1. Sose cenineja e manušen kola tane strpljiva?

 SARE amen ceninaja e manušen kola tane strpljiva. Amen isi amen šukar mišljenje okolendar kola ađićerena diso bizo te nervirinen pe. Hijam zahvalna hem so neko tano strpljivo amencar ked ćeraja disave greške. Isto ađahar, hijam but zahvalna e osobaće koja proučinđa amencar so hine strpljivo đi pomožinđa amen te sikljova, te prihvatina hem te primenina odova so i Biblija sikavi. A soj tano najvažno, but hijam zahvalna e Jehovase soj tano strpljivo amencar (Rimlj. 2:4).

2. Ko kola situacija šaj te ovel amenđe pharo te ova strpljiva?

² Iako but ceninaja e manušen kola tane strpljiva, amenđe šaj nane uvek lokho te mothova odija osobina. Na primer, šaj amenđe pharo te aćhova smirime ked isi gužva ko saobraćaj, pogotovo ako harinaja. Ili šaj but holjanaja ked avera nervirinena amen. A podijekh puti šaj te ovel amenđe pharo te ađićera o Jehova te ispunini pe obećanja ando nevo sveto. Da li mangeja te ove postrpljivo? Ko akava članko ka dikha so značini te ova strpljiva hem sose tano odova odobor važno. Isto ađahar, ka dikha so šaj te pomožini amen te ova postrpljiva.

3. Sar i osoba koja tani strpljivo reagujini ked avera nervirinena la?

³ Akana ka dikha štar načinija sar šaj te mothova strpljenje. Sar prvo, i strpljivo osoba na holjani sigate. Ked avera  ćerena diso so nervirini la, oj aćhola smirimi hem na ponašini pe premalo lende ađahar sar so on ponašinena pe premalo late. Isto ađahar, nane grubo premalo avera ked isi la pharipa. O izraz „na holjani sigate“ ki Biblija prvo puti pojavini pe ked o Jehova opisini pe sar „Devel soj tano milosrdno hem samilosno, strpljivo [ili: „na holjani sigate“, fusn.], pherdo verno mangipaja hem ćaćipaja“ (Izl. 34:6).

4. Sar i strpljivo osoba reagujini ked valjani diso te ađićeri?

⁴ Sar dujto, i strpljivo osoba smireno ađićeri. Ako valjani diso te ađićeri pobuter nego so očekujinđa, asavki osoba trudini pe te aćhol smirimi hem te na holjani (Mat. 18:26, 27). Ka oven but situacije ko kola valjani te ova smirime hem te ađićera. Na primer, valjani pažljivo te šuna đi neko vaćeri hem te na prekinina le (Jov 36:2). Isto ađahar, valjani te ova strpljiva ked pomožinaja e osobaće kasa proučinaja te haljol diso andi Biblija ili te aćhavi disavi lošno navika.

5. Ko kova aver način šaj te mothova strpljenje?

⁵ Sar trito, i strpljivo osoba nane sigutni. Naravno, disavo puti ka valjani te ćerel o buća ki sig. Ama, ked isi la disavo važno zadatko oj na počmini le bizo plan hem na siđari te završini le so posig. Umesto odova, odija osoba odvojini dovoljno vreme te planirini sar te ćerel odova zadatko. Palo odova, odvojini dovoljno vreme šukar te ćerel le.

6. Sar i strpljivo osoba reagujini ked isi la problemija?

⁶ Sar štarto, i strpljivo osoba istrajini ko po problemi bizo te žalini pe. Odova značini so o strpljenje hem i istrajnost tane but povezime. Naravno, nane pogrešno te phrava amen amare paše amalese hem  te phena lese sar osetinaja amen sebepi amaro problemi. Ama, i strpljivo osoba ka del sa pestar hem ponodri radosno te istrajini (Kol. 1:11). E Devlese sluge valjani te trudinen pe te mothoven strpljenje ko sa akala buća. Sose? Akana ka dikha nekobor razlogija.

7. Premali Jakovljeva 5:7, 8, sose tano o strpljenje but važno? (Dikh i slika.)

⁷ O strpljenje tano but važno aso amaro spasenje. Sar o verna manuša ko purano vreme hem amen valjani strpljivo te ađićera o Jehova te ispunini pe obećanja (Jevr. 6:11, 12). I Biblija uporedini amen jekhe zemljoradnikoja. (Čitin Jakovljeva 5:7, 8.) Iako ov sadini hem ćhivela pani ko odova so sadinđa, na đanela tačno ked odova ka barjol. Odolese, o zemljoradniko strpljivo ađićeri hem verujini so jekh dive ka ćedel odova so sadinđa. Isto ađahar, hem amen valjani te da sa amendar te ova zaokupime duhovno bućencar iako na đanaja „ko kova dive avela [amaro] Gospod“ (Mat. 24:42). Amen strpljivo ađićeraja hem hijam uverime so o Jehova ko pravo vreme ka ispunini sa so obećinđa. Ama, ako hijam nestrpljiva šaj te umorina amen hem te počmina te cida amen ando ćaćipe. Isto ađahar, šaj te počmina te razmislina so avera buća šaj te ćeren amen te ova bahtale. Ama, ako hijam strpljiva, amen ka ova istrajna đi o krajo hem ka ova spasime (Mih. 7:7; Mat. 24:13).

8. Sar o strpljenje pomožini amen ko amaro odnos averencar? (Kološanima 3:12, 13)

⁸ O strpljenje šaj te pomožini amen te ova ko šukar odnosija averencar. Ako hijam strpljiva, amen pažljivo ka šuna averen đi vaćerena (Jak. 1:19). O strpljenje ka pomožini amen hem te ova ko mir averencar. Ked hijam ko stres, na ka reagujina but sigate hem na ka phena diso neljubazno. Isto ađahar, na ka holjana sigate ked avera povredinena amare osećanja. Umesto te irina o lošnipe, amen ka šuna o savet: „Podnosinen jekh jekhe hem ando vilo oprostinen jekh jekhese.“ (Čitin Kološanima 3:12, 13.)

9. Sar o strpljenje pomožini amenđe ked valjani te ana odluke? (Poslovice 21:5)

⁹ O strpljenje šaj te pomožini amen hem te ana šukar odluke. Umesto te siđara, amen ka odvojina dovoljno vreme te razmislina savo izbor tano anglo amende hem te odlučina odova soj tano najšukar. (Čitin Poslovice 21:5.) Na primer, ako rodaja buti amen šaj mangaja te prihvatina i prvo buti koja arakhaja, čak iako odova ka značini te propustina nekobor sastankija ja te đa pohari ki služba. Ama, ako hijam strpljiva, ka odvojina dovoljno vreme te razmislina kobor tani dur odija buti, kobor satija ćerela pe hem sar odija buti ka utičini upri amari porodica ja upri amari duhovnost. Ked hijam strpljiva, amen ka ana šukar odluke.

10. Sar šaj te ova pana postrpljiva?

¹⁰ Molin tut te ove pana postrpljivo. O strpljenje tano plod ando Jehovaso sveti duh (Gal. 5:22, 23). Odolese, amen šaj te molina amen e Jehovase te del amen po sveti duh te šaj te razvijina odija osobina. Ako ki disavi situacija tano pharo te mothova strpljenje, šaj te roda e Jehovastar oleso „sveti duh“ te pomožini amen te ova strpljiva (Luka 11:9, 13). Isto ađahar, šaj te roda e Jehovastar te pomožini  amen ko buća te dikha sar ov so dikhela. Pali molitva, valjani te da sa amendar svako dive te mothova strpljenje. So pobuter molinaja amen hem trudinaja amen te ova strpljiva, odija osobina pana poviše ka astari koreno ko amaro vilo hem ka ovel deo andi amari ličnost.

11-12. Sar o Jehova mothovi strpljenje?

¹¹ Razmislin ando biblijake primerija. I Biblija vaćeri ando but manuša kola hine strpljiva. Ked razmislinaja olendar, šaj te sikljova sar šaj te mothova strpljenje. Angleder te razmotrina disave primerija, ka dikha o primer ando Jehova kova tano najstrpljivo.

¹² Ko edensko vrt, o Satana klevetinđa e Jehovaso anav ađahar so ćhivđa e Eva te sumnjini da li tano o Jehova pravedno vladari hem da li mangela len. Umesto odmah te uništini e Satana, o Jehova mothovđa strpljenje hem samokontrola sose đanđa so ka valjani te nakhel vreme te šaj te dokažini pe soj tano ov najšukar vladari. Đi ađićeri, ov tano istrajno odolese so hem ponodri oleso anav klevetini pe. U stvari, o Jehova strpljivo ađićeri sose mangela so poviše manuša te ovel len prilika te dobinen o večno životi (2. Petr. 3:9, 15). Sebepi odova, milionija manuša upoznajinena le. Ako razmislinaja save šukar buća isi odolese so o Jehova tano strpljivo, amenđe ka ovel polokho te ađićera te avel o kraj.

13. Sar o Isus savršeno oponašinđa pe Dadeso strpljenje? (Dikh i slika.)

¹³ Đi hine ki phuv, o Isus savršeno oponašinđa pe Dadeso strpljenje. Sigurno na hine lese uvek lokho te ovel strpljivo, posebno premalo fariseja hem premalo okola so penđarđe o Zakon  (Jov. 8:25-27). Ama, o Isus sar po Dad na holjanđa sigate. Ov na irinđa lenđe ked on uvredinđe le ja nervirinđe le (1. Petr. 2:23). O Isus strpljivo istrajinđa ki svako kušnja bizo te žalini pe. Odolese, i Biblija phenela amenđe: „Hor razmislinen ando okova kova istrajinđa ked o grešna manuša marđe lese muj“ (Jevr. 12:2, 3). Uzi Jehovasi pomoć, hem amen šaj te ova istrajna ked isi amen disavi kušnja.

14. So sikljovaja ando Avraham (Jevrejima 6:15; dikh i slika.)

¹⁴ Disave amendar šaj but berša ađićerena te avel o kraj. Ama, šaj darana so na ka oven đivde ked ov ka avel. So šaj te pomožini len strpljivo te ađićeren? E Avrahameso primer. Ked hine le 75 berš ov pana na hine le ćhave, a tegani o Jehova phenđa lese: „Tutar ka ćerav jekh baro narodo“ (Post. 12:1-4). Da li o Avraham dikhlja sar o Jehova ispuninđa akava obećanje? Palo odova so nakhlja i reka Eufrat, ov ađićerđa 25 berš hem tek tegani bijandilo oleso ćhavo o Isak. Palo odova, 60 berš nakhlje ked bijandilje olese unukija, o Jakov hem o Isak. (Čitin Jevrejima 6:15.) Ama, o Avraham na dikhlja so ando olese potomkija ulo baro narodo hem so nasledinđe i Obećimi phuv. Ama, đi hine đivdo ov hine paše e Jehovaja (Jak. 2:23). Ked ka uskrsnini, ov sigurno ka ovel but bahtalo ked ka šunel so sebepi olesi vera hem strpljenje hine blagoslovimo celo narodo ki phuv (Post. 22:18). So sikljovaja ando oleso primer? Šaj akana na dikhaja sar ispuninena pe sa e Jehovase obećanja. Ama, šaj te ova sigurna  so ako hijam strpljiva sar o Avraham, o Jehova but ka blagoslovini amen akana, a ko nevo sveto so avela pana pobuter (Mar. 10:29, 30).

15. So šaj te istražina ko amaro lično proučibe?

¹⁵ Ki Biblija isi amen but primerija ando manuša kola hine strpljiva (Jak. 5:10). Šukar bi ovela te proučina odola izveštaja. b Na primer, iako o David hine pomazimo te ovel budućo kralj ko Izrael ked hine but terno, ov morandilo beršencar te ađićeri angleder so ulo kralj. O Simeon hem i Ana verno služinđe e Jehovase đi ađićerđe te avel o obećimo Mesija (Luka 2:25, 36-38). Đi proučineja asavke izveštaja, razmislin ando akala pućiba: So pomožinđa akale manušese te ovel strpljivo? Sar pomožinđa lese odova so hine strpljivo? Sar šaj te oponašinav le? Isto ađahar, šaj te sikljove hem ando okola kola na hine strpljiva (1. Sam. 13:8-14). Šaj te puće tut: „Sose hine nestrpljiva? Kola lošna buća desinđe pe lenđe odolese so na hine strpljiva?“

16. Sose tano šukar te ova strpljiva?

¹⁶ Razmislin sose tano šukar te ove strpljivo. Ked hijam strpljiva, amen hijam pobahtale hem posmirime. O strpljenje šukar utičini upro amaro sastipe. Ked hijam strpljiva averencar, isi amen pana pošukar odnos olencar hem ki skupština isi pana pobaro jekhipe. Ako neko nervirini amen, na ka holjana sigate hem na ka ćera o problemi te ovel pana pobaro (Ps. 37:8, fusn.; Posl. 14:29). Ama soj tano najvažno, ked hijam strpljiva, amen oponašinaja amare nebesko Dade hem ovaja pana popaše oleja.

17. So valjani te ova odlučna te ćera?

¹⁷ Ćaće, o strpljenje tani but šukar osobina koja but pomožini amen! Iako nane uvek lokho te ova strpljiva, uzi Jehovasi pomoć amen šaj hem ponodri te razvijina akija osobina. Đi strpljivo ađićeraja te avel o nevo sveto, amen šaj te ova sigurna so „e Jehovase jaćha tane upro okola kola darana olestar, upro okola so osloninena pe ko oleso verno mangipe“ (Ps. 33:18). Odolese, sare valjani te ova odlučna te urava amen ko strpljenje!