1. ¿Imamandata pacienciata charij gentecunahuan canata gushtapangui?

 ¿IMAMANDATA tucuicunatallata pacienciata charij gentecunahuan canata gushtanchi? Por ejemplo, na culirashpalla shuyanata yachajcunatami respetanchi. Shinallata ñucanchicuna pandarijpi shujcuna pacienciata charijpica ninandami valichinchi. Bibliapa yachachishcacunata na ucha intindijpi, shinallata yachajushcacunata ñucanchi causaipi na ucha pactachijpi Bibliamanda yachachij huauquipanicuna pacienciata charishcamandaca ninandami agradicircanchi. Ashtahuangarin Jehová Dios ñucanchita pacienciata charishcamandami ninanda agradicinchi (Rom. 2:4).

2. ¿Ima situaciongunapita pacienciata charinaca difícil caita ushan?

² Shujcuna pacienciata charijpica ninandami valichinchi. Shinapash shujcunata pacienciata charishcata ñucanchi ricuchina cajpica dificilmi caita ushan. Por ejemplo, jipayashca rijujpi, ñanbi carrocuna junda cajpi, chai jahuapash imatapash nijpica talvez jaicatami culiranchiman. Chaita rurashpaca pacienciata charishcataca na ricuchinchimanllu. Y huaquinbica “Jehovapa punllapash na ucha shamunllu” nishpami pensarinchiman. Caicunapi pensarishpaca ashtahuan pacienciata charinatami munanchiman. Cai temapica paciencia ima cashcata y pacienciata charina imamanda importante cashcatami ricupashun. Shinallata ashtahuan pacienciata charichun imacunalla ayudai ushashcata yachangapami huaquin consejocunata ricupashun.

3. Shujcuna culirachingapaj munajpipash pacienciata charijcunaca ¿imatata ruran?

³ Pacienciata charijcuna imashina cashcata chuscu yuyaicunapi ricupashun. Primero, na ñapash culiranllu. Pipash culirachijpi tranquilo cangapami esforzarin. Shinallata na chashnallata tigrachinllu. Bibliapica Jehová Dios pacienciata charishcata  ricuchingapaca: “Tucuita ushaj, llaquij, juyaj, na ñapash fiñarij, ninanda llaquij, na llullaj can” ninmi (Éx. 34:6).

4. Shuyana cashcata yachashpaca pacienciata charijcunaca ¿imatata ruran?

⁴ Segundo, pacienciata charijcunaca imagutapash tranquilomi shuyan. Shuyashca jahua imapash na ucha pactarijpica na culiranllu (Mat. 18:26, 27). Cazi tucuipimi tranquilo shuyana canchi. Por ejemplo, pipash imagutapash parlajpica, imatapash na nishpami paicuna parlachun pacienciahuan uyana canchi (Job 36:2). Shinallata Bibliamanda shuj estudianteman Bibliapa yachachishcacunata intindichishpa cati ushangapami pacienciata charina minishtirin. O paicunapa nali ruraicunata saquichun ayudangapapashmi pacienciata charina minishtirin.

5. ¿Imata ashtahuan rurashpata pacienciata charishcataca ricuchinchi?

⁵ Tercero, pacienciata charijcunaca na aliguta pensarishpallata na imatapash ruranllu. Huaquinbica imagutapash jaicata ruranaca alimi can. Pero pacienciata charijcunaca imapash importante ruraicunata charishpaca chai ruraicunata tucuchingapaj nishpallaca imatapash na jaicata ruranllu. Ashtahuangarin imashina ruranata ricungapami tiempota llujchin. Chashna rurashca jipami imata rurana cashpapash alimanda ruran.

6. Pacienciata charijcunaca llaquicunapi cashpaca ¿imatata ruran?

⁶ Cuarto, pacienciata charijcunaca llaquicunata charishpapash na quejarishpalla chai llaquicunata aguantangapami esforzarin. Shinaca pacienciata charinami aguantashpa catichun ayudanga. Llaquicunata charishpa shuj amigo de confianzaman chai llaquicunamanda imashina sintirijushcata parlanaca alimi can. Pero pacienciata charijcunaca llaquicunata charishpapash aguantashpa catita ushangapaj y Jehová Diostapash cushilla sirvita ushangapami ninanda esforzarin (Col. 1:11). Cristianocunaca cai chuscu yuyaicunapi yachajushcashnami pacienciata ricuchingapaj esforzarina capanchi. Chaita ruranaca ¿imamandata importante can?  Chaita yachangapaca huaquin yuyaicunata ricupashun.

7. Santiago 5:7, 8​pi nishcashnaca pacienciata charinaca ¿imamandata importante can? (Fotocunata ricupangui).

⁷ Salvarita ushangapaca pacienciata charinami minishtirishca can. Punda tiempopi Jehovata sirvijcunashnallatami Jehová Dios paipa promesacunata pactachichunmi pacienciahuan shuyana canchi (Heb. 6:11, 12). Bibliapica shuj tarpuj runaguhuanmi chimbapuran (Santiago 5:7, 8​ta liipangui). Tarpuj runagu muyuta tarpushpa, yacuta regashpapash ima horapacha chai muyugu viñanataca na yachanllu. Shinapash ima horapash cozechanata yashpami pacienciahuan shuyan. Shinallata cristianocunapash “Señor ima punlla shamunata na yachashpami” Jehová Diospa shinlli trabajashpa ocupado yalin (Mat. 24:42). Jehová Dios paipa tucui promesacunata pactachinata seguro cashpami pacienciahuan shuyanchi. Na pacienciata charishpaca “Jehová Diospa promesacunaca na ucha pactarimunllu” yashpami Jehovamanda asha asha caruyaita ushanchi. Shinallata cushilla sintiringapaj munaimandami shuj cosascunapira pensarita ushanchiman. Pero pacienciata charishpallami tucurimuicaman aguantashpa salvarita ushashun (Miq. 7:7; Mat. 24:13).

8. Pacienciata charinaca ¿imashinata shujcunahuan ali cachun ayudan? (Colosenses 3:12, 13).

⁸ Pacienciata charinaca shujcunahuan ali cachunmi ayudan. Pacienciata charishpaca shujcuna parlajpi uyangapapash listomi cashun (Sant. 1:19). Tucuicunahuanmi tranquilo, ali caita ushashun. Pipash culirachijpica na jaicata shujcunata llaquichij shimicunata nishunllu. Shinallata pipash imatapash nishpa llaquichijpica na ñapash culirashunllu. Ni ñucanchita llaquichishcashnallatapash na llaquichishunllu. Ashtahuangarin caishujmanda chaishujmanda aguantarishpa y tucui shunguhuan perdonashpami catipashun (Colosenses 3:12, 13​ta liipangui).

9. Decisiongunata japina horasca pacienciata charinaca ¿imashinata ayudan? (Proverbios 21:5).

⁹ Pacienciata charinaca ali decisiongunata japichunmi ayudan. Imatapash na pensarishpa ñapash ruranapa randica, ima ali cashcata pensaringapami tiempota llujchina canchi (Proverbios 21:5​ta liipangui). Por ejemplo, trabajota mascajuimandami tandanajuiman, predicacionman na rita ushana trabajota tarinchiman. Pero pacienciata charishpaca trabajo pushtu maipi cajta, imashina trabajagrijushcata pensarinami canchi. Shinallata: “¿Familiahuan y Jehová Dioshuanbash ali cachun ayudangachu?” nishpami pensarina canchi. Pacienciata charinami nali decisiongunata ama japichun ayudan.

10. Pacienciata charishpa catingapaca ¿imatata rurai ushanchi?

¹⁰ Ashtahuan pacienciata charingapaca Jehová Diostami mañana canchi. Taita Diospa espíritu santo pushachun saquishpami pacienciata charishcata ricuchita ushapashun (Gál. 5:22, 23). Chaimandami Jehová Diostaca paipa espíritu santota cushpa ashtahuan pacienciata charichun ayudahuai nishpa mañaita ushanchi. Imapash llaquipi cashpa pacienciata ñana chari ushajushpaca Jehovata paipa espíritu santota carahuai nishpa mañaita ushanchi (Luc. 11:9, 13). Shinallata Jehová Dios pensashcashna ñucanchipash pensangapaj ayudahuai nishpami mañaita ushanchi. Y Jehová Diosta mañashca jipaca cada punlla pacienciata charishcata ricuchingapami esforzarina canchi. Pacienciata charingapaj Jehová Diosta ayudahuai nishpa y pacienciata charishcata ricuchingapaj esforzarishpaca  asha ashami pacienciata charishpa catishun.

11, 12. Jehová Dios pacienciata charishcataca ¿imashinata ricuchishca?

¹¹ Bibliapi parlashca ejemplocunatami yachajuita ushanchi. Bibliapica pacienciata charishcacunamandami parlan. Paicunamanda yachajushpaca ñucanchicunapashmi pacienciata charinata yachajushun. Pacienciata charishcacunapa huaquin ejemplocunatami ricupashun. Pero primeroca Jehová Dios pacienciata charishcatami ricupashun.

¹² Jardín de Edenbica Diabloca Jehovapa shutimanda llullacunata nishpami Jehová Dios ali mandaj, juyaj cashcatami na valichirca. Pero Diablota chai rato tucuchita ushashpapash Jehová Diosca paipa Gobiernolla ali cashcata ricuchingapaca pacienciata charishcata y controlarinata yachaj cashcatami ricuchirca. Jehová Diosca paipa punlla chayamungacamanmi paipa shutita mapayachinajujpipash aguantashpa shuyajun. Chaicamanga Jehová Dios pacienciata charishcamandami ashtaca millón gentecunaca paita rijsita ushashca. Shinallata para siempre causana oportunidadtapashmi charin (2 Ped. 3:9, 15). Jehová pacienciata charishcamanda ashtaca ali cosascunata rurai ushashcapi pensarishpaca Jehovapa punllata shuyanaca ashtahuan facilmi canga.

13. Jesusca ¿imashinata paipa Taitashna pacienciata charishcata ricuchirca? (Fotota ricupangui).

¹³ Jesús cai alpapi cashpaca paipa Taitashna pacienciata charishcataca alipachami ricuchirca. Jesuspaca siempre pacienciata ricuchinaca na facilchu carca. Ashtahuanbachaca leyta yachachijcuna y fariseocuna llulla cashcamandami shina pasarca (Juan 8:25-27). Pero Jesusca paipa Taita cuendami na ñapash culiran carca. Jesusca paipa contracuna nalicunata nijpipash na chashnallata tigrachinllu carca (1 Ped. 2:23). Más bien Jesusca chai  llaquicunataca pacienciahuan, na quejarishpallami aguantarca. Chaimi Bibliapica: “Na shaijushpa, ama desanimaringapaca, Jesuspimi aligutapacha pensarina capanguichi. Paica, pecador gentecunapa nali rimashcacunatami aguantarca” nishpa consejan (Heb. 12:2, 3). Ñucanchicunapash Jehová Diospa ayudahuanmi ima llaquicuna shamujpipash pacienciahuan aguantaita ushanchi.

14. Abrahán pacienciata charishcamandaca ¿imatata yachajunchi? (Hebreos 6:15; fotocunata ricupangui).

¹⁴ Talvez huaquingunaca Jehovapa punlla chayamuchunga ñami ashtaca tiempota shuyanajushcanchi. Pero cunanbica “Jehovapa punllataca talvez na ñuca ñavihuanbacha ricuita ushashachu” nishpami pensarita ushanchiman. Chai punllata pacienciahuan shuyangapaca ¿imata ayudanga? Abrahanba ejemplota ricupashun. Abrahanga 75 huatacunatami charirca. Paica shuj churigutallapash na charircachu. Abrahandaca “cambaj miraimandaca, shuj jatun llactata rurasha” nishpami Jehová Diosca prometirca (Gén. 12:1-4). Pero Abrahanga Jehová Dios imashina chai promesata pactachishcataca ¿ricui usharcachu? Na tucuita ricui usharcachu. Abrahán paipa churi Isaacta charingapaca Éufrates yacuta yalishca jipami 25 huatacunata shuyana carca. Y 60 huatacuna jipami paipa nieto Esaú y Jacobca nacirirca (Hebreos 6:15​ta liipangui). Pero Abrahanga paipa familiamanda ashtaca llactacuna mirashcata y shinallata Jehová Dios carasha nishca alpagupi causajtapash na ricuita usharcachu. Jehovapa prometishcata na tucuita ricui ushashpapash Abrahanga Jehová Dioshuanga alipacha amigomi carca (Sant. 2:23). Abrahán paraíso alpagupi cutin causarishpaca ¿imashinata sintiringa? Shinlli feta, pacienciata charishcamanda tucui llactacuna bendiciai tucushcata yachaj chayashpaca Abrahanga cushillami sintiringa (Gén. 22:18). Caimandaca ¿imatata  yachajupanchi? Cunan punllacunapi Jehovapa tucui promesacuna imashina pactarijta na ricui ushashpapash Abrahán shinami pacienciata charishpa catita ushapanchi. Chashna pacienciata charijpimi Jehová Dios cunan punllapipash y shamuj punllapipash bendicianataca seguro caita ushapanchi (Mar. 10:29, 30).

15. Ñucanchi estudio personalpica ¿imatata yachajuita ushapanchi?

¹⁵ Bibliapica pacienciata charishcacunapa huaquin ejemplocunamandami parlan (Sant. 5:10). Cai ejemplocunamandami yachajuita ushapangui. b Por ejemplo, Davidtaca Jehová Diosca Israel llactapi mandachunga huambragu cajpillatami agllarca. Pero shinapash Israel llactapi mandangapaca ashtaca huatacunatami shuyana carca. Simeón y Anaca Mesías shamungacamanga Jehová Diosta sirvishpami catinajurca (Luc. 2:25, 36-38). Paicunamanda yachajujushpaca cashnami pensarita ushapangui: “Cai persona pacienciata charichunga ¿imata ayudarca? Pacienciata charishcamandaca ¿ima beneficiocunatata charirca? Paipa ejemplotaca ¿imashinata cati ushani?”. Shinallata pacienciata na charishcacunapa ejemplomandapashmi yachajuita ushapangui (1 Sam. 13:8-14). Paicunamanda yachajujushpapash cashnami pensarita ushapangui: “¿Imamandata pacienciataca na charirca? Pacienciata na charishcamandaca paicunahuanga ¿imata pasarca?”.

16. Pacienciata charishpa ima beneficiocunata chari ushashcata parlapai.

¹⁶ Pacienciata charishcamanda ima beneficiocunalla tiashcapi pensaripashunchi. Pacienciata charinaca cushilla, tranquilo cachunmi ayudan. Shinaca pacienciata charinaca físicamente y mentalmente ali cachunmi ayudan. Shinallata shujcunahuanbash ali cachun y congregacionbipash shujllashna cachunmi ayudanga. Shujcuna imatapash nishpa culirachijpipash na jaicata culiranata yachashpaca shujcunahuanbash na problemata charishunllu (Sal. 37:8; Prov. 14:29). Ashtahuangarin pacienciata charishpami Jehovapa ejemplota catishcata ricuchinchi y paimanbash ashtahuan quimirinchi.

17. ¿Imata rurangapata esforzarina capanchi?

¹⁷ Imashinami ricupashcanchi pacienciata charinaca alipacha can. Shinallata tucuipimi ayudaita ushan. Aunque pacienciata ricuchina na siempre fácil cajpipash Jehová Diosca pacienciata charishpa catichunmi ayudanga. Y paraíso alpagu chayamungacamanga pacienciahuan shuyashpa catijpica ‘Mandaj Diosca paipaj ñavihuanmi paita manllajcunatapash, pai llaquinata shuyajcunatapash ricujujtaca’ seguro caita ushapanchi (Sal. 33:18). Shinaca tucuicunallatami pacienciata charishpa catingapaj esforzarina capanchi.