1. ¿Jasche utz kawilo che katkʼojiʼ kukʼ ri winaq che kʼo kipaciencia?

 QONOJEL utz kqilo kojkʼojiʼ kukʼ winaq che kʼo kipaciencia. ¿Jasche? Rumal che aninaq taj kkʼistaj kikʼuʼx. Y nim kqil wi are chiʼ ri winaq aninaq taj kpe koyowal chqij are chiʼ kʼo kojsach wi. Xuqujeʼ, nim kqil wi che ri xyaʼow etaʼmanik re ri Biblia chqe xukʼut paciencia qukʼ are chiʼ kʼo kqachʼobʼ taj y are chiʼ kʼax kqabʼan che ubʼanik pa ri qakʼaslemal. Y más ¡kojmaltyoxin che ri Jehová che kʼo upaciencia qukʼ! (Rom. 2:4).

2. ¿Jampaʼ kʼax kqabʼan che ukʼutik paciencia?

² Qonojel nim kqil wi che ri nikʼaj chik kkikʼut paciencia. Are kʼu, are chiʼ oj ri rajawaxik kqakʼut paciencia weneʼ kʼax kqabʼan che ubʼanik. Weneʼ aninaq kpe qoyowal are chiʼ oj bʼenaq pa ri qacarro y kojkun taj kojqʼaxik más na we aninaq qij. Weneʼ aninaq kpe qoyowal are chiʼ ko kojchʼabʼexik. Y weneʼ jujun taq mul kqachomaj che ri kʼakʼ uwach Ulew che utzujum ri Jehová aninaq ta kpetik. ¿La mat qastzij che rajawaxik che qonojel kkʼojiʼ qapaciencia? Pa wajun kʼutunem riʼ kqil na jas kraj kubʼij ri paciencia y jasche rajawaxik kqakʼutu. Y kqil na jujun taq tobʼanik che kojutoʼo rech kqakʼut paciencia.

3. ¿Jas kunaʼ jun winaq che kʼo upaciencia are chiʼ kyak royowal?

³ Chqilaʼ kajibʼ ubʼantajik jun winaq che kʼo upaciencia. Nabʼe, aninaq taj kpe royowal. Aninaq taj kpe royowal rukʼ ri kbʼix che y kutoj ta ukʼaxel ri kbʼan che. Wajun bʼantajik riʼ kriqitaj nabʼe mul pa ri Biblia are chiʼ kubʼij che ri Jehová are jun «¡Dios junalik, xuqujeʼ toqʼobʼisal wachaj,  kochʼonel xuqujeʼ nim pa loqʼoqʼebʼal kʼuxaj xuqujeʼ qastzij!» (Éx. 34:6).

4. ¿Jas bʼantajik rajawaxik kukʼut jun winaq che kʼo upaciencia are chiʼ keyenik?

⁴ Ukabʼ, ri winaq che kʼo upaciencia keyenik. Kpe ta royowal are chiʼ aninaq taj kebʼan ri jastaq (Mat. 18:26, 27). Kʼi taq mul rajawaxik kkʼojiʼ qapaciencia rech kqeyej jun jastaq che kqaj. Jun chke, are chiʼ jun winaq kubʼij chqe ri tajin kukʼulmaj, rajawaxik kqatatabʼej rukʼ paciencia y aninaq taj kojchʼawik (Job 36:2). Xuqujeʼ rajawaxik kkʼojiʼ qapaciencia are chiʼ kqatoʼ ri tijoxel rech kuchʼobʼ ri kubʼij ri Biblia o rech kuya kan ubʼanik jun itzel jastaq.

5. ¿Jas rajawaxik kqabʼano rech kqakʼutu che kʼo qapaciencia?

⁵ Urox, ri winaq che kʼo upaciencia aninaq taj kchʼojinik. Qastzij wi che weneʼ kʼo jujun taq mul che rajawaxik aninaq kqabʼan ri jastaq. Are chiʼ kyaʼ jun chak che nim ubʼanik che jun winaq che kʼo upaciencia, aninaq taj kumajij y aninaq taj kukʼisilaʼ. Xaneʼ kchoman na chrij ri kraj kubʼano, rech utz kel ri uchak che kubʼano.

6. ¿Jas kubʼan jun winaq che kʼo upaciencia are chiʼ kuriq jun kʼax?

⁶ Ukaj, ri winaq che kʼo upaciencia kukoj uchuqʼabʼ rech xaq ta are kchʼaw chrij ri kʼax che kuriqo. Rumal laʼ ri kochʼonik kʼo ubʼanik rukʼ ri paciencia. Qastzij wi che kʼo ta kubʼano we kqabʼij che jun qachiʼl ri tajin kqakʼulmaj. Are kʼu ri winaq che kʼo upaciencia kkʼojiʼ jun utz ubʼantajik y kuya ta kan upatanexik ri Jehová rukʼ kikotemal apastaneʼ ri kʼax che kuriqo (Col. 1:11). Ri oj upatanel ri Jehová kqakoj qachuqʼabʼ rech amaqʼel kqakʼut paciencia. ¿Jasche? Chqilaʼ jujun rumal che rajawaxik kqakʼut paciencia.

7. Junam rukʼ ri kubʼij Santiago 5:7, 8, ¿jasche rajawaxik kqakʼut paciencia? (Xuqujeʼ chawilaʼ ri e wachbʼal).

⁷ Rech kqariq ri kʼaslemal che kʼo ta ukʼisik rajawaxik kqakʼut paciencia. Junam rukʼ ri xkibʼan ri sukʼalaj taq upatanelabʼ ri Jehová ojer, oj rajawaxik kqakʼut paciencia y kqeyeʼj kʼa ktzʼaqat na ri urayibʼal ri Dios (Heb. 6:11, 12). Ri Biblia kojjunamaj rukʼ jun tikonel (chasikʼij uwach Santiago 5:7, 8). Ri tikonel kchakunik, kutik ri ijaʼ, kujaʼj, are kʼu retaʼm taj jampaʼ kuya ri uwachinik. Are kʼu rukʼ paciencia kreyeʼj che kwachinik. Are je kkibʼan ri cristianos: kkikoj kichuqʼabʼ che upatanexik ri Jehová paneʼ ketaʼm taj jampaʼ kpe ri kajaw (Mat. 24:42). Rumal laʼ, chojeyen rukʼ paciencia y chqakubʼsaj qakʼuʼx che ri Jehová kutzʼaqatisaj na ri utzujum. We kqakʼut ta paciencia, weneʼ kkʼistaj qakʼuʼx y nojimal chi nojimal kqaya kan upatanexik ri Jehová. Xuqujeʼ weneʼ kqamaj ubʼanik jastaq che kuya ta kikotemal chqe. Are kʼu, we kqaya ta kan ukʼutik paciencia, kqachʼij riʼ ronojel ri kʼax che kqakʼulmaj y ri Jehová kuya na ri kʼaslemal chqe che kʼo ta ukʼisik (Miq. 7:7; Mat. 24:13).

8. ¿Jas kojutoʼ wi ri paciencia rech oj utz kukʼ ri nikʼaj chik? (Colosenses 3:12, 13).

⁸ Ri paciencia kojutoʼo rech oj utz kukʼ ri nikʼaj chik. We kʼo qapaciencia, kqatatabʼej riʼ ri kkibʼij ri nikʼaj chik (Sant. 1:19). Y kqabʼano che kkʼojiʼ jamaril chqaxoʼl. Aninaq ta riʼ kojchʼawik y kqabʼij ta tzij che kubʼan kʼax chke ri nikʼaj chik. Xuqujeʼ, we kbʼix tzij chqe, aninaq ta riʼ kpe qoyowal y kqatoj ta ukʼaxel ri kbʼan chqe. Xaneʼ kqachʼijo y kqakuyulaʼ qamak (chasikʼij uwach Colosenses 3:12, 13).

9. ¿Jas kubʼan ri paciencia che qatoʼik rech utz ri kqachaʼ ubʼanik pa ri qakʼaslemal? (Proverbios 21:5).

⁹ Ri paciencia xuqujeʼ kojutoʼo rech utz ri kqachaʼ ubʼanik pa ri qakʼaslemal. Rech xaq ta aninaq kqabʼan jun jastaq, ri paciencia kojutoʼo rech kqatas qatiempo rech kqilo we utz ri tajin kqachaʼ ubʼanik (chasikʼij uwach Proverbios 21:5). Jun kʼutbʼal, we tajin kqatzukuj qachak, we aninaq kqakʼam jun weneʼ kubʼano che kojbʼe ta chi pa ri e riqbʼal ibʼ o kqatzijoj ta chi más ri utzij ri Dios. Are kʼu, we kʼo qapaciencia, kqil na riʼ che ri chak kʼo ta kubʼan che ri qachilanik rukʼ ri qafamilia y ri qachilanik rukʼ ri Jehová. Ri paciencia kojutoʼo rech kqariq ta kʼax rukʼ ri kqachaʼ ubʼanik.

10. ¿Jas rajawaxik kqabʼano rech kqaya ta kan ukʼutik paciencia?

¹⁰ Chqataʼ che ri Jehová che kojutoʼo rech kkʼojiʼ más qapaciencia. Ri paciencia are jun bʼantajik che kuya ri uxlabʼixel chqe (Gál. 5:22, 23). Rumal laʼ, kojkunik kqataʼ che ri Jehová che kojutoʼ rukʼ ri ruxlabʼixel rech kqakʼut ri e bʼantajik che kuyaʼo. We tajin kqariq jun kʼax pa ri qakʼaslemal che kubʼano che kʼax kqabʼan che ukʼutik paciencia, chqataʼ ri utobʼanik ri Jehová (Luc. 11:9, 13). Xuqujeʼ kojkunik kqataʼ che ri Jehová che keqil ri jastaq junam rukʼ ri kubʼan ri areʼ che kilik. Are chiʼ qabʼanom chi qachʼawem, chqakojoʼ qachuqʼabʼ rech ronojel taq qʼij kqakʼut paciencia. We amaqʼel kqataʼ tobʼanik che ri Jehová y kqakoj qachuqʼabʼ  che ukʼutik paciencia, nojimal chi nojimal kkʼojiʼ qapaciencia.

11, 12. ¿Jas ubʼanom ri Jehová che ukʼutik che kʼo upaciencia?

¹¹ Chojchoman chrij ri e kʼutbʼal che e kʼo pa ri Biblia. Pa ri Biblia keqariq kʼutbʼal kech winaq che xkʼojiʼ kipaciencia. We kojchoman chrij ri kikʼutbʼal, kojkun riʼ kqakʼut paciencia junam kukʼ. Kqetaʼmaj na chkij winaq che kubʼij ri Biblia, are kʼu nabʼe chqetaʼmaj chrij ri Jehová, che are jun Dios che kʼo nim upaciencia.

¹² Pa ri kotzʼiʼjalaj Edén, ri Satanás xutzʼilobʼisaj ri ubʼiʼ ri Jehová, jetaneʼ xubʼij che ri Jehová are jun itzel Qʼatal tzij y che kloqʼoqʼen taj. Are kʼu ri Jehová, aninaq taj xusachisaj uwach wajun bʼanal tzij, xaneʼ xukʼut paciencia, rumal che retaʼm che kajwataj tiempo rech kukʼutu che ri uQʼatbʼal tzij are ri más utz. Y rumal che uyaʼom na tiempo tajin kuchʼij ri molom taq tzij che tajin kbʼix chrij ri ubʼiʼ. Rumal che ri Jehová kʼo upaciencia, wariʼ ubʼanom che e kʼi winaq tajin kketaʼmaj chrij y kekunik kkiriq ri kʼaslemal che kʼo ta ukʼisik (2 Ped. 3:9, 15). We kojchoman chrij ri utzilal che riqom rumal ri upaciencia ri Jehová, kʼax ta kqabʼan riʼ che ukʼutik paciencia y kqeyeʼj che kopan ri qʼij che kkʼis ri kʼaxkʼolil cho ri uwach Ulew.

13. ¿Jas xubʼan ri Jesús che resaxik uwach ri upaciencia ri Jehová are chiʼ xkʼojiʼ cho ri uwach Ulew? (Xuqujeʼ chawilaʼ ri wachbʼal).

¹³ Ri Jesús kresaj uwach ri upaciencia ri uTat y xukʼut wariʼ are chiʼ xkʼojiʼ cho ri uwach Ulew. Qastzij riʼ che jujun taq mul kʼax xubʼan che ukʼutik paciencia, más na kukʼ ri escribas y ri fariseos, che e itzel taq winaq (Juan 8:25-27). Are kʼu, rumal  che xresaj uwach ri uTat, aninaq taj xpe royowal. Xubʼij ta itzel taq tzij chke ri winaq che xkibʼan kʼax che y che xkiyoqʼo (1 Ped. 2:23). Xaneʼ rukʼ paciencia xuchʼij ri kʼax che xbʼan che. Rumal laʼ, ri Biblia kubʼij wariʼ chqe: «Chichomaj rij ri jun ri xuchʼij ronojel ri kʼax ri xbʼan che kumal ajmakibʼ» (Heb. 12:2, 3). Rukʼ ri utobʼanik ri Jehová, kojkunik kqachʼij rukʼ paciencia ri e kʼax che kqariq na.

14. ¿Jas kqetaʼmaj chrij ri upaciencia ri Abrahán? (Hebreos 6:15; xuqujeʼ chawilaʼ ri e wachbʼal).

¹⁴ ¿Jas kojtoʼwik rech amaqʼel kqakʼut paciencia che reyexik ri kʼisbʼalil? Weneʼ jujun taq mul kkʼistaj qakʼuʼx che reyexik o weneʼ kqachomaj che kqil ta chi riʼ are chiʼ kpetik. Chojchoman chrij ri ukʼutbʼal ri Abrahán. Ri Abrahán 75 chi ujunabʼ y kʼo ta ralkʼwal, are chiʼ ri Jehová xubʼij wariʼ che: «Kinbʼan na jun nim tinamit ri nim uqʼij chke ri e awijaʼlil» (Gén. 12:1-4). ¿La xril ri Abrahán are chiʼ xtzʼaqat wajun tzujunik riʼ? Ronojel taj xrilo. 25 junabʼ xreyeʼj na ri Abrahán are chiʼ uqʼaxem chi ri joron Éufrates. Tekʼuriʼ xkʼojiʼ ri Isaac. Y are chiʼ qʼaxinaq chi 60 junabʼ xekʼojiʼ ri uwiʼ umam ri Esaú y ri Jacob (chasikʼij uwach Hebreos 6:15). Ri Abrahán xril ta chik are chiʼ ri rijaʼlil xeʼux nimaʼq taq tinamit y xkechbʼej ri Tzujum Ulew. Paneʼ je wariʼ xukʼulmaj, are kʼu xkʼojiʼ jun utz rachilanik rukʼ ri Jehová (Sant. 2:23). Qastzij riʼ che sibʼalaj kkikot ri Abrahán are chiʼ kkʼastajisaxik. Y kretaʼmaj na che rukʼ ri ukojonik y ri upaciencia xetewchix kʼi taq tinamit (Gén. 22:18). ¿Jas kqetaʼmaj chrij wariʼ? Weneʼ kqil taj are chiʼ ketzʼaqat ronojel ri utzujum  ri Jehová pa taq ri qaqʼij. Are kʼu, we kqakʼut paciencia junam rukʼ ri Abrahán, qas kqakubʼsaj qakʼuʼx riʼ che ri Jehová kojutewchij na kimik y pa ri kʼakʼ uwach Ulew (Mar. 10:29, 30).

15. ¿Jas kojkunik kqanikʼoj are chiʼ kqasikʼij ri Biblia?

¹⁵ Ri Biblia xuqujeʼ kchʼaw chkij nikʼaj chik che xkikʼut paciencia (Sant. 5:10). Utz we kanikʼoj ri kikʼaslemal ri winaq riʼ. b Ri David kʼa ala na are chiʼ xchaʼ che qʼatal tzij pa Israel, are kʼu xreyej na kʼi junabʼ rech kuqʼat tzij. Ri Simeón y ri Ana rukʼ sukʼilal xkipatanij ri Jehová are chiʼ xkeyej che kpe ri Mesías (Luc. 2:25, 36-38). Are chiʼ kanikʼoj uwach ri e bʼantajik riʼ che e kʼo pa ri Biblia, chachomaj: «¿Jas xtoʼw wajun winaq riʼ rech xukʼut paciencia? ¿Jas utzilal xuriqo rumal che xukʼut paciencia? ¿Jas kinbʼan che resaxik uwach?». Xuqujeʼ kʼo kʼi kawetaʼmaj chkij ri xkʼojiʼ ta kipaciencia (1 Sam. 13:8-14). Chachomaj wariʼ: «¿Jasche xkʼojiʼ ta kipaciencia? ¿Jas kʼax xkiriqo rumal che xkikʼut ta paciencia?».

16. Chayaʼ ubʼixik jujun taq utzilal che kqariqo we kqakʼut paciencia.

¹⁶ Chojchoman chrij ri utzilal che kqariqo we kqakʼut paciencia. We kʼo qapaciencia sibʼalaj kojkikot riʼ y kpe ta qoyowal riʼ. Rumal laʼ, ri paciencia kojutoʼo rech kojyawaj taj. Xuqujeʼ ktobʼanik rech kkʼojiʼ utzilal chqaxoʼl kukʼ ri nikʼaj chik y rech kkʼojiʼ ta tasoj ibʼ pa ri congregación. We aninaq ta kpe qoyowal rumal ri kubʼan jun chik chqe, wariʼ kubʼano che kkʼojiʼ ta chʼoj chqaxoʼl (Sal. 37:8; Prov. 14:29). We kqakʼut paciencia, kqariq utzilal, kqesaj uwach ri Jehová y kojqebʼ más rukʼ.

17. ¿Jas ri kqaj kqabʼano?

¹⁷ Junam rukʼ ri qilom chik, ri paciencia are jun utz bʼantajik che kuya kikotemal chqe. Paneʼ kʼax kqabʼan che ukʼutik, are kʼu ri Jehová kojutoʼ che ukʼutik wajun bʼantajik riʼ. Y, rech kqeyeʼj che kopan ri kʼakʼ uwach Ulew, qas kqakubʼsaj qakʼuʼx che «ri Ajawaxel amaqʼel keʼuchajij ri nim kil wi kumal xuqujeʼ ri kuʼl kikʼuʼx chrij ri loqʼoqʼebʼal ukʼuʼx» (Sal. 33:18). Rumal laʼ, chqakojoʼ qachuqʼabʼ rech kqakʼut paciencia.