneng to ya sikatoy aaligen tayo.

17. Antoy determinado tayon gawaen?

¹⁷ Talagan marakdakep ya ugali so inkaanos! Tua, wala ray situasyon ya nasubok so inkaanos tayo, pero diad tulong nen Jehova, sarag tayoy mananos. Legan tayon aalagaren so isabi na balon mundo, makapan-anos tayo no tandaan tayo ya “say mata nen Jehova et akabantay ed saramay ontatakot ed sikato, saramay manaalagar ed matoor a panangaro to.” (Sal. 33:18) Itultuloy tayo sirin so mananos!