1. Faandi mbei i lobi sëmbë di abi pasensi?

 HII u tuu lobi sëmbë di abi sakafasi. U ta lesipeki sëmbë di sa hoi wakiti wan soni, söndö u hati u de boonu. U lobi te sëmbë ta hoi pasensi da u te u mbei wan föutu. Boiti di dë, u bi tei ën u bigi seei di di sëmbë di bi ta lei u soni u Bëibel bi ta hoi pasensi da u, te a bi ta taanga da u fuu fusutan so u dee lei u Bëibel, söseei fuu libi ku de. U ta tei ën u bigi seei taa Jehovah ta hoi pasensi da u!​—Lom. 2:4.

2. Na un ten a sa taanga da u fuu lei taa u abi pasensi?

² Hii fa u lobi te sëmbë abi pasensi, tökuseei so juu a sa ta taanga da u fuu lei taa u abi pasensi. Kandë a sa ta taanga da u fuu dë piii ta wakiti a wan wagi dendu te sömëni woto wagi dë a u fesi, möönmöön ee u lati kaa. U sa lasi useei te wotowan mbei hati fuu boonu. Nöö so juu a sa ta taanga da u fuu hoi wakiti u di njunjun goonliba u Jehovah dou. I bi o kë abi pasensi möön gaanfa u? A di woto aki, woo si unfa u sa lei taa u abi pasensi, söseei woo si faandi mbei pasensi dë fanöudu sö. Woo si tu andi sa heepi u fuu ko möön abi pasensi.

3. Unfa wan sëmbë di abi pasensi ta du soni, te wotowan du soni u mbei hati fëën boonu?

³ Boo taki u fö fasi fa u sa lei taa u abi pasensi. Di fosu soni, hën da hati u wan sëmbë di abi pasensi an ta boonu hesi. Te wan soni ta toobi ën, nasö te sëmbë du soni u mbei hati fëën boonu, nöö a ta mbei möiti faa hoi hënseei, söseei fu an toona du hogi ku de baka. Di fosu kamian ka dee wöutu „hati fëën an ta boonu hesi” sikifi a di Bëibel, da ka a ta taki taa Jehovah da „wan Gadu di abi tjalihati u sëmbë, söseei di ta fii da sëmbë. Hati fëën an ta boonu hesi, a abi bunuhati pasa maaka, nöö  hii juu a ta du dee soni dee a ta taki”.​—Ëki. 34:6.

4. Unfa wan sëmbë di abi pasensi ta du soni te a musu wakiti?

⁴ Di u tu soni, hën da wan sëmbë di abi pasensi sa dë piii ta wakiti wan soni. Ee wan soni ta tei möön ten möön fa a bi mëni, nöö a ta mbei möiti fu an ko wei u wakiti, söseei fu an fuufei hesi poi (Mat. 18:26, 27). A lo’ u pasa taa u musu ta hoi wakiti u so soni pasa. U musu ta wakiti ku pasensi te wotowan ta fan, söndö fuu koti de buka (Jöpu 36:2). U musu abi pasensi tu te u ta heepi wan sëmbë di u ta lei soni u Bëibel faa ko fusutan wan lei u Bëibel, nasö faa disa wan taku guwenti di a abi.

5. Andi da wan woto fasi fa u sa lei ta u abi pasensi?

⁵ Di u dii soni, hën da wan sëmbë di abi pasensi an ta du soni söndö u pakisei. Wë so juu, a ta dë fanöudu fuu du wan soni hesihesi. Ma te wan sëmbë di abi pasensi abi wan fanöudu soni faa du, nöö an ta du ën valavala. Ma a ta tei ten wegi luku unfa a sa du di soni. Baka di dë, nöö a ta tei ten du ën bumbuu.

6. Unfa wan sëmbë di abi pasensi ta du soni te tesi ta miti ën, nasö te soni ta taanga dëën?

⁶ Di u fö soni, hën da te tesi ta miti wan sëmbë di abi pasensi, nöö a ta tjëën söndö faa kaagi. Di lö pasensi aki nama ku di hoi di wan sëmbë ta hoi dou. Wë an dë wan föutu soni fuu konda da wan mati fuu andi ta miti u, ku unfa u ta fii. Ma wan sëmbë di abi pasensi o mbei hii möiti faa hoi dou ku piizii. Hën da an o ta buta pakisei a dee hogi soni dee ta miti ën nöö (Kol. 1:11). A dë fanöudu seei fuu dee Keesitu sëmbë ta lei taa u abi pasensi a hii dee fasi aki. Faandi mbei? Boo taki u wantu soni di mbei.

7. Faandi mbei pasensi dë wan fanöudu soni sö, te u luku andi Jakobosi 5:7, 8 ta taki? (Luku di peentje tu.)

⁷ A dë fanöudu fuu abi pasensi fuu sa feni di libi u teego. U musu hoi wakiti Gadu faa du  dee soni dee a paamusi u, leti kumafa dee dinima fëën fu awooten bi du ën (Heb. 6:11, 12). Di Bëibel ta tei u maaka ku wan sëmbë di ta paandi soni. (Lesi Jakobosi 5:7, 8.) Wan sëmbë di ta paandi soni ta mbei taanga möiti u paandi dee soni fëën, söseei u munjan de. Ma an ta kaba sabi na un ten dee soni fëën o nasi. Fëën mbei a ta wakiti ku pasensi, ku di mëni taa de o lepi faa feni diki nasö faa feni koti. Wë sö useei ta mbei möiti fuu ta abi sömëni soni ta du a di biibi, hii fa ’wa sabi na un juu di Masa fuu o toona ko’ (Mat. 24:42). U ta wakiti ku pasensi, u di u dë seiki taa Jehovah o du hii dee soni dee a paamusi u a di soifi ten. Ee wa ko abi pasensi möön, nöö u sa ko wei u wakiti, nöö u bigi ta kumutu a di lei pikipiki. Boiti di dë, u sa bigi buta pakisei a soni di u ta si kuma o tja wini ko da u wantewante. Ma ee u abi pasensi, nöö woo sa hoi dou u te di kaba dou, sö taa u sa feni di libi u teego.​—Mik. 7:7; Mat. 24:13.

8. Unfa pasensi ta heepi u fuu sa libi ku wotowan? (Kolosën 3:12, 13)

⁸ Pasensi ta heepi u fuu sa libi ku wotowan. A ta heepi u fuu ta haika bunu te wotowan ta fan (Jak. 1:19). A ta heepi u tu fuu sa libi fiifii ku de. Boiti di dë, a ta heepi u fu wa biinga du soni hesi poi, söseei fu wa taki hatihati soni da wotowan te soni an nango kumafa u kë. Ee u abi pasensi, nöö hati fuu an o ta boonu hesi te wan sëmbë du wan soni ku u di hati u. Söseei wa o ta toona du hati soni ku wotowan, ma woo ta ’hoi pasensi da useei ta da useei paadon ku hii u hati’.​—Lesi Kolosën 3:12, 13.

9. Unfa pasensi ta heepi u te u musu du wan soni? (Nöngö 21:5.)

⁹ Pasensi sa heepi u tu fuu sa du soni ku köni. Wa o ta biinga du soni vou, ma woo ta tei ten öndösuku soni, söseei woo ta tei ten wegi soni luku, fuu sa sabi unfa u sa du soni a wan möön bunu fasi. (Lesi Nöngö 21:5.) Ee u ta suku wan wooko, nöö kandë woo kë tei di fosuwan di u feni, aluwasi ee a sa taapu u fuu du so soni a di dini di u ta dini Jehovah. Ma ee u abi pasensi, nöö woo tei ten wegi luku naasë di wookope dë, na un juu a o dë fuu ta wooko, söseei unfa di wooko o mbei u ku Jehovah, ku dee sëmbë fuu wosudendu ko dë. Pasensi sa heepi u fu wa du wan soni di o hati u bakaten.

10. Unfa wan Keesitu sëmbë sa ko abi pasensi, söseei andi sa heepi ën faa ta du soni ku pasensi hii juu?

¹⁰ Begi Gadu faa da i möön pasensi. Pasensi da wan u dee fasi di di jeje u Gadu ta mbei sëmbë ko abi (Gal. 5:22, 23). Fëën mbei u sa hakisi Jehovah faa da u di santa jeje fëën, söseei faa heepi u fuu ko abi dee fasi di di jeje fëën ta mbei sëmbë ko abi. Te a ta taanga da u fuu hoi pasensi, nöö u ta „begi Masa Gadu nöömö” faa da u di santa jeje fëën, u heepi u fuu du soni ku pasensi (Luk. 11:9, 13). U sa hakisi Jehovah tu faa heepi u fuu si soni kumëën. Te u begi Jehovah kaa, nöö u musu ta mbei möiti hiniwan daka, fuu du soni ku pasensi. Ee u ta begi fuu sa ko abi pasensi, nöö u ta mbei möiti fuu du soni ku pasensi, nöö woo ko dë wan sëmbë di abi pasensi.

11-12. Unfa Jehovah bi lei taa a abi pasensi?

¹¹ Kai pakisei a dee woto u dee sëmbë di di Bëibel ta taki soni u de. Di Bëibel ta taki soni u sömëni sëmbë di bi abi pasensi. Te u ta kai pakisei a de woto dë, nöö woo ko sabi unfa u sa lei taa u abi pasensi. Ma ufö u taki u dee woto dë, nöö boo taki soni u Jehovah, di Sëmbë di abi möön pasensi.

¹² Saatan bi mindi soni da Jehovah a di djai u Eden, u di a bi kë poi hën në. A bi kë u Eva si kuma Jehovah da wan Sëmbë di an lo’  sëmbë, söseei di an ta tii a wan leti fasi. Ma Jehovah an bi kii Saatan puu a pasi wantewante dë. Ma a bi hoi hënseei, hën a du soni ku pasensi, u di a bi sabi taa a bi o dë fanöudu u möön ten pasa, u sëmbë ko si taa di fasi fa a ta tii da di möön bunuwan. Nöö a hii di pisiten di a bi dë ta wakiti u soni seeka, a bi ta hoi dou, hii fa sëmbë bi ta poi hën në. Boiti di dë, Jehovah bi hoi wakiti ku pasensi, sö taa möön hia sëmbë bi sa feni okasi u feni di libi u teego (2 Pet. 3:9, 15). Te u kaba fëën, milionmilion sëmbë bi ko sabi soni fëën. Ee u buta pakisei a dee wini dee u ta feni u di Jehovah ta hoi pasensi, nöö a kan taa an o taanga da u sö fuu wakiti u di daka fëën dou, ka a o poi di hogi goonliba aki.

13. Unfa Jesosi bi lei taa a abi pasensi, leti kuma hën Tata? (Luku di peentje tu.)

¹³ Jesosi ta lei taa a abi pasensi, leti kuma hën Tata, nöö di a bi dë a goonliba aki, a bi lei taa a abi di fasi aki. Na hii juu a bi o ta dë wan kösökösö soni dëën u lei taa a abi pasensi. A bi o sa ta taanga dëën u hoi pasensi da dee Sabima u Wëti ku dee Faliseima, u di dee womi aki bi ta du soni a wan bödjëë fasi (Joh. 8:25-27). Jesosi hati an bi ta boonu hesi, leti kumafa hën Tata hati an ta boonu hesi. An bi ta toona du hogi ku sëmbë te de bi ta kosi ën, nasö te de bi ta du soni ku ën u mbei hati fëën boonu (1 Pet. 2:23). Di tesi bi ta miti Jesosi, nöö a bi hoi dou söndö guunjan. Fëën mbei an ta bigi da u taa di Bëibel ta piki u ’fuu ta mëni fa a bi tja sö wan gaan sitaafu a dee takuhati sëmbë maun’! (Heb. 12:2, 3) Jehovah sa heepi u tu fuu sa hoi dou, aluwasi un tesi ta miti u.

14. Andi u sa lei u di pasensi di Abahamu bi abi? (Hebelejën 6:15) (Luku di peentje tu.)

¹⁴ Unfa a dë ee dee soni dee nama ku di kaba  an pasa jeti kumafa u bi mëni? Kandë u bi ta mëni taa di kaba u di goonliba aki bi o ko gaanduwe, ma kandë nöunöu u ko ta fëëë taa wa o libi longi tjika fuu sa si ën. Andi sa heepi u fuu wakiti ku pasensi go dou? Buta pakisei a di fasi fa soni bi dë da Abahamu. Di Abahamu bi abi 75, nöö an bi abi miii. Hën Jehovah paamusi ën taa: „Mi o mbei i ko abi te a hia bakamii” (Ken. 12:1-4). Abahamu bi si fa Jehovah bi du di soni di a paamusi ën u? Wë an bi feni ën si bumbuu. Baka di Abahamu bi haba di lio de kai Efaata, hën a bi wakiti 25 jaa longi, hën a si fa Jehovah bi du wan foombo soni u mbei a pai di womi mii fëën de kai Isaki. Nöö 60 jaa baka di dë, hën de pai tu womi mii di kai ën avo. Dee mii dë da Esau ku Jakopu. (Lesi Hebelejën 6:15.) Ma Abahamu an bi si fa dee bakamii fëën bi ko hia, söseei fa de feni di Paamusi Köndë. Hii fa a dë sö, tökuseei hën ku di Sëmbë di mbei ën bi dë gaan mati (Jak. 2:23). Nöö te Abahamu weki ko a libi baka, na piki wai a o wai te a ko sabi taa di biibi ku di pasensi fëën, hën mbei taa hii dee nasiönnasiön sëmbë feni gaan bunu! (Ken. 22:18) Andi u ta lei a di soni aki? A kan taa wa si wantewante unfa hii dee soni dee Jehovah paamusi pasa tuutuu. Ma ee u abi pasensi kuma Abahamu, nöö u sa dë seiki taa Jehovah o paka u nöunöu kaa. Ma a o paka u möön gaanfa seei te di njunjun goonliba fëën dou.​—Maik. 10:29, 30.

15. Andi u sa du te u ta lei soni u Bëibel?

¹⁵ Di Bëibel ta taki soni u sömëni woto sëmbë di bi abi pasensi tu (Jak. 5:10). A sa bunu fii öndösuku soni u dee sëmbë aki. b Dafiti da wan u dee sëmbë dë, nöö a bi njönku seei di  Jehovah bi salufu ën faa ko dë di njunjun könu u Isaëli, ma tökuseei a bi musu wakiti sömëni jaa ufö a toon könu. Simion ku Hana bi ta dini Jehovah ku hii de hati go dou, di de bi ta wakiti u di Mësiasi dou (Luk. 2:25, 36-38). Te i ta öndösuku soni u dee sëmbë aki, nöö mbei möiti fii feni di piki u dee hakisi aki: Andi bi heepi di sëmbë aki faa hoi pasensi? Un wini a bi feni u di a bi lei taa a abi pasensi? Unfa mi sa djeesi ën? I sa feni wini te lei soni u dee sëmbë dee an bi hoi pasensi tu (1 Sam. 13:8-14). I sa hakisi iseei taa: ’Andi bi mbei taa de an bi hoi pasensi? Unfa di soni dë bi mbei soni waka da de?’

16. Andi da wantu wini di u ta feni te u abi pasensi?

¹⁶ Buta pakisei a dee wini dee joo feni te i abi pasensi. Te u abi pasensi, nöö u ta möön dë waiwai, söseei wa ta dë pantapanta. Hën da ee fuu taki ën, nöö pasensi sa heepi u fuu ko dë möön gösöntu. Te u ta hoi pasensi da wotowan, nöö u ku de ta dë möön gaan mati. U ta möön libi makandi ku useei a di kemeente tu. Ee hati fuu an ta boonu hesi, nöö te wan sëmbë du wan soni di mbei hati fuu boonu, nöö di soni dë sa mbei taa soni an ko möön hogi (Ps. 37:8 ;Nöng. 14:29). Ma di möön gaan soni, hën da ee u abi pasensi nöö u ta lei taa u ta djeesi di Tata fuu di dë a liba ala, nöö u ku ën ta ko dë möön gaan mati.

17. Andi u musu dë kabakaba u du?

¹⁷ Pasensi da wan bunu fasi di ta tja wini ko da u tuutuu! Hii fa na hii juu a ta dë wan kösökösö soni da u fuu lei taa u abi pasensi, tökuseei Jehovah sa heepi u fuu mbei möiti go dou, fuu ko abi di fasi aki. Nöö u di u ta wakiti ku pasensi u di njunjun goonliba dou, mbei u sa dë seiki taa „Jehovah ta buta pakisei a dee sëmbë dee ta lesipeki ën. A ta buta pakisei a dee sëmbë dee ta wakiti faa lei de taa a abi bunuhati u de” (Ps. 33:18). Be hii u tuu mbei möiti go dou, u ’pasensi sa dë kuma wan koosu di u ta bisi a u sinkii’.