1. Mukunda natshi tuana suanguluga nu athu ana khala nu khadilo dia guhuiminyina?

 MUKUT’ETU agasue tuana suanguluga nu athu ana khala nu khadilo dia guhuiminyina. Mukunda natshi tuazuela ngenyi? Handaga tuana nemesa athu ana nengenena ndaga imoshi ngenyi guvua khabu ndo. Tuana suanguluga tangua athu ana gutumonesela guhuiminyina gula tuakalagala ndaga yabola. Tuana suanguluga nji nu luholo muthu watulongesele Biblia wamonesele guhuiminyina tangua tuakhalele mutshita ngolo ha gulonguga nga gutshigina longo dimoshi ngenyi dia Biblia nu gudikalegela. Uvi ndaga yabalega ndando idi egi tuana suanguluga nu luholo Yehowa Nzambi wana gutumonesela khadilo dia guhuiminyina!​—Roma 2:4.

2. Mu ndaga jitshi yajiya gukhala lamba ha gumonesa khadilo dia guhuiminyina?

² Idi yadiago egi tuana suanguluga nu luholo athu ako ana gutumonesela khadilo dia guhuiminyina, uvi matangua ako yajiya gukhala lamba gudi esue hakhetu ha gumonesa khadilo diene. Ha gufezegesa, yajiya gukhala lamba ha gunengenena nu guhuiminyina guagasue tangua tudi mutshigina gutuisa phupha gu moulin gula tangua diayi gale. Tuajiya nji guvua khabu gula muthu wazuela ndaga imoshi ngenyi yatusuanguluishilego. Matangua ako, yajiya gukhala lamba ha gulandula gunengenena mavu ahe-ahe alayele Yehowa. Udi mutshigina gukudisa khadilo dia guhuiminyina ba? Mu longo edi, tuza mumona gula khadilo dia guhuiminyina didi itshi nu mukunda natshi khadilo diene didi nu ndando yavula. Tuza nji mumona ndaga jiajiya gutukuatesa ha gukudisa khadilo diene.

3. Ndaga itshi muthu wana khala nu khadilo dia guhuiminyina wana kalagala gula amuhana khabu?

³ Tutadilenu maluholo nguana tuajiya gumonesa khadilo dia guhuiminyina. Thomo, muthu wana khala nu khadilo dia guhuiminyiga ganago guvua khabu muphushi. Gula athu ako amuhana khabu, wana hena tedie, ganago guvutula gubola mu gubola; ganago nji gukalegela athu  ako ndaga nu khuta gula udi nu gikenene. Fundo dia thomo Biblia yana zuelela mbimbi ‘gutuna guvua khavu muphushi’ didi tangua yana monesa egi Yehowa udi “Nzambi wa khenda nu wa gisemo, wazala pha nu guzumba gua giamatshidia, ganago guvua khabu muphushi, Nzambi wazala pha nu giamatshidia.”​—Guz. 34:6.

4. Luholo lutshi muthu wana khala nu khadilo dia guhuiminyina wana kalagala ndaga gula idi mutoga egi anengenene ndaga imoshi ngenyi?

⁴ Ya mbadi, muthu wana khala nu khadilo dia guhuiminyina wajiya gunengenena nu mutshima watuluga. Gula ndaga imoshi idi mushipha, muthu wana khala nu khadilo dia guhuiminyina ganago gubua tunga-tunga nga guvua khabu. (Mat. 18:26, 27) Gudi nu ndaga jiavula jiana toga egi tumonese khadilo dia guhuiminyina. Ha gufezegesa, tudi naye gutegelela nu guhuiminyina guagasue tangua muthu muko udi muzuela gumubatula mbimbi ndo. (Yobo 36:2) Yajiya nji gutoga egi tumonese khadilo dia guhuiminyina tangua tudi mukuatesa muthu tuana longesa Biblia ha gukotelesa longo dimoshi dia Biblia nga ha gubemba khadilo dimoshi diabola.

5. Mu luholo lutshi luko tuajiya gumonesa khadilo dia guhuiminyina?

⁵ Ya thathu, muthu wana khala nu khadilo dia guhuiminyina ganago gukalagala ndaga phushi-phushi gutangiza ndo. Yadiago, matangua ako yana toga egi tutshite ndaga muphushi. Uvi gula muthu wana khala nu khadilo dia guhuiminyina udi nu mudimo wa ndando wa gutshita, ganago guwutshita phushi-phushi nga guwumanesela muphushi. Uvi wana tshita ngolo ha guheta tangua dia gulondega luholo ludi naye muene gukalagala mudimo wene. Gungima wana zula tangua dia guwukalagala muabonga diago.

6. Luholo lutshi muthu wana khala nu khadilo dia guhuiminyina wana kalagala ndaga gula udi mutagana malamba?

⁶ Ya nguana, muthu wana khala nu khadilo dia guhuiminyina wana kolesela mu malamba guboguta ndo. Khadilo dia guhuiminyina diana gudivua nu khadilo dia gukolesela. Ishigo diago ndaga yabola ha guwambela futa dietu mumoshi luholo tudi gudivua mukunda nu ndaga jidi gutubuila. Uvi muthu wana khala nu khadilo dia guhuiminyina wana  landula gukolesela malamba ene nu gusuanguluga guagasue. (Kol. 1:11) Luholo tudi Aklisto tudi naye gumonesa khadilo dia guhuiminyina mu ndaga jiagasue jia mu monyo wetu. Mukunda natshi? Tutadilenu ndaga eji.

7. Ha gutadila Yakoba 5:7, 8, mukunda natshi khadilo dia guhuiminyina didi nu ndando? (Tala nji gifuanesa.)

⁷ Tudi naye gumonesa khadilo dia guhuiminyina gula tudi mutshigina guheta monyo wa ivo nu ivo. Gifua akombeledi a Yehowa a mu tangua dikulu, esue nji tudi naye gunengenena nu guhuiminyina guagasue egi Nzambi ataganese ndaga jiagasue jialayele muene. (Heb. 6:11, 12) Biblia yana gutufuanesa nu mudimi wa mahia. (Tanga Yakoba 5:7, 8.) Mudimi wa mahia wana kuna mbuto, wana gujimbila meya, uvi ganago gujiya tangua mbuto jiene mbajizoga. Uvi wana nengenena nu guhuiminyina guagasue nu wana gusha mutshima egi mbawukatula mbuto jienji. Luholo lumoshi nu esue, tuana khala nu ndaga jiavula jia mu nyuma jia gutshita ikhale tushigo “mujiya lusugu mbaluza Fumu [wetu].” (Mat. 24:42) Tuana nengenena nu guhuiminyina guagasue, tuana gusha nji mutshima egi Yehowa mbawutagenesa ndaga jiagasue jialayele muene mu tangua diatagana. Uvi gula tushigo nu khadilo dia guhuiminyina, tuajiya guleba muila, tuasendesa getu gubemba giamatshidia mage-mage. Tuajiya nji gusendesa gutshita ndaga tudi mutangiza egi jiajiya gutubatela gusuanguluga mangino. Uvi gula tudi nu khadilo dia guhuiminyina, tuajiya gukolesela uu nu gu gisugishilo nu guheta monyo wa ivo nu ivo.​—Mika 7:7; Mat. 24:13.

8. Luholo lutshi khadilo dia guhuiminyina diana gutukuatesa ha gukhala muabonga nu athu ako? (Kolosai 3:12, 13)

⁸ Khadilo dia guhuiminyina diana gutukuatesa ha gukhala muabonga nu athu ako. Diana gutukuatesa ha gutegelela muabonga tangua athu ako adi muzuela. (Yak. 1:19) Khadilo diene diana gutukuatesa ha gukhala mu guhuima nu athu ako. Diana gutukuatesa nji ha gutuna gutshita ndaga muphushi nga guzuela ndaga jiabola gula tudi nu gikenene. Gula tudi nu khadilo dia guhuiminyina, mbatushigo muvua khabu muphushi gula muthu watukalegela ndaga yabola. Ha fundo dia gumuvutudila gubola mu gubola, ‘mbatukanga mutshima mu ndaga jia athu ako, mbatukhala nji guditotesela nu mutshima wagasue.’​—Tanga Kolosai 3:12, 13.

9. Luholo lutshi khadilo dia guhuiminyina diana gutukuatesa tangua tudi mutshigina guzula badesizio? (Ishima 21:5)

⁹ Khadilo dia guhuiminyina diajiya gutukuatesa ha guzula badesizio abonga. Ha fundo dia gukalagala ndaga muphushi gutangiza ndo muabonga, mbatuzula tangua dia gutshita ba recherche ha gujiya gula desizio ditshi didi diabonga ha guzula. (Tanga Ishima 21:5.) Ha gufezegesa gula tudi mukamba mudimo, tuajiya gutshigina mudimo wa thomo tuaheta ikhale mudimo wene wajiya gutuzula tangua diavula dia gukalagala ndaga jia mu nyuma. Uvi gula tudi nu khadilo dia guhuiminyina, mbatukamba gujiya fundo mbatukhala mukalagala mudimo wene nu guvula gua matangua mbatukhala mubalegesa nu gula mudimo wene mbawukhala gutubembela tangua dia gubalegesa nu enya fami yetu nga dia gutshita ndaga jia mu nyuma. Gula tudi nu khadilo dia guhuiminyina mbaditukuatesa ha guzula badesizio abonga.

10. Luholo lutshi Muklisto wajiya gukudisa nu gubamba khadilo dia guhuiminyina?

¹⁰ Khala mutoga Nzambi mu gisambu ha gugukuatesa ha gukudisa khadilo dia guhuiminyina. Guhuiminyina gudi bundu dia nyuma ya Nzambi. (Gal. 5:22, 23) Hene tuajiya gutoga Yehowa mu gisambu ha gutuhana nyuma yenji nu gumutoga ha gutukuatesa ha gukudisa mabundu a nyuma yene. Gula tudi mutagana nu ndaga idi mulola khadilo dietu dia guhuiminyina, tuajiya ‘gulandula gutoga’ nyuma ya Nzambi hagula itukuatese ha gukhala nu khadilo diene. (Luka 11:9, 13) Tuajiya nji gutoga Yehowa ha  gutukuatesa ha gutadila ndaga gifua muene. Gungima dia gutshita gisambu, tudi naye gukalagala yagasue ha gumonesa khadilo dia guhuiminyina lusugu nu lusugu. Gula tualandula gutshita gisambu ha gukhala nu khadilo dia guhuiminyina nu tudi mukalagala ngolo ha gumonesa khadilo diene, Yehowa mbawutukuatesa ha gukhala nu guhuiminyina ikhale tuakhalelego nu khadilo diene thomo.

11-12. Luholo lutshi Yehowa wamonesele khadilo dia guhuiminyina?

¹¹ Khala mutangigiza ifegezegeselo idi mu Biblia. Biblia idi nu ifezegeselo yavula ya athu amonesele khadilo dia guhuiminyina. Gula tudi mutangigiza ifegezegeselo yene, tuajiya nji gujiya maluholo tuajiya gumonesa khadilo diene. Gutuama dia gutadila ifezegeselo iko mukatshi dia ifezegeselo yene, tutadilenu gale gifezegeselo giabalega ndando gia guhuiminyina gia Yehowa.

¹² Mu dihia dia Edene, Satana wazuelele ndaga jia mambo mukunda nu jina dia Yehowa nu lukuma luenji; wazuelele egi Yehowa udi Fumu wabola, ganago guzumba athu enji. Yehowa gashiyilego Satana mbala imoshi, uvi wadikandele nu guhuiminyina guagasue handaga wakhalele mujiya egi mbayizula tangua diavula ha gumonesa egi luholo luenji lua guhinyina luene ludi luatagana. Tangua didi munengenena muene, wana kolesela gu ndaga jia mambo athu ana zuela mukunda nu jina dienji. Yehowa wana nengenena nji nu guhuiminyina guagasue hagula athu avula ajiya guheta luendu lua guheta monyo wa mayilago. (2 Phet. 3:9, 15) Hene, athu avula amujiyile gale. Gula tudi mutadila gubonga tuana heta mu luholo Yehowa wana monesa khadilo dia guhuiminyina, mbayishigo mukhala lamba ha gunengenena tangua mbadiza muene mushiya mavu awa.

13. Luholo lutshi Yesu walanduile khadilo dia guhuiminyina dia Sh’enji? (Tala nji gifuanesa.)

¹³ Yesu walanduile diago khadilo dia guhuiminyina dia Sh’enji, wamonesele nji khadilo diene hakhalele muene ha mavu. Yakhalelego nji yaleba gudi muene ha gumonesa khadilo dia guhuiminyina,  muavula gubalega gudi alongeshi a mikhuala nu Afalese akhalele nu makalegelo abola. (Yone 8:25-27) Gifua Sh’enji, Yesu nji khalelego muvua khabu muphushi. Gavutudilego gubola mu gubola tangua athu akhalele gumushinga nga gumukambela milonga. (1 Phet. 2:23) Yesu wakolesele mu malamba nu guhuiminyina guagasue guboguta ndo. Gishina giene Biblia yana gututoga ha ‘gutangiza muabonga gifezegeselo gia muthu munu wakolesele mu ndaga jiabola jiakhalele muzuela enya gubola mukunda nu muene’! (Heb. 12:2, 3) Yehowa wajiya nji gutukuatesa ha gukolesela mu malamba agasue adi gutubuila nu guhuiminyina guagasue.

14. Malongo atshi tuajiya guzula mu khadilo dia guhuiminyina dia Abalahama? (Hebelu 6:15) (Tala nji gifuanesa.)

¹⁴ Itshi tuajiya gutshita gula gisugishilo gia mavu awa khenji giza gifua luholo tuakhalele gudifelela? Athu ako mukatshi dietu akhalele gudifelela egi nga gisugishilo giajile gale sendese mualeha. Uvi henyaha yajiya gukhala egi tudi muvua woma egi mbatushigo mukhala luko nu monyo matangua avula ha gumona guza gua gisugishilo giene. Itshi yajiya gutukuatesa ha gulandula gunengena nu guhuiminyina guagasue? Tutadilenu gifezegeselo gia Abalahama. Hakhalele muene nu ivo 75 nu gakhalelego nga nu mona, Yehowa wamulayele egi: “Mbagugubuisa gifutshi giakoma.” (Gis. 12:1-4) Abalahama wamonele gutagenesewa gua laji diene ba? Diago ndo. Gungima dia guzawuga Muta wa Efrata, Abalahama wanengenene ivo 25, gungima wamonele guvualewa gua mun’enji Izake; wanengenene ivo iko 60, gungima wamonele nji guvualewa gua ajigulu enji mbadi Ezau nu Yakoba. (Tanga Hebelu 6:15.) Uvi Abalahama gamonelego luholo ajigulu enji abuile gifutshi giakoma nu ahetela Mavu Agutendelela. Uvi yala owu wagujinginyina wakuatele ufuta wakola nu Mufugi wenji. (Yak. 2:23) Tangua Abalahama mbawufuzumuga, mbawukhala nu gusuanguluga ha gujiya egi gutshigina guenji nu khadilo dienji  dia guhuiminyina diabatele athu a mu ifutshi yagasue gubonga! (Gis. 22:18) Longo ditshi tuajiya guzula mu gifezegeselo gienji? Yajiya gukhala egi tuamonelego gutagenesewa gua ndaga jiagasue jiatulayele Yehowa. Uvi gula tudi nu khadilo dia guhuiminyina gifua Abalahama, tuajiya gusha mutshima egi Yehowa mbawutushimbiga sendese mangino nu muavula gubalega mu mavu ahe-ahe alayele muene.​—Mako 10:29, 30.

15. Ndaga jitshi tuajiya gutadila mu gulonguga guetu hakhetu?

¹⁵ Biblia idi nu ifezegeselo iko yavula ya athu amonesele khadilo dia guhuiminyina. (Yak. 5:10) Yajiya gukhala ndaga yabonga gula wazula tangua dia gulonguga ifezegeselo yawo. b Ha gufezegesa, Davidi wambiwe maji ha gubua fumu wa Isalele tangua diakhalele muene mona wazonda, uvi wakhalele naye gunengena ivo yavula ha gusendesa guhinyina. Simeone nu Ana akombelele Yehowa nu gujinginyina guagasue tangua akhalele munengena guza gua Masiya. (Luka 2:25, 36-38) Tangua udi mulonguga mene eji, dihule egi: Yajiya gukhala egi itshi yakuatesele muthu owu ha gumonesa khadilo dia guhuiminyina? Luholo lutshi khadilo diene diamubatele gubonga? Luholo lutshi ngajiya gulandula gifezegeselo gienji? Wajiya nji guzula malongo mu ifezegeselo ya athu anyi amoneselego khadilo dia gughuiminyina. (1 Sam. 13:8-14) Dihule nji egi: ‘Ndaga itshi yatshitshile egi athu ene amonesago khadilo dia guhuiminyina? Malamba atshi a abuidile?’

16. Gubonga gutshi tuajiya guheta gula tudi mumonesa khadilo dia guhuiminyina?

¹⁶ Gubonga wajiya guheta gula udi nu khadilo dia guhuiminyina. Tangua tuana monesa khadilo dia guhuiminyina, tuana khala nu gusuanguluga, tuanago nji gudisagesa muavula. Khadilo diene diajiya nji gutukuatesa ha gukhala nu matangi abonga nu sante yabonga. Khadilo dia guhuimanyina diajiya gutukuatesa ha gukhala muabonga nu athu ako. Diana gutukuatesa nji ha gukhala nu gudivua guabonga mu hungu. Gula muthu watukambela milonga, gutuna guvua khabu muphushi guajiya gutukuatesa ha gutuna gutshita ndaga yajiya gubolesa luko milonga yene. (Ngi. 37:8; Ish. 14:29) Uvi ndaga yabalega ndando idi egi, gula tudi nu khadilo dia guhuiminyina tudi mulandula gifezegeselo gia Tata wetu wa mu dilu nu tudi mukolesa ufuta wetu n’enji.

17. Desizio ditshi tudi naye guzula?

¹⁷ Khadilo dia guhuiminyina didi khadilo dia ndando diana gutubatela gubonga guavula! Matangua ako yajiya gukhala lamba ha gumonesa khadilo dia guhuiminyina, uvi Yehowa wajiya gutukuatesa ha gulandula gukudisa khadilo diene. Tangua tudi munengena mavu ahe-ahe, tudi naye gusha mutshima egi ‘meso a Yehowa ana tala athu adi gumutumagela, anyi ana nengenena guzumba guenji gua giamatshidia.’ (Ngi. 33:18) Mukut’etu agasue tuzulenu desizio dia gulandula gusudiga khadilo dia guhuiminyina.