1. Yini leyenta sibatsandze bantfu lababeketelako?

 SONKHE siyabatsandza bantfu lababeketelako. Sisho ngani? Siyabahlonipha labo labakhonako kulindza lokutsite babe bangatfukutseli. Siyajabula ngekutsi labanye bayasibeketelela nasenta emaphutsa. Ngetulu kwaloko, siyajabula kutsi loyo lowadadisha natsi liBhayibheli wasibeketelela ngesikhatsi sisetama kufundza timfundziso teliBhayibheli, kutemukela nekutisebentisa. Ngetulu kwako konkhe, sijabula kakhulu ngekutsi Jehova Nkulunkulu uyasibeketelela!​—Rom. 2:4.

2. Kukutiphi timo lasingahle sikutfole kumatima khona kubeketela?

² Nanobe sibatsandza bantfu lababeketelako, singahle sikutfole kumatima kubeketela. Sibonelo nje, singahle sikutfole kumatima kuba nemoya lophansi nangabe sideleze elayinini lelidze kantsi sijakile. Singahle sikutfole kumatima kutibamba nangabe labanye basitfukutselisa. Ngaletinye tikhatsi singahle sikutfole kumatima kuchubeka silindzele live lelisha Jehova lasetsembise lona. Uyafuna yini kubeketela kakhudlwana? Kulesihloko, sitawucoca ngekutsi kusho kutsini kubeketela nekutsi kubaluleke ngani. Sitawuphindze sicoce ngekutsi yini lengasisita kutsi sibeketele kakhudlwana.

3. Umuntfu lobeketelako wenta njani nakaphatfwa kabi?

³ Cabanga nganati timo letine lasingakhombisa khona kutsi siyabeketela. Kwekucala, umuntfu lobeketelako uyephuta kutfukutsela. Wetama kwehlisa umoya futsi atibambe angaphindziseli  nakaphatfwa kabi nobe nakacindzetelekile. Emavi latsi ‘kwephuta kutfukutsela’ avela kwekucala eBhayibhelini nakachaza Jehova ngekutsi ‘unguNkulunkulu lonesihawu neluvelo, lowephuta kutfukutsela futsi lochichima lutsandvo lolucotfo neliciniso.’​—Eks. 34:6.

4. Umuntfu lobeketelako wenta njani nakudzingeka kutsi alindze?

⁴ Kwesibili, umuntfu lobeketelako ulindza ngesineke abe ehlise umoya. Nangabe intfo letsite itsatsa sikhatsi lesidze kunaleso bekasilindzele, umuntfu lobeketelako wehlisa umoya nobe angacansuki. (Mat. 18:26, 27) Tinyenti timo lakudzingeka kutsi silindze khona. Sibonelo nje, kufanele silalelisise ngesineke nangabe umuntfu akhuluma, singamngeni emlonyeni. (Jobe 36:2) Kungahle kudzingeke sibeketele nasisita umuntfu lesidadisha naye liBhayibheli kutsi acondze imfundziso letsite yeliBhayibheli nobe ancobe umkhuba lomubi.

5. Nguyiphi lenye indlela lesingakhombisa ngayo kutsi siyabeketela?

⁵ Kwesitsatfu, umuntfu lobeketelako akabhudvuteli. Kuliciniso kutsi letinye timo tidzinga sente lokutsite ngekushesha. Nobe kunjalo, umuntfu lobeketelako nakufanele ente intfo letsite lebalulekile, akajaki kuyenta nobe kuyicedza. Kunaloko, ubeka sikhatsi lesenele kuze ahlele kutsi utayenta njani. Ngemuva kwaloko utinika sikhatsi kuze ayente kahle.

6. Umuntfu lobeketelako wenta njani nakanetinkinga?

⁶ Kwesine, umuntfu lobeketelako wetama kungakhononi nakabhekene nenkinga. Kulendzaba, kubeketela kuphose kufane nekucinisela. Kuliciniso kutsi akusikubi kutfulula sifuba kumngani futsi simtjele indlela lesitiva ngayo ngenkinga letsite. Nanobe kunjalo, umuntfu lobeketelako utawenta konkhe langakwenta kuze achubeke acinisela abe anesimo sengcondvo lesihle. (Khol. 1:11) Njengobe singemaKhristu, kudzingeka sikhombise kubeketela  kuko konkhe loku lesesicoce ngako. Leni? Ase sicoce ngaletinye tizatfu.

7. Ngekuvumelana naJakobe 5:7, 8, kubaluleke ngani kubeketela? (Buka nesitfombe.)

⁷ Kubeketela kubalulekile kuze sisindziswe. Njengebantfu baNkulunkulu labetsembekile basesikhatsini lesendlulile, kufanele simlindzele ngesineke Nkulunkulu kutsi afeze tonkhe tetsembiso takhe. (Heb. 6:11, 12) LiBhayibheli lifananisa simo setfu nesemlimi. (Fundza Jakobe 5:7, 8.) Umlimi usebenta kamatima kuze ahlanyele futsi anisele lakulimile, kodvwa akati ngalokucondzile kutsi kutawukhula nini. Ngako lomlimi ulindzela ngesineke, etsembe kutsi utawuvuna. Ngendlela lefanako, natsi sihlale simatasatasa ngetintfo letiphatselene naNkulunkulu ngisho nobe ‘singalati lilanga iNkhosi yetfu letawufika ngalo.’ (Mat. 24:42) Silindzela ngesineke, siciniseka kutsi Jehova utawutifeza tonkhe tetsembiso takhe ngesikhatsi sakhe lesifanele. Nasingayekela kubeketela, singahle siphelelwe ngemandla ekulindza futsi sicale kushiya liciniso kancane kancane. Singahle sicale kwenta tintfo lesicabanga kutsi titasijabulisa nyalo. Kodvwa nangabe sibeketela, singacinisela kuze kube sekugcineni futsi sisindziswe.​—Mik. 7:7; Mat. 24:13.

8. Kubeketela kusisita njani endleleni lesiphatsa ngayo labanye? (KubaseKholose 3:12, 13)

⁸ Kubeketela kuyasisita endleleni lesiphatsa ngayo labanye. Kuyasisita kutsi silalelisise labanye nabakhuluma. (Jak. 1:19) Kubeketela kuphindze kwakhe kuthula. Kuyasivikela kutsi singasheshi sente lokutsite nobe sisho intfo lete umusa nasicindzetelekile. Nasibeketela, sitawephuta kutfukutsela nangabe lomunye asivisa buhlungu. Kunekutsi siphindzisele, ‘sitawuchubeka sibeketela futsi sitsetselela ngekukhululeka.’​—Fundza KubaseKholose 3:12, 13.

9. Kubeketela kusisita njani nakufanele sente tincumo? (Taga 21:5)

⁹ Kubeketela kungaphindze kusisite kutsi sente tincumo letikahle. Kunekutsi sente tintfo singakacabangi, sitawutiniketa sikhatsi sekucwaninga nesekucabangisisa ngaphambi kwekutsi sincume loko lesitawukwenta. (Fundza Taga 21:5.) Sibonelo nje, nangabe sifuna umsebenti, singahle semukele nobe ngumuphi lesiwutfola kucala ngisho nobe ungaphatamisa luhlelo lwetfu lwekukhonta Jehova. Kodvwa nangabe sibeketela, sitawutinika sikhatsi sekucabanga kutsi ukhashane kanganani, anganani ema-awa lesitawasebenta, utawutsintsa njani umndeni wetfu kanye nebuhlobo betfu naJehova. Nasibeketela, singakugwema kwenta tincumo letikabi.

10. Yini umKhristu langayenta kuze abeketele futsi ahlale abeketela?

¹⁰ Thantazela kubeketela kakhudlwana. Kubeketela kuyincenye yetitselo temoya. (Gal. 5:22, 23) Ngako singathantazela umoya longcwele futsi sicele Jehova asisite sibe nalesitselo semoya. Nangabe sibhekana nesimo lesivivinya kubeketela kwetfu, ‘sitawuchubeka sicela’ umoya longcwele kuze usisite sibeketele. (Luk. 11:9, 13) Singaphindze sicele Jehova asisite kutsi sibone tintfo ngendlela latibona ngayo. Ngemuva kwekuthantaza, kufanele sente konkhe lokusemandleni etfu kuze sibeketele onkhe malanga. Nasichubeka sithantazela kubeketela futsi setama kuba nako, kutawumila timphandze etinhlitiyweni tetfu futsi kube yincenye yebuntfu betfu.

11-12. Jehova ukhombise njani kutsi uyabeketela?

¹¹ Cabangisisa ngetibonelo letiseBhayibhelini.  LiBhayibheli linetibonelo letinyenti tebantfu lababeketela. Nasicabangisisa ngato, singafundza kutsi singabeketela njani. Ngaphambi kwekutsi sicoce ngaletinye taletibonelo, ase sicale sicoce ngesibonelo lesihamba embili sekubeketela, lokusibonelo saJehova.

¹² Ensimini yase-Edeni, Sathane wanyundzela ligama laJehova futsi wenta Eva wangabata kutsi Jehova unguMbusi lolungile nalonelutsandvo. Kunekutsi ambhubhise ngekushesha lomnyundzeli, Jehova wabeketela futsi watibamba ngobe bekati kutsi kutawutsatsa sikhatsi kuze akhombise kutsi unguMbusi lokahle kakhulu. Njengobe asalindzile, ubeketelele kuhlanjalatwa kweligama lakhe. Ngetulu kwaloko, Jehova bekasolo alindze ngesineke kuze bantfu labanyenti batfole litfuba lekutfola kuphila lokuphakadze. (2 Phet. 3:9, 15) Ngenca yaloko, tigidzi tebantfu setiyamati Jehova. Nangabe sinaka kutsi kusisita ngani kubeketela kwaJehova, sitakutfola kumelula kulindzela sikhatsi sakhe sekutsi abhubhise lelive lelibi.

13. Jesu wamlingisa njani ncamashi Babe wakhe ngekubeketela? (Buka nesitfombe.)

¹³ Jesu umlingisa ncamashi Babe wakhe ngekubeketela, futsi wabeketela ngesikhatsi alamhlabeni. Bekungahlali kumelula kubeketela, ikakhulukati nakufanele abeketelele tati temtsetfo nebaFarisi lebebatentisa. (Joh. 8:25-27) Nobe kunjalo, njengaBabe wakhe, Jesu bekangasheshi atfukutsele. Akazange aphindzisele ngesikhatsi etfukwa nobe atfukutseliswa. (1 Phet. 2:23) Jesu bekangakhononi nakanetinkinga. Kungako liBhayibheli lisitjela kutsi ‘sicabangisise ngaloyo lowabeketelela inkhulumo lephikisako yetoni’! (Heb. 12:2, 3) Ngekusitwa nguJehova, natsi singakhona kubeketela ngisho sibhekene natiphi tinkinga.

14. Yini lesingayifundza esibonelweni sa-Abrahama sekubeketela? (KumaHebheru 6:15) (Buka nesitfombe.)

 ¹⁴ Kutsiwani nakusolo kungefiki kuphela lesisolo sikulindzele? Mhlawumbe besigadze kutsi ngabe kadze kwefika. Singahle sikhatsateke ngekutsi sitawufa kungakefiki. Yini lengasisita kutsi sichubeke silindze ngesineke? Cabanga ngalokwenteka ku-Abrahama. Ngesikhatsi Abrahama aneminyaka lengu-75 futsi ete umntfwana, Jehova wametsembisa watsi: “Ngitakwenta ube sive lesikhulu.” (Gen. 12:1-4) Abrahama wasibona yini lesetsembiso sigcwaliseka? Hhayi ngalokuphelele. Ngemuva kwekwewela uMfula iYufrathe futsi alindze iminyaka lengu-25, Abrahama wabona kutalwa kwendvodzana yakhe Isaka ngalokusimangaliso futsi ngemuva kweminyaka lengu-60 wabona kutalwa kwebatukulu bakhe, lokungu-Esawu naJakobe. (Fundza KumaHebheru 6:15.) Kodvwa Abrahama akazange abone situkulwane sakhe siba sive lesikhulu futsi sihlala eVeni Lesetsembiso. Nobe kunjalo, lendvodza leyetsembekile beyinebuhlobo lobuhle neMdali wayo. (Jak. 2:23) Nasekavusiwe Abrahama, utawujabula kakhulu nakabona kutsi tonkhe tive temhlaba tabusiswa ngenca yekukholwa kwakhe nekubeketela kwakhe! (Gen. 22:18) Yini lesiyifundzako? Kungenteka singaboni lapho tonkhe tetsembiso taJehova tigcwaliseka. Nobe kunjalo, nangabe sibeketela njenga-Abrahama, singaciniseka kutsi Jehova utasibusisa nyalo, futsi asibusise kakhulu eveni lelisha laletsembisile.​—Mak. 10:29, 30.

15. Yini lesingacabanga ngayo nasitidadishela liBhayibheli?

¹⁵ LiBhayibheli linaletinye tibonelo letinyenti tebantfu lababeketela. (Jak. 5:10) Tinike  sikhatsi sekucwaninga ngaletibonelo? b Sibonelo nje, nanobe Davide agcotjwa asemncane kutsi utawuba yinkhosi yaka-Israyeli, kwadzingeka kutsi alindze iminyaka leminyenti ngaphambi kwekutsi acale kubusa. Simeyoni na-Ana bakhonta Jehova ngekwetsembeka njengobe bebasalindzele Mesiya. (Luk. 2:25, 36-38) Njengobe usafundza ngaletibonelo, yetama kuphendvula nayi imibuto: Yini lokungenteka yasita lomuntfu kutsi abeketele? Kwamsita njani kubeketela? Ngingamlingisa njani? Kungakusita nekufundza ngalabo labangazange babeketele. (1 Sam. 13:8-14) Ungatibuta: ‘Yini lokungenteka yenta bangabeketeli? Ngumiphi imiphumela lababhekana nayo?’

16. Kusisita njani kubeketela?

¹⁶ Cabanga ngekutsi kusisita njani kubeketela. Nasibeketela siyajabula futsi sibe nemoya lophansi. Ngako, kubeketela kusenta siphile emtimbeni nasengcondvweni. Nangabe sibabeketelela labanye, siba nebudlelwane lobuhle nabo. Libandla liba nebunye. Nangabe lotsite asiphatsa kabi, kwephuta kutfukutsela kungenta simo singabi sibi kakhulu. (Hla. 37:8, umbhalo longentasi; Taga 14:29) Ngetulu kwako konkhe, nangabe sibeketela, silingisa Babe wetfu wasezulwini futsi sisondzela kakhulu kuye.

17. Yini lokufanele sitimisele kuyenta?

¹⁷ Kubeketela buntfu lobuhle mbamba futsi lobusisitako! Nanobe kutawuhle kuba lukhuni kubeketela, ngekusitwa nguJehova singachubeka sikwetama. Njengobe siselindzele live lelisha ngesineke, singaciniseka kutsi “liso laJehova libuke labo labamesabako, labo labetsembele elutsandvweni lwakhe lolucotfo.” (Hla. 33:18) Shengatsi singatimisela kuchubeka sigcoke kubeketela.