1. Thangwi yanji tisakomerwa na anthu akupirira?

 IFE tonsene tisakomerwa na anthu akupirira. Thangwi yanji? Thangwi tisalemedza ale anadikhira cinthu mbakhonda kuipirwa. Ife tisakomerwa kakamwe anango angapirira madodo athu. Pontho tisapereka takhuta kuna munthu adatipfundzisa Bhibhlya thangwi ya kupirira kwace mu ndzidzi ukhawangisira ife toera kupfundza, kutawira na kuphatisira pipfundziso pya Bhibhlya. Kusiyapo pyenepi, ife tisapereka takhuta kuna Yahova Mulungu wathu thangwi iye asapirira madodo athu!—Aroma 2:4.

2. Ndi midzidzi ipi yakuti panango pinakhala pyakunentsa toera kupirira?

² Ndimomwene kuti tisakomerwa anango angakhala akupirira, mbwenye panango pinakhala pyakunentsa kuna ife toera kupangiza n’khaliro unoyu. Mwacitsandzo, panango pinakhala pyakunentsa kuna ife toera kupirira khala tiri pa bhixa yakulapha kakamwe, makamaka khala tadembuka. Panango tinaipirwa kakamwe anango angatitsukwalisa. Pontho midzidzi inango pinakhala pyakunentsa kuna ife toera kupitiriza kudikhira dziko ipswa idapikira Yahova. Kodi imwe musafuna kukhala munthu wakupirira kakamwe? Mu nsolo uno, tinaona kuti tinapangiza tani kupirira, pontho thangwi yanji ndi kwakufunika kakamwe. Tinaonambo kuti ninji pinafuna kutiphedza toera kukhala akupirira kakamwe.

3. Munthu wakupirira asacitanji angasoswa?

³ Onani njira zinai zakuti tinakwanisa kupangiza kupirira. Yakutoma, munthu wakupirira nee asaipirwa mwakucimbiza. Iye asawangisira toera kukhala wakukhurudzika mbakhonda kubwezera pyakuipa angasoswa peno angatsukwala. Mafala akuti “nkhabe cimbiza na kuipirwa” atoma kugumanika  m’Bhibhlya pidalongwa Yahova kuti ndi “Mulungu wantsisi na wakukoma ntima, waufuni kakamwe na waundimomwene.”—Eks. 34:6.

4. Munthu wakupirira asacitanji khala pinthu nee pyacitika mu ndzidzi ukhadikhira iye?

⁴ Yaciwiri, munthu wakupirira asadikhira mwakukhurudzika. Cinthu cinafuna iye cingakhonda kucitika pa ndzidzi ukhadikhira iye, asawangisira toera akhonde kuipirwa. (Mat. 18:26, 27) Pana pinthu pizinji pyakuti tisafunika kudikhira mwakukhurudzika. Mwacitsandzo, ife tisafunika kubvesera mwakupirira mu ndzidzi unalonga munthu unango, mbatikhonda kungwanda mafala. (Yobe 36:2) Kusiyapo pyenepi, tisafunikambo kupirira mu ndzidzi unaphedza ife nyakupfundza toera abvesese pipfundziso pya Bhibhlya peno toera kukunda misambo yakuipa.

5. Ndi pinthu pipi pinango pinacita munthu wakupirira?

⁵ Yacitatu, munthu wakupirira nee asacita pinthu mwakucimbiza mbadzati kunyerezera mwadidi. Mwandimomwene midzidzi inango tisafunika kucita pinthu mwakucimbiza. Mbwenye munthu wakupirira angafuna kucita cinthu cakufunika kakamwe, asawangisira toera kunyerezera mwadidi mbadzati kucicita. Pontho asacita pyonsene pinakwanisa iye toera akhale na ndzidzi wakukwana toera kusankhula pinafuna iye kucita. Buluka penepo asakhala na ndzidzi toera kucita mwadidi basa yace.

6. Munthu wakupirira asacitanji angathimbana na nyatwa?

⁶ Cacinai, munthu wakupirira asawangisira toera kupirira nyatwa mwakukhonda dungunya. Mwandimomwene, nee ndi pyakuipa kupanga xamwali wathu nyatwa zathu. Mbwenye munthu wakupirira asawangisira toera kupitiriza kukhala na maonero adidi. (Akol. 1:11) Ninga Akristu, ife tisafunika kupirira munjira zenezi zonsene. Thangwi yanji? Tendeni tione mathangwi mangasi.

7. Mwakubverana na Tiyago 5:7, 8, thangwi yanji kupirira ndi kwakufunika kakamwe? (Onanimbo foto.)

⁷ Ife tisafunika kukhala akupirira toera tidzapulumuswe. Ninga atumiki akukhulupirika a mu ndzidzi wakale, ife tisafunika kudikhira mwakupirira toera Mulungu akwanirise mapikiro ace. (Aheb. 6:11, 12) Bhibhlya isatilandanisa na nyakulima. (Lerini Tiyago 5:7, 8.) Nyakulima asaphata basa mwakuwanga toera kubzwala na kuthirira pinthu pidabzwala iye, mbwenye nee asadziwa ndzidzi unafuna ipyo kukula. Natenepa nyakulima asafunika kudikhira mwakupirira, mbanyindira kuti anadzabvuna pinthu pidabzwala iye. Munjira ibodzi ene, ife tisapitiriza kutumikira Yahova mwaphinga, maseze ‘nee tisadziwa ntsiku inafuna kubwera Mbuyathu.’ (Mat. 24:42) Ife tisadikhira mwakupirira mbatinyindira kuti pa ndzidzi wace wakuthema, Yahova anadzakwanirisa mapikiro ace onsene. Tingakhonda khala akupirira, panango tinaneta mbatisiya kutumikira Yahova mwapang’ono na pang’ono. Kusiyapo pyenepi, panango tinatoma kucita pinthu pinaona ife kuti pinatitsandzayisa cincino. Mbwenye tingakhala akupirira, tinapitiriza kutumikira Yahova mpaka kunkhomo mbatipulumuswa.—Mik. 7:7; Mat. 24:13.

8. Kupirira kunatiphedza tani toera kubverana mwadidi na anango? (Akolose 3:12, 13)

⁸ Kupirira kunatiphedza toera kubverana mwadidi na anango. Kupirira kusatiphedza toera kubvesera mwadidi mu ndzidzi unalonga anango. (Tiya. 1:19) Kupirira kusatiphedzambo toera tikhale muntendere na anango. Tingakhala akupirira, ife nee tinaipirwa mwakucimbiza mbatilonga mwakusowa ufuni tingatsukwala. Pontho tingakhala akupirira, nee tinaipirwa mwakucimbiza anthu anango angatitsukwalisa. M’mbuto mwa kubwezera pyakuipa, ife tinapitiriza ‘kupirirana unango na ndzace mbatilekererana na ntima onsene.’—Lerini Akolose 3:12, 13.

9. Kupirira kunatiphedza tani tingafuna kucita pisankhulo? (Misangani 21:5)

⁹ Kupirira kunatiphedzambo toera kucita pisankhulo pyadidi. M’mbuto mwakucita pinthu mwamangungu, ife tinakhala na ndzidzi toera kufufudza na kunyerezera mwadidi pinafuna ife kucita. (Lerini Misangani 21:5.) Mwacitsandzo, khala tiri kusaka basa, panango tinatawira basa yonsene inaona ife maseze itipingize kulambira Yahova. Mbwenye tingakhala akupirira, tinakhala na ndzidzi wakunyerezera mbuto ya basa, midzidzi inafuna ife kuphata basa, pontho basa ineyi inakhuya tani banja yathu na uxamwali wathu na Yahova. Tingakhala akupirira, tinacalira kucita pisankhulo pyakuipa.

10. Nkristu anakwanisa tani kupitiriza kukhala wakupirira?

¹⁰ Citani phembero toera mukhale akupirira kakamwe. Kupirira ndi ubodzi mwa misapo ya nzimu. (Agal. 5:22, 23) Natenepa, ife tinakwanisa kuphemba nzimu wakucena na ciphedzo ca Yahova toera kukulisa n’khaliro unoyu. Tingathimbana na nyatwa zakuti zisayesera kupirira kwathu, tisafunika ‘kupitiriza kuphemba’ nzimu wakucena toera utiphedze kukhala akupirira. (Luka 11:9, 13) Ife tinakwanisambo kuphemba Yahova toera atiphedze kuona pinthu munjira inapiona iye. Tingamala kucita phembero, tisafunika kucita pyonsene pinakwanisa ife toera tikhale akupirira ntsiku zonsene. Tingapitiriza kucita phembero toera tikhale akupirira, mbatiwangisira toera kupangiza n’khaliro unoyu, Yahova anatiphedza toera tikhale akupirira kakamwe maseze kale nee tikhali akupirira.

11-12. Yahova asapangiza tani kupirira?

 ¹¹ Nyerezerani pitsandzo pya m’Bhibhlya. M’Bhibhlya muli na pitsandzo pya anthu azinji adapangiza n’khaliro wakupirira. Tinganyerezera pitsandzo pyenepi, ife tinapfundza njira zizinji toera kukhala akupirira. Mbatidzati kuona pingasi mwa pitsandzo pyenepi, tendeni tione citsandzo ca Yahova wakuti ndi wakupirira kakamwe.

¹² Mu Edheni, Sathani apswipisa dzina ya Yahova, mbayesera kucitisa Eva kupenula kuti Yahova ndi Ntongi waulungami na waufuni. M’mbuto mwakufudza Sathani mu ndzidzi ubodzi ene, Yahova akhala wakupirira na wakudzitonga mbadziwa kuti mbapadapita ndzidzi toera kupangiza kuti Iye ndi ntongi wadidi. Pontho mu ndzidzi unadikhira iye, asapirira kupswipiswa kwa dzina yace. Kusiyapo pyenepi, Yahova asadikhira mwakupirira toera anthu azinji akhale na mwai wakutambira umaso wakukhonda mala. (2 Ped. 3:9, 15) Na thangwi ineyi, anthu azinji kakamwe akwanisa kundziwa. Tinganyerezera pinthu pyadidi pinacitika thangwi ya kupirira kwa Yahova, pinakhala pyakukhonda nentsa kuna ife toera kudikhira ndzidzi unafuna kudzamalisa iye pinthu pyonsene pyakuipa.

13. Yezu atowezera tani mwadidi kupirira kwa Pai wace? (Onanimbo foto.)

¹³ Yezu atowezera mwadidi kupirira kwa Pai wace, pontho iye apangiza n’khaliro unoyu pikhali iye pa dziko yapantsi. Midzidzi inango pikhali pyakunentsa kuna iye toera kupangiza n’khaliro unoyu wakupirira, makamaka mu ndzidzi ukhaonana iye na alembi na Afarisi aumpfakafaka. (Juwau 8:25-27) Mbwenye ninga Pai wace, Yezu nee akhaipirwa mwakucimbiza. Iye nee akhabwezera pyakuipa mu ndzidzi ukhatikanwa iye peno kusoswa. (1 Ped. 2:23) Yezu apirira mayesero  mwakukhonda dungunya. Na thangwi ineyi Bhibhlya isalonga: “Nyerezerani mwadidi ule adapirira mafala mazinji akuipa adalongwa na anyakudawa.” (Aheb. 12:2, 3) Na ciphedzo ca Yahova, tinakwanisambo kupirira mayesero onsene anathimbana na ife.

14. Tisapfundzanji na kupirira kwa Abhrahamu? (Ahebheri 6:15) (Onanimbo foto.)

¹⁴ Mphapo ndiye tani khala pinthu pinadikhira ife thangwi ya kumala kwa makhaliro ano akuipa pidzati kucitika? Panango tisadikhira pyenepi kutomera kale kakamwe. Panango tinanyerezera kuti tinafa pinthu pyenepi mbapidzati kucitika. Ninji pinafuna kutiphedza toera kupitiriza kudikhira mwakupirira? Onani citsandzo ca Abhrahamu. Abhrahamu akhali na pyaka 75 pyakubalwa, pontho nee akhali na mwana mu ndzidzi udampanga Yahova kuti: “Ndinadzakucitisa kukhala dzindza ikulu.” (Gen. 12:1-4) Kodi Abhrahamu aona kukwanirisika kwa pikiro ineyi? Iye aona basi ene kukwanirisika kwa khundu ibodzi ya pikiro ineyi. Pidawambuka iye Nkulo wa Eufrate mbadikhira pyaka 25, Abhrahamu aona kubalwa kwa mwanace Izaki, pontho pidapita pyaka 60, iye aona kubalwa kwa adzukulu ace Ezau na Yakobe. (Lerini Ahebheri 6:15.) Mbwenye Abhrahamu nee aona kukula kwa dzindza yace, pontho nee apita mu Dziko Yakupikirwa. Ngakhale tenepo, mamuna unoyu wakukhulupirika akhali na uxamwali wakuwanga na Nciti wace. (Tiya. 2:23) Pontho Abhrahamu angadzalamuswa muli akufa, iye anatsandzaya kakamwe angadziwa kuti thangwi ya cikhulupiro cace na kupirira kwace, anthu onsene apaswa nkhombo. (Gen. 22:18) Tisapfundzanji? Panango ife nee tinaona kukwanirisika kwa mapikiro onsene a Yahova.  Mbwenye tingapirira ninga Abhrahamu, tinakwanisa kukhala na cinyindiro cakuti Yahova anatipasa nkhombo cincino, pontho anatipasa nkhombo zizinji n’dziko ipswa idapikira Iye.—Marko 10:29, 30.

15. Ndi pinthu pipi pyakuti tinakwanisa kupipfundza pakucita pfundziro ya munthu paekha?

¹⁵ M’Bhibhlya muli na pitsandzo pizinji pya anthu anango adapangiza kupirira. (Tiya. 5:10) Panango pinakhala pyadidi kupfundza thangwi ya anthu anewa. b Mwacitsandzo, maseze Dhavidhi adzodzwa mbali m’phale toera kukhala mambo wa Izraeli, iye adikhira pyaka pizinji toera kutonga. Simeoni na Yana alambira Yahova mwakukhulupirika mu ndzidzi ukhadikhira iwo kubalwa kwa Mesiya. (Luka 2:25, 36-38) Mu ndzidzi unapfundza imwe pitsandzo pyenepi, yeserani kutawira mibvundzo iyi: Ninji pidaphedza munthu unoyu toera kupirira? Kodi iye aphedzeka tani thangwi ya kupirira? Ndinatowezera tani citsandzo cace? Imwe munaphedzekambo mungapfundza pitsandzo pya ale akuti nee apangiza kupirira. (1 Sam. 13:8-14) Panango munabvundzika: ‘Ninji pidaacitisa toera kukhonda khala akupirira? Ninji pidaacitikira thangwi yakukhonda kwawo kukhala akupirira?’

16. Ndi nkhombo zipi zinakhala na ife tingakhala akupirira?

¹⁶ Onani nkhombo zakukhala wakupirira. Tingakhala akupirira, ife tisakhala akutsandzaya na akukhurudzika. Pontho kupirira kunatiphedza toera kukhala na ungumi wadidi na manyerezero adidi. Tingakhala akupirira, tinabverana mwadidi na anango. Kusiyapo pyenepi, mpingo usakhala wakuphatana kakamwe. Tingasoswa, kukhonda kuipirwa mwakucimbiza kunatiphedza toera tikhonde kutekeresa pinthu. (Mas. 37:8, cidzindikiro.; Mis. 14:29) Kusiyapo pyonsene, tingakhala akupirira tinatowezera Babathu wakudzulu, pontho tinakhala na uxamwali wakuwanga na iye.

17. Tisafunika kukhala dzololo toera kucitanji?

¹⁷ Mwandimomwene, kupirira ndi n’khaliro wakuti usatiphedza kakamwe. Midzidzi inango ndi pyakunentsa kupirira, mbwenye na ciphedzo ca Yahova, ife tinakwanisa kupitiriza kupangiza n’khaliro unoyu. Pontho mu ndzidzi unadikhira ife mwakupirira dziko ipswa, tinakwanisa kukhala na cinyindiro cakuti “maso a Yahova asayang’anira ale anan’gopa, ale anadikhira ufuni wace wakukhonda mala.” (Mas. 33:18) Natenepa tendeni tipitirize kukhala akupirira.