1. Cincanno manna naadattohu mayiraati?

 NINKE baalunku cincanno manna naandeemmo. Mayira? Mitto coye caaccaawikkinni cince agadhanno manna ayirrinseemmo. Soˈro loonseenna wolootu cincitunkero insa naandeemmo. Qoleno Qullaawa Maxaafa rosiisinke rodii, Qullaawu Maxaafi halaale rosate, ammanne adhate woy ronsoommore loosu aana hosiisate sharrammummo yannara cince kaaˈlinonke daafira tashshi yiinonke. Baalunkunni roore Maganu Yihowa cincannonke daafira lowo geeshsha galanteemmosi!—Rom. 2:4.

2. Cinca qarra ikkitannonkehu hiittoo woyite ikkara dandaanno?

² Cincanno manna naandeemmoha ikkirono, ninke uminkera cinca duucha woyite shota ikka hooggankera dandiitanno. Lawishshaho mittu coyira salfinoommowa tarinke rahe iilla hooganno woyite roorenkanni muddammoommoha ikkiro cinca qarra ikkitankera dandiitanno. Mitu manni caacceessannonke woyite hanqo eemadha qarra ikkitankera dandiitanno. Qoleno mito woyite Yihowa haaro alame abbate eino qaale cincine agadha qarra ikkitankera dandiitanno. Ati albinni roore cincattoha ikka hasiˈratto? Konni birxichira cincate yaa mayyaateronna lowo geeshsha hasiissannota ikkitinohu mayiraatiro ronseemmo. Qoleno albinni roore cincineemmore ikkineemmo gede kaaˈlannonkeri maatiro ronseemmo.

3. Cincanno manchi wolootu hanqissannosi woyite maa assanno?

³ Hanni cincineemmore ikkinoommota leellisha dandiineemmota shoole doogga laˈno. Umihunni, cincanno manchi hanqoho dimuddamanno. Isi wolootu hanqissannosi woyite dirabbisiˈranno; hattono yaachishanno coyi tuncu yaannosi woyite wodanaaˈmate woˈnaalanno. ‘Hanqoho muddamannokkiha’ yitanno yaatto umo Qullaawu Maxaafi giddo kulloonnihu Yihowa “maarannohanna hanqoho muddamannokkiha; mararaancho Magano,  ammanamasinna bagamannokkihu baxillisi batiˈra” ikkinota kulli woyiteeti.—Ful. 34:6.

4. Cincanno manchi mitto coye ma garinni agadhanno?

⁴ Layinkihunni, cincanno manchi mitto coye wodanaaˈme agadhanno. Togoo manchi mittu coyi isi hedino yanna sae keeshshanno woyite dicaaccaawanno. (Mat. 18:26, 27) Wodanaaˈmine agadha hasiissannonkehu batinyu coyi no. Lawishshaho mittu manchi coyiˈranno woyite mereero eˈnummokkinni cincine macciishsha hasiissannonke. (Iyo. 36:2) Rosaanchinke Qullaawu Maxaafi roso huwatanno gede woy busha gadesi qeeˈlanno gede kaaˈlineemmo woyiteno cinca hasiissannonkeha ikkara dandaanno.

5. Cincineemmore ikkinoommota leellinsheemmoti wole doogo hiittenneeti?

⁵ Sayikkihunni, cincanno manchi dimuddamanno. Hige mitu coyi ranke assa hasiissannonkeha ikkara dandaanno. Ikkirono cincanno manchi loosa hasiissannosiha mitto looso rahe hanafate woy rahe gudate dimuddamanno. Hatteentenni isi hakko loosira ikkitanno geeshshi yanna gaaˈmate balaxe qixxaawanno. Hakkiinni konne looso hattee gaaˈmino yanna giddo loose gudanno.

6. Cincanno manchi qarru woy fonqolu iillannosi woyite ma assanno?

⁶ Shoolkihunni, cincanno manchi iillannosi qarra gungumikkinni dandee saˈˈate woˈnaalanno. Hige mittu muli jaalinkera iillinonke qarra hasaapha soˈro diˈˈikkitino. Ikkirono cincanno manchi dancha danchare hedanno; hattono Yihowara hagiirrunni soqqamate dandiire baala assanno. (Qol. 1:11) Kiristaana ikkinoommo daafira tenne baalante doogganni cincineemmore ikkinoommota leellisha hasiissannonke. Mayira? Hanni mito korkaata laˈno.

7. Yaiqoobi 5:7, 8 kultanno garinni cinca lowo geeshsha hasiissannota ikkitinohu mayiraati? (Misileno lai.)

⁷ Hegere heeshsho afiˈrate cincineemmore ikka hasiissannonke. Hunda heedhinori  ammanantino soqqamaano gede Maganu uyino hexxo wonsha geeshsha cincine agadha hasiissannonke. (Ibi. 6:11, 12) Qullaawu Maxaafi ninke baatto loosiˈre galino manchi ledo heewisiisanno. (Yaiqoobi 5:7, 8 nabbawi.) Baatto loosiˈre galino manchi wixa wixatenna waa hayikkisate diinaggaawe loosannoha ikkirono wixino gidi lophannohu mamooteetiro kayinni diafanno. Ikkirono isi wixiˈrino wixa mixxannota hexxe cince agadhanno. Hatteente gede ninkeno ‘Mootichu ma barra daannoro anfoommokkiha’ ikkirono ayyaanaamittete looso woˈmanka woyite diinaggaambe loonseemmo. (Mat. 24:42) Yihowa uyino hexxo baala isi hedino yannara wonshannota addaxxine cincine agadhineemmo. Cincineemmokkire ikkinummoro, Yihowa barra agadha agurrammora hattono sunu sununni halaalu mininni fullammora dandiineemmo. Qoleno yannate geeshshi hagiirre shorra hananfammora dandiineemmo. Cincineemmore ikkinummoro kayinni goofimarchu geeshsha kaajjine uurranna hegere heeshsho afiˈra dandiineemmo.—Mik. 7:7; Mat. 24:13.

8. Cinca wolootu ledo noonke aantera kaaˈlitannonkehu hiittoonniiti? (Qolasiyaasi Sokka 3:12, 13)

⁸ Cinca wolootu ledo dancha aante heedhannonke gede kaaˈlitannonke. Cincineemmore ikka wolootu coyidhanno woyite seekkine macciishshineemmo gede kaaˈlitannonke. (Yai. 1:19) Qoleno keere kalanqeemmore ikkate kaaˈlitannonke. Hattono yaachishannonke coyi tuncu yaannonke woyite muddamme gara ikkinokkire coyiˈneemmokki gede kaaˈlitannonke. Cincineemmore ikkinummoro mittu manchi xissiisannonkere coyiˈriro hanqoho dimuddammeemmo. Togoo woyite dirabbisiˈneemmo; hatteentenni ‘mimmito’ mulla gatona yineemmo.—Qolasiyaasi Sokka 3:12, 13 nabbawi.

9. Cinca mitto doorsha doodhineemmo woyite kaaˈlitannonkehu hiittoonniiti? (Lawishsha 21:5)

⁹ Cinca dancha doorsha doodhineemmo gedeno kaaˈlitannonke. Cincineemmore ikkinummoro mitto coye muddamme woy gara garimmo laˈnummokkinni doodhantenni hiikku coyi woyyannoro xiinxallate yanna gaaˈmineemmo. (Lawishsha 21:5 nabbawi.) Lawishshaho looso hasiˈnanni heeˈnoommoha ikkiro kuni loosi Yihowa magansiˈneemmokki gede ataawe ikkannonkeha ikkiro nafa umo afiˈnoommo looso loosate maahoyye yineemmoha ikkara dandaanno. Cincineemmore ikkinummoro kayinni konne looso mama loonseemmoro, mageeshshi saate loonseemmoro hattono kuni loosi maatenkenna ayyaanaamittenke gawajjannohoronna teˈee hedate yanna gaaˈmineemmo. Cincineemmore ikka busha doorsha doodhineemmokki gede kaaˈlitannonke.

10. Mittu Kiristaanchi albinni roore cincannoha ikka dandaannohu hiittoonniiti?

¹⁰ Albinni roore cincitinannire ikkate huuccatto assidhe. Cinca ayyaanu laalo widooti. (Gal. 5:22, 23) Hakko daafira qullaawa ayyaana afiˈratenna qullaawu ayyaani laalo wido ikkitino akatta heedhannonke gede kaaˈlankera Yihowa huucciˈra dandiineemmo. Cinca qarra ikkitannonke gede assanno fonqoli iillinkero cincineemmo gede kaaˈlannonkeha qullaawa ayyaanasi aannonke gede agurrummokkinni Yihowa ‘huucciˈra’ hasiissannonke. (Luq. 11:9, 13) Qoleno Yihowa mitto coye isi laˈˈanno garinni laˈneemmo gede kaaˈlankera huucciˈra dandiineemmo. Huuccatto assiˈnummohu gedensaanni barru baala cincineemmore ikkate dandiinummore baala assa hasiissannonke. Albinni roore cincineemmore ikkate huuccatto assiˈneemmohanna konne akata leellishate sharrammeemmoha ikkiro, konni albaanni cincineemmokkire ikkinummoro nafa Yihowa woˈmanka woyite cincineemmore ikkineemmo gede kaaˈlannonke.

11-12. Yihowa cincannoha ikkasi leellishinohu hiittoonniiti?

 ¹¹ Qullaawu Maxaafi giddo kulloonni manni lawishsha hiince. Qullaawu Maxaafi giddo cincatenni lawishsha ikkannoha batinye manna kulloonni. Konni manni xagge hiincine cincineemmore ikkinoommota leellinsheemmo doogga rosa dandiineemmo. Hanni konni mannita mite xagge laˈnammora albaanni, Yihowa cincatenni kaajja lawishsha ikkinonkehu hiittoonniitiro laˈno.

¹² Sheexaanu Edenete kaashshu basera, Yihowa taashshannohanna baxillaancho Gashshaancho diˈˈikkino yee suˈmasi hunino. Yihowa isi gashshooti baalunkunni woyyinoha ikkinota leellishate yanna hasiissannota afino daafira, suˈmasi huninoha Sheexaane bayichonkonni dihunino; Yihowa konni garinni cincannohanna isonooto eemadhannoha ikkasi leellishino. Qoleno isi Sheexaane huna geeshsha suˈmasi hunate assinoonnire baala cince no. Yihowa cince agare noohu rooru manni hegere heeshsho afiˈrara yeeti. (2 Phe. 3:9, 15) Tini xaa yannara lowo miliyoone ikkanno manni iso afanno gede assitino. Yihowa cincasi abbitanno guma illachinshummoro isi tenne busha alame hunanno yanna agadha qarra diˈˈikkitannonke.

13. Yesuusi cincannoha ikkate woˈmunni woˈma Annisi lawishsha harunsinohu hiittoonniiti? (Misileno lai.)

¹³ Yesuusi cincannoha ikkate woˈmunni woˈma Annisi lawishsha harunsino; hattono uullate aana noo yannara konne akata leellishino. Roorenkanni lawisiisaano borreessaanonna Farisoota cinca, isira woˈmanka woyite shota ikkitinosikkiti dihuluullissannote. (Yoh. 8:25-27) Ikkirono Yesuusi Annisinte gede hanqoho dimuddamannoho. Isi wolootu xontusi woy mishshusi woyite dirabbisiˈrino. (1 Phe. 2:23) Yesuusi gungumikkinni iillinosi fonqolo cince saino. Qullaawu Maxaafi, “Cubbaataammu  baalu gibbannasi cincinoha Yesuusa qaagge” yaannohu iseraati. (Ibi. 12:2, 3) Yihowa kaaˈlonni ninkeno iillannonke fonqolo baala cincine saˈˈa dandiineemmo.

14. Abirihaami cincanni maa ronseemmo? (Ibiraawoota 6:15) (Misileno lai)

¹⁴ Tenne alame goofimarchi ninke hendoommo yannara daalla hoogi? Goofimarchu daanno yine hendoommohu lowo dirira albaanni ikkara dandaanno. Qoleno lubbotenni heeˈne tini busha alame baˈanna laˈnummokki ganteemmo yine waajjinoommoha ikkara dandaanno. Ikkina woˈmanka woyite cincine agadhineemmo gede kaaˈlannonkeri maati? Hanni Abirihaami lawishsha laˈno. Abirihaami ooso ilikki 75 dirihu heeˈreenna “Wolqaataame gosa asseemmohe” yee Yihowa hexxo uyinosi. (Kal. 12:1-4) Abirihaami tini hexxo woˈmitanna laino? Woˈmunni woˈma dilaino. Efiraaxisi Laga tayise saihunna 25 diro cince agadhihu gedensaanni Abirihaami, beettisi Yisihaaqi maalale ikkanno garinni ilamanna laino; qoleno 60 diri gedensaanni beettisi ooso Eesawunna Yaiqoobi ilantanna laino. (Ibiraawoota 6:15 nabbawi.) Kayinni Abirihaami sirchisi wolqaataame gosa ikkanna hattono Hexxote Gobba ragiˈranna horo dilaino. Ikkirono kuni ammanamino manchi Kalaqaanchisi ledo muli jaaloomi heeˈrannosi gede assiˈrino. (Yai. 2:23) Qoleno Abirihaami reyotenni kae, ammanasinna cincasi baalanti gosa atoote afidhanno gede assitinota afanno woyite lowo geeshsha hagiidhanno! (Kal. 22:18) Ninke tennenni maa ronseemmo? Ninkeno xaa yannara Yihowa uyinoti baalanti hexxo woˈmitanna laˈneemmokkiha ikkara dandaanno. Ikkirono Abirihaami gede cincineemmoha ikkiro, Yihowa xaa yannara baˈraasannonketanna abbate qaale einote haaro alamera lowo  atoote afiˈneemmota addaxxa dandiineemmo.—Maq. 10:29, 30.

15. Hojju xiinxallonke yannara mayi daafira xiinxalla dandiineemmo?

¹⁵ Qullaawu Maxaafi cincatenni dancha lawishsha ikkannoha wole batinye manna kulanno. (Yai. 5:10) Konni manni xagge xiinxallate pirogiraame fushshiˈri. b Lawishshaho Daawiti Israeelete moote ikkate buuraminohu anje heeˈre ikkirono moote ikke gashshate lowo diro agadha hasiissinosi. Simiooninna Haanna daanno yine kulloonniha buuramino Moote agadhe noo yannara Yihowara ammaname soqqamino. (Luq. 2:25, 36-38) Tenne xagge xiinxallatto woyite aante noo xaˈmuwara dawaro afiˈrate woˈnaali: Kuni manchi cincannoha ikkanno gede kaaˈlinosiri maati? Cincasi kaaˈlitinosihu hiittoonniiti? Isi lawishsha harunsa dandeemmohu ma garinniiti? Cincinokki manni xagge xiinxallakkino kaaˈlitannohe. (1 Sam. 13:8-14) Ateneeto togo yite xaˈma dandaatto: ‘Insa cincitannokki gede assinonsari maati? Cinca hoogansa mayi qarra abbitinonsa?’

16. Cincineemmore ikkinummoro afiˈneemmoti mite horo maati?

¹⁶ Cincineemmore ikkinummoro afiˈneemmo horo hedi. Cincineemmore ikkinummoro hagiirraammanna wodanaaˈmineemmore ikkineemmo. Cincineemmore ikkanke surrenkeranna ordu fayyimmankera kaaˈlitannonke. Woloota cincineemmoha ikkiro insa ledo dancha aante heedhannonke. Songote giddo albinni roore mittimma heedhanno gede assineemmo. Mittu manchi hanqisannonke woyite hanqoho muddammeemmokkire ikkanke coyi roore bushannokki gede assitanno. (Far. 37:8; Law. 14:29) Baalunkunni roore cincineemmo woyite iimi Anninke lawishsha harunsineemmo hattono albinni roore isiwa shinqeemmo.

17. Maa assate murciˈra hasiissannonke?

¹⁷ Cinca lowo geeshsha baxisannohonna kaaˈlannoho kaajja akataati! Cinca woˈmanka woyite shota ikkitannonkekkiha ikkirono Yihowa kaaˈlonni woˈmanka woyite kuni akati heeˈrannonke gede assiˈra dandiineemmo. Haaro alame dagganno yanna cincine ‘agadhineemmo’ woyite Yihowa kaaˈlannonketanna agarannonketa addaxxa dandiineemmo. (Mik. 7:7) Baalunku woˈmanka woyite cinca uddiˈrate murciˈno.