1. Eaa koe i mataora ai i te aronga e akakoromaki ra?

 MATAORA tatou i te aronga e akakoromaki ra. Eaa te tumu? Ka āriki meitaki tatou i te aronga e tapapa ra i tetai apinga kare ratou e manamanata ana. E reka ana tatou i te aronga e akakoromaki ua ra me rave tatou i te tarevake. E ka akameitaki tatou i te puapii apii Pipiria tei akakoromaki noatu te ngatā ia tatou i te apii, te āriki e te taangaanga i te apiianga a te Pipiria. Te mea puapinga, te akameitaki nei tatou i te Atua ko Iehova no te akakoromaki maata!—Roma 2:4.

2. Eaa te au turanga ka ngatā ia tatou i te akakoromaki?

² Noatu te akaperepere nei tatou i te aronga e akakoromaki ra, ko tatou ra penei kare tatou e akakoromaki ana. Ei akaraanga, penei kare tatou e tiaki maru me piritia tatou i runga i te mataara. Ka riri tatou me akariri mai tetai ia tatou. Tetai au taime, kare tatou e akakoromaki ana i te tiaki ua atu i te ao ou o Iehova. Ka inangaro ainei koe i te akakoromaki maata? I teia atikara, ka uriuri tatou eaa te aiteanga kia akakoromaki e eaa i puapinga ai. Ka uriuri katoa tatou eaa te ka tauturu ia tatou kia akakoromaki maata.

3. Eaa ta te tangata akakoromaki ka rave me akaririia mai aia?

³ Akamanako ana i nga mataara e a ka akakoromaki tatou. Mea mua, kare te tangata akakoromaki e riri. Ka noo maru ua aia e kare e akakino atu me akaririia mai. Tei roto i te Pipiria te tuatua “akakoromaki maata” te akakite maira ia Iehova e “e Atua takinga-meitaki, e te  aroa ua, e te akakoromaki maata, e te meitaki maata, e te tuatua-mou.”—Exo. 34:6.

4. Eaa ta te tangata akakoromaki ka rave iaia e tapapa ua ra?

⁴ Te rua, ka tiaki marie ua te tangata akakoromaki. Me ka roa atu tana i tapapa, ka tiaki marie ua aia. (Mata. 18:26, 27) E maata te au turanga ka tiaki marie ua tatou. Ei akaraanga, ka akarongo meitaki tatou ki te tangata me tuatua aia. (Iobu 36:2) Ka akakoromaki ua tatou me tauturu i te tangata apii kia mārama i te apiianga a te Pipiria me kore kia akaruke aia i te peu tarevake.

5. Eaa tetai atu mataara me akaari i te akakoromaki?

⁵ Te toru, kare te tangata akakoromaki e rapurapu. Tetai au taime, ka anoanoia te taui anga viviki. Inara, me e angaanga puapinga ta tetai tangata akakoromaki ka rave, kare aia e rapurapu e te rere ua. Mari ra, ka parani meitaki aia i tana ka rave. E oti, ka rave meitaki aia i te reira.

6. Eaa ta te tangata akakoromaki ka rave me tupu te manamanata?

⁶ Te a, kare te tangata akakoromaki e kopekope me tupu te manamanata. E meitaki i te tuatua ki to tatou oa piri mou i to tatou manako no to tatou manamanata. Pera katoa ka akamanako rai te tangata akakoromaki i te au mea meitaki o tona oraanga, e te tavini rekareka ia Iehova. (Kolo. 1:11) Ei au Kerititiano, ka akaari tatou i teia au tu no te akakoromaki. No teaa ra? Ka akara ana tatou i teia au tumu.

7. Ia Iakobo 5:7, 8, eaa te akakoromaki i puapinga ai? (Akara katoa i te tutu.)

⁷ Puapinga tikai te akakoromaki no to tatou ora. Mei te au tavini tiratiratu i  te tuatau taito, ka tiaki marie ua tatou me akatupu te Atua i tana au taputou. (Ebe. 6:11, 12) Te akaaite ra te Pipiria i to tatou turanga ki te tangata tanu kai. (E tatau ia Iakobo 5:7, 8.) Ka angaanga pakari te tangata tanu kai i te tanu e te pîpî i tana kai, inara kare aia i kite e aea te reira e tupu ei. No reira, ka tiaki marie ua aia i te irinaki anga e ka tupu mai tana kai. Pera katoa tatou, ka rave maroiroi tatou i te angaanga pae vaerua, noatu “kare tatou i kite i te ora e tae mai ei to [tatou] Atu.” (Mata. 24:42) Ka tiaki marie ua tatou e ka akatupu a Iehova i tana i taputou mai i tona tuatau tau. Me kare tatou e akakoromaki ana, ka roiroi tatou i te tiaki ua e aere ua rai ka akaruke i te tuatua mou. Penei ka akamata tatou i te kimi i te au mea ta tatou e mataora ra. Inara me tiaki marie ua ka rauka ia tatou i te akakoromaki e tae ua atu ki te openga.—Mika 7:7; Mata. 24:13.

8. Akapeea te akakoromaki me tauturu i to tatou pirianga ki tetai? (Kolosa 3:12, 13)

⁸ Ka tauturu te akakoromaki kia akatupu tatou i te pirianga meitaki ki tetai. Ka tauturu te reira kia akarongo meitaki tatou me tuatua mai tetai kia tatou. (Iako. 1:19) Te akatupu katoa ra te akakoromaki i te ’au. Kare tatou e akakino e te riri i tetai me manamanata tatou. Kare tatou e akaapa atu, mari ra ka ‘tauturu atu tatou i tetai e tetai, e ka akakore tetai i ta tetai ara.’—E tatau ia Kolosa 3:12, 13.

9. Akapeea te akakoromaki me tauturu ia tatou no te rave i te au ikianga? (Maseli 21:5)

⁹ Ka tauturu katoa te akakoromaki kia rave tatou i te au ikianga meitaki. Kare tatou e rapurapu, ka kimi e ka akamanako meitaki tatou i te au ikianga. (E tatau ia Maseli 21:5.) Ei akaraanga, me te kimi ra tatou i tetai ngai angaanga, penei ka āriki ua tatou i te angaanga, noatu e ka tamanata te reira i ta tatou akamorianga. Me akakoromaki maata tatou, ka akamanako meitaki tatou i te ngai o te angaanga, te au ora, e me ka tamanata te reira i te ngutuare e te akamorianga. Na te akakoromaki anga, kare tatou e rave i te ikianga tarevake.

10. Akapeea te Kerititiano me akaari i te akakoromaki?

¹⁰ Pure no te akakoromaki maata. E tuanga te akakoromaki no te ua o te vaerua. (Gala. 5:22, 23) Ka pure tatou no te vaerua tapu e ka pati kia Iehova kia tauturu mai ia tatou kia akaari i taua au tu. Me ka tamanataia to tatou akakoromaki, e “pati” i te vaerua tapu kia tauturu mai ia tatou kia akakoromaki. (Luka 11:9, 13) Ka pati katoa tatou kia Iehova kia akamanako tatou i te au mea mei iaia rai. Muri ake i te pure, kia akakoromaki ua rai tatou i te au rā ravarai. Me pure tatou kia akakoromaki, ka tauturu mai a Iehova ia tatou kia akaari ua rai i teia tu.

11-12. Akapeea a Iehova i te akaari mai anga i te akakoromaki?

¹¹ Akamanako oonu i te au akaraanga Pipiria. I roto i te Pipiria te vaira te au akaraanga o te au tangata tei akakoromaki ua. Na te akamanako anga i teia au akaraanga, ka kite tatou akapeea me akaari i te akakoromaki. Mua ake ka uriuri ei tatou i teia ka akamanako tatou i  te akaraanga meitaki rava atu o Iehova no te tu akakoromaki.

¹² I roto i te kainga i Edene, kua akakino a Satani i to Iehova ingoa e kua akakino katoa i Tona tu ei Tutara tau e te aroa. Kare a Iehova i takore viviki atu ana ia Satani, kua akakoromaki ua aia, te kite anga e ka roa te tuatau i te akapapu e e meitaki atu Tana tutaraanga. Iaia e tiaki ua ra, kua akakoromaki ua aia i te akakino anga no runga i tona ingoa. Pera katoa, kua tiaki marie ua a Iehova kia rauka te maata anga o te tangata te ora mutu kore. (2 Pete. 3:9, 15) Tei tupu mai, mirioni ua atu te au tangata tei apii no runga iaia. Me akamanako tatou i te au akameitaki anga no to Iehova tu akakoromaki, mama ua ia tatou i te tapapa atu e ka tae mai te tuatau openga.

13. Akapeea a Iesu te aru meitaki anga i te tu akakoromaki o tona Metua? (Akara katoa i te tutu.)

¹³ Kua aru meitaki a Iesu i te tu akakoromaki o tona Metua, e kua akaari mai aia i te reira iaia i te enua nei. Penei kare i te mea mama i te akakoromaki ua i te tu o te aronga tata tuatua e te au Pharisea pikikaa. (Ioa. 8:25-27) Inara, mei tona Metua rai, kua akakoromaki ua a Iesu. Kare aia i akakino atu ana noatu kua akakinoia mai aia. (1 Pete. 2:23) Akakoromaki ua a Iesu i te au timataanga tei tupu kiaia. No reira te Pipiria i karanga ai e kia “akamaara marie oki [tatou] iaia, ko tei akakoromaki i te reira tu akakino a te aronga rave ara iaia uaorai”! (Ebe. 12:2, 3) Ma ta Iehova tauturu, ka rauka katoa ia tatou i te akakoromaki ua atu i te au timataanga.

14. Eaa ta tatou ka apii mai no to Aberahama tu akakoromaki? (Ebera 6:15) (Akara katoa i te tutu.)

 ¹⁴ Kua tapapa ana tatou e kua tupu ke ana te tuatau openga, teianei te manata nei e penei kare tatou e kite atu me tae mai taua tuatau openga. Eaa te ka tauturu ia tatou kia tiaki marie ua? Akamanako i to Aberahama akaraanga. Tae anga a Aberahama ki te 75 mataiti e kare i anau tamariki ake, kua taputou a Iehova kiaia: “E akariro oki au ia koe ei iti-tangata maata.” (Gene. 12:1-4) Kua kite ainei a Aberahama i te tupuanga o taua taputou? Kare. I tona aere atu anga ki tetai tua o te Kauvai Eupharati e te tiaki anga e 25 mataiti, i kite ei a Aberahama te anau mai anga o tana tamaiti ko Isaaka, e e 60 mataiti i muri mai, te anau anga o tana nga mokopuna ko Esau raua ko Iakoba. (E tatau ia Ebera 6:15.) Kare roa a Aberahama i kite ana i tona uanga te riro mai anga ei iti tangata maata e te noo anga i roto i te Enua Taputouia. Kareka ra, kua mataora teia tangata tiratiratu i te pirianga vaitata ki Tei Anga mai iaia. (Iako. 2:23) E me akatuia mai a Aberahama, ka mataora aia i te kite e no tona akarongo e te akakoromaki i akameitakiia ai te pa enua katoa i teianei ao! (Gene. 22:18) Eaa te apiianga? Penei kare tatou e kite atu me tupu mai ta Iehova au taputou. Inara me akakoromaki ua tatou mei ia Aberahama rai, papu ia tatou e ka tutaki mai a Iehova ia tatou i teianei e i roto i te ao ou Tana i taputou mai.—Mare. 10:29, 30.

15. Eaa ta tatou ka akamanako i roto i ta tatou uaorai apii?

 ¹⁵ I roto i te Pipiria e maata te au akaraanga no te au tangata tei akakoromaki ua. (Iako. 5:10) Penei e meitaki kia apii koe no runga i teia au akaraanga. b Ei akatauanga, e tamaiti mapu ua a Davida i tona akatainuia anga ei ariki no Iseraela, inara kua roa tona tiaki anga kia rauka iaia te taoonga ariki. Kua akamori tiratiratu a Simeona raua ko Ana ia Iehova ia raua e tapapa atura i te Mesia taputouia. (Luka 2:25, 36-38) Ia koe e apii ra i teia au akaraanga, e kimi i te pauanga ki teia au uianga: Eaa tei tauturu i teia tangata kia akakoromaki ua? Akapeea aia i te akameitakiia anga no tona tu akakoromaki? Akapeea au me aru i tona tu? Ka puapinga katoa koe me apii no te aronga kare i akakoromaki ana. (1 Samu. 13:8-14) Ka ui koe: ‘Eaa te tumu kare ratou i akakoromaki? Eaa te kino i tupu kia ratou?’

16. Eaa te au akameitakianga no te akakoromakianga?

¹⁶ Akamanako ana i te au akameitakianga no te tu akakoromaki. Me akakoromaki ua tatou, ka tupu te mataora e te maru. Ka tauturu te reira ia tatou i te pae manako e te oraanga. Ka mataora to tatou pirianga ki tetai e tetai e ka taokotai te putuputuanga no te tu akakoromaki. E me akariri mai tetai ia tatou ka akakore atu tatou i te reira ma te akakoromaki. (Sala. 37:8; Mase. 14:29) Te mea maata, me akakoromaki ua tatou te aru nei tatou i to tatou Metua i te rangi e ka akavaitata atu kiaia.

17. Eaa ta tatou ka tauta i te rave?

¹⁷ E meitaki e e puapinga kia akakoromaki! Kare i te mea mama i te akakoromaki ua inara ma ta Iehova tauturu, ka rauka ia tatou i te akaari i teia tu. Ia tatou e tapapa marie ra i te ao ou, papu ia tatou e “tei runga to Iehova mata i te aronga i mataku iaia; i runga i te aronga i irinaki i tona ra aroa.” (Sala. 33:18) Ka tauta pakari tatou katoatoa i te akaari i te akakoromaki.