1. Manino ro teantsika ty olo manam-pahareta?

 TENA teantsika ty olo manam-pahareta. Falifaly, ohatsy, tsika lafa mahita olo tsy kivy mihintsy fa mahaliny raha. Teantsika laha manam-pahareta amintsika ty hafa lafa tsika manao hadisoa. Le falifaly koa tsika fa nanam-pahareta tamintsika ty olo nampianatsy Baiboly antsika lafa nisy raha tsy niazontsika, tsy nekentsika, na nisarotsy amintsika ty nanoriky azy. Fa ty tena bevata, mankasitraky ani-Jehovah Ndranahary tsika satria manam-pahareta amintsika ie!​—Rom. 2:4.

2. Amy raha manao akory ro mety ho sarotsy amintsika ty hanam-pahareta?

² Marina fa falifaly tsika lafa mahita olo manam-pahareta, fe haintsika fa tsy mora ty hoe hanam-pahareta avao. Mety ho sarotsy amintsika, ohatsy, ty ho kalma avao lafa tratsini-amboteiazy, sirtò laha fa tara tsika. Mety ho meloky tsika lafa misy olo manao raha mampeloky antsika. Sarotsy amintsika koa kindraiky ty mandiny ani-tontolo vaovao nampitamanini-Jehovah iny. Teanao va ty hanam-pahareta avao? Hodinihintsika amy lahatsoratsy toy hoe akory ty hampisehoantsika hoe manam-pahareta tsika, le manino raha zay ro tena ilà. Hohenteantsika koa hoe ino ty hanampy antsika hanam-pahareta avao.

3. Ino ty ataon’olo manam-pahareta lafa misy olo manao raha mampeloky azy?

³ Retoa misy fomba efatsy azontsika ampisehoa hoe manam-pahareta tsika. Voalohany, tsy mora meloky ty olo manam-pahareta. Lafa misy olo manao raha nampeloky azy, le miezaky  ho kalma avao ie sady tsy mamaly faty ani-olo iny. Tsy masiatsiaky amin’olo koa ie ndre misy raha mampiasa loha azy. Mivola ty Baiboly fa Jehovah, le “Ndranahary mamindra fo noho miferinay, tsy mora meloky, tena be fitiava noho tsy mivaliky sady tena tea fahamarina.”​—Eks. 34:6.

4. Ino ty ataon’olo manam-pahareta lafa misy raha linisany?

⁴ Faharoe, mahaliny raha ty olo manam-pahareta, le tsy taitsy avao ie lafa mandiny ani-raha iny. Laha tsy araky ty nieritseretany azy ty raha raiky, le miezaky ie mba tsy hiasa loha marè na ho mora meloky. (Mat. 18:26, 27) Maro ty raha miseho ilàntsika fahareta. Lafa misy olo miresaky, ohatsy, le mila manam-pahareta tsika ka mijanjy azy fa tsy hanapatapaky ty raha volaniny. (Joba 36:2) Mila manam-pahareta koa tsika lafa manampy mpianatsy Baiboly hahazo soa ty raha ianarany amy Baiboly ao na handresy fahazaran-draty.

5. Akory koa ty ampisehoan’olo raiky hoe manam-pahareta ie?

⁵ Fahatelo, tsy malisalisa hanao raha ty olo manam-pahareta. Marina aloha fa mila manao raha malaky tsika kindraiky. Fe tsy manao ho zay ty olo manam-pahareta lafa misy asa bevata tokony hataony. Tsy malisalisa hanomboky na hamita ani-raha iny ie. Mifanohitsy amy zay, fa ataony azo antoky hoe mana fotoa ampy soa hanaova ani-raha iny ie. Bakeo vitany soa asa iny.

6. Ino ty ataon’olo manam-pahareta lafa miatriky raha sarotsy?

⁶ Fahaefatsy, tsy be taray ty olo manam-pahareta lafa miatriky raha sarotsy. Marina aloha fa tsy raty ty hoe mitantara amy ty namantsika ty raha sarotsy mahazo antsika noho miresaky aminy ty fihetseham-pontsika. Fe laha manam-pahareta ty olo raiky, le hieritseritsy raha soa avao koa ie sady falifaly avao manao ze fara heriny amy fanompoa ani-Jehovah. (Kol. 1:11) Mpanomponi-Jehovah  tsika ka mila mampiseho ani-karaza fahareta iaby reo. Fa manino? Ndao tsika handiniky antony vitsivitsy.

7. Laha hentea ty Jakoba 5:7, 8, manino ro tena ilà ty fahareta? (Henteo koa sary io.)

⁷ Mila manam-pahareta tsika laha ta hahazo fiaina mandrakizay. Manahaky mpanomponi-Jehovah tsy nivaliky taloha rey, le mila mandiny a Ndranahary hanatanteraky ty fampitamanany tsika. (Heb. 6:11, 12) Ampitovizini-Baiboly amy mpamboly tsika. (Vakio Jakoba 5:7, 8.) Tena miasa mafy ty mpamboly mamboly noho manondraky ty raha amboleny, kanefa tsy tena hainy hoe ombia marina raha rey vo hitiry. Fe ndre zay, le mandiny avao ie sady matoky hoe tsy maintsy hahazo vokatsy. Manahaky ani-zay koa tsika. Miezaky mafy manori-dia ani-Jesosy tsika, ndre ‘tsy haintsika aza ty andro hiaviani-Tompontsika’ iny. (Mat. 24:42) Mandiny avao tsika sady matoky hoe hanatanteraky ty raha iaby nampitamaniny Jehovah amy fotoa voatondrony. Fe laha lasa tsy manam-pahareta tsika, le mety ho vozaky handiny sady hanomboky hiala tsikelikely amy Jehovah. Mety hanomboky hifantoky amy ze raha eritseretintsika hoe mahasambatsy antsika amy zao koa tsika. Fe laha manam-pahareta tsika, le afaky hiaritsy zisiky farany sady ho avotsy.​—Mika 7:7; Mat. 24:13.

8. Manino ty fahareta ro manampy antsika hifandramby soa amin’olo? (Kolosianina 3:12, 13)

⁸ Mila manam-pahareta tsika laha ta hifandramby soa amin’olo. Manampy antsika hijanjy soa raha io lafa miresaky amintsika ty hafa. (Jak. 1:19) Manampy antsika hilongo amin-drozy koa ty fahareta. Laha manam-pahareta tsika, le tsy halisalisa hanao raha noho hivola raha tsy mampahery lafa misy raha mampiasa loha antsika. Laha manam-pahareta koa tsika, le tsy ho mora meloky lafa misy olo manao raha mampalahelo antsika. Tsy hamaly faty tsika fa ‘hahay hifandefitsy noho hifanenga hadisoa tanteraky.’​—Vakio Kolosianina 3:12, 13.

9. Manino ty fahareta ro afaky manampy antsika lafa tsika manapa-kevitsy? (Ohabolana 21:5)

⁹ Afaky manampy antsika hahay hanapa-kevitsy koa ty fahareta. Tsy halisalisa na ho taitaitsy tsika lafa hanapa-kevitsy, fa hanoka fotoa hanaova fikaroha noho handiniha soa ani-raha iny. (Vakio Ohabolana 21:5.) Laha mila asa, ohatsy, tsika le mety avy le haneky ze asa hitantsika ndre mety hahavy antsika hanapatapaky fivoria noho fanompoa aza raha iny. Fe laha manam-pahareta tsika le handiniky soa. Ohatsy hoe aia asa iny, manao akory ty halavirany, le hanao akory ty fianakaviantsika noho ty fifandrambesantsika amy Jehovah laha manao ani-asa iny tsika. Afaky handramby fanapahan-kevitsy soa tsika laha manam-pahareta.

10. Ino ty hanampy ty Kristiana hanam-pahareta avao?

¹⁰ Mivavaha mba hahavy anao tena hanam-pahareta. Anisani-vokatsini-fanahy ty fahareta. (Gal. 5:22, 23) Afaky mivavaky amy Jehovah zany tsika mba hahazo fanahy masy, le mangataky aminy mba hanampy antsika hana ty vokatsini-fanahy. Laha miatriky raha sarotsy mety hahavy antsika tsy hanam-pahareta tsika, le ‘mangataky’ fanahy masy avao mba hanampy antsika hanam-pahareta. (Lioka 11:9, 13) Azontsika atao koa ty mangataky amy Jehovah mba hanampy antsika hitovy fomba fanenty aminy. Lafa baka nivavaky amy zay tsika le mila miezaky, soa mba hanam-pahareta avao sanandro. Arakaraky ty ivavahantsika noho iezahantsika le vomaiky tsika hana ani-toetsy  io ndre tsy nanam-pahareta aza tsika taloha.

11-12. Akory ty nampisehoani-Jehovah hoe nanam-pahareta ie?

¹¹ Vetsevetseo modelin’olo amy Baiboly ao rey. Ahità modelin’olo maro nanam-pahareta amy Baiboly ao. Laha mametsivetsy ty tantaran-drozy tsika, le ho haintsika koa ty hampiseho fahareta. Fe alohani-hanenteantsika ty modelin-drozy, le ndao tse tsika handiniky ohatsy raiky tena miavaky amy resaky fahareta. Tsy ia zay fa Jehovah.

¹² Tamy zariday Edena tao, le nandratiraty ty anarani-Jehovah Satana, sady nataony ze hahavy ani-Eva hisalasala laha tena manao ty rariny noho be fitiava Jehovah. Fe tsy avy le naripakini-Jehovah mpandratiraty io, fa naleony nandiny, le nifehy tena ie satria hainy fa elaela vo ho voaporofo hoe ie ro mahay manday ty olombelo. Tanatini-fotoa nandinisany zay, le niaritsy lafa kila fandratiratia natao amy ty anarany avao ie. Ankoatsini-zay, nandiny avao koa Jehovah amy zay ho maro ty olo afaky hahazo fiaina mandrakizay. (2 Pet. 3:9, 15) Ino ty vokany? Olo an-tapitrisany ro lasa nahay azy. Tena mandramby soa tsika satria manam-pahareta Jehovah. Laha mifantoky amy zay tsika le ho mora amintsika ty handiny zisiky hiaviani-fotoa handravany ani-tontolo toy.

13. Akory ty nampisehoani-Jesosy hoe nanam-pahareta manahaky ani-Babany ie? (Henteo koa sary io.)

¹³ Nanam-pahareta manahaky ani-Babany Jesosy le nampiseho ani-toetsy io ie tan-tany etoy. Tsy nimora taminy avao ty nampiseho fahareta, sirtò tamy Fariseo noho mpanora-dalàna mpiatsaravelatsihy rey. (Jaona 8:25-27) Fe nanahaky ani-Babany Jesosy ka tsy nimora meloky. Tsy namaly mihintsy ie lafa nisy  olo nandratiraty azy na nanao raha nampeloky azy. (1 Pet. 2:23) Tsy nimenimeny Jesosy lafa niatriky raha sarotsy fa niaritsy avao. Tsy mahatseriky zany laha mivola ty Baiboly hoe “diniho soa azy niaritsy ty safà feno fankalaina nivolanini-mpanota iny”! (Heb. 12:2, 3) Ho vitantsika koa ty hiaritsy ze raha sarotsy mety hahazo antsika satria manampy Jehovah.

14. Nanam-pahareta Abrahama, ino ty ianarantsika baka aminy? (Hebreo 6:15) (Henteo koa sary io.)

¹⁴ Manao akory laha mbo tsy tanteraky ty raha tamanintsika mikasiky ty farany? Mety nitamà ty sisany amintsika hoe fa ho niavy fa ela ty farany. Lasa matahotsy amy zay tsika henanizao hoe hay ndre fa tsy ho hitantsika ty hiaviani-fotoa io. Ino ty hanampy antsika hanam-pahareta avao? Diniho ty modelini-Abrahama. Fa 75 tao Abrahama fe mbo tsy niteraky. Tamy fotoa zay mihintsy Jehovah ro nampitamà azy hoe: “Hataoko lasa firenena bevata iha.” (Gen. 12:1-4) Nihitani-Abrahama va ty nahatanteraky ani-fampitamana zay? Eka, fe tsy ie iaby fa tampany kelikely avao. Lafa baka nitsàky ty Vavaranoni-Eofrata Abrahama, le mbo nandiny 25 tao. Zay vo nihitany ty nahaterahani-Isaka anakilahiny, le 60 tao mahery tafarani-zay koa vo nateraky Esao noho Jakoba zafiny. (Vakio Hebreo 6:15.) Fe tsy nihitani-Abrahama mihintsy ty nahalasa firenena bevata ani-taranakiny reo noho nandovan-drozy ani-Tany Nampitamany iny. Fe ndre zay, le nifalifaly lahilahy tsy nivaliky io satria nipinama tamy Mpamoro azy iny. (Jak. 2:23) Lafa hovelomy amy zay Abrahama, le ho falifaly biby ie lafa mahay hoe lasa nahazo fitahia ty firenena iaby satria nanam-pinoa noho fahareta ie! (Gen. 22:18) Ino ty fianara ho antsika? Mety tsy hahita ty hahatanteraky  ty fampitamanani-Jehovah iaby tsika henanizao. Fe laha manam-pahareta manahaky ani-Abrahama tsika, le hatòky hoe hamaly soa antsika Jehovah henanizao le handraky moa amy tontolo vaovao nampitamaniny iny any.​—Mar. 10:29, 30.

15. Ino ty raha azontsika dinihy lafa manao fianara am-bata?

¹⁵ Ahità modelin’olo maro nanam-pahareta ty amy Baiboly ao. (Jak. 5:10) Manino laha mba ataonao anaty fandahara ty hianatsy mikasiky an-drozy? b Mbo nikely, ohatsy, Davida le fa nivoatendry ho mpanjakan’Israely, fe nila nandiny tanatini-tao maro ie zay vo tena nanjaka. Nahavita tsy nivaliky amy Jehovah Simeona noho Ana sady nahavita nandiny ani-Mesia nampitamany iny. (Lioka 2:25, 36-38) Lafa mianatsy tantara manahaky ani-reo iha, le ilao ty valini-fanontanea retoa: Ino ty nanampy an’olo toy hanam-pahareta? Ino ty soa niazony lafa nanam-pahareta ie? Akory ty azoko anahafa azy? Mety hahasoa anao koa ty mianatsy tantaran’olo tsy nanam-pahareta rey. (1 Sam. 13:8-14) Eritsereto zao: ‘Ino ty antony nahavy an-drozy tsy hanam-pahareta? Ino ty vokany lafa tsy nanam-pahareta rozy?’

16. Ino ty soa ho azontsika laha manam-pahareta tsika?

¹⁶ Eritsereto ty soa ho azo lafa manam-pahareta. Laha manam-pahareta tsika, le ho sambatsy sady hilamin-tsay. Afaky manasoa ty fahasalamantsika zany ty fahareta. Laha manam-pahareta amy ty hafa tsika, le hifandramby soa amin-drozy. Vomaiky hiharo raiky ty fiangona misy antsika. Laha misy olo manao raha mampeloky antsika fe tsy mora meloky tsika, le lasa tsy hiitatsy problemo iny. (Sal. 37:8, f.a.p.; Ohab. 14:29) Fe ty tena vatan-draha, laha manam-pahareta tsika, le manahaky ani-Babantsika an-danitsy any iny sady vomaiky hifandramby marìny aminy.

17. Tokony ho tapa-kevitsy hanao ino tsika?

¹⁷ Toetsy tena soa ty fahareta sady mahasoa antsika iaby. Tsy mora aloha ty hanam-pahareta, fe manampy antsika Jehovah ka afaky hana ani-toetsy io tsika. Zisiky andinisantsika ani-tontolo vaovao iny, le afaky matoky tsika fa “ty masoni-Jehovah manenty soa ani-ze matahotsy azy, le ze mandiny ty hampisehoany fitiava noho tsy fivaliha.” (Sal. 33:18) Enga anè tsika hiezaky hanam-pahareta avao.