1. ¿Chúsiá mi we natéami niraa iné echi pagótami japi kilí buwéami ju?

 SINÉAMI ta we kanili napawía echi pagótami yúa japi kilí buwéami ju. Japi riká, ati riwiwi echi japi ke iyoka buwé. Ayénachó ti we natéami niraa iné japalí jarecho kilí ju tamó yúa japalí ta ke aʼlá nokisaa. Alí ti waʼlú matétara iyá echi pagótami japi tamó binérili Biblia jitra jiti echi ko we kilí nili tamó yúa japalí ti we jilí nirali inamia, bichiwia alí nijewia japi ta binéi. Nalí, ¡wabé natéami ko ju japi Jeobá kilí buwéami ju tamujé yúa, jiti la ti waʼlú matétarabá iyá! (Rom. 2:4).

2. ¿Chu kabú a jilí nímiré kilí buwéami niya?

² Sinéami ta we natéami niraa iné japi jarecho kilí buwéami nima. Nalí, japalí tamujé ju japi kilí buwéami nísaré, a keʼré japi jilí nima. Japi riká, a we jilí nímiré kilí niya japalí ta biléana simíami nisa nalí ti ke omérisa sapú simía echi carros jitra. Ayénachó a keʼré japi iyopo japalí jarecho tamó iyótisa. Alí a keʼré japi isini kaachi jilí nima kilí buwea echi Wichimóbachi we baʼóami japi Jeobá anili. ¿Kechi ko a bichíwali ju japi sinéami ta kanílisa nili aminabi kilí buwéami niya? Jenaʼí binelíwami binepo piri aniwáami ju kilí buwéami niya alí chúsiá we natéami ju echi riká niya. Ayénachó binepo jaré namuti japi tamó iʼwírima aminabi kilí buwéami niya.

3. ¿Piri ke isimí bilé pagótami japi kilí buwéami ju japalí jarecho cha olasa iyótimia?

³ Binepo naó namuti japi isimí bilé pagótami japi kilí buwéami ju. Bilé, ke sapú iyó. Iʼwérili isimí kilí niya japalí jarecho cha olá iyótimia alí ke echi riká cho ku olá japi riká binoy oláratami nili. Echi raʼíchali “ke sapú iyóami”  ne bachá niraa machina echoná Biblia japalí Jeobá anili japi echi ju “bilé Onorúami we aʼláala, simá isíami, ke sapú iyóami, bichíwika raʼíchami alí we galéami” (Éx. 34:6).

4. ¿Chúriká isimí bilé japi kilí buwéami ju?

⁴ Okuá, echi pagótami japi kilí ju kilí niraa buwé. Ke we nata alí ke iyó japalí bilé namuti ke sapú ikisaa (Mat. 18:26, 27). Nirú wiká namuti japoná newaléliwa japi ta kilí buwéami nipo. Japi riká, ati kilí kipúsaré japalí bilé tamó ruyé bilé namuti alí ti ke nukumésaré raʼíchachi (Job 36:2). Ayénachó ti kilí buwéami nísaré japalí bilé binéami ke sapú inami japi aní echi Biblia o we jilí niraa riwea bilé namuti chati.

5. ¿Chúriká ti nokisaa ayénachó néwariwéliti japi ta kilí buwéami ju?

⁵ Bikiá, echi pagótami japi kilí buwéami ju ke isimí bilé namuti ke natasa. A bichíwali ju japi isini kaachi sapú nokisáré bilé namuti. Nalí, japalí ju bilé namuti we natéami, echi pagótami japi kilí buwéami ju ke sapú chotasi isiá bilé namuti alí ke cho we sapú isimí sunimia. Echi ko nalí we aʼlá nata japi isímaré alí miná ko kilí niraa isimí echi namuti jiti aʼlá machínima.

6. ¿Piri isimí bilé japi kilí buwéami ju japalí ikisaa namuti jilírami?

⁶ Naó, echi pagótami japi kilí buwéami ju iʼwérili isimí kilí niraa anachia echi jilírami namuti. Jiti la, jiti anachabo ati kilí buwéami nísaré. Ke chati ju japi ta anepo bilé aʼlá amigo japi ta chu nili anachia bilé jilírami namuti. Nalí echi pagótami japi kilí buwéami ju, iʼwérili isima aʼlá nátami niya alí ke riwema kanila nóchilia Jeobá (Col. 1:11). Japi ta cristianos ju, ata néwariwélitinalaká japi ta kilí buwéami ju, ati nokisáré suwaba jepuná namuti. ¿Chúsiá? Ma inepo jaré namuti.

7. Japi riká aní Santiago 5:7, 8, ¿chúsiá we natéami ju kilí buwéami niya? (Ayénachó iné echi dibujos).

⁷ Jiti niyúbipo we natéami ju japi kilí buwéami nipo. Japi riká echi japi Jeobá nijéwami nili chabé piréami, tamujé ayénachó kilí buwésaré japi Onorúami isima japi anili (Heb. 6:11, 12, TNM). Echi Biblia aní japi tamujé ko ju japi riká echi icháami (leeri Santiago 5:7, 8). Echi icháami we nocha ichayá alí baʼwí roʼea, nalí echi ko ke aʼlá machí chu kabú rakema. Jiti la kilí buwé jiti machí japi a ʼwima echi talí japi ichali. Echi riká cho noká echi cristianos: echi ko we nocha Jeobá nóchilia tákoré ke machí chukiliko sebama echi rawé (Mat. 24:42). Echi riká ju, ati kilí buwé alí ti we bichiwi japi Jeobá a isima japi anili japalí aʼlá ju. Ke ti echi riká nokisáaká, a keʼré japi kilipi niraa riwepo Jeobá. Ayénachó a keʼré japi ta wabé natéami niraa inepo echi namuti japi ta olá jipi, jiti ta mayé japi echi tamó iʼwiri kaníliami niya. Nalí be, ati kilí buwéami nísaká, ati anachabo echalí jubá rawé chéami alí ti niyúbitami nipo (Miq. 7:7; Mat. 24:13).

8. ¿Chúriká tamó iʼwiri kilí buwéami niya? (Colosenses 3:12; Efesios 4:32).

⁸ Kilí buwéami niya tamó iʼwiri kanilia sinéami yúa. Ati kilí buwéami nísaká, ati we aʼlá kipupo japalí jarecho tamó raʼichi (Sant. 1:19). Ayénachó tamó iʼwiri kilí niya sinéami yúa. Alí japalí ti ke kanila iyénisa wiká namuti natia, ati ke sapú aniboa bilé namuti japi cha nílitima jarecho. Tamó iʼwiri jiti ke sapú iyopo alí ke cho ku cha riká nokiboa japalí jarecho cha riká nokisaa tamó iyotia. Tamujé ko nalí anachabo japi tamó olá jarecho alí ti ku wikáwipo (leeri Colosenses 3:12; Efesios 4:32).

9. ¿Chúriká tamó iʼwiri kilí buwéami niya jiti aʼlá nátika nokiboa? (Proverbios 21:5).

⁹ Kilí buwéami niya ayénachó tamó iʼwiri jiti aʼlá nátika nokiboa. ¿Chúsiá? Jiti ta ke sapú nokiboa bilé namuti ke bachá aʼlá natasa, nalí ti bachá aʼlá binepo jiti ta machiboa chu iyiri wabé aʼlá ju japi ta nokiboa (leeri Proverbios 21:5). Japi riká, ati nóchali aa iyénisaká, a keʼré japi ta sapú narénalipo bilé nóchali japi ne bachá tamó iyáliwa, tákoré echi nóchili isima japi ta ke me ikíripo simíaya napawíliwachi o nawisasia. Nalí, ati kilí buwéami nísaká, ati natáboré kumi nima echi nóchali, chu kilipi nochabo alí achi ikíripo napawika simaria tamujé téemala yúa o nóchilia Jeobá. Kilí buwéami niya tamó iʼwírima sinibí aʼlá nátika nokayá.

10. ¿Piri ta nokisáré jiti aminabi we kilí buwéami nipo?

¹⁰ Tánipo Jeobá japi tamó iʼwírima aminabi kilí buwéami niya. Echi Onorúami jiwérala tamó iʼwiri kilí buwéami niya (Gál. 5:22, 23). Jiti la ti ke riwésaré tania Onorúami echi jiwérala japalí ikisaa bilé namuti we jilírami japoná ti newalé we kilí buwéami niya (Luc. 11:9, 13). Ayénachó ati omeri tania Jeobá japi tamó iʼwírima inea echi namuti japi riká echi iné. Alí miná ko, ati iʼwérili nokisáré we kilí buwéami niya sinibí rawé. Ke ti riwésaká tania Jeobá japi tamó iʼwírima kilí buwéami niya alí ti iʼwérili nokisáaká, ata inepo japi kilipi niraa aminabi we kilí buwéami nipo.

11, 12. ¿Chúriká néwariwéliti Jeobá japi kilí buwéami ju?

 ¹¹ Natabo echi ejemplos japi uchuwi echoná Biblia. Echoná ti biné wiká pagótami jitra japi kilí buwéami nili. Ata natásaká echi jitra, ayénachó binéporé echi riká niya. Ma inepo jaré echi ejemplos, nalí bachá binepo Jeobá jitra japi wabé kilí buwéami ju sinéami yúa.

¹² Echoná weʼé baʼóachi Edén riwéami, Satanás cha riká raʼíchili Jeobá riwalá jitra aniká japi echi ke aʼlá nuláami ju alí ke galéami. Tákoré ikaleka raʼíchili, Jeobá ko ke sapú miʼali Satanás, echi ko nalí anáchili alí kilí niraa buweli jiti machiyé japi kilí buwésaré néwariwélitimia japi echi nalí wabé aʼlá nuláami ju. Alí japalí buwea atí, echi ko aminá anacha tákoré wiká cha riká raʼicha echi riwalá jitra. Ayénachó, jiti Jeobá kilí buwéami ju, millones pagótami a omero machiyá echi alí pe aminana a omérima sinibí pirea (2 Ped. 3:15). Ati natásaká suwaba echi namuti aʼláala japi ikí jiti Jeobá kilí buwéami ju, ati ke me jilí nirabo kilí niraa buwea japalí suwábitami nima echi namuti chati.

13. ¿Chúriká néwariwélitili Jesús japi kilí buwéami ju japi riká echi Onolá? (Ayénachó iné echi foto).

¹³ Jesús ayénachó kilí buwéami ju japi riká echi Onolá, alí echi riká néwariwélitili japalí iyénili jenaʼí Wichimóbachi. Alí a we jilí niráliré kilí buwéami niya, japi riká echi fariseos alí escribas yúa japi we cha nokáami nili (Juan 8:25-27). Nalí japi riká echi Onolá, Jesús ayénachó ke sapú iyóami nili alí ke ku nímili cha riká raʼíchika japalí echi sayérala echi riká nokali (1 Ped. 2:23). Echi ko nalí kilí niraa anáchili alí  ke namú aniká. Jiti la echoná Biblia tamó iyá jepuná busuréliami: “Ne galá ʼnatasi ʼyemi mapurigá echi Walubela Jesucristo [...] ne wabé simírami risúu olárami níili echi jaré chati sitíi oláami pagótami jiti” (Heb. 12:3). Jeobá iʼwírila jitra, tamujé ayénachó oméripo kilí niraa anachia chuwé namuti jilírami japi ikiméaré.

14. Abrahán kilí buwéami nili, ¿piri ta biné echi jitra? (Hebreos 6:15; ayénachó iné echi imagen).

¹⁴ A keʼré japi ta nílipo japi ma suwábitami nisa riweili echi chati namuti o japi ta ma ke riwiboa echi riká ikíachi. Jiti la, ¿piri tamó iʼwírima aminabi kilí buwea japalí suwábitami nima echi namuti chati? Ma binepo Abrahán jitra. Japalí Jeobá aneli “ani isima japi mi wiká muwésima”, Abrahán ko 75 bamíbami nili alí kecho ranéami nili (Gén. 12:1-4). Nalí, ¿achi ineli Abrahán ikíachi japi Jeobá anili? Ayena, nalí ke ne suwaba. Jiti echi ko buweli 25 bamíali japalí jonsa simárili echi bakochi Éufrates. Miná ko Jeobá isili japi Sara ranélima Isaac alí ma 60 bamíali simírisa ochérili Isaac kúchuwala japi nili Esaú alí Jacob (leeri Hebreos 6:15). Nalí Abrahán ko ke ineli japi echi téemala wiká muwésili alí ke cho ineli moʼíachi echoná weʼé japi Onorúami iyama riweili. Tákoré ke ineli suwaba echi riká ikíachi, Abrahán we kanílili Jeobá amígowala ka (Sant. 2:23). Alí japalí ku owínisa, echi ko we kanílima machiyá japi iʼwírili wiká pagótami omáana Wichimóbachi piréami, jiti echi we bichíyami nili alí kilí buweli (Gén. 22:18). ¿Piri ta biné? A keʼré japi jipi rawé ke  ti inepo ikíachi suwaba echi namuti aʼláala japi Jeobá anili. Nalí ati kilí buwéami nísaká japi riká Abrahán, ati we bichíwipo japi Jeobá tamó iyama wiká namuti aʼláala jipi alí pe aminana (Mar. 10:29, 30).

15. ¿Piri jitra ti binésaré japalí ti bineli niraa biné?

¹⁵ Echi Biblia raʼicha wiká pagótami jitra japi kilí buwéami nili (Sant. 5:10). Jiti la, ¿chúsiá mi ke biné echi pagótami jitra? b Japi riká, David ko we remalí nili japalí chapirúami nili jiti silíami nima echoná Israel, nalí echi ko buweli wiká bamíali jiti omérima nulayá. Simeón alí Ana ke riweli nóchilia Jeobá japalí buwéi echi Mesías (Luc. 2:25, 36-38). Japalí mi biné echi pagótami jitra, nárika isí: “¿Piri iʼwírili jepuná pagótami jiti kilí buwema? ¿Piri namuti aʼláala ikili jiti kilí buwéami nili? ¿Chúriká ni isima japi riká echi?”. Ayénachó mi omeri binea wiká namuti echi jitra japi ke kilí buwéami nili (1 Sam. 13:8-14). Alí mi omeri nárika isiá: “¿Chúsiá ke kilí buweli? ¿Piri namuti ke aʼlá ikili jiti ke kilí buweli?”.

16. Ruyé jaré namuti aʼláala japi ikí japalí ti kilí buwéami ju.

¹⁶ Natabo piri namuti aʼláala ikí ati kilí buwéami nísaká. Kilí buwéami niya tamó iʼwiri aminá we kaníliami niya alí kilí niraa nilia. Jiti la ti omeri aniyá japi echi tamó iʼwiri jiti ke nayupo alí kilí niraa natabo. Ayénachó tamó iʼwiri kaníliami niya jarecho yúa alí jiti echi congregación sinibí napawika nima. Ati ke sapú iyósaká japalí bilé isimí namuti japi ke tamó kaníliti, iʼwíriporé jiti ke aminá cha ikimea (Sal. 37:8, nota; Prov. 14:29). Alí, japalí ti kilí buwéami ju, wabé natéami ko ju japi ta noká japi riká tamujé Onolá Jeobá alí ti aminá muliwi echi.

17. ¿Piri ta nokinálisaré?

¹⁷ Japi riká ti ma ineli, kilí buwéami niya we aʼlá ju alí we tamó iʼwiri. Tákoré isini kaachi a we jilí ju kilí buwéami niya, Jeobá ko tamó iʼwírima jiti oméripo echi riká nokayá. Alí, japalí ti kilí niraa buwé japi jena wichimoba we baʼóami nima, ata we bichíwisaré japi “Jeobá busila ko inea atí echi japi majaa nili echi, japi kilí buwé japi ke siné riwé galea echi” (Sal. 33:18). Jiti la, sinéami ta iʼwérili nokisáré kilí buwéami niya.